1-2. ʻOku anga-fēfē ʻetau maʻu ʻaonga mei hono fakatupu kitautolu mo e malava ke maʻu ʻa e fiefia lahi ange ʻi he foaki atú ʻi he maʻu maí?

 ʻI HONO fakatupu ʻe Sihova ʻa e faʻahinga ʻo e tangatá, naʻá ne faʻu kinautolu mo e malava ke maʻu ʻa e fiefia lahi ange ʻi he foaki atú ʻi he maʻu maí. (Ngā. 20:35) ʻOku ʻuhinga ení ʻoku ʻikai ke tau maʻu ʻe kitautolu ha fiefia ʻi he maʻu maí? ʻIkai. ʻOku tau ʻiloʻi mei heʻetau hokosiá ʻoku tau fiefia ʻi heʻetau maʻu ha meʻaʻofa. Neongo ia, ʻoku tau fiefia lahi ange ʻi he taimi ʻoku tau fai ai ha foaki. Pea ko e moʻoni, naʻe faʻu kitautolu ʻe Sihova ʻi he foungá ni koeʻuhi ke tau maʻu ʻaonga mei ai. Ko e hā hono ʻuhingá?

² ʻI hono fakatupu kitautolu ʻe Sihova ʻi he founga ko iá, ʻokú ne fakaʻatā kitautolu ke tau fakalahi ʻetau fiefiá. ʻE lava ke tau fakalahi ʻetau fiefiá ʻaki ʻa e kumi ki ha faingamālie lahi ange ke fai ha foaki. ʻIkai ko ha tafaʻaki fakaofo ia ʻo e founga hono ngaohi kitautolú?—Saame 139:14.

3. Ko e hā ʻoku lava ai ke fakamatalaʻi ʻa Sihova ko e “ʻOtua fiefiá”?

³ ʻOku fakapapauʻi mai ʻe he Folofolá ko e foaki atú ʻoku maʻu ai ʻa e fiefia, ko ia tā neʻineʻi ke fakamatalaʻi ʻe he Tohi Tapú ʻa Sihova ko e “ʻOtua fiefiá.” (1 Tīm. 1:11) Ko ia ʻa e fuofua Tokotaha-Foaki lahi tahá. Koeʻuhí ko ia, “ʻoku tau maʻu ai ʻa e moʻuí mo ngaue holo ai mo tau ʻi aí ni,” hangē ko hono fakahaaʻi ʻe he ʻapositolo ko Paulá. (Ngā. 17:28) Ko e moʻoni, “ko e meʻaʻofa lelei kotoa pē mo e foaki haohaoa kotoa pē” ʻoku haʻu meia Sihova.—Sēm. 1:17.

4. Ko e hā te ne tokoniʻi kitautolu ke hokosia ʻa e fiefia lahi angé?

⁴ Ko kitautolu kotoa te tau saiʻia nai ke hokosia ʻa e fiefia lahi ange ʻoku haʻu mei hono fai ha foakí. ʻE lava ke tau fai pehē ʻaki ʻa e faʻifaʻitaki ki he nima-homo ʻa Sihová. (ʻEf. 5:1) ʻI heʻetau lāulea ki hení, tau fakatokangaʻi angé ʻa e meʻa ʻe lava ke tau fai kapau ʻoku tau ongoʻi ko ʻetau foakí ʻoku ʻikai ke fakahoungaʻi. Ko e ngaahi fakamanatu ko ení te ne tokoniʻi kitautolu ke tauhi maʻu pea naʻa mo hono fakalahi ʻa e fiefia ʻoku tau maʻu mei hono fai ha foaki.

 FAʻIFAʻITAKI KI HE NIMA-HOMO ʻA SIHOVÁ

5. Ko e hā ʻa e ngaahi meʻa fakamatelie ʻoku foaki mai ʻe Sihová?

⁵ Ko e hā ʻa e ngaahi founga ʻe niʻihi ʻoku fakahāhā ai ʻe Sihova ʻa e nima-homó? Fakakaukau ki ha ngaahi fakatātā ʻe niʻihi. ʻOku foaki mai ʻe Sihova ʻa e ngaahi meʻa fakamatelie. ʻOku ʻikai nai ke tau moʻui tuʻumālie, kae fakamālō kia Sihova, ko e tokolahi taha ʻo kitautolú ʻoku tau maʻu ʻa e meʻa ʻoku tau fiemaʻú. Ko e fakatātaá, ʻokú ne ʻai ke tau malava ʻo maʻu ʻa e meʻakai, vala mo e nofoʻanga. (Saame 4:8; Māt. 6:​31-33; 1 Tīm. 6:​6-8) ʻOku tokonaki ʻe Sihova ʻetau ngaahi fiemaʻu fakaesinó koeʻuhí pē ʻokú ne ongoʻi ko hono fatongia ia? ʻIkai ʻaupito! Ko e hā ʻoku fai ai eni ʻe Sihova maʻa kitautolú?

6. Ko e hā ʻoku tau ako mei he Mātiu 6:​25, 26?

⁶ Ko hono ʻai mahinó, ʻoku tokonaki ʻe Sihova ʻetau ngaahi fiemaʻu fakaesinó koeʻuhí ʻokú ne ʻofa ʻiate kitautolu. Fakakaukau ki he ngaahi lea ʻa Sīsū ʻi he Mātiu 6:​25, 26. (Lau.) ʻOku ngāueʻaki ʻe Sīsū ʻa e ngaahi faʻifaʻitakiʻanga mei he fakatupú. ʻI he lave fekauʻaki mo e fanga manupuná, ʻoku pehē ʻe Sīsū: “ʻOku ʻikai te nau tūtuuʻi pe utu pe faʻoaki feleoko.” Kae kehe, fakatokangaʻi ʻene lea hono hokó: “ʻOku fafanga kinautolu ʻe hoʻomou Tamai fakahēvaní.” ʻOku ʻeke leva ʻe Sīsū: “ʻIkai ʻoku mou mahuʻinga ange kimoutolu ʻiate kinautolu?” Ko e hā ʻa e poiní? ʻOku vakai ʻa Sihova ki heʻene kau lotú ʻoku nau mahuʻinga mamaʻo ange ʻi he fanga manú. Kapau ʻoku tokanga ʻa Sihova ki he ngaahi fiemaʻu ʻa e fanga manú, ʻe lava ke tau fakapapauʻi te ne tokonaki maʻatautolu! Hangē ko ha tamai fakaetangata tokanga, ʻoku tokonaki ʻa Sihova maʻa hono fāmilí ʻo makatuʻunga ʻi he ʻofá.—Saame 145:16; Māt. 6:32.

7. Ko e hā ʻa e founga ʻe taha ʻe lava ke tau faʻifaʻitaki ai ki he nima-homo ʻa Sihová? (Sio foki ki he fakatātaá.)

⁷ Hangē ko Sihová, ko kitautolu foki ʻe lava ke tau fai ha foaki fakamatelie ʻo makatuʻunga ʻi he ʻofá. Ko e fakatātaá, ʻokú ke ʻiloʻi ha kaungātui ʻokú ne fiemaʻu ha meʻakai pe vala? ʻE lava ke ngāueʻaki koe ʻe Sihova ke foaki kiate ia ha meʻa ke feau ʻene fiemaʻú. Ko e kakai ʻa Sihová ʻoku tautefito ʻenau ʻiloa ʻi hono fakahāhā ʻa e nima-homó ʻi he tō ha fakatamaki. Ko e fakatātaá, lolotonga ʻa e mahaki fakaʻauha COVID-19, ko e fanga tokouá mo e fanga tuofāfiné naʻa nau vahevahe ʻa e meʻakai, vala mo e ngaahi naunau kehe ki he faʻahinga naʻa nau fiemaʻu tokoní. Ko e tokolahi foki naʻa nau fai ʻa e ngaahi tokoni nima-homo ki he ngāue ʻi māmani lahí. Naʻe tokoni ia ke fakapaʻanga ʻa e ngaahi tokoni fakatamaki takatakai he kolopé. Naʻa nau ʻai ki honau lotó ʻa e ngaahi lea ʻi he Hepelū 13:16: “ʻOua ʻe ngalo  ke failelei mo vahevahe atu ʻa e meʻa ʻoku mou maʻú ki he niʻihi kehé, he ʻoku hōifua ʻa e ʻOtuá ʻi he ngaahi feilaulau peheé.”

8. ʻI he ngaahi founga fē ʻoku tau maʻu ʻaonga ai mei he mālohi ʻo Sihová? (Filipai 2:13)

⁸ ʻOku ʻomai ʻe Sihova ʻa e mālohi. ʻOku fiefia ʻa Sihova ke vahevahe ʻa hono mālohi taʻefakangatangatá ki heʻene kau lotu faitōnungá. (Lau ʻa e Filipai 2:13.) Kuó ke lotu ki ha mālohi ke talitekeʻi ʻa e fakatauelé pe ki ha mālohi ke kātekina ha ʻahiʻahi faingataʻa? Kuó ke toe lotu nai ke maʻu ha ivi feʻunga ke hokohoko atu ʻi ha toe ʻaho ʻe taha. ʻI he taimi naʻe tali ai ʻa hoʻo lotu ki ha mālohí, ʻe lava ke ke loto-tatau mo e ʻapositolo ko Paulá, naʻá ne tohi: “ʻOku ou malava ʻa e meʻa kotoa pē koeʻuhi ʻoku ou maʻu ʻa e ivi fakafou ʻi he tokotaha ko ia ʻokú ne ʻomai kiate au ʻa e mālohí.”—Fil. 4:13.

9. ʻE lava fēfē ke tau faʻifaʻitaki ki hono ngāueʻaki nima-homo ʻe Sihova hono mālohí? (Sio foki ki he fakatātaá.)

⁹ Neongo ʻoku tau taʻehaohaoa, ʻe lava ke tau faʻifaʻitaki ki hono ngāueʻaki nima-homo ʻe Sihova ʻa hono mālohí. Heʻikai lava ke tau foaki ʻa e mālohi pe ivi ki he niʻihi kehé. Ka ʻe lava ke tau ngāueʻaki hotau mālohí ke tokoni kiate kinautolu. Ko e fakatātaá, te tau fai nai ha puʻi pe fai ha ngāue ʻi he ʻapi ʻo ha Kalisitiane taʻumotuʻa pe mahamahaki. Kapau ʻoku fakaʻatā kitautolu ʻe hotau tuʻungá, ʻe lava ke tau pole ke tokoni ke fakamaʻa mo tokangaʻi ʻa e Fale Fakatahaʻangá. Ko ʻetau ngāueʻaki hotau mālohí ʻi he ngaahi founga peheé ʻoku maʻu ʻaonga ai ʻa e niʻihi kehe ʻoku nau lotu kia Sihová.

10. ʻE lava fēfē ke tau ngāueʻaki ʻa e mālohi ʻo e leá ke maʻu ʻaonga ai ʻa e niʻihi kehé?

¹⁰ ʻOua foki naʻa ngalo ko e leá ʻoku ʻi ai hono mālohi. ʻE lava ke ke fakakaukau ki ha tokotaha ʻe maʻu ʻaonga mei ha fakaongoongolelei loto-moʻoni? ʻOkú ke ʻiloʻi ha taha ʻokú ne fiemaʻu ha fakafiemālie? ʻI he ongo tuʻungá fakatouʻosi, fēfē ke ke tamuʻomuʻa ke kakapa atu ki he tokotahá? ʻE lava ke ke ʻaʻahi kiate ia, tā telefoni pe ʻave nai ha kaati, ʻīmeili pe ko ha pōpoaki. Ko e meʻa te ke leaʻakí ʻoku ʻikai fiemaʻu ia ke matiketika. Ko ha ngaahi lea faingofua mei he lotó ko e meʻa tofu pē nai ia ʻoku fiemaʻu ʻe ho kaungātuí ke nofoʻaki faitōnunga ʻi ha toe ʻaho ʻe taha pe ke ongoʻi lelei ange fekauʻaki mo hono tuʻungá.—Pal. 12:25; ʻEf. 4:29.

11. ʻOku anga-fēfē hono ngāueʻaki ʻe Sihova ʻa hono potó?

¹¹ ʻOku foaki mai ʻe Sihova ʻa e potó. Naʻe tohi ʻe he ākonga ko Sēmisí: “Kapau ʻoku ʻi ai ha taha ʻo kimoutolu ʻoku masiva ʻi he potó, tuku ke ne hanganaki kole ki he ʻOtuá, he ʻokú ne foaki nima-homo ki he faʻahinga kotoa ʻo ʻikai te ne fakasio hala.” (Sēm. 1:5; fkm. ʻi lalo) Hangē ko ia ʻoku fakahaaʻi ʻi he ngaahi lea ko ení, ʻoku ʻikai ke tauhi pē ʻe Sihova ʻa hono potó ʻiate ia. ʻOkú ne vahevahe nima-homo ia ki he niʻihi kehé. Fakatokangaʻi foki, ʻi he taimi ʻoku foaki ai ʻe Sihova ʻa e potó, ʻokú ne fai ia “ʻo ʻikai te ne ʻoatu mo e  lau” pe ʻoku “ʻikai te ne fakasio hala.” ʻOku ʻikai ʻaupito te ne ʻai ke tau ongoʻi kovi ʻi heʻetau fakahaaʻi ʻoku tau fiemaʻu ʻene tatakí. Ko hono moʻoní, ʻokú ne fakalototoʻaʻi kitautolu ke kumi ki ai.—Pal. 2:​1-6.

12. Ko e hā ʻa e ngaahi faingamālie ʻoku tau maʻu ke vahevahe atu hotau potó?

¹² Fēfē kitautolu? ʻE lava ke tau faʻifaʻitaki kia Sihova ʻaki ʻa e vahevahe atu hotau potó? (Saame 32:8) ʻOku maʻu ʻe he kakai ʻa Sihová ʻa e ngaahi faingamālie lahi ke vahevahe atu ʻa e meʻa kuo nau akó. Ko e fakatātaá, ʻoku tau faʻa akoʻi ʻa e faʻahinga ʻoku foʻou ki he ngāue fakafaifekaú. Ko e kau mātuʻá ʻoku nau tokoniʻi anga-kātaki ʻa e kau sevāniti fakafaifekaú mo e fanga tokoua ʻosi papitaisó ke ako ʻa e founga ke fakahoko ai honau ngaahi vāhenga-ngāue ʻi he fakatahaʻangá. Pea ko e faʻahinga ʻoku taukei ʻi he ngāue langá mo e monomonó ʻoku nau tokoni ke akoʻi ʻa e faʻahinga ʻoku siʻi ʻenau taukeí ke nau fai ʻa e ngāue ʻi he ngaahi fale fakateokalatí.

13. ʻI hono akoʻi ʻa e niʻihi kehé, ʻe lava fēfē ke tau faʻifaʻitaki ki he founga ʻoku vahevahe ai ʻe Sihova ʻa e potó?

¹³ Ko e faʻahinga ʻoku nau fai ʻa e akoʻí ʻoku lelei ke nau faʻifaʻitaki ki he founga ʻoku vahevahe ai ʻe Sihova ʻa hono potó. Manatuʻi ʻoku foaki nima-homo ʻe Sihova ʻa e potó. ʻI he founga meimei tatau, ʻoku tau vahevahe tauʻatāina atu ʻetau ʻiló mo e taukeí ki he faʻahinga ʻoku nau akó. ʻOku ʻikai ke tau fufū ʻetau ʻiló ʻi heʻetau ilifia naʻa faai atu pē nai kuo fetongi kitautolu ʻe he tokotaha akó. Pea ʻoku ʻikai ke tau maʻu ʻa e vakai: ‘Naʻe ʻikai ke akoʻi au ʻe ha taha! Tuku ke ne ako pē ʻiate ia.’ Ko ha fakakaukau pehē ʻoku ʻikai totonu ke ʻasi ia ʻi he haʻohaʻonga ʻo e kakai ʻa Sihová. ʻI hono kehé, ʻoku tau ʻoatu fiefia ʻo ʻikai ngata pē ʻi heʻetau ʻiló “kae toe pehē foki mo [kitautolu] tonu” ki he faʻahinga ʻoku tau akoʻí. (1 Tes. 2:8) ʻOku tau ʻamanaki “te nau hoko leva ai ʻo taau feʻunga ke akoʻi ʻa e niʻihi kehé.” (2 Tīm. 2:​1, 2) Kapau te tau vahevahe nima-homo atu hotau potó, ko kitautolu pea mo e niʻihi kehé te tau hoko ʻo poto ange mo fiefia ange.

KAPAU ʻOKU HĀ NGALI ʻIKAI FAKAHOUNGAʻI ʻETAU FOAKÍ

14. ʻOku fēfē ʻa e fakafeangai ʻa e tokolahi tahá ki heʻetau nima-homó?

¹⁴ ʻI he taimi ʻoku tau nima-homo aí, tautefito ki hotau fanga tokouá mo e fanga tuofāfiné, ʻoku nau faʻa fakahāhā mai ʻa e houngaʻia. Te nau ʻomai nai ha kiʻi tohi fakamālō pe fakahaaʻi ʻenau houngaʻiá ʻi ha founga kehe. (Kol. 3:15) Ko hono maʻu ʻa e ngaahi fakahāhā ko ia ʻo e houngaʻiá ʻoku tānaki atu ia ki heʻetau fiefiá.

15. Ko e hā ʻoku totonu ke tau manatuʻi ʻi he taimi ʻoku ʻikai ke fakahāhā ai ʻe he niʻihi kehé ʻa e houngaʻiá?

¹⁵ Ka ko hono moʻoní, ko e niʻihi heʻikai nai ke nau fakahāhā maʻu pē ʻa e houngaʻiá. ʻI he taimi ʻe niʻihi, ʻoku tau foaki nai hotau taimí, iví pe koloá ka ʻi he ʻosi angé ʻoku tau fifili pe naʻe tokanga ʻa e tokotahá ki he meʻa naʻa tau faí. Kapau ʻoku hoko ia, ʻe lava fēfē ke tau fakaʻehiʻehi mei he mole ʻetau fiefiá pe hoko ʻo loto-koná? Manatuʻi ʻa e ngaahi lea ʻi heʻetau konga tohi ʻo e kaveingá, ʻa e Ngāue 20:35. Ko ʻetau fiefia ʻi he foaki atú ʻoku ʻikai ke makatuʻunga ia ʻi he tali ʻoku fai maí. ʻE lava ke tau fili ke fiefia ʻi he foakí neongo kapau ʻoku hā ngali ʻoku ʻikai fakahoungaʻi ʻe he niʻihi kehé. Anga-fēfē? Fakakaukau ki ha founga ʻe niʻihi.

16. Ko e hā ʻoku totonu ke tau tokangataha ki ai ʻi heʻetau fai ha foakí?

¹⁶ Tokangataha ki he faʻifaʻitaki kia Sihová. ʻOkú ne foaki ʻa e ngaahi meʻa lelei ki he kakaí tatau ai pē pe ʻoku nau houngaʻia ai pe ʻikai. (Māt. 5:​43-48) ʻOku talaʻofa ʻe Sihova ʻi he taimi ʻoku tau fai ai ʻa e meʻa tatau ʻo foaki atu “ʻo ʻikai ʻamanaki ke toe maʻu mai ha meʻa,” ʻe “lahi ʻa [hotau] totongí.” (Luke 6:35) Ko e “meʻa” ko ení ʻoku kau nai ki ai ʻa e fakahāhā ʻo e houngaʻiá. Tatau ai pē pe ʻoku tau maʻu ia pe ʻikai, ko Sihova te ne totongi fakafoki maʻu pē kiate kitautolu koeʻuhi ko ʻetau failelei ki he niʻihi kehé, pea  koeʻuhi ko ʻetau hoko ko e ‘kau foaki fiefiá.’—Pal. 19:17; 2 Kol. 9:7.

17. ʻE lava fēfē ke tau tauhi maʻu ʻa e vakai totonú? (Luke 14:​12-14)

¹⁷ Ke tauhi maʻu ʻa e vakai totonu ki he foaki atú, ʻoku tau maʻu ha tefitoʻi moʻoni mahuʻinga ʻi he Luke 14:​12-14. (Lau.) ʻOku ʻikai ke hala ia ke fakahāhā ʻa e anga-talitali kakaí pe ke nima-homo ʻi he ngaahi founga kehé ki he faʻahinga ʻe lava ke nau fai mai ha meʻa meimei tatau kiate kitautolu. Kae kehe, fēfē kapau ʻoku tau fakatokangaʻi ʻoku tau faʻa fai pē ʻa e foakí koeʻuhí ʻoku tau ʻamanekina ke maʻu mei ai ha meʻa? ʻOku lelei ke tau ʻahiʻahiʻi ʻa e meʻa naʻe fokotuʻu mai ʻe Sīsuú. ʻE lava ke tau anga-talitali kakai ki ha taha ʻoku tau ʻiloʻi ʻoku ʻikai te ne maʻu ha meʻa ke fakahāhā mai ʻaki ʻa e anga-talitali kakaí. Te tau fiefia leva koeʻuhí ʻoku tau faʻifaʻitaki kia Sihova. Ko e vakai tatau ko iá te ne toe tokoniʻi kitautolu ke tauhi maʻu ʻetau fiefiá ʻi he taimi ʻoku ʻikai ke fakahaaʻi ai ʻe he niʻihi kehé ʻa e houngaʻiá.

18. Ko e hā ʻe lava ke ne tokoniʻi kitautolu ke fakaʻatuʻi ki he niʻihi kehé?

¹⁸ Fakaʻehiʻehi mei hono fehuʻia ʻa e fakaueʻiloto ʻa e niʻihi kehé. (1 Kol. 13:7) Kapau ʻoku ʻikai ke fakahāhā ʻe he niʻihi kehé ʻa e houngaʻiá, ʻe lava ke tau ʻeke hifo: ‘ʻOku nau taʻehoungaʻia moʻoni pe naʻe ngalo pē ke nau fakahāhā ʻa e houngaʻiá?’ Mahalo pē ʻoku ʻi ai ha ngaahi ʻuhinga kehe ki he ʻikai ke nau fakafeangai mai ʻo hangē ko ia naʻa tau fakaʻamu ki aí. Ko e niʻihi ʻoku nau houngaʻia loloto nai ka ʻoku faingataʻa ke fakahaaʻi ia. ʻOku nau ongoʻi mā nai ke maʻu ha tokoni, tautefito kapau ko kinautolu naʻa nau tokoniʻi ʻa e niʻihi kehé ʻi he kuohilí. Pe ko e hā pē ʻa e tuʻungá, ko e ʻofa faka-Kalisitiané te ne ueʻi kitautolu ke tau fakaʻatuʻi ki hotau kaungātuí pea ke maʻu ai pē ʻa e fiefia ʻi he foaki atú.—ʻEf. 4:2.

19-20. Ko e hā ʻoku ʻaonga ai ʻa e kātakí ʻi heʻetau fai ha foaki ki he niʻihi kehé? (Sio foki ki he fakatātaá.)

¹⁹ Hoko ʻo anga-kātaki. ʻI he fekauʻaki mo e hoko ʻo nima-homó, naʻe tohi ʻe he poto ko Tuʻi Solomoné: “Lī atu hoʻo maá ki he vaí, he ʻi he hili ha ngaahi ʻaho lahi te ke toe maʻu mai ia.” (Tml. 11:1) Hangē ko ia ʻoku fakahaaʻi ʻi he ngaahi lea ko ení, ko e niʻihi te nau fai nai ha tali ki heʻetau nima-homó—ʻi he “hili ha ngaahi ʻaho lahi.” Fakakaukau ki ha hokosia ʻokú ne fakamamafaʻi ʻa e moʻoni ko ení.

²⁰ ʻI he ngaahi taʻu lahi kuo maliu atú, ko e uaifi  ʻo ha ʻovasia sēketi naʻá ne ʻave ha tohi fakalotomāfana ki ha tuofefine toki papitaiso, ʻo fakalototoʻaʻi ia ke ne nofoʻaki faitōnunga. Hili ha taʻu nai ʻe valu mei ai, naʻe toki tali atu ʻe he tuofefiné ʻene tohí, ʻo pehē: “Naʻá ku ongoʻi naʻe pau ke u tohi ʻo fakahā atu ke ke ʻilo ʻa e tokoni naʻá ke fai maʻaku ʻi he ngaahi taʻu kuo maliu atú.” Naʻá ne hoko atu: “[Ko hoʻo tohí] naʻe mātuʻaki fakalotomāfana, ka ko e veesi Tohi Tapú naʻe maongo ki hoku lotó, pea naʻe ʻikai ʻaupito ke ngalo ʻiate au.” a Hili ʻa e fakamatala ʻa e tuofefiné ki he niʻihi ʻo e ngaahi pole naʻá ne fehangahangai mo iá, naʻá ne pehē: “ʻI he taimi ʻe niʻihi naʻá ku foʻi, ʻo u loto ke mavahe mei he moʻoní, mei he ngaahi fatongiá—mei he meʻa kotoa. Ka ko e veesi Tohi Tapu naʻá ke ʻomaí naʻá ne ueʻi mālohi hoku lotó, pea naʻá ku . . . hokohoko atu pē.” Naʻá ne toe pehē: “Naʻe ʻikai ha meʻa ʻe taha ʻi he taʻu ʻe valu ko iá naʻe maongo pehē kiate au.” Sioloto atu ki he fiefia ʻa e uaifi ʻo e ʻovasia sēketí ke maʻu ʻa e tohi ko ení “ʻi he hili ha ngaahi ʻaho lahi”! Ko kitautolu foki te tau maʻu nai ʻa e ngaahi fakahāhā ʻo e houngaʻiá ʻi he hili ha taimi fuoloa mei heʻetau fai ha meʻa lelei ki ha taha.

21. Ko e hā ʻokú ke fakapapauʻi ai ke hanganaki faʻifaʻitaki ki he nima-homo ʻa Sihová?

²¹ Hangē ko ia naʻe lave ki aí, naʻe fakatupu kitautolu ʻe Sihova fakataha mo ha malava makehe. Neongo ʻoku tau fiefia ʻi he maʻu maí, ʻoku tau maʻu ha fiefia ʻoku lahi ange ʻi heʻetau foaki atu ki he niʻihi kehé. ʻOku tau ongoʻi lelei ʻi heʻetau malava ke tokoniʻi hotau kaungātuí. Pea ʻoku tau fiefia ʻi he taimi ʻoku nau fakahaaʻi ai ʻenau houngaʻiá. Neongo ia, pe ʻoku fakahāhā ʻe he tokotahá ha houngaʻia pe ʻikai, ʻoku lava ke tau fiefia naʻa tau fai ʻa e meʻa totonú. ʻOua ʻaupito naʻa ngalo pe ko e hā pē ha meʻa ʻokú ke foaki, “ʻoku maʻu ʻe Sihova ʻa e mafai ke ʻoatu kiate koe ha meʻa lahi ange ia ai.” (2 Kal. 25:9) Heʻikai pē lava ke lahi ange ʻetau foakí ʻia Sihova! Pea ʻoku ʻikai ha fiefia ʻe toe lahi ange ʻi hono fai mai ʻe Sihova tonu ʻa e totongi fakafokí. Tuku ke tau fakapapauʻi leva ke hokohoko atu ʻa e faʻifaʻitaki ki heʻetau Tamai fakahēvani nima-homó.