1. Ko e hā ‘oku lava ai ke tau pehē ‘oku ‘a Sihova ‘a e me‘a kotoa pē? (Sio ki he ‘uluaki fakatātā ‘i he kupú ni.)

‘OKU ‘a Sihova ‘a e me‘a kotoa pē! ‘Oku ‘a‘ana “‘a e langí, na‘a mo e langi ‘o e ngaahi langí, mo e māmaní pea mo e me‘a kotoa ‘oku ‘i aí.” (Teu. 10:14; Fkh. 4:11) Koe‘uhi ko Sihova na‘á ne fakatupu ‘a e tangatá, ko kitautolú kotoa ko ‘ene koloa. (Saame 100:3) Ka kuo fili ‘e he ‘Otuá ‘a e ni‘ihi mei he kakai kotoa pē kuo faifai pea nau mo‘ui maí ke ‘a‘ana ‘i ha founga makehe.

2. Fakatatau ki he Tohi Tapú, ko hai ‘oku ‘a Sihova ‘i ha founga makehé?

² Ko e fakatātaá, ‘oku fakamatala‘i ‘i he Saame 135 ‘a e kau lotu faitōnunga ‘a Sihova ‘i ‘Isileli ‘o e kuonga mu‘á “ko ‘ene koloa makehe.” (Saame 135:4) Pehē foki, na‘e kikite‘i ‘e Hōsea ‘e hoko ‘a e ni‘ihi ‘oku ‘ikai ko e kau ‘Isileli ko ha kakai ‘a Sihova. (Hōs. 2:23) Na‘e fakahoko ‘a e kikité ni ‘i he taimi na‘e kamata fili ai ‘e Sihova ha kakai na‘e ‘ikai ko e kau ‘Isileli ke nau pule ‘i hēvani fakataha mo Kalaisi. (Ngā. 10:45; Loma 9:23-26) Ko e fa‘ahinga ko ia na‘e pani‘aki ‘a e laumālie mā‘oni‘oní ‘oku ui “ko ha kakai mā‘oni‘oni.” Ko e “koloa makehe” kinautolu ‘a Sihova. (1 Pita 2:9, 10) Kae fēfē ‘a e kau Kalisitiane faitōnunga kotoa ‘i he ‘ahó ni ‘oku nau ‘amanaki ke mo‘ui ta‘engata ‘i he māmaní? ‘Oku toe ui kinautolu ‘e Sihova ko ‘hoku kakai’ mo e ‘fa‘ahinga kuó u fili.’​—‘Ai. 65:22.

3. (a) Ko hai ‘okú ne ma‘u ha vaha‘angatae makehe mo Sihova ‘i he ‘aho ní? (e) Ko e hā te tau lāulea ki ai ‘i he kupu ko ení?

 ³ ‘I he ‘ahó ni, ko e “fanga sipi tokosi‘i,” ‘a ia ‘oku nau ‘amanaki ke mo‘ui ta‘engata ‘i hēvaní, mo e “fanga sipi kehe,” ‘oku nau ‘amanaki ke mo‘ui ta‘engata ‘i māmaní, ‘oku nau lotu fakataha kia Sihova ko e “tākanga pē ‘e taha.” (Luke 12:32; Sione 10:16) ‘Oku tau loto ke fakahaa‘i kia Sihova ‘a ‘etau hounga‘ia ‘i he‘etau ma‘u ha vaha‘angatae makehe mo iá. ‘I he kupu ko ení, te tau lāulea ai ki he founga ‘e lava ke tau fakahāhā ai ‘etau hounga‘ia kia Sihova ‘i he lāngilangi makehe ko ení.

4. ‘E lava fēfē ke tau fakamālō kia Sihova ‘i he‘ene faka‘atā ke tau ma‘u ha vaha‘angatae mo iá, pea na‘e anga-fēfē hono fai ‘e Sīsū ha me‘a meimei tatau?

⁴ ‘Oku tau fakahāhā ‘etau hounga‘ia kia Sihová ‘i he‘etau fakatapui kiate ia pea papitaisó. ‘E lava leva ai ke sio ‘a e tokotaha kotoa ‘oku ‘a Sihova kitautolu pea ‘oku tau loto-lelei ke talangofua kiate ia. (Hep. 12:9) Na‘e fai ‘e Sīsū ha me‘a meimei tatau ‘i he‘ene papitaisó. Neongo na‘á ne ‘osi hoko ko ha konga ‘o ha pule‘anga ‘a ia na‘e fakatapui kia Sihova, na‘á ne foaki atu ia ma‘a Sihova. Ne hangē ia na‘á ne pehē: “Ke fai ho finangaló, ‘e hoku ‘Otua, ko ‘eku holí ia.”​—Saame 40:7, 8, fakamatala ‘i lalo.

5, 6. (a) Ko e hā na‘e lea‘aki ‘e Sihova ‘i he papitaiso ‘a Sīsuú? (e) Ko e hā ‘a e fakatātā ‘e lava ke ne tokoni‘i kitautolu ke tau mahino‘i ‘a e anga ‘o e ongo‘i ‘a Sihova fekau‘aki mo ‘etau fakatapuí?

⁵ Na‘e fēfē ‘a e ongo‘i ‘a Sihová ‘i he papitaiso ‘a Sīsuú? ‘Oku pehē ‘i he Tohi Tapú: “‘I he hili hono papitaisó, na‘e mālanga hake leva ‘a Sīsū mei he vaí; pea vakai, na‘e fakaava hifo ‘a e langí, peá ne mamata ki he laumālie ‘o e ‘Otuá ‘oku ‘alu hifo kiate ia ‘o hangē ha lupé. Vakai! Na‘e ‘i ai mo ha le‘o mei he langí na‘e pehē mai: ‘Ko hoku ‘Aló eni, ‘a e ‘ofeiná, ‘a ia kuó u hōifua aí.’” (Māt. 3:16, 17) Na‘e ‘osi hoko pē ‘a Sīsū ko e me‘a ‘a e ‘Otuá. Ka na‘e fiefia ‘a Sihova ‘i he‘ene sio na‘e loto-lelei ‘a Sīsū ke ne ngāue‘aki ‘ene mo‘uí ke tauhi pē kiate Iá. ‘Oku toe hōifua ‘a Sihova ‘i he‘etau fakatapui ‘etau mo‘uí kiate iá, pea te ne tāpuaki‘i kitautolu.​—Saame 149:4.

⁶ Ka ‘oku ‘a Sihova ‘a e me‘a kotoa pē! Ko e hā ‘e lava ke tau foaki kiate iá? Sioloto atu ki ha tangata ‘oku ‘i ai ha‘ane ngoue matala‘i‘akau faka‘ofo‘ofa. ‘I he ‘aho ‘e taha ‘oku paki‘i ai ‘e hono ki‘i ‘ofefiné ha taha ‘o e ngaahi matala‘i‘akaú ‘o ‘oange kiate ia. Neongo ko e matala‘i‘akau pē ia ‘a‘ana, ‘oku fiefia ‘a e tamai ‘ofá ‘i he me‘a‘ofá. ‘Oku fakahaa‘i ai ‘oku ‘ofa ‘iate ia ‘a hono ‘ofefiné. Ko e matala‘i‘akau ko ia mei hono ‘ofefiné ‘oku mahu‘inga ange ia kiate ia ‘i he ngaahi matala‘i‘akau kehe kotoa ‘i he‘ene ngoué. ‘I he founga meimei tatau, ‘oku fiefia ‘a Sihova ‘i he‘etau loto-lelei ke fakatapui ‘etau mo‘uí kiate iá.​—‘Eki. 34:14.

7. ‘Oku anga-fēfē hono tokoni‘i kitautolu ‘e Malakai ke tau mahino‘i ‘a e anga ‘o e ongo‘i ‘a Sihova fekau‘aki mo e fa‘ahinga ‘oku nau tauhi loto-lelei kiate iá?

⁷ Lau ‘a e Malakai 3:16. Ko e hā ‘oku mātu‘aki mahu‘inga ai ke fakatapui ho‘o mo‘uí kia Sihova peá ke papitaisó? Ko e mo‘oni mei he mōmeniti pē ‘o e kamata ‘a ho‘o mo‘uí, kuó ke ‘osi hoko ai ko e me‘a ‘a ho Tokotaha-Fakatupú, ‘a Sihova. Kae fakakaukau atu pē ki he fiefia ‘a Sihova ‘i ho‘o tali ia ke ne hoko ko ho Pule peá ke fakatapui kiate iá! (Pal. 23:15) ‘Oku ‘ilo‘i ‘e Sihova ‘a e fa‘ahinga ‘oku nau tauhi loto-lelei kiate iá, pea ‘okú ne hiki ‘a honau hingoá ‘i he‘ene “tohi ‘o e manatú.”

8, 9. Ko e hā ‘oku fiema‘u ‘e Sihova mei he fa‘ahinga ‘oku hiki honau hingoá ‘i he‘ene “tohi ‘o e manatú”?

⁸ Kapau ‘oku tau loto ke tu‘u ma‘u ai pē hotau hingoá ‘i he ‘tohi ‘o e manatu’ ‘a Sihová, ‘oku ‘i ai ‘a e me‘a kuo pau ke tau fai. Na‘e pehē ‘e Malakai kuo pau ke tau manavahē kia Sihova pea fakalaulauloto ki hono huafá. Kapau ‘oku tau lotu ki ha toe taha pe ko ha toe me‘a kehe,  ‘e to‘o ‘a hotau hingoá mei he tohi ‘a Sihová!​—‘Eki. 32:33; Saame 69:28.

⁹ Ko ia ‘oku ‘ikai fe‘unga pē ke tau palōmesi ke fai ‘a e finangalo ‘o Sihová pea hoko atu ai ‘o papitaiso. Ko e me‘a eni ‘oku tau fai tu‘o taha pē, ka ko e lotu kia Sihová ko ha founga ia ‘o e mo‘uí. ‘I he ‘aho kotoa pē, lolotonga ‘etau mo‘uí, kuo pau ke tau fakamo‘oni‘i ‘aki ‘etau ngaahi ngāué ‘oku tau talangofua kia Sihova.​—1 Pita 4:1, 2.

10. Ko e hā ‘a e faikehekehe kuo pau ke hā mahino ‘i he vaha‘a ‘o e fa‘ahinga ‘oku nau tauhi kia Sihová mo e fa‘ahinga ‘oku ‘ikaí?

¹⁰ ‘I he kupu ki mu‘á, na‘a tau ‘ilo ai ko Keini, Solomone, mo e kau ‘Isilelí na‘a nau taukave‘i ‘oku nau lotu kia Sihova ka na‘e ‘ikai te nau mateaki kiate ia. Ko e ngaahi fakatātā ko ení na‘e ako‘i mai ai ‘oku ‘ikai fe‘unga ke tau pehē pē ‘oku tau lotu kia Sihova. ‘Oku fiema‘u ke tau fehi‘a ‘i he me‘a ‘oku koví pea ‘ofa ‘i he me‘a ‘oku leleí. (Loma 12:9) ‘Oku pehē ‘e Sihova ‘e hā mahino ‘a e faikehekehe “‘i he vaha‘a ‘o e tokotaha ‘oku mā‘oni‘oní mo e tokotaha ‘oku anga-fulikivanú, ‘i he vaha‘a ‘o e tokotaha ‘oku tauhi ki he ‘Otuá mo e tokotaha ‘oku ‘ikai tauhi kiate iá.”​—Mal. 3:18.

11. Ko e hā ‘oku totonu ai ke faingofua ‘a e sio mai ‘a e tokotaha kotoa ‘oku tau lotu kia Sihova pē?

¹¹ ‘Oku tau hounga‘ia ‘ia Sihova ‘i he‘ene fili kitautolu ke tau hoko ko ‘ene kakaí! ‘Oku totonu ke faingofua ‘a e sio mai ‘a e tokotaha kotoa ‘oku tau kau mo Sihová. (Māt. 5:16; 1 Tīm. 4:15) ‘Eke hifo: ‘‘Oku lava ke sio mai ‘a e ni‘ihi kehé ‘oku ou mateaki faka‘aufuli kia Sihova? ‘Oku ou laukau‘aki ‘a hono tala ki he kakaí ko e taha au ‘o e Kau Fakamo‘oni ‘a Sihová?’ Sioloto atu ki he mamahi ‘e ongo‘i ‘e Sihová kapau ‘oku tau mā ke tala ki he ni‘ihi kehé ‘oku ‘a‘ana kitautolu.​—Saame 119:46; lau ‘a e Ma‘ake 8:38.

12, 13. Kuo anga-fēfē hono ‘ai ‘e he ni‘ihi ke faingata‘a hono ‘ilo‘i kinautolu ko e Kau Fakamo‘oni ‘a Sihová?

¹² Ko e me‘a fakamamahí, ‘oku a‘u ‘o fa‘ifa‘itaki ‘a e Kau Fakamo‘oni ‘e ni‘ihi ki he “laumālie ‘o e māmaní.” Ko hono olá, ‘oku ‘ikai te nau fu‘u kehe mei he fa‘ahinga ‘oku ‘ikai te nau lotu kia Sihová. (1 Kol. 2:12) “Ko e laumālie ‘o e māmaní” ‘okú ne ‘ai ‘a e kakaí ke nau tokangataha  ki he‘enau ngaahi holi siokitá. (‘Ef. 2:3) Ko e fakatātaá, neongo ‘a e fale‘i kotoa kuo tau ma‘ú, ‘oku fili pē ‘a e ni‘ihi ia ke ‘ai vala ta‘efakanānā. ‘Oku nau tui ‘a e vala ‘oku maha‘iha‘i mo aata, na‘a mo e ‘i he ngaahi fakatahataha faka-Kalisitiané. Pe ‘oku nau fili ke ‘ai ‘a e sitaila ‘ulu faikehe. (1 Tīm. 2:9, 10) Ko hono olá, ‘e faingata‘a nai ai ke ‘ilo‘i ‘e he ni‘ihi kehé pe ko e Kau Fakamo‘oni ‘a Sihova kinautolu pe ‘ikai.​—Sēm. 4:4.

¹³ ‘Oku ‘i ai ‘a e ngaahi founga kehe kuo ‘ikai ke hā mahino ai ‘a e kehe ‘a e Kau Fakamo‘oni ‘e ni‘ihi mei he māmaní. Ko e fakatātaá, ‘i he ngaahi pātí, kuo tisikou ai ‘a e ni‘ihi pea nau fai ha tō‘onga ‘oku ‘ikai ala tali ke fai ‘e he kau Kalisitiané. Kuo pousi ‘e he ni‘ihi ‘a honau ngaahi tā pea ‘oatu ai ‘a e fakamatala ‘i he mītia fakasōsialé ‘a ia ‘oku fakae‘a ai ‘enau fakakaukau fakakakanó. Kuo ‘ikai nai ke akonaki‘i kinautolu ‘i he fakataha‘anga Kalisitiané ki ha angahala mamafa, ka ‘e lava ke nau hoko ko ha tākiekina kovi ki honau fanga tokoua mo e fanga tuofāfine ‘a ē ‘oku nau feinga mālohi ke kehe mei he māmaní.​—Lau ‘a e 1 Pita 2:11, 12.

14. Ko e hā kuo pau ke tau fai ke malu‘i ai ‘etau kaume‘a makehe mo Sihová?

¹⁴ ‘Oku fa‘ufa‘u ‘a e me‘a kotoa pē ‘i he māmaní ke ‘ai kitautolu ke tau tokangataha ki he “holi ‘o e kakanó pea mo e holi ‘o e matá pea mo e fiehā‘aki ‘a e me‘a ‘okú te ma‘ú.” (1 Sio. 2:16) ‘Oku ‘a Sihova kitautolu, ko ia ai ‘oku tau kehe. ‘Oku tau “taliteke‘i ‘a e anga-ta‘efaka‘otuá mo e ngaahi holi fakamāmaní,” pea ‘oku tau “mo‘ui ‘aki ‘a e fakakaukau leleí mo e mā‘oni‘oní mo e anga-lī‘oa faka‘otuá ‘i he lotolotonga ‘o e fokotu‘utu‘u lolotonga ko ‘ení.” (Tai. 2:12) Ko ‘etau founga mo‘uí kotoa, ‘o kau ai ‘a e anga ‘o ‘etau talanoá, kaí, inú, ‘ai valá, mo e ngāué, ‘oku totonu ke ne ‘ai ke mahino ki he tokotaha kotoa ‘oku ‘a Sihova kitautolu.​—Lau ‘a e 1 Kolinitō 10:31, 32.

15. Ko e hā ‘oku totonu ai ke tau anga-lelei mo anga-‘ofa ki he kau Kalisitiane kehé?

¹⁵ ‘Oku tau fakahaa‘i ‘etau fakamahu‘inga‘i ‘a e kaume‘a mo Sihová ‘i he anga ‘o ‘etau fakafeangai ki hotau fanga tokouá mo e fanga  tuofāfiné. ‘Oku ‘a Sihova kinautolu, ‘o hangē pē ko kitautolú. Kapau ‘oku tau manatu‘i ‘a e mo‘oni‘i me‘a ko ení, te tau fakafeangai ma‘u pē kiate kinautolu ‘i he anga-lelei mo e anga-‘ofa. (1 Tes. 5:15) ‘Oku mahu‘inga fēfē eni? Na‘e pehē ‘e Sīsū ki hono kau muimuí: “Ko e me‘a eni ‘e ‘ilo ai ‘e he fa‘ahinga kotoa ko ‘eku kau ākonga kimoutolú​—‘o kapau ‘oku mou ma‘u ‘a e ‘ofá ‘i homou lotolotongá.”​—Sione 13:35.

16. Ko e hā ‘oku tau ako mei he Lao ‘a Mōsesé fekau‘aki mo e ‘ofa ‘a Sihova ki hono kakaí?

¹⁶ ‘E lava ke tokoni‘i kitautolu ke tau mahino‘i ‘a e founga ‘oku totonu ke tau fakafeangai‘aki ki he ni‘ihi kehe ‘i he fakataha‘angá ‘i ha fakatātā mei he Lao ‘a Mōsesé. ‘I he temipale ‘o Sihová, na‘e ‘i ai ‘a e ngaahi naunau na‘e ngāue‘aki tāfataha pē ki he lotú. Na‘e fakamatala‘i mahino ‘i he Laó ‘a e founga ‘oku totonu ke tokanga‘i ‘aki ‘e he kau Līvaí ‘a e ngaahi naunau ko iá, pea ko ha taha pē na‘e ‘ikai ke muimui ‘i he ngaahi fakahinohino ko ení na‘e tāmate‘i. (Nōm. 1:50, 51) Kapau na‘e tokanga lahi ‘a Sihova ki he anga ‘o e fakafeangai ‘a e kakaí ki he ngaahi me‘a na‘e ngāue‘aki ‘i he‘ene lotú, huanoa ange ai ‘a ‘ene tokanga ki he anga ‘o e fakafeangai ‘a e kakaí ki he‘ene kau lotu mateaki ‘osi fakatapuí! ‘Okú ne ‘ai ke tau ‘ilo‘i ‘oku tau mahu‘inga kiate ia ‘i he‘ene pehē: “‘Ilonga ‘a ia te ne ala kiate kimoutolú ‘okú ne ala ki hoku tama‘imatá.”​—Sāk. 2:8.

17. Ko e hā ‘oku “tokanga mo fanongo” ki ai ‘a Sihová?

¹⁷ Na‘e pehē ‘e Malakai ko Sihová ‘okú ne “tokanga mo fanongo” ki he anga ‘o e fefakafeangai‘aki ‘a hono kakaí. (Mal. 3:16) “‘Oku ‘afio‘i ‘e Sihova ‘a e fa‘ahinga ‘oku ha‘aná.” (2 Tīm. 2:19) ‘Okú ne mātu‘aki lāu‘ilo ki he me‘a kotoa pē ‘oku tau fai mo lea‘akí. (Hep. 4:13) ‘I he taimi ‘oku ‘ikai ke tau anga-lelei ai ki hotau fanga tokouá mo e fanga tuofāfiné, ‘oku fakatokanga‘i ia ‘e Sihova. Ka ‘oku lava ke tau fakapapau‘i ‘oku toe fakatokanga‘i foki ‘e Sihova ‘a e taimi ‘oku tau anga-talitali kakai, nima-homo, fakamolemole, mo anga-lelei aí.​—Hep. 13:16; 1 Pita 4:8, 9.

18. ‘E lava fēfē ke tau fakamālō kia Sihova ‘i he‘ene fili kitautolu ke tau hoko ko ‘ene kakaí?

¹⁸ ‘Oku tau loto ke fakahāhā kia Sihova ‘etau hounga‘ia ‘i he hoko ko e me‘a ‘a‘ana ‘i he tu‘unga ko hono kakai. ‘Oku tau ‘ilo‘i ‘i he taimi ‘oku tau fakatapui ai ‘etau mo‘uí kiate iá, ko e fili fakapotopoto taha ia na‘e lava ke tau faí. Neongo ‘oku tau mo‘ui “‘i he lotolotonga ‘o ha to‘utangata pikopiko mo mio‘i,” ‘e kei lava pē ke tau hoko “‘o ta‘ehalaia mo tonuhia” pea ulo atu “ko e ngaahi maama‘anga ‘i he māmaní.” (Fil. 2:15) Ko ia ‘oku tau fakapapau‘i ke faka‘ehi‘ehi mei hono fai ha me‘a pē ‘oku fehi‘a ai ‘a Sihova. (Sēm. 4:7) Pea ‘oku tau ‘ofa mo faka‘apa‘apa‘i hotau fanga tokouá mo e fanga tuofāfiné koe‘uhí ‘oku ‘a Sihova foki mo kinautolu.​—Loma 12:10.

19. ‘Oku anga-fēfē hono fakapale‘i ‘e Sihova ‘a e fa‘ahinga ‘oku ‘a‘aná?

¹⁹ ‘Oku tala‘ofa mai ‘i he Tohi Tapú: “He‘ikai ke si‘aki ‘e Sihova ‘a hono kakaí.” (Saame 94:14) Ko ha fakapapau‘i‘anga eni. Tatau ai pē pe ko e hā ‘e hokó, ‘e kau ‘a Sihova mo kitautolu. Neongo kapau te tau mate, he‘ikai ngalo kitautolu ‘iate ia. (Loma 8:38, 39) “Kapau ‘oku tau mo‘ui, ‘oku tau mo‘ui ma‘a Sihova, pea kapau ‘oku tau mate, ‘oku tau mate ma‘a Sihova. Ko ia pe ‘oku tau mo‘ui pe ‘oku tau mate, ‘oku ‘a Sihova ‘a kitautolu.” (Loma 14:8) ‘Oku tau fakatu‘amelie atu ki he taimi ‘a ia ‘e toe fakamo‘ui ai ‘e Sihova ‘a hono ngaahi kaume‘a mateaki kotoa kuo nau maté. (Māt. 22:32) Pea na‘a mo e taimí ni ‘oku tau ma‘u ai ‘a e ngaahi me‘a‘ofa fisifisimu‘a lahi mei he‘etau Tamaí. Hangē ko e lau ‘a e Tohi Tapú, “fiefia ē ko e pule‘anga ‘a ia ko honau ‘Otuá ‘a Sihová, ‘a e kakai kuó ne fili ko ‘ene me‘a ‘a‘aná.”​—Saame 33:12.