1, 2. ‘Oku ‘uhinga ki he hā ‘a e hanga kia Sihová?

‘OKU tau mo‘ui ‘i he “ngaahi taimi fakalilifu” ‘a ia ‘oku “faingata‘a ke fekuki mo ia.” (2 Tīm. 3:1) Pea ‘e hoko ‘o toe faingata‘a ange ‘a e mo‘uí ki mu‘a ke faka‘auha ‘e Sihova ‘a e māmani fulikivanu ko ení pea ‘omai ‘a e melino mo‘oni ki he māmaní. ‘I he ‘uhinga ko ení, ‘oku totonu ai ke tau ‘eke hifo, ‘Ko hai ‘oku ou hanga ki ai ki ha tokoni mo e tatakí?’ Te tau pehē nai ‘i he taimi pē ko iá “Ko Sihova,” pea ko e tali lelei tahá ia.

² ‘Oku ‘uhinga ki he hā ‘a e hanga kia Sihová? Pea ‘e lava fēfē ke tau fakapapau‘i ‘oku tau hanga ma‘u pē kiate ia ‘i he ‘i ai ‘etau ngaahi palopalemá? ‘I ha taimi fuoloa ‘i he kuohilí, na‘e fakamatala ai ha tokotaha-tohi Tohi Tapu ki he lahi ‘o e fiema‘u ke tau hanga kia Sihova ‘i he taimi ‘oku tau fiema‘u ai ha tokoní. (Lau ‘a e Saame 123:1-4.) Na‘á ne pehē ‘i he taimi ‘oku tau hanga ai kia Sihová, ‘oku tau hangē ko ha sevāniti ‘oku hanga ki hono pulé. ‘O anga-fēfē? ‘Oku hanga pe falala ha sevāniti ki hono pulé, te ne ‘oange kiate ia ‘a e me‘akai pea malu‘i ia. Ka kuo pau foki ke ne siofi ma‘u pē ‘a hono  pulé ke ne mahino‘i ‘a e me‘a ‘oku fiema‘u ‘e hono pulé ke ne faí, pea kuo pau leva ke ne fai ia. ‘I ha founga meimei tatau, kuo pau ke tau ako fakalelei ‘a e Folofola ‘a e ‘Otuá ‘i he ‘aho kotoa pē ke mahino‘i ‘a e me‘a ‘oku fiema‘u mai ‘e Sihova ke tau faí, pea kuo pau leva ke tau fai ia. ‘E lava leva ai ke tau fakapapau‘i ‘e tokoni‘i kitautolu ‘e Sihova ‘i he taimi ‘oku tau fiema‘u ai ha tokoní.​—‘Ef. 5:17.

3. Ko e hā ‘e lava ke ne fakahoha‘asi kitautolu mei he hanga kia Sihová?

³ Neongo ‘oku tau ‘ilo‘i kuo pau ke tau hanga ma‘u pē kia Sihova, ‘e fakahoha‘asi nai kitautolu ‘i he taimi ‘e ni‘ihi. Ko e me‘a tofu pē ia na‘e hoko ki he kaume‘a ofi ‘o Sīsū ko Mā‘atá. Na‘á ne “femo‘uekina ‘i he tokanga ki he ngaahi ngafa lahi.” (Luke 10:40-42) Kapau na‘e femo‘uekina pe fakahoha‘asi ha tokotaha faitōnunga hangē ko Mā‘atá neongo na‘e ‘i ai tonu mo ia ‘a Sīsū, ‘oku ‘ikai totonu ke tau ‘ohovale ‘i ha lava ke fakahoha‘asi foki mo kitautolu. Ko ia, ko e hā ‘e lava ke ne fakahoha‘asi kitautolu mei he hanga kia Sihová? ‘I he kupú ni, te tau lāulea ai ki he founga ‘e lava ke fakahoha‘asi ai kitautolu ‘e he me‘a ‘oku fai ‘e he ni‘ihi kehé. Pea te tau ako ai ki he founga ke hanga ma‘u pē ai kia Sihová.

4. Ko e hā nai te tau ‘ohovale ai ‘i he mole meia Mōsese ‘a e monū ‘o e hū ki he Fonua ‘o e Tala‘ofá?

⁴ Na‘e hanga mo‘oni ‘a Mōsese kia Sihova ki ha tataki. ‘Oku tala mai ‘e he Tohi Tapú “na‘á ne hanganaki tu‘u ma‘u ‘i he‘ene sio atu ko ia ki he Tokotaha ‘a ia ‘oku ta‘ehāmaí.” (Lau ‘a e Hepelū 11:24-27.) ‘Oku toe pehē ai “kuo te‘eki ai ‘aupito ke toe hoko mai ha palōfita ‘i ‘Isileli na‘e hangē ko Mōsesé, ‘a ia na‘e ‘afio‘i ‘e Sihova mata ki he mata.” (Teu. 34:10) Ka neongo na‘e hoko ‘a Mōsese ko ha kaume‘a ofi ‘o Sihova, na‘e mole meiate ia ‘a e monū ‘o e hū ki he Fonua ‘o e Tala‘ofá. (Nōm. 20:12) Ko e hā ‘a e me‘a na‘e fehālaakí?

5-7. Ko e hā ‘a e me‘a na‘e hoko taimi nounou pē mei he mavahe ‘a e kau ‘Isilelí mei ‘Isipité, pea ko e hā ‘a e me‘a na‘e fai ‘e Mōsesé?

⁵ Si‘i hifo ‘i he māhina ‘e ua mei he mavahe ‘a e kau ‘Isilelí mei ‘Isipité, pea ki mu‘a ke a‘u ‘o nau tū‘uta ‘i Mo‘unga Sainaí, na‘e hoko ai ha me‘a mafatukituki. Na‘e kamata ke lāunga ‘a e kakaí koe‘uhí na‘e ‘ikai ke ‘i ai ha vai. Na‘e kamata ke nau muhumuhu fekau‘aki mo Mōsese mo nau ‘ita lahi pea na‘e “tangi ‘a Mōsese kia Sihova: ‘Ko e hā te u fai ki he kakaí ni? ‘Oku toetoe si‘i pē pea nau tolomaka‘i au!’” (‘Eki. 17:4) Na‘e ‘oange ‘e Sihova ha fakahinohino mā‘ala‘ala kia Mōsese. Na‘e tala ange ‘e Sihova ke ne to‘o ‘a hono tokotokó ‘o taa‘i ‘aki ‘a e maka ‘i Hōlepí. ‘Oku pehē ‘e he Tohi Tapú: “Na‘e fai pehē ‘a Mōsese ‘i he ‘ao ‘o e kau mātu‘a ‘o ‘Isilelí.” Na‘e ha‘u leva mei he maká ha vai, ‘o ma‘u ‘e he kau ‘Isilelí ‘a e vai lahi ke nau inu, pea na‘e fakalelei‘i ai ‘a e palopalemá.​—‘Eki. 17:5, 6.

⁶ ‘Oku tala mai ‘i he Tohi Tapú na‘e ui ‘e Mōsese ‘a e feitu‘ú ko Masa, ‘a ia ‘oku ‘uhingá ko e “‘Ahi‘ahi‘i,” mo Mēlipa, ‘a ia ‘oku ‘uhingá ko e “Fakakē.” Ko e hā hono ‘uhingá? “Koe‘uhi ko e fakakē ‘a e kau ‘Isilelí pea koe‘uhi ko ‘enau ‘ahi‘ahi‘i ‘a Sihova ‘i he‘enau pehē: ‘‘Oku ‘i hotau lotolotongá koā ‘a Sihova pe ‘ikai?’”​—‘Eki. 17:7.

⁷ Na‘e fēfē ‘a e ongo‘i ‘a Sihova fekau‘aki mo e me‘a na‘e hoko ‘i Mēlipá? Na‘á ne ongo‘i na‘e angatu‘u ‘a e kau ‘Isilelí kiate ia mo hono mafaí, ‘o ‘ikai kia Mōsese pē. (Lau ‘a e Saame 95:8, 9.) Ko e me‘a na‘e fai ‘e he kau ‘Isilelí na‘e hala ‘aupito. Ka na‘e fai ‘e Mōsese ‘a e me‘a totonú. Na‘á ne hanga kia Sihova pea muimui fakalelei leva ki he‘ene fakahinohinó.

8. Ko e hā na‘e hoko ofi ki he ngata‘anga ‘o e fononga ‘a e kau ‘Isilelí ‘i he toafá?

⁸ Kae kehe, ko e hā na‘e hoko ‘i ha tu‘unga meimei tatau ‘i he ta‘u nai ‘e 40 ki mui ai? Na‘e ofi ke ngata ‘a e fononga ‘a e kau ‘Isilelí ‘i he toafá. Na‘a nau a‘u ki ha feitu‘u ofi ki Kētesi, ‘i he ve‘e kau‘ā ‘o e Fonua ‘o e Tala‘ofá. Na‘e toe  ‘iloa ‘a e feitu‘ú ni ko Mēlipa. * (Sio ki he fakamatala ‘i lalo.) Ko e hā hono ‘uhingá? Koe‘uhí na‘e toe lāunga ‘a e kau ‘Isilelí ko e ‘ikai ke ‘i ai ha vaí. (Nōm. 20:1-5) Ka ‘i he taimi ko ení, na‘e fai ai ‘e Mōsese ha fehālaaki mafatukituki.

9. Ko e hā ‘a e fakahinohino na‘e ‘oange ‘e Sihova kia Mōsesé, ka ko e hā na‘e fai ‘e Mōsesé? (Sio ki he ‘uluaki fakatātā ‘i he kupú ni.)

⁹ Ko e hā na‘e fai ‘e Mōsese ‘i he angatu‘u ‘a e kakaí? Na‘á ne toe hanga kia Sihova ki ha fakahinohino. Ka ‘i he taimi ko ení na‘e ‘ikai ke tala ange ‘e Sihova kia Mōsese ke ne taa‘i ‘a e maká. Na‘á ne tala ange kia Mōsese ke ne to‘o ‘a hono tokotokó, pea ‘omai ‘a e kakaí ke nau ofi ki he maká, peá ne lea leva ki he maká. (Nōm. 20:6-8) Na‘e fai ‘e Mōsese ‘a e me‘a ko iá? ‘Ikai. Na‘á ne mātu‘aki ongo‘i feifeitamaki mo ‘ita ‘o ne kaila ki he kakaí: “Fanongo mai, ‘i he taimí ni, ‘a kimoutolu kau angatu‘u! Kuo pau koā ke ma ‘omai ha vai ma‘amoutolu mei he maká ni?” Na‘á ne taa‘i leva ‘a e makatu‘ú, pe ko e maká, ‘o ‘ikai tu‘o taha pē, kae tu‘o ua.​—Nōm. 20:10, 11.

10. Na‘e fēfē ‘a e fakafeangai ‘a Sihova ki he me‘a na‘e fai ‘e Mōsesé?

¹⁰ Na‘e houhau lahi ‘a Sihova ‘ia Mōsese. (Teu. 1:37; 3:26) Ko e hā na‘e fakafeangai pehē ai ‘a Sihová? Ko e ‘uhinga nai ‘e taha he na‘e ‘ikai ke talangofua ‘a Mōsese ki he fakahinohino fo‘ou na‘e ‘oange ‘e Sihova kiate iá.

11. ‘I hono taa‘i ‘e Mōsese ‘a e maká, ko e hā nai na‘e ‘ai ai ‘e Mōsese ke fakakaukau ‘a e kau ‘Isilelí na‘e ‘ikai ke fai ‘e Sihova ha maná?

¹¹ Na‘e toe ‘i ai nai ha ‘uhinga ‘o e me‘a na‘e houhau ai ‘a Sihová. Ko e ngaahi fu‘u maka ‘i he ‘uluaki Mēlipá ko e kalānite fefeka. Tatau ai pē pe ko e hā hono lahi ‘a hono taa‘i ‘e ha taha ‘a e kalānité, ‘e ‘ikai ke ‘amanekina ‘e ha taha ‘e ha‘u mei ai ha vai. Ka ko e ngaahi maka ‘i Mēlipa hono uá ‘oku kehe ‘aupito ia. Ko e lahi taha ‘o e fa‘ahinga maka ‘i aí ko e maka lahe. Koe‘uhí ko e maka lahé ko e fa‘ahinga maka ia ‘oku molū ange, ‘oku fa‘a hūhū ai ‘a e vaí ‘o tānaki ‘i lalo. ‘E lava leva ke ma‘u ‘e he kakaí ‘a e vai ko ení ‘aki hono avangi ‘a e maká. Ko ia ‘i hono taa‘i ‘e Mōsese ‘a e maká kae ‘ikai lea ki aí, ‘oku lava nai ke pehē na‘e fakakaukau ‘a e kau ‘Isilelí na‘e ‘otomētiki pē ‘a e ha‘u ‘a e vaí ‘o ‘ikai koe‘uhí na‘e fai ‘e Sihova ha mana? * (Sio ki he fakamatala ‘i lalo.) ‘Oku ‘ikai lava ke tau fakapapau‘i.

12. Ko e hā nai ‘a e toe ‘uhinga ‘e taha na‘e houhau ai ‘a Sihova ‘ia Mōsese mo ‘Ēloné?

¹² Ko e toe ‘uhinga nai eni ‘e taha na‘e houhau lahi ai ‘a Sihova ‘ia Mōsese mo ‘Ēloné. Na‘e tala ‘e Mōsese ki he kakaí: “Kuo pau koā ke ma ‘omai ha vai ma‘amoutolu mei he maká ni?” ‘I he pehē ko ia ‘e Mōsese “ke ma,” ‘oku ngalingali na‘á ne ‘uhinga kiate ia mo ‘Ēlone. Ko e me‘a na‘e lea‘aki ‘e Mōsesé na‘e mātu‘aki ta‘efaka‘apa‘apa koe‘uhí na‘e ‘ikai te ne ‘oange ‘a e lāngilangí kotoa kia Sihova ‘i he mana ko iá. ‘Oku pehē ‘i he Saame 106:32, 33: “Na‘a nau fakahouhau‘i Ia ‘i he vai ‘o Mēlipá, pea na‘e hoko ai ha kovi kia Mōsese koe‘uhí ko kinautolu. Na‘a nau faka‘ita‘i hono laumālié, pea na‘á ne lea ta‘efakakaukau ‘aki hono loungutú.” * (Sio ki he fakamatala ‘i lalo.) (Nōm. 27:14) Na‘e ‘ikai ke ‘oange ‘e Mōsese kia Sihova ‘a e lāngilangi na‘á Ne tuha mo iá. Na‘e tala ‘e Sihova kia Mōsese mo ‘Ēlone: “Na‘á mo fakatou angatu‘u ki he‘eku tu‘utu‘uni.” (Nōm. 20:24) Ko ha angahala mātu‘aki mafatukituki ia!

13. Ko e hā na‘e totonu ai mo ‘uhinga lelei ‘a e founga ‘o hono tautea‘i ‘e Sihova ‘a Mōsesé?

 ¹³ Na‘e ‘amanekina ‘e Sihova ‘a e me‘a lahi ange meia Mōsese mo ‘Ēlone koe‘uhí na‘á na tataki ‘a Hono kakaí. (Luke 12:48) ‘I he kuohilí, na‘e ‘ikai faka‘atā ai ‘e Sihova ha to‘utangata fakalūkufua ‘o e kau ‘Isilelí ke nau hū ki he Fonua ‘o e Tala‘ofá koe‘uhí na‘a nau angatu‘u kiate ia. (Nōm. 14:26-30, 34) Ko ia na‘e totonu mo ‘uhinga lelei ‘a hono tautea‘i ‘e Sihova ‘i he founga tatau ‘a Mōsese ‘i he‘ene angatu‘ú. ‘I he hangē pē ko e kau angatu‘u kehé, na‘e ‘ikai ke faka‘atā ‘a Mōsese ke ne hū ki he Fonua ‘o e Tala‘ofá.

14, 15. Ko e hā na‘á ne fakatupunga ‘a Mōsese ke angatu‘u kia Sihová?

¹⁴ Ko e hā na‘á ne fakatupunga ‘a Mōsese ke angatu‘u kia Sihová? Toe fakatokanga‘i angé ‘a e me‘a ‘oku lea‘aki ‘i he Saame 106:32, 33: “Na‘a nau fakahouhau‘i Ia ‘i he vai ‘o Mēlipá, pea na‘e hoko ai ha kovi kia Mōsese koe‘uhí ko kinautolu. Na‘a nau faka‘ita‘i hono laumālié, pea na‘á ne lea ta‘efakakaukau ‘aki hono loungutú.” Ko ia neongo na‘e angatu‘u ‘a e kau ‘Isilelí kia Sihova, ko Mōsese na‘e ‘itá. Na‘e ‘ikai te ne fakahāhā ha mapule‘i-kita ka na‘á ne lea ‘o ‘ikai ke ne fakakaukau ki he ngaahi nunu‘á.

¹⁵ Na‘e ‘ikai ke toe hanga ‘a Mōsese kia Sihova koe‘uhí na‘á ne faka‘atā ke fakahoha‘asi ia ‘e he tō‘onga ‘a e ni‘ihi kehé. ‘I he ‘uluaki taimi na‘e lāunga ai ‘a e kakaí fekau‘aki mo e vaí, na‘e fai ‘e Mōsese ‘a e me‘a na‘e totonú. (‘Eki. 7:6) Kae mahalo pē na‘á ne hela‘ia mo ongo‘i feifeitamaki koe‘uhí na‘e angatu‘u ‘a e kau ‘Isilelí ‘i he ngaahi ta‘u lahi. ‘Oku lava nai ke pehē na‘e fakakaukau pē ‘a Mōsese ‘i he taimi ko ení ki he‘ene ongo‘í kae ‘ikai ki he founga ‘e lava ke ne fakalāngilangi‘i ai ‘a Sihová.

16. Ko e hā ‘oku totonu ai ke tau fakakaukau ki he me‘a na‘e fai ‘e Mōsesé?

¹⁶ Kapau na‘e lava ke fakahoha‘asi pea faiangahala ha palōfita faitōnunga hangē ko Mōsesé, ‘e lavangofua ke hoko ‘a e me‘a tatau kiate kitautolu. Na‘e teu ke hū ‘a Mōsese ki he Fonua ‘o e Tala‘ofá, pea ‘oku teu ke tau hū ki he māmani fo‘oú. (2 Pita 3:13) ‘Oku ‘ikai mo‘oni ke tau loto ke mole ‘a e monū makehe ko iá. Ka ke hū ki he māmani fo‘oú, kuo pau ke hokohoko atu ‘etau hanga kia Sihová pea talangofua ma‘u pē kiate ia. (1 Sio. 2:17) Ko e hā ‘a e ngaahi lēsoni ‘oku lava ke tau ako mei he fehālaaki ‘a Mōsesé?

17. ‘E lava fēfē ke tau faka‘ehi‘ehi mei hono ‘ai ke mole ‘etau mapule‘i-kitá ‘i he taimi ‘oku tau ongo‘i feifeitamaki aí?

¹⁷ ‘Oua ‘e ‘ai ke mole ho‘o mapule‘i-kitá ‘i he taimi ‘okú ke ongo‘i feifeitamaki aí. ‘Oku tau toutou hokosia ‘i he taimi ‘e ni‘ihi ‘a e ngaahi palopalema tatau. Ka ‘oku pehē ‘e he Tohi Tapú: “‘Ai ke ‘oua na‘a tau fo‘i ‘i hono fai ‘a e me‘a ‘oku leleí, he te tau utu ‘i hono taimi totonú kapau he‘ikai ke tau hela‘ia.” (Kal. 6:9; 2 Tes. 3:13) ‘I hono toutou ‘ai kitautolu ‘e ha me‘a pe ko ha taha ke tau ongo‘i feifeitamakí, ‘oku tau fakakaukau ki mu‘a ke tau leá? ‘Oku tau mapule‘i ‘etau ‘itá? (Pal. 10:19; 17:27; Māt. 5:22) ‘I hono faka‘ita‘i kitautolu ‘e he ni‘ihi kehé, ‘oku fiema‘u ke tau ako ke “tuku ia ki he houhaú,” pe faka‘atā ‘a Sihova ke ne fakahāhā ‘ene houhaú. (Lau ‘a e Loma 12:17-21.) ‘Oku ‘uhinga ia ki he hā? ‘I he ‘ikai ke ‘itá, ‘oku tau tatali anga-kātaki kia Sihova ke ne fai ha me‘a fekau‘aki mo ‘etau palopalemá ‘i he taimi ‘okú ne fakakaukau ai ‘oku fiema‘ú. Kapau ‘oku tau feinga ke faisāuni kae ‘ikai hanga kia Sihova, te tau ta‘efaka‘apa‘apa ai kiate ia.

18. Ko e hā ‘oku totonu ke tau manatu‘i fekau‘aki mo e muimui ‘i he ngaahi fakahinohinó?

¹⁸ Muimui fakalelei ki he fakahinohino fakamuimui tahá. ‘Oku tau muimui faitōnunga ki he ngaahi fakahinohino fakamuimui taha kuo ‘omai ‘e Sihova kiate kitautolú? ‘Oku ‘ikai  totonu ke tau hanganaki fai pē ‘a e ngaahi me‘á ‘i he founga kuo tau fai ma‘u pē ‘i he kuohilí koe‘uhí pē ko e me‘a ia kuo tau anga ki aí. ‘I hono kehé, ‘oku totonu ke tau fakavave ke muimui ‘i ha fakahinohino fo‘ou pē ‘oku ‘omai ‘e Sihova kiate kitautolu fakafou ‘i he‘ene kautahá. (Hep. 13:17) Pehē foki, kuo pau ke tau tokanga ke tau “fai pē ki he ngaahi me‘a kuo tohí.” (1 Kol. 4:6) ‘I he‘etau muimui fakalelei ki he ngaahi fakahinohino ‘a Sihová, ‘oku tau hanga ma‘u pē ai kiate ia.

19. ‘E lava fēfē ke tau faka‘ehi‘ehi mei hono faka‘atā ‘a e fehālaaki ‘a e ni‘ihi kehé ke ne maumau‘i ‘etau kaume‘a mo Sihová?

¹⁹ ‘Oua na‘a faka‘atā ‘a e fehālaaki ‘a e ni‘ihi kehé ke ne maumau‘i ho‘o kaume‘a mo Sihová. Kapau ‘oku hokohoko atu ‘etau hanga kia Sihová, he‘ikai ke tau maumau‘i ai ‘etau kaume‘a mo iá pe ‘ita koe‘uhi ko e me‘a ‘oku fai ‘e he ni‘ihi kehé. ‘Oku tautefito ‘ene mahu‘inga ení kapau ‘oku tau ma‘u ha fatongia, hangē ko Mōsesé, ‘i he kautaha ‘a e ‘Otuá. Ko e mo‘oni, ko kitautolu taki taha ‘oku fiema‘u ke tau ngāue mālohi mo talangofua kia Sihova ka ta‘u ma‘u ‘a e fakamo‘uí. (Fil. 2:12) Kae kehe, ko e lahi ange ‘a e fatongia ‘oku tau ma‘ú, ko e lahi ange ia ‘a e me‘a ‘oku ‘amanekina ‘e Sihova meiate kitautolú. (Luke 12:48) Ka ‘o kapau ‘oku tau ‘ofa mo‘oni ‘ia Sihova, he‘ikai ha me‘a te ne ‘ai kitautolu ke tau tūkia pe fakamavahe‘i kitautolu mei he‘ene ‘ofá.​—Saame 119:165; Loma 8:37-39.

20. Ko e hā ‘oku totonu ke tau fakapapau‘i ke faí?

²⁰ ‘Oku tau mo‘ui ‘i he taimi faingata‘a mo palopalema‘ia. Ko ia ‘oku mātu‘aki mahu‘inga ke tau hanga ma‘u pē kia Sihova, ‘a ia ‘okú ne “‘afio ‘i he taloni ‘i he langí,” koe‘uhí ke tau mahino‘i ‘a e me‘a ‘okú ne fiema‘u mai ke tau faí. ‘Oku ‘ikai ‘aupito totonu ke tau faka‘atā ‘a e tō‘onga ‘a e ni‘ihi kehé ke ne maumau‘i ‘etau kaume‘a mo Sihová. Ko e me‘a na‘e hoko kia Mōsesé ‘oku ako‘i mai ai kiate kitautolu ‘a e lēsoni mātu‘aki mahu‘inga ko ení. ‘I he ‘ikai ke ‘ita ‘i hono fai ‘e he ni‘ihi kehé ‘a e ngaahi fehālaakí, tau fakapapau‘i ke tau “hanga . . . kia Sihova ko hotau ‘Otuá kae ‘oua kuó ne fakahaa‘i mai kiate kitautolu ‘a ‘ene hōifuá.”​—Saame 123:1, 2.