1-2. Ko e hā ʻoku fakatupu tokanga ai kiate kitautolu ʻa e talanoa ʻo Samisoní?

 KO E HĀ ʻoku haʻu ki hoʻo fakakaukaú ʻi hoʻo fanongo ki he hingoa Samisoni? Ngalingali ʻokú ke fakakaukau ki ha tangata mo ha mālohi anga-kehe. Ko e moʻoni ia. Ka naʻe fai ʻe Samisoni ha fili fakavalevale naʻe taki atu ki ha ngaahi nunuʻa fakamamahi. Neongo ia, naʻe tokangataha ʻa Sihova ki he lēkooti fakalūkufua ʻo e faitōnunga ʻa Samisoní, ʻa ia naʻá Ne fakakau ʻi he Tohi Tapú ke tau maʻu ʻaonga mei ai.

² Naʻe ngāueʻaki ʻe Sihova ʻa Samisoni ke fakahoko ʻa e ngaahi meʻa fakaofo ke tokoni ki Heʻene kakai filí, ʻa ʻIsileli. ʻI he laui senituli hili ʻa e mate ʻa Samisoní, naʻe fakamānavaʻi ʻe Sihova ʻa e ʻapositolo ko Paulá ke fakakau ʻa e hingoa ʻo Samisoní ʻi ha lisi ʻo e kau tangata tuʻu-ki-muʻa ʻo e tuí. (Hep. 11:​32-34) ʻE lava ke fakalototoʻaʻi kitautolu ʻe he faʻifaʻitakiʻanga ʻa Samisoní. Naʻá ne falala kia Sihova, naʻa mo e lolotonga ʻa e ngaahi tuʻunga faingataʻá. Tau lāulea angé ki he founga ʻe lava ke tau maʻu ai ʻa e fakalototoʻa pea pehē ki he ngaahi lēsoni ʻaonga te tau ako mei heʻene faʻifaʻitakiʻangá.

3. Ko e hā ʻa e vāhenga-ngāue naʻe maʻu ʻe Samisoní?

³ ʻI he taimi naʻe fanauʻi ai ʻa Samisoní, naʻe puleʻi ʻe he kau Filisitiá ʻa e puleʻanga ʻo ʻIsilelí pea lōmekina kinautolu. (Fkm. 13:1) Ko ʻenau founga-pule anga-fakamamahí naʻe ʻomi ai ʻa e faingataʻa lahi ki he kau ʻIsilelí. Naʻe fili ʻe Sihova ʻa Samisoni ke ne “taki ʻi hono fakahaofi ʻa ʻIsileli mei he nima ʻo e kau Filisitiá.” (Fkm. 13:5) He fatongia faingataʻa ē ko ia! Ke fakahoko ʻa e vāhenga-ngāue faingataʻá ni, naʻe pau ke falala ʻa Samisoni kia Sihova.

4. Naʻe anga-fēfē hono tokoniʻi ʻe Sihova ʻa Samisoni ke hao mei he kau Filisitiá? (Fakamaau 15:​14-16)

 ⁴ Fakakaukau ki ha fakatātā ʻo e falala ʻa Samisoni kia Sihová pea mo e poupou naʻe tokonaki ʻe he ʻOtuá. ʻI he taimi ʻe taha, naʻe ʻalu atu ha kau tau Filisitia ke puke ʻa Samisoni ʻi Lehi, ngalingali ʻi Siuta. Naʻe ilifia ʻa e kau tangata ʻo Siutá, ko ia naʻa nau fili ke tuku atu ʻa Samisoni ki he filí. Ko e kakai tonu ʻo Samisoní naʻa nau haʻi ia ʻaki ha ongo maea foʻou pea ʻave ia ki he kau Filisitiá. (Fkm. 15:​9-13) Kae kehe, naʻe “fakaivia [ʻa Samisoni] ʻe he laumālie ʻo Sihová,” pea naʻe homo meiate ia ʻa e ongo maeá. Pea naʻá ne “ʻilo ha hui kaungao foʻou ʻo ha ʻasi tangata,” naʻá ne toʻo hake ia, pea ngāueʻaki ke taaʻi ʻaki ʻa e kau tangata Filisitia ʻe toko 1,000!—Lau ʻa e Fakamaau 15:​14-16.

5. ʻI hono ngāueʻaki ʻe Samisoni ʻa e hui kaungao ʻo ha ʻasí, ko e hā ʻoku fakahaaʻi mai ai fekauʻaki mo ʻene falala pau kia Sihová?

⁵ Ko e hā naʻe ngāueʻaki ai ʻe Samisoni ʻa e hui kaungao ʻo ha ʻasí? Ko ha meʻatau ia naʻe ʻikai anga-maheni hono ngāueʻakí! ʻOku ʻikai ha veiveiua naʻe ʻiloʻi ʻe Samisoni ko ʻene lavameʻá naʻe fakafalala ia kia Sihova, ʻo ʻikai ʻi he meʻatau naʻá ne ngāueʻakí. ʻIo, naʻe ngāueʻaki ʻe he tangata faitōnunga ko ení ʻa e meʻa naʻá ne ala maʻú ke fakahoko ʻaki ʻa e finangalo ʻo Sihová. ʻOku hā mahino, koeʻuhi ko e falala ʻa Samisoni kia Sihová, naʻe tāpuakiʻi ia ʻaki ha lavameʻa lahi.

6. ʻI hono fakahoko hotau vāhenga-ngāue fakateokalatí, ko e hā ʻe lava ke tau ako meia Samisoní?

⁶ ʻOku lava foki ke fakaivimālohiʻi mo kitautolu ʻe Sihova ke fakahoko hotau ngaahi vāhenga-ngāué, naʻa mo e vāhenga-ngāue ʻoku hā ngali taulōfuʻú. ʻE lava ke fai ia ʻe he ʻOtuá ʻi ha founga ʻe fakaʻohovale nai kiate kitautolu. Falala ko Sihova, ʻa ia naʻá ne fakaivia ʻa Samisoní, te ne tokoniʻi koe ke fai hono finangaló ʻo kapau te ke falala ai pē kiate Ia ki ha tokoni.—Pal. 16:3.

7. Ko e hā ʻa e fakatātā ʻokú ne fakahaaʻi ʻa e mahuʻinga ʻetau kumi ki he tataki ʻa Sihová?

⁷ Ko e fanga tokoua mo e fanga tuofāfine tokolahi ʻoku nau kau ki he ngaahi poloseki langa fakateokalatí kuo nau fakahāhā ʻa e falala kia Sihova. ʻI he kuohilí, ko e fanga tokouá naʻa nau faʻa tisaini mo langa ʻa e lahi taha ʻo e ngaahi Fale Fakatahaʻanga foʻoú mo e ngaahi  langa kehé. Ka koeʻuhí ko e tupulaki ʻa e kautaha ʻa Sihová naʻe fiemaʻu ai ke fai ha liliu. Ko e fanga tokoua fua fatongiá naʻa nau kumi ki he tataki ʻa Sihová pea ʻahiʻahiʻi ʻa e ngaahi founga foʻou, hangē ko hono fakatau mai ʻa e ngaahi fale pea fakaleleiʻi. “ʻI he kamatá, naʻe ʻikai ke faingofua ki he niʻihi ke nau tali ʻa e founga foʻou ko ení,” ko e lea ia ʻa Robert, ʻa ia ʻi he ngaahi taʻu ki mui ní kuó ne ngāue ʻi heʻetau ngaahi poloseki langa lahi takatakai he māmaní. ʻOkú ne toe pehē: “Naʻe mātuʻaki kehe ia mei he meʻa naʻa tau fai ʻi he ngaahi taʻu kuohilí. Ka naʻe loto-lelei ʻa e fanga tokouá ke fai ha feʻunuʻaki, pea kuo hoko ʻo hā mahino hono tāpuakiʻi ʻe Sihova ʻa e ngaahi liliu ko ení.” Ko e fakatātā pē eni ʻe taha ʻo e founga hono tataki ʻe Sihova ʻene kakaí ke fakahoko hono finangaló. Mei he taimi ki he taimi, ʻoku lelei kiate kitautolu kotoa ke ʻeke hifo, ‘ʻOku ou kumi ki he tataki ʻa Sihová pea hanganaki feʻunuaki ʻi heʻeku ngāue kiate iá?’

8. ʻI he taimi naʻe hoko ai ʻa Samisoni ʻo fieinua ʻaupitó, ko e hā naʻá ne faí?

⁸ Kuó ke lau nai fekauʻaki mo e ngaahi tuʻunga kehe naʻe fakahoko ai ʻe Samisoni ʻa e ngaahi ngāue fakaofo. Naʻá ne faitau toko taha mo ha laione pea ki mui ai naʻá ne taaʻi ʻa e kau tangata ʻe toko 30 ʻi he kolo Filisitia ko ʻAsikeloní. (Fkm. 14:​5, 6, 19) Naʻe ʻiloʻi ʻe Samisoni heʻikai ʻaupito malava ke ne fakahoko ha meʻa pehē ʻo taʻekau ai ʻa e tokoni ʻa Sihová. Naʻe hā mahino ia ʻi ha taimi naʻá ne hoko ai ʻo fieinua ʻaupito hili ʻene taaʻi ha kau Filisitia ʻe toko 1,000. Ko e hā naʻá ne faí? ʻI he ʻikai fakafalala pē kiate ia ke kumi hano inú, naʻá ne tautapa kia Sihova ki ha tokoni.—Fkm. 15:18.

9. Naʻe anga-fēfē tali ʻa Sihova ki he tautapa ʻa Samisoni ki ha tokoní? (Fakamaau 15:19 mo e fakamatala ʻi lalo)

⁹ Naʻe tali ʻe Sihova ʻa e tangi ʻa Samisoni ki ha tokoní ʻaki hono faʻu fakaemana ha matavai. ʻI he inu ʻa Samisoni mei aí, “naʻe toe foki mai hono mālohí peá ne toe ake.” (Lau ʻa e Fakamaau 15:19 mo e fakamatala ʻi laló.) ʻOku ngalingali, ko e matavai foʻou ko ení naʻe kei tuʻu pē ʻi ha ngaahi taʻu ki mui ʻi he taimi naʻe fakamānavaʻi ai ʻa e palōfita ko Sāmiuelá ke ne hiki ʻa e tohi ʻa Fakamāú. Ko e kau ʻIsileli naʻa nau sio ki he matavai ko iá naʻe fakamanatu nai ai kiate kinautolu ko Sihova ʻe lava ke nau falala ki ai ke ne tokoniʻi ʻene kau lotu faitōnungá ʻi heʻenau fiemaʻu tokoní.

10. Ko e hā ʻoku kau ki heʻetau kumi ki he tokoni ʻa Sihová? (Sio foki ki he fakatātaá.)

¹⁰ Ko kitautolu foki ʻoku fiemaʻu ke tau kumi ki he tokoni ʻa Sihová ʻo tatau ai pē pe ko e hā ʻa e ngaahi talēniti pe malava ʻoku tau maʻu nai pe ko e meʻa kuo tau lavaʻi ʻi heʻene ngāué. ʻOku totonu ke tau tali anga-fakanānā ʻa e foʻi moʻoni ko e lavameʻa moʻoní ʻoku malava pē ia ʻi he taimi ʻoku tau falala ai kia Sihová. Hangē pē ko hono fakaivia ʻo Samisoni ʻi heʻene inu ʻa e vai naʻe tokonaki ʻe Sihová, ʻe fakaivimālohiʻi fakalaumālie kitautolu ʻi heʻetau ngāueʻaongaʻaki ʻa e ngaahi tokonaki kotoa ʻoku ʻai ʻe Sihova ke tau ala maʻú.—Māt. 11:28.

11. ʻE lava fēfē ke tau ngāuekakatoʻaki ʻa e tokoni ʻa Sihová? Fakatātaaʻi.

¹¹ Fakakaukau ki he faʻifaʻitakiʻanga ʻa Aleksey, ko e taha hotau fanga tokoua Lūsia ʻokú ne kātekina ʻa e fakatanga kakahá. Ko e hā kuó ne tokoniʻi ia ke nofoʻaki mālohi ʻi he malumalu ʻo e ngaahi tuʻunga mātuʻaki faingataʻá? Ko ia mo hono uaifí kuó na fokotuʻu ha taimi-tēpile fakalaumālie lelei. ʻOkú ne pehē: “ʻOku ou feinga ke tauhi maʻu ʻeku taimi-tēpile fakalaumālie ʻo e ako fakafoʻituituí mo e lau Tohi Tapu fakaʻahó. ʻI he pongipongi kotoa, ʻoku ou lāulea mo hoku uaifí ki he konga tohi fakaʻahó peá ma lotu fakataha kia Sihova.” Ko e hā ʻoku akoʻi mai heni kiate kitautolú? ʻI he ʻikai falala pē kiate kitautolú, ʻoku totonu ke tau falala kia Sihova. Anga-fēfē?  ʻAki hono langa hake ʻetau tuí fakafou ʻi hono maʻu ha taimi-tēpile ako Tohi Tapu fakafoʻituitui lelei pea kau ki he ngaahi ngāue fakateokalati kehé. ʻE tāpuakiʻi lahi leva ʻe Sihova ʻetau ngaahi feinga ke tauhi kiate iá. Naʻá ne fakaivimālohiʻi ʻa Samisoni, pea ʻe lava moʻoni ke Ne fakaivimālohiʻi kitautolu.

12. Ko e hā ʻa e fili fakavalevale naʻe fai ʻe Samisoní, pea naʻe anga-fēfē kehe ʻa e meʻá ni mei heʻene ngaahi hokosia ki muʻa angé?

¹² Naʻe taʻehaohaoa ʻa Samisoni ʻo hangē pē ko kitautolú, ko ia ʻi he taimi ʻe niʻihi naʻá ne fai ʻa e ngaahi fili fakavalevale. Ko e taha ʻo e fili naʻá ne faí naʻá ne taki atu ia ki he ngaahi nunuʻa fakamamahi. Hili ʻa e ngāue ʻa Samisoni ko ha fakamaau ʻi ha vahaʻa taimi, naʻá ne “hoko ʻo ʻofa ʻi ha fefine ʻi he Teleʻa ko Sōlekí ʻa ia ko hono hingoá ko Tilila.” (Fkm. 16:4) Ki muʻá, naʻe ʻosi fakamaʻu ʻa Samisoni mo ha fefine Filisitia, ka ko e haʻi ko iá naʻe “meia Sihova” ia, ʻa ia naʻá ne “kumi ki ha faingamālie ke tauʻi ai ʻa e kau Filisitiá.” Ki mui ai, naʻe nofo ʻa Samisoni ʻi he fale ʻo ha fefine feʻauaki ʻi he kolo Filisitia ko Kesá. ʻI he tuʻunga ko iá, naʻe fakaivia ʻe he ʻOtuá ʻa Samisoni ke ne fua ʻo ʻave ʻa e ongo laumatapā ʻo e koló, ʻo fakavaivaiʻi ai ʻa e koló. (Fkm. 14:​1-4; 16:​1-3) Ka ko e tuʻunga ʻo Tililá naʻe kehe nai ia, koeʻuhí ʻoku ngalingali ko ha ʻIsileli ia.

13. Naʻe anga-fēfē hono taki atu ʻe Tilila ʻa Samisoni ke iku ki ha tuʻunga fakavalevalé?

¹³ Naʻe tali ʻe Tilila ha fuʻu paʻanga lahi mei he kau Filisitiá ko e totongi ki hono lavakiʻi ʻo Samisoní. Naʻe falala tōtuʻa ʻa Samisoni—ʻo fakakuihi ia ʻe heʻene ʻofá—ʻo ʻikai ke ne ʻiloʻi ai ʻa e meʻa ʻa Tilila naʻe faí? Pe ko e hā pē ʻa e tuʻungá, naʻe toutou tenge ʻe Tilila ʻa Samisoni ke fakahaaʻi ange ʻa e matavai ʻo hono mālohí, pea faai atu pē ʻo ne tala ange kiate ia. Ko e meʻa fakamamahí, naʻe fakaʻatā ʻe Samisoni ʻa ia tonu ke ne ʻi ha tuʻunga naʻe iku atu ai ki he mole ʻa hono mālohí pea mole mo e hōifua ʻa Sihová ʻi ha vahaʻa taimi.—Fkm. 16:​16-20.

14. Ko e hā ʻa e ngaahi nunuʻa naʻe hokosia ʻe Samisoni koeʻuhi ko ʻene falala kia Tililá?

 ¹⁴ Naʻe hokosia ʻe Samisoni ha ngaahi nunuʻa fakamamahi koeʻuhí ko ʻene falala kia Tilila kae ʻikai kia Sihová. Naʻe puke ʻe he kau Filisitiá ʻa Samisoni pea ʻai ia ke ne kui. Naʻe tuku pilīsone ia ʻi Kesa, ʻa ia ko hono kakaí naʻá ne fakamaaʻi ki muʻa ange, pea naʻá ne hoko ko ha tokotaha momosi uite māʻulalo. Naʻe fakamaaʻi leva ia ʻi he fakatahataha ʻa e kau Filisitiá ki ha kātoanga. Naʻa nau fai ha fuʻu feilaulau ki honau ʻotua loi ko Tākoní, ʻo hangē ia naʻá ne tuku ange ʻa Samisoni ki honau nimá. Naʻa nau ʻomi ʻa Samisoni mei he pilīsoné ki he kātoangá ke ne fai ha meʻa ke nau “oliʻia ai”—ke nau fakakataʻaki ia.—Fkm. 16:​21-25.

15. Naʻe anga-fēfē hono fakahāhā ʻe Samisoni naʻá ne toe falala kia Sihová? (Fakamaau 16:​28-30) (Sio ki he tā ʻi he takafí.)

¹⁵ Naʻe fai ʻe Samisoni ha fehālaaki mafatukituki, ka naʻe ʻikai ke ne foʻi. Naʻá ne kumi ki ha faingamālie ke fakahoko hono vāhenga-ngāue naʻe tuku ange ʻe he ʻOtuá ke ne fai ki he kau Filisitiá. (Lau ʻa e Fakamaau 16:​28-30.) Naʻe kōlenga ʻa Samisoni kia Sihova: “Tuku ke u fai ha sāuni ki he kau Filisitiá.” Naʻe tali ʻe he ʻOtua moʻoní ʻa e kōlenga ʻa Samisoní pea toe fakafoki kiate ia hono mālohi fakaemaná. Ko hono olá, naʻe tokolahi ange ʻa e kau Filisitia naʻe tāmateʻi heni ʻe Samisoní ʻi ha toe taimi ki muʻa.

16. Ko e hā ʻe lava ke tau ako mei he fehālaaki ʻa Samisoní?

¹⁶ Neongo naʻe hokosia ʻe Samisoni ʻa e ngaahi nunuʻa fakamamahi ʻo ʻene fehālaakí, naʻe ʻikai ke tuku ai ʻene feinga ke fai ʻa e finangalo ʻo Sihová. Neongo kapau te tau fai ha fehālaaki pea fiemaʻu ha fakatonutonu pe mole ai ha monū, kuo pau ke ʻoua te tau foʻi. Manatuʻi, ʻoku ʻikai ke foʻi ʻa Sihova ʻiate kitautolu. (Saame 103:​8-10) Neongo ʻetau ngaahi fehālaakí, ʻe lava pē ke tau kei ʻaonga kia Sihova, ʻo hangē pē ko Samisoní.

17-18. Ko e hā ʻoku fakalototoʻa kiate koe mei he hokosia ʻa Michael? (Sio foki ki he fakatātaá.)

¹⁷ Fakakaukau ki he faʻifaʻitakiʻanga ʻa ha tokoua kei siʻi ko Michael. Naʻá ne femoʻuekina ʻi he ngaahi ngāue fakateokalatí, ngāue ko ha sevāniti fakafaifekau pea tāimuʻa tuʻumaʻu. Ka ko e meʻa fakamamahí, naʻá ne fai ha fehālaaki, ʻa ia naʻe iku atu ai ki he mole ʻa hono ngaahi monū ʻi he fakatahaʻangá. “ʻI he aʻu mai ki he tuʻunga ko ení,” ko ʻene leá ia, “naʻe lele ʻi matangi ʻeku ngāue kia Sihová. Pea fakafokifā pē, ne u ongoʻi ʻo hangē ia ʻoku ou tau ʻi ha fuʻu holisi pilikí. Naʻe ʻikai ʻaupito te u fakakaukau ʻe liʻaki au ʻe Sihova, ka naʻá ku fifili pe ʻe faifai ange ʻo toe lelei hoku vahaʻangatae mo iá pe ʻe  toe malava ke u ngāue kakato kiate ia ʻi he fakatahaʻangá ʻo hangē ki muʻá.”

¹⁸ ʻOku tuha ʻa Michael ke fakaongoongoleleiʻi he naʻe ʻikai ke ne foʻi. ʻOkú ne toe pehē: “Naʻá ku tokangataha ki hono fakaleleiʻi hoku vahaʻangatae mo Sihová ʻaki hono fakaava maʻu pē hoku lotó kiate ia ʻi he lotu, ako mo e fakalaulauloto.” ʻI he faai atu ʻa e taimí, naʻe toe maʻu ʻe Michael ha tuʻunga lelei ʻi he fakatahaʻangá. ʻOkú ne ngāue he taimí ni ko ha mātuʻa pea hoko ko ha tāimuʻa tuʻumaʻu. ʻOkú ne fakamatala: “Ko e poupou mo e fakalototoʻa naʻá ku maʻú, tautefito mei he kau mātuʻá, naʻá ne tokoniʻi au ke ʻiloʻi ʻoku kei ʻofa pē ʻa Sihova ʻiate au. ʻOku lava ke u toe ngāue ʻi he fakatahaʻangá mo ha konisēnisi maʻa. Ko e hokosia ko ení kuó ne akoʻi mai ko Sihova te ne fakamolemoleʻi ha taha pē ʻoku fakatomala moʻoni.” ʻOku lava ke tau falala pau ʻe ngāueʻaki kitautolu ʻe Sihova pea tāpuakiʻi foki kitautolu neongo kapau kuo tau fai ha ngaahi fehālaaki, kehe pē ke tau fai ʻa e kotoa te tau malavá ke fakatonutonu hotau ʻalungá pea hokohoko atu ke falala kiate ia.—Saame 86:5; Pal. 28:13.

19. Kuo anga-fēfē hono fakaivimālohiʻi koe ʻe he faʻifaʻitakiʻanga ʻa Samisoní?

¹⁹ ʻI he kupu ko ení, kuo tau sivisiviʻi ha ngaahi meʻa fakatoʻoaloto siʻi pē ʻi he moʻui ʻa Samisoní. Naʻe ʻikai ke ne haohaoa; neongo ia, naʻe ʻikai ke ne foʻi ʻi heʻene feinga ke tauhi kia Sihová, naʻa mo e hili ʻene fehālaaki mo Tililá. Pea naʻe ʻikai ke foʻi ʻa Sihova ʻiate ia. Naʻe toe ngāueʻaki ʻe he ʻOtuá ʻa Samisoni ʻi ha founga mālohi. Naʻe kei lau pē ia ʻe Sihova ko ha tangata naʻe tuʻu-ki-muʻa ʻene tuí, ʻo fakakau ia ʻi he lisi ʻo e faʻahinga faitōnunga ʻi he Hepelū vahe 11. He fakalototoʻa ē ke ʻiloʻi ʻoku tau tauhi ki ha Tamai fakahēvani anga-ʻofa pehē ʻokú ne holi ke fakaivimālohiʻi kitautolu, tautefito ʻi he taimi ʻoku tau vaivai aí! Ko ia hangē ko Samisoní, tau kōlenga kia Sihova: “Manatuʻi muʻa au, peá ke fakaivimālohiʻi muʻa au.”—Fkm. 16:28.