ʻOku ʻikai ke fiemaʻu ke tau fakakaukau koeʻuhí pē naʻe ʻikai ke ʻi ai ʻa e kau ākonga ʻe toko 70 ʻi hono fokotuʻu ʻe Sīsū ʻa e Kai Efiafi ʻa e ʻEikí, pea tau pehē naʻe ʻikai ke tali kinautolu pe naʻa nau liʻaki ia. Naʻe loto pē ʻa Sīsū ke ne fakataha mo ʻene kau ʻapositoló ʻi he kātoanga ko iá.

Naʻá ne tali fakatouʻosi ʻa e toko 12 mo e toko 70. Naʻe ʻuluaki fili ʻe Sīsū mei heʻene kau ākonga tokolahí ʻa e kau tangata ʻe toko 12, ʻa ia naʻá ne ui ko e kau ʻapositoló. (Luke 6:​12-16) Naʻá ne ʻi Kāleli ʻi he taimi naʻá ne “ui fakataha mai ʻa e toko Hongofulu-mā-uá” pea “fekauʻi atu kinautolu ke nau malangaʻi ʻa e Puleʻanga ʻo e ʻOtuá mo fakamoʻui mahaki.” (Luke 9:​1-6) Ki mui ai, ʻi Siutea, naʻe “fili [ʻe Sīsū] ha toko 70 kehe peá ne fekauʻi atu kinautolu ʻo tautau toko ua.” (Luke 9:51; 10:1) Ko ia ai, naʻe ʻi ai ʻa e kau muimui ʻo Sīsū ʻi he ngaahi feituʻu kehekehe ʻa ia naʻe malangaʻi ai ʻene pōpoakí.

Ko e kau Siu naʻa nau hoko ko e kau ākonga ʻa Sīsuú naʻa nau kei fakahoko pē ʻa e Pāsova fakataʻú, ʻo ngalingali mo honau ngaahi fāmilí. (ʻEki. 12:​6-11, 17-20) ʻI he ofi ki he pekia ʻa Sīsuú, naʻá ne ʻalu mo ʻene kau ʻapositoló ki Selusalema. Ka naʻe ʻikai ke ne fekau ke fakatahataha mai ʻene kau ākongá kotoa ki ha fuʻu Pāsova—mei Siutea, Kāleli mo Pēlea. ʻOku hā mahino, naʻe loto ʻa Sīsū ke ne fakataha mo ʻene kau ʻapositoló ʻi he kātoanga ko ení. Naʻá ne tala ange kiate kinautolu: “Kuó u holi lahi ke kai ʻa e Pāsova ko ení mo kimoutolu ki muʻa ke u tofanga ʻi he faingataʻá.”—Luke 22:15.

Naʻe ʻi ai ha ʻuhinga lelei ki ai. Naʻe teu ke pekia ʻa Sīsū “ko e Lami . . . ʻa e ʻOtuá ʻa ia ʻokú ne ʻave ʻa e angahala ʻa māmaní.” (Sione 1:29) Naʻe pau ke hoko ia ʻi Selusalema, ʻa ia ko e feituʻu ia naʻe fakahoko ai ʻa e ngaahi feilaulau ki he ʻOtuá. Ko e pekia ʻa Sīsuú ʻe tokonaki ai ha fakatauʻatāina lahi mamaʻo ange ia ʻi he meʻa naʻe ala maʻu fakafou ʻi he lami naʻe kai ʻe he ngaahi fāmili ʻIsilelí ʻi he pō ʻo e ʻEkisoto mei ʻIsipité. (1 Kol. 5:​7, 8) Ko e meʻa naʻe fai ʻe Sīsuú ʻe fakaʻatā ai ki he toko Hongofulu-mā-uá ke nau hoko ko e fakavaʻe ʻo e fakatahaʻanga Kalisitiané. (ʻEf. 2:​20-22) Ko e meʻa ʻoku fakatupu tokangá, ko e kolo tapu ko Selusalemá ʻoku ʻi ai hono “maka fakavaʻe ʻe 12” ʻa ia naʻe hiki ai “ʻa e hingoa ʻe 12 ʻo e kau ʻapositolo ʻe toko 12 ʻa e Lamí.” (Fkh. 21:​10-14) ʻIo, ko e kau ʻapositolo faitōnungá te nau maʻu ha ngafa mahuʻinga ʻi hono fakahoko ʻa e taumuʻa ʻa e ʻOtuá. Ko ia ai, ʻe lava ke tau mahinoʻi ʻa e ʻuhinga naʻe loto ai ʻa Sīsū ke nau kau fakataha mo ia ʻi he Pāsova fakaʻosi ko iá pea mo e meʻa naʻe hoko atu aí—ʻa e Kai Efiafi ʻa e ʻEikí.

Ko e toko 70 mo e kau ākonga kehé naʻe ʻikai ke nau ʻi he kai efiafi ko iá mo Sīsū. Neongo ia, ko e kau ākonga kotoa naʻa nau fakamoʻoniʻi ʻenau faitōnungá te nau maʻu ʻaonga mei he meʻa naʻe fokotuʻu ʻe Sīsuú—ʻa e Kai Efiafi ʻa e ʻEikí. Ko kinautolu kotoa ʻa ia naʻe faai atu pē ʻo nau hoko ko e kau Kalisitiane paní te nau hū ki he fuakava ki ha puleʻangá, ʻa ia naʻe tala ange ʻe Sīsū ki heʻene kau ʻapositoló ʻi he pō ko iá.—Luke 22:​29, 30