1. Ki muʻa siʻi pē ke mate ʻa e ʻapositolo ko Pitá, ko e hā naʻe fakamānavaʻi ia ke ne faí?

 NAʻE ʻiloʻi ʻe he ʻapositolo ko Pitá ko ʻene moʻuí naʻe vave ke ngata. Lolotonga ʻene ngāue faitōnunga ʻi he laui hongofuluʻi taʻú, naʻá ne ʻaʻeva mo Sīsū, fakaava ʻa e ngaahi feituʻu ngāue foʻou ki he malangá, pea ngāue ko ha mēmipa ʻo e kulupu pulé. Ka naʻe ʻikai ko e ngata ia ʻa e ngāue ʻa Pitá. ʻI he 62-64 T.S. nai, naʻe fakamānavaʻi ia ke ne hiki ʻa e tohi ʻe ua—ko e tohi ʻa 1 mo 2 Pitá. Naʻá ne fakahaaʻi ʻene ʻamanaki ko e ongo tohi ko ení te ne tokoniʻi ʻa e kau Kalisitiané hili ʻene maté.—2 Pita 1:​12-15.

2. Ko e hā naʻe mātuʻaki taimi totonu ai ʻa e ongo tohi naʻe hiki ʻe Pitá?

² Naʻe hiki ʻe Pita ʻene ongo tohi fakamānavaʻí ʻi ha taimi ko hono kaungātuí naʻa nau “mamahi . . . ʻi he ngaahi ʻahiʻahi kehekehe.” (1 Pita 1:6) Naʻe feinga ʻa e kau tangata fulikivanú ke fakahūhū ʻa e ngaahi akonaki loi mo e tōʻonga taʻemaʻa ki he loto fakatahaʻangá. (2 Pita 2:​1, 2, 14) Ko e kau Kalisitiane ʻi Selusalemá naʻe vave ke nau fehangahangai mo e “ngataʻanga ʻo e ngaahi meʻa kotoa pē”—ʻa hono fakaʻauha ʻe he kau tau Lomá ʻa e kolo ko iá pea mo e ngaahi fokotuʻutuʻu faka-Siú. (1 Pita 4:7) ʻOku ʻikai ha veiveiua naʻe tokoniʻi ʻe he ongo tohi ʻa Pitá ʻa e kau Kalisitiané ke sio ki he meʻa ʻe lava ke nau fai ke kātekina ai ʻa e ngaahi ʻahiʻahi lolotongá pea mateuteu ki he ʻahiʻahi ʻi he kahaʻú. b

3. Ko e hā ʻoku totonu ai ke tau sivisiviʻi ʻa e ongo tohi fakamānavaʻi ʻa Pitá?

³ Neongo naʻe fakataumuʻa ʻe Pita ʻene ongo tohí ki he kau Kalisitiane ʻi he ʻuluaki senitulí, naʻe ʻai ʻe Sihova ʻa e ongo tohi ko ení ko e konga ʻo ʻEne Folofolá. Ko ia ʻe lava ke tau maʻu ʻaonga he taimí ni mei he ongo tohi ko iá. (Loma 15:4) Ko e moʻui ʻi ha  māmani ʻokú ne pouaki ʻa e tōʻonga taʻemaʻá, ʻoku tau toe fehangahangai ai mo e ngaahi ʻahiʻahi ʻe lava ke ne ʻai ke faingataʻa ʻetau tauhi kia Sihová. ʻIkai ngata aí, ʻoku vavé ni ke tau hokosia ha mamahi ʻe toe lahi ange ia ʻi he mamahi naʻá ne fakangata ʻa e fokotuʻutuʻu faka-Siú. ʻOku tau maʻu ha ngaahi fakamanatu mātuʻaki mahuʻinga ʻi he ongo tohi ʻa Pitá. ʻE tokoniʻi kitautolu ʻe he meʻá ni ke tau hanganaki ʻamanaki ki he ʻaho ʻo Sihová, ikuʻi ʻa e manavahē tangatá, pea fakatupulekina ʻa e ʻofa lahi ki he tokotaha taki taha. ʻE toe tokoniʻi ʻe he ngaahi fakamanatu peheé ʻa e kau mātuʻá ke vakai ki he founga ke tokangaʻi lavameʻa ai ʻa e ngaahi fiemaʻu ʻa e tākangá.

4. Hangē ko ia ʻoku fakahaaʻi ʻi he 2 Pita 3:​3, 4, ko e hā ʻe lava ke ne ueʻia ʻetau tuí?

⁴ ʻOku takatakaiʻi kitautolu ʻe he kakai ʻoku ʻikai ke nau tui ki he kikite Fakatohitapú. ʻE manukiʻi nai kitautolu ʻe he kau fakafepakí koeʻuhí ko ʻetau fakatuʻotuʻa vēkeveke ki he ngataʻangá ʻi he laui taʻu lahi. ʻOku taukaveʻi ʻe he kau fakaanga ʻe niʻihi heʻikai ʻaupito hoko mai ia. (Lau ʻa e 2 Pita 3:​3, 4.) Kapau ʻoku tau fanongo ki ha ngaahi lea pehē mei ha tokotaha-ʻapi, kaungāngāue pe ko ha mēmipa ʻi he fāmilí, ko ʻetau tuí ʻe lava ke ueʻia. Naʻe fakamatalaʻi ʻe Pita ʻa e meʻa ʻe lava ke ne tokoniʻi kitautolú.

5. Ko e hā te ne tokoniʻi kitautolu ke tauhi maʻu ʻa e vakai totonu fekauʻaki mo e ngataʻanga ʻo e fokotuʻutuʻu ko ení? (2 Pita 3:​8, 9)

⁵ ʻOku ngali hā nai ki he niʻihi ʻoku faituai ʻa Sihova ke fakangata ʻa e fokotuʻutuʻu fulikivanu lolotongá. ʻE lava ke tokoniʻi kitautolu ʻe he ngaahi lea ʻa Pitá ke tauhi maʻu ʻa e vakai totonu, ʻo fakamanatu mai kiate kitautolu ko e vakai ʻa Sihova ki he taimí ʻoku kehe ʻaupito ia mei he vakai ʻa e tangatá. (Lau ʻa e 2 Pita 3:​8, 9.) Ko e taʻu ʻe taha afé kia Sihova ʻoku tatau ia mo e ʻaho ʻe taha. ʻOku anga-kātaki ʻa Sihova, ʻo ʻikai ke ne finangalo ke fakaʻauha ha taha. Ka ʻi he taimi ʻe aʻu mai ai ʻa hono ʻahó, ko e fokotuʻutuʻu ko ení ʻe ngata. Ko ha monū ia ʻoku tau maʻu ke ngāueʻaki ʻa e taimi ʻoku toé ke fai ha fakamoʻoni ki he kakai ʻo e ngaahi puleʻanga kotoa pē.

6. ʻOku anga-fēfē ʻetau “hanganaki tauhi maʻu ʻi he ʻatamaí” ʻa e ʻaho ʻo Sihová? (2 Pita 3:​11, 12)

⁶ ʻOku ekinaki mai ʻa Pita ke tau “hanganaki tauhi maʻu ʻi he ʻatamaí” ʻa e ʻaho ʻo Sihová. (Lau ʻa e 2 Pita 3:​11, 12.) Anga-fēfē? ʻOku lelei ke tau fakalaulauloto—ʻi he ʻaho kotoa, ʻo ka malava—ki he ngaahi tāpuaki ʻi he māmani foʻoú. Sioloto atu kiate koe ʻokú ke mānava ʻi ha ʻea maʻa moʻoni, kai ʻa e meʻakai fakatupu moʻui lelei, talitali lelei ʻa e ngaahi ʻofaʻangá ʻi heʻenau toetuʻu maí, pea akoʻi ʻa e kakai naʻa nau moʻui ʻi he ngaahi senituli kuo maliu atú fekauʻaki mo hono fakahoko ʻo e ngaahi kikite Fakatohitapú. Ko e fakalaulauloto peheé te ne tokoniʻi koe ke hanganaki ʻamanaki pea maluʻi koe mei he hoko ʻo fakataʻetaʻetokanga ki he taimi ʻoku tau moʻui aí. ʻI hono “maʻu ʻa e ʻilo tokamuʻa ko ʻení” ʻo fekauʻaki mo hotau kahaʻú, heʻikai ke “takiheeʻi” ai kitautolu ʻe he kau faiako loí.—2 Pita 3:17.

7. ʻE lava fēfē ke uesia kitautolu ʻe he manavahē tangatá?

⁷ ʻI heʻetau hanganaki tauhi maʻu ʻi he ʻatamaí ʻa e ʻaho ʻo Sihová, ʻoku ueʻi ai kitautolu ke vahevahe atu ʻa e ongoongo leleí ki he niʻihi kehé. Neongo ia, ʻi he ngaahi tuʻunga ʻe niʻihi te tau toumoua nai ke lea. Ko e hā hono ʻuhingá? Te tau tō fakataimi nai ʻi he manavahē tangatá. Naʻe hoko ia kia Pita. ʻI he pō naʻe fakamāuʻi ai ʻa Sīsuú, naʻe ilifia ʻa Pita ke fakahaaʻi ia ko e taha ʻo e kau ākonga ʻa Sīsuú pea naʻá ne toutou fakaʻikaiʻi ʻokú ne ʻiloʻi ia. (Māt. 26:​69-75) Kae kehe, ko e ʻapositolo tatau pē ko ení, ʻokú ne lea ki mui ai mo e tuipau: “ʻOua ʻe manavahē ʻi he meʻa ʻoku nau manavahē aí, pea ʻoua ʻe hohaʻa.” (1 Pita 3:14) ʻOku fakapapauʻi mai ʻe he ngaahi lea ʻa Pitá ʻe lava ke tau ikuʻi ʻa e manavahē tangatá.

8. Ko e hā ʻe lava ke ne tokoniʻi kitautolu ke ikuʻi ʻa e manavahē tangatá? (1 Pita 3:15)

 ⁸ Ko e hā ʻe lava ke ne tokoniʻi kitautolu ke ikuʻi ʻa e manavahē tangatá? ʻOku tala mai ʻe Pita: “ʻAi ke tāpuhā ʻa e Kalaisí ʻi homou lotó ko e ʻEikí ia.” (Lau ʻa e 1 Pita 3:15.) ʻOku kau ki heni ʻa e fakalaulauloto ki he tuʻunga mo e mafai ʻo hotau ʻEiki mo e Tuʻi, ko Kalaisi Sīsuú. Kapau ʻokú ke ongoʻi tailiili pe manavahē ʻi he malanga hake ha faingamālie ke vahevahe ʻa e ongoongo leleí ki he niʻihi kehé, manatuʻi hotau Tuʻí. Sioloto atu kiate ia ʻokú ne pule ʻi hēvani pea takatakaiʻi ia ʻe he kau ʻāngelo taʻefaʻalaua. Manatuʻi kuó ne maʻu ʻa e “mafai kotoa pē ʻi hēvani mo māmani” pea te ne “ʻiate kimoutolu ʻi he ʻaho kotoa pē ʻo aʻu ki he fakaʻosiʻosi ʻo e fokotuʻutuʻu lolotongá.” (Māt. 28:​18-20) ʻOku ekinaki mai ʻa Pita ke tau “mateuteu maʻu pē” ke taukapoʻi ʻetau tuí. Te ke saiʻia ke fai ha fakamoʻoni ʻikai anga-maheni ʻi he ngāueʻangá, ʻapiakó pe ʻi ha ngaahi feituʻu kehe? Fakakaukau tokamuʻa fekauʻaki mo e taimi ʻe malava nai ke ke fai pehē aí, pea teuteu leva ʻa e meʻa te ke leaʻakí. Lotu ki ha loto-toʻa, ʻo falala ʻe tokoniʻi koe ʻe Sihova ke ikuʻi ʻa e manavahē tangatá.—Ngā. 4:29.

9. ʻI ha tuʻunga ʻe taha, naʻe anga-fēfē ʻa e ʻikai lava ʻe Pita ke fakahāhā ʻa e ʻofá? (Sio foki ki he fakatātaá.)

⁹ Naʻe ako ʻe Pita ʻa e founga ke lavameʻa ai ʻi hono fakahāhā ʻa e ʻofá. Naʻá ne ʻi ai ʻi he taimi naʻe pehē ai ʻe Sīsū: “ʻOku ou ʻoatu ha fekau  foʻou kiate kimoutolu, ke mou feʻofaʻaki; hangē tofu pē ko ʻeku ʻofaʻi kimoutolú, ke mou feʻofaʻaki foki.” (Sione 13:34) Neongo ia, naʻe tō ki mui ai ʻa Pita ʻi he tengé pea fakafisi ke kai fakataha mo hono fanga tokoua mo e fanga tuofāfine Senitailé. Naʻe ui ʻe he ʻapositolo ko Paulá ʻa e meʻa naʻe fai ʻe Pitá ko e “fakangalingali,” pe ko ha tōʻonga mālualoi. (Kal. 2:​11-14) Naʻe tali ʻe Pita ʻa e fakatonutonu ko iá pea ako mei ai. ʻI heʻene ongo tohí fakatouʻosi, ʻokú ne fakamamafaʻi ai ʻoku totonu ke ʻoua te tau ongoʻi pē ʻa e ʻofa ki hotau fanga tokouá mo e fanga tuofāfiné kae fakahāhā foki ʻa e ʻofa ko iá.

10. Ko e ‘ʻofa fakatokoua taʻemālualoí’ ko e ola ia ʻo e hā? Fakamatalaʻi. (1 Pita 1:22)

¹⁰ ʻOku pehē ʻe Pita ʻoku totonu ke tau maʻu ʻa e “ʻofa fakatokoua taʻemālualoi” ki hotau kaungālotú. (Lau ʻa e 1 Pita 1:22.) Ko e ʻofa peheé ko e ola ia ʻo e “talangofua ki he moʻoní.” Ko e moʻoni ko ení ʻoku kau ki ai ʻa e akonaki “ʻoku ʻikai ke filifilimānako ʻa e ʻOtuá.” (Ngā. 10:​34, 35) ʻOku ʻikai lava ke tau talangofua ki he fekau ʻa Sīsū fekauʻaki mo e ʻofá kapau ʻoku tau fakahāhā ʻa e ʻofá ki he niʻihi ʻi he fakatahaʻangá kae ʻikai ki he niʻihi. Ko e moʻoni, te tau hoko ʻo ongoʻi ofi ange nai ki ha niʻihi ʻi ha niʻihi, hangē ko Sīsuú. (Sione 13:23; 20:2) Ka ʻoku fakamanatu mai ʻe Pita ʻoku totonu ke tau feinga ke maʻu ʻa e “ʻofa fakatokoua”—ʻo hangē ko e ʻofa māfana ʻi he fāmilí—ki he kotoa hotau fanga tokouá mo e fanga tuofāfiné.—1 Pita 2:17.

11. Ko e hā ʻoku kau ki hono maʻu “ʻa e ʻofa lahi” ki he niʻihi kehé “mei he lotó”?

¹¹ Naʻe ekinaki mai ʻe Pita ke tau maʻu “ʻa e ʻofa lahi ki he tokotaha taki taha mei he lotó.” ʻI he potutohi ko ení, ko e ʻofa “lahi” ko iá ʻoku kau ki ai ʻetau fano atu ʻi heʻetau hehema fakanatula ke ʻofá. Ko e fakatātaá, fēfē kapau ʻoku fakaʻitaʻi pe fakalotomamahiʻi kitautolu ʻe ha tokoua? Ko ʻetau hehema anga-mahení nai ke faisāuni kae ʻikai ke fakahāhā ʻa e ʻofá. Neongo ia, naʻe ako ʻa Pita meia Sīsū ko e faisāuní ʻoku ʻikai ke fakahōifua ki he ʻOtuá. (Sione 18:​10, 11) Naʻe tohi ʻe Pita: “ʻOua ʻe totongi ʻa e koví ʻaki ʻa e kovi pe lea koví ʻaki ʻa e lea kovi. ʻI hono kehé, ʻoatu ha tāpuaki.” (1 Pita 3:9) Fakaʻatā ʻa e ʻofa lahí ke ne ueʻi koe ke hoko ʻo anga-lelei mo fakaʻatuʻi ʻo aʻu ki he faʻahinga kuo nau fakalotomamahiʻi nai koé.

12. (a) Ko e hā ha toe meʻa ʻe ueʻi kitautolu ʻe he ʻofa lahí ke fai? (e) Ko e hā ʻokú ke loto ke ke feinga ke faí, hangē ko ia ʻoku fakatātaaʻi ʻi he vitiō Tauhi Maʻu ʻa e Meʻaʻofa Mahuʻinga ʻo e Fāʻūtahá?

¹² ʻI he ʻuluaki tohi ʻa Pitá, naʻá ne ngāueʻaki ʻa e kupuʻi lea ko e “ʻofa lahi.” Ko e ʻofa ko iá ʻokú ne ʻufiʻufi, ʻo ʻikai ko ha ngaahi angahala siʻi pē, ka ko ha “fuʻufuʻunga angahala.” (1 Pita 4:8) Mahalo naʻe manatuʻi ʻe Pita ʻa e lēsoni fekauʻaki mo e fakamolemolé naʻe akoʻi ange ʻe Sīsū ʻi he ngaahi taʻu ki muʻa ange aí. ʻI he taimi ko iá, ʻoku ngalingali naʻe tui ʻa Pita naʻá ne nima-homo ʻi heʻene pehē te ne fakamolemoleʻi hono tokouá ʻo “aʻu ʻo tuʻo fitu.” Ka naʻe akoʻi ia ʻe Sīsū—pea mo kitautolu—ke fakamolemole ʻo “aʻu ki he tuʻo 77,” ʻo ʻuhingá ko e ʻikai hano ngataʻanga. (Māt. 18:​21, 22) Kapau ʻoku faingataʻa kiate koe ke ngāueʻaki ʻa e faleʻi ko ení, ʻoua ʻe loto-siʻi! Ko e kotoa ʻo e kau sevāniti taʻehaohaoa ʻa Sihová kuo nau fāinga ʻi he taimi ʻe niʻihi ke fakamolemole. Ko e meʻa mahuʻinga ʻi he taimi ní ke ke fou ʻi ha sitepu pē ʻoku fiemaʻu ke fakamolemoleʻi ho tokouá pea fakamelino mo ia. c

13. Ko e hā ʻe hoko ai ko ha pole ki he kau mātuʻá ke tauhi ʻa honau fanga tokouá mo e fanga tuofāfiné?

¹³ Ko e moʻoni naʻe ʻikai ʻaupito ngalo ʻia Pita ʻa e meʻa naʻe tala ange ʻe Sīsū hili ʻene toetuʻú: “Tauhi ʻeku fanga kiʻi sipí.” (Sione 21:16) Kapau ko ha mātuʻa koe, ʻokú ke ʻiloʻi ko e fakahinohino ko iá ʻoku kaunga kiate koe foki.  Neongo ia, ʻe lava ke hoko ko ha pole ki ha mātuʻa ke maʻu ʻa e taimi ke fakahoko ai ʻa e vāhenga-ngāue mahuʻinga ko ení. Kuo pau ke ʻuluaki tokangaʻi ʻe he kau mātuʻá honau fāmilí tonu fakaesino, fakaeongo mo fakalaumālie. ʻOku nau toe takimuʻa ʻi he ngāue fakamalangá pehē foki ki hono teuteu mo fakahoko ʻa e ngaahi konga ʻi he fakatahá, ʻasemipilií mo e fakataha-lahí. Ko e niʻihi ʻoku nau toe maʻu ʻa e fatongia ko e kau ʻi he Kōmiti Fetuʻutaki Fakafalemahakí pe tali ha vāhenga-ngāue ʻi he Potungāue Tisaini/Langa Fakalotofonuá. Ko e kau mātuʻá ko e kau tangata femoʻuekina moʻoni!

14. Ko e hā ʻe lava ke ne ueʻi ʻa e kau mātuʻá ke tauhi ʻa e tākangá? (1 Pita 5:​1-4)

¹⁴ “Tauhi ʻa e tākanga ʻa e ʻOtuá,” ko e ekinaki ia ʻa Pita ki hono kaungāmātuʻá. (Lau ʻa e 1 Pita 5:​1-4.) Kapau ko ha mātuʻa koe, ʻoku mau ʻiloʻi ʻokú ke ʻofa ʻi ho fanga tokouá mo e fanga tuofāfiné pea loto ke tauhi kinautolu. Kae kehe, te ke ongoʻi nai ʻi he taimi ʻe niʻihi ʻokú ke fuʻu femoʻuekina pe fuʻu helaʻia ʻo ʻikai lava ke ke fakahoko ho vāhenga-ngāué. Ko e hā ʻe lava ke ke faí? Huaʻi atu hoʻo ngaahi hohaʻá kia Sihova. Naʻe tohi ʻe Pita: “Kapau ʻoku fai ʻe ha taha ha tokoni, tuku ke ne fai ia ʻo fakatuʻunga ʻi he mālohi ʻoku tokonaki mai ʻe he ʻOtuá.” (1 Pita 4:11) ʻOku fehangahangai nai ho fanga tokouá mo e fanga tuofāfiné mo e ngaahi palopalema heʻikai lava ke fakaleleiʻi kakato ʻi he fokotuʻutuʻu ko ení. Kae manatuʻi ko e “tauhi-sipi lahí,” ʻa Sīsū Kalaisi, ʻe lava ke ne tokoniʻi kinautolu ʻo fakalaka atu ia ʻi he meʻa ʻoku malava ke ke faí. ʻE lava ke ne fai ia he ʻahó ni pea ʻi he māmani foʻoú. Ko e meʻa pē ʻoku kole ʻe he ʻOtuá ki he kau mātuʻá ke nau ʻofa ʻi honau fanga tokouá, ke tauhi honau fanga tokouá, pea hoko ko e “ngaahi faʻifaʻitakiʻanga ki he tākangá.”

15. ʻOku anga-fēfē hono tauhi ʻe ha mātuʻa ʻe taha ʻa e tākangá? (Sio foki ki he fakatātaá.)

¹⁵ Ko William, ko ha mātuʻa fuoloa, ʻokú ne mahinoʻi ʻa e mahuʻinga ʻo e ngāue fakatauhisipí. ʻI he kamata ʻa e mahaki fakaʻauha COVID-19, ko ia mo hono kaungāmātuʻá naʻa nau ʻai ko ha meʻa muʻomuʻa ʻa e fetuʻutaki ki he tokotaha taki taha ʻi heʻenau kulupu malangá ʻi he uike taki taha. ʻOkú ne fakamatala ki he ʻuhingá: “Ko e tokolahi ʻo e fanga tokouá naʻa nau nofo pē ʻi ʻapi mo ʻenau ngaahi fakakaukaú, pea ʻe lava ke maliu vave ʻenau ngaahi fakakaukaú ki he meʻa ʻikai lelei.” ʻI he fāinga ha kaungātui, ʻoku fanongo tokanga ʻa William ke fakapapauʻi ʻene ngaahi fiemaʻú mo e hohaʻá. ʻOkú ne kumi leva ha fakamatala pau, hangē ko e ngaahi vitiō  mei heʻetau uepisaití, ke tokoni ki he kaungātuí. ʻOkú ne pehē: “ʻOku ʻikai ha taimi ʻe fiemaʻu lahi ange ai ʻa e ngāue fakatauhisipí ka ko e taimí ni. ʻOku tau feinga lahi ke tokoniʻi ʻa e kakaí ke ako fekauʻaki mo Sihova; ʻoku fiemaʻu ke mau fai ha feinga meimei tatau ke tauhi ʻa e tākangá, ʻo tokoniʻi ʻa e fanga sipi ʻa Sihová ke nofo maʻu ʻi he moʻoní.”

16. ʻI he ngaahi founga fē te tau ngāueʻaki nai ai ʻa e ngaahi lēsoni kuo tau ako mei he ongo tohi ʻa Pitá?

¹⁶ Kuo tau lāulea ki ha ngaahi lēsoni pē ʻe niʻihi mei he ongo tohi fakamānavaʻi ʻa Pitá. Mahalo naʻá ke fakatokangaʻi ha tafaʻaki ʻokú ke loto ke fakaleleiʻi. Ko e fakatātaá, te ke saiʻia ke fakalaulauloto lahi ange ki he ngaahi tāpuaki ʻoku fakatatali mai ʻi he māmani foʻoú? Kuó ke fokotuʻu ʻa e taumuʻa ke faifakamoʻoni ʻikai anga-maheni ʻi he ngāueʻangá, ʻapiakó pe ʻi ha feituʻu kehe? ʻOkú ke vakai ki ha ngaahi founga ʻe lava ke ke fakahāhā ai ʻa e ʻofa lahi ki ho fanga tokouá mo e fanga tuofāfiné ʻo toe kakato ange? Kau mātuʻa, ʻokú ke fakapapauʻi ke tauhi loto-lelei mo vēkeveke ʻa e fanga sipi ʻa Sihová? Ko ha sivisiviʻi-kita faitotonu te ne fakaeʻa nai ʻokú ke maʻu ha ngaahi vaivaiʻanga pau, kae ʻoua ʻe loto-siʻí. ʻOku “anga-lelei ʻa e ʻEikí,” pea te ne tokoniʻi koe ke ke fakalakalaka. (1 Pita 2:3) ʻOku fakapapauʻi mai ʻe Pita: “Ko e ʻOtua . . . te ne fakaʻosi ʻe ia homou akoʻí. Te ne ʻai kimoutolu ke mou tuʻu maʻu, te ne ʻai kimoutolu ke mou mālohi, te ne fokotuʻu kimoutolu ʻi ha makatuʻunga mālohi.”—1 Pita 5:10.

17. Kapau ʻoku tau kītaki pea fakaʻatā ʻa Sihova ke ne akoʻi kitautolu, ko e hā ʻa e olá?

¹⁷ Naʻe tomuʻa ongoʻi ʻe Pita ʻoku ʻikai ke ne taau ke ʻi he ʻao ʻo e ʻAlo ʻo e ʻOtuá. (Luke 5:8) Ka ʻi he poupou anga-ʻofa ʻa Sihova mo Sīsuú, naʻe kītaki ʻa Pita ʻi he tuʻunga ko ha muimui ʻo Kalaisi. Naʻe tali ai ʻa Pita ke ne “hū ki he Puleʻanga taʻengata ʻa hotau ʻEiki mo e Fakamoʻui ko Sīsū Kalaisí.” (2 Pita 1:11) He pale fakaofo ē ko ia! Kapau te ke kītaki ʻo hangē ko Pitá pea fakaʻatā ʻa Sihova ke ne akoʻi koe, ko koe foki te ke maʻu ʻa e pale ʻo e moʻui taʻengatá. Te ke “aʻusia ʻa e taumuʻa ʻo [hoʻo] tuí, ʻa [hoʻo] fakamoʻuí.”—1 Pita 1:9.