1. Ko e hā ‘oku fiema‘u ai ke tau mateuteu ki he fakatangá?

‘I HE pō ki mu‘a ke tāmate‘i hotau ‘Eiki ko Sīsuú, na‘á ne pehē ko e fa‘ahinga kotoa ‘oku nau fili ke hoko ko ‘ene kau ākongá ‘e fehi‘anekina‘i. (Sione 17:14) Mei he taimi ko iá ‘o a‘u mai ki he ‘ahó ni, ko e Kau Fakamo‘oni Kalisitiane faitōnunga ‘a Sihová kuo fakatanga‘i ‘e he fa‘ahinga ‘oku nau fakafepaki‘i ‘a e lotu mo‘oní. (2 Tīm. 3:12) ‘I he toe faka‘a‘au ke ofi ange ‘a e ngata‘anga ‘o e fokotu‘utu‘u ko ení, ‘oku tau ‘amanekina ‘e lahi ange hono fakafepaki‘i kitautolu ‘e hotau ngaahi filí.​—Māt. 24:9.

2-3. (a) Ko e hā ‘oku totonu ke tau ‘ilo‘i fekau‘aki mo e manavaheé? (e) Ko e hā te tau lāulea ki ai ‘i he kupu ko ení?

² ‘E lava fēfē ke tau teu‘i kitautolu he taimí ni ke fehangahangai mo e fakatangá? ‘Oku ‘ikai fiema‘u ia ke tau sioloto atu ki he me‘a kotoa ‘e lava ke hoko mai kiate kitautolú. Kapau ‘e pehē, ‘e lava ke lōmekina kitautolu ‘e he manavaheé mo e loto-mo‘uá. ‘E lava ke tau faka‘atā ‘a e ngaahi fakamanamaná ke ne ikuna‘i kitautolu na‘a mo e ki mu‘a ke hoko mai ha ‘ahi‘ahi mo‘oní. (Pal. 12:25; 17:22) Ko e manavaheé ko e me‘atau mālohi ia ‘oku ngāue‘aki ‘e hotau “filí, ‘a e Tēvoló” ke fakafepaki‘i ‘aki kitautolú. (1 Pita 5:8, 9) Ko e hā ‘e lava ke tau fai he taimí ni ke fakaivimālohi‘i ai kitautolú?

³ ‘I he kupu ko ení, te tau lāulea ai ki he founga ‘e lava ke tau fakaivimālohi‘i ai hotau vaha‘angatae mo Sihová mo e ‘uhinga ‘oku mātu‘aki mahu‘inga ai ke tau fai ia he taimi ní. Te tau toe lāulea ki he me‘a ‘e lava ke tau fai ke langa hake ai ‘etau loto-to‘á. Pea faka‘osí, te tau sivisivi‘i ‘a e founga ‘e lava ke tau fekuki ai mo e fehi‘anekina mei he kau fakafepakí.

4. Fakatatau ki he Hepelū 13:5, 6, ko e hā kuo pau ke tau tuipau fekau‘aki mo iá, pea ko e hā hono ‘uhingá?

⁴ Hoko ‘o tuipau ‘oku ‘ofa ‘a Sihova ‘iate koe pea he‘ikai ‘aupito te ne li‘aki koe. (Lau ‘a e Hepelū 13:5, 6.) ‘I he ngaahi ta‘u kuo  maliu atú, na‘e pehē ‘i he The Watchtower: “Ko e tokotaha ‘okú ne ‘ilo‘i lelei taha ‘a e ‘Otuá te ne falala lahi taha kiate Iá ‘i he taimi ‘o e ‘ahi‘ahí.” He mo‘oni ē ko ia! Ke fehangahangai lavame‘a mo e fakatangá, kuo pau ke tau ‘ofa kia Sihova mo falala kakato kiate ia, pea ‘oua ‘aupito ‘e veiveiua ‘i he‘ene ‘ofa ‘iate kitautolú.​—Māt. 22:36-38; Sēm. 5:11.

5. Ko e hā ‘e tokoni kiate koe ke ke hokosia ai ‘a e ‘ofa ‘a Sihová?

⁵ Lau faka‘aho ‘a e Tohi Tapú mo e taumu‘a ke ‘unu‘unu ke toe ofi ange kia Sihova. (Sēm. 4:8) ‘I ho‘o laú, tokangataha ki he ngaahi ‘ulungaanga fakaalaala ‘o Sihová. Feinga ke mahino‘i ‘a e lahi ‘o ‘ene ‘ofa ‘iate koé ‘i ho‘o lau fekau‘aki mo e me‘a ‘okú ne lea‘aki mo faí. (‘Eki. 34:6) ‘Oku fāinga nai ‘a e ni‘ihi ke tui ‘oku ‘ofa ‘a e ‘Otuá ‘iate kinautolu koe‘uhi kuo te‘eki ai ‘aupito ke fakahāhā ange ha ‘ofa kiate kinautolu. Kapau ‘okú ke fehangahangai mo e pole ko iá, feinga ke hiki ‘i he ‘aho taki taha ‘a e ngaahi founga kuo fakahāhā mai ai ‘e Sihova ‘ene mēsí mo e anga-leleí kiate koé. (Saame 78:38, 39; Loma 8:32) ‘I ho‘o fakakaukau ki ho‘o ngaahi hokosiá tonu pea fakalaulauloto ki he me‘a kuó ke lau ‘i he Folofola ‘a e ‘Otuá, ngalingali te ke malava ai ke hiki ‘a e ngaahi me‘a lahi kuo fai ‘e Sihova ma‘aú. Ko e lahi ange ho‘o hounga‘ia ‘i he me‘a ‘oku fai ‘e Sihová, ko e mālohi ange ia ho vaha‘angatae mo iá.​—Saame 116:1, 2.

6. Fakatatau ki he Saame 94:17-19, ‘e lava fēfē ke tokoni‘i koe ‘e he lotu loto-mo‘oní?

⁶ Lotu ma‘u pē. Sioloto atu ki ha ki‘i tamasi‘i ‘okú ne fā‘ofua māfana ki he‘ene tamaí. ‘Oku ongo‘i malu mo‘oni ‘a e ki‘i tamasi‘í ‘o ne talanoa tau‘atāina ki he‘ene tamaí fekau‘aki mo e me‘a lelei mo e kovi na‘e hoko kiate ia he ‘aho ko iá. ‘E lava ke ke ma‘u ‘a e vaha‘angatae tatau kapau te ke ‘unu‘unu ofi kia Sihova ‘i he lotu loto-mo‘oni ‘i he ‘aho taki taha. (Lau ‘a e Saame 94:17-19.) ‘I ho‘o lotu kia Sihová, “hua‘i atu ho lotó ‘o hangē ha vaí” pea tala ki ho‘o Tamai anga-‘ofá ‘a e kotoa ho‘o ngaahi manavaheé mo e loto-mo‘uá. (Tangi. 2:19) Ko e hā ‘a e olá? Te ke hokosia ‘a e me‘a ‘oku ui ‘e he Tohi Tapú “ko e nonga ‘a e ‘Otuá ‘a ia ‘oku fakalaka atu ‘i he mahino kotoa pē.” (Fil. 4:6, 7) Ko e lahi ange ho‘o lotu ‘i he founga ko ení, ko ho‘o ongo‘i ofi ange ia kia Sihová.​—Loma 8:38, 39.

7. Ko e hā kuo pau ai ke ke tuipau ko e ngaahi tala‘ofa ‘a e ‘Otuá fekau‘aki mo hono Pule‘angá ‘e hoko mo‘oni?

⁷ Hoko ‘o tuipau ko e ngaahi tāpuaki ‘a e Pule‘anga ‘o e ‘Otuá ‘e hoko mo‘oni. (Nōm. 23:19) Kapau ‘oku vaivai ho‘o tui ki he ngaahi tala‘ofa peheé, ‘e faingofua ange ai kia Sētane mo ‘ene kau fakafofongá ke nau fakamanavahee‘i koe. (Pal. 24:10; Hep. 2:15) ‘E lava fēfē ke ke fakaivimālohi‘i ho‘o tuipau ki he Pule‘anga ‘o e ‘Otuá he taimí ni? Vahe‘i ha taimi ke fekumi ai ki he ngaahi tala‘ofa ‘a e ‘Otuá fekau‘aki mo hono Pule‘angá mo e ‘uhinga ‘oku lava ke ke fakapapau‘i ai ‘e hoko mo‘oní. ‘E anga-fēfē ‘a e tokoni ‘a e me‘á ni? Fakakaukau ki he fa‘ifa‘itaki‘anga ‘a Stanley Jones, na‘e tuku pilīsone ‘i he ta‘u ‘e fitu koe‘uhi ko ‘ene tuí. * Ko e hā na‘á ne tokoni‘i ia ke ne kātaki faitōnungá? Na‘á ne pehē: “Ko e hoko ‘o fakaivimālohi‘i ‘e he ‘ilo fekau‘aki mo e pule‘anga ‘o e ‘Otuá, tuipau fekau‘aki mo iá, ‘o ‘ikai ‘aupito ha veiveiua ‘e taha, na‘á ku tu‘uma‘u ai.”  Kapau ‘okú ke ma‘u ha tui mālohi ki he ngaahi tala‘ofa ‘a e ‘Otuá, te ke ‘unu‘unu ofi ange ai kia Sihova pea he‘ikai te ke hoko ai ‘o manavahē.​—Pal. 3:25, 26.

8. Ko ‘etau vakai ki hono ma‘u ‘a e ngaahi fakatahá ko e faka‘ilonga lelei ia ‘o e hā? Fakamatala‘i.

⁸ Ma‘u ma‘u pē ‘a e ngaahi fakataha faka-Kalisitiané. Ko e ngaahi fakatahá ‘oku tokoni‘i ai kitautolu ke ‘unu‘unu ofi ange kia Sihova. Ko ‘etau vakai ki hono ma‘u ‘a e ngaahi fakatahá ko e faka‘ilonga lelei ia ki he founga ‘e lava ke tau fekuki lavame‘a ai mo e fakatangá ‘i he kaha‘ú. (Hep. 10:24, 25) He ko e hā hono ‘uhingá? Kapau te tau faka‘atā ‘a e fanga ki‘i fakafaingata‘a‘ia‘anga īkí ke ne ta‘ofi kitautolu mei hono ma‘u ‘a e ngaahi fakatahá he taimí ni, ko e hā ‘e hoko ‘i he kaha‘ú kapau ‘e fiema‘u ke tuku ‘etau mo‘ui ke ‘i ha tu‘unga fakatu‘utāmaki ke fakatahataha mo hotau kaungātuí? ‘I he tafa‘aki ‘e tahá, kapau te tau fakatupulekina ha fakapapau mālohi ke ma‘u ‘a e ngaahi fakatahá, he‘ikai ke tau fo‘i ‘i he feinga ‘a e kau fakafepakí ke ta‘ofi kitautolu mei he fakatahataha fakatahá. Ko e taimi eni ke fakatupulekina ai ‘a e ‘ofa ‘i he‘etau ngaahi fakatahá. ‘I he‘etau ma‘u ‘a e ‘ofa ko ia ki he‘etau ngaahi fakatahá, he‘ikai ta‘ofi kitautolu ‘e he fakafepakí, na‘a mo ha tapui fakapule‘anga, mei he talangofua ki he ‘Otuá kae ‘ikai ki he tangatá.​—Ngā. 5:29.

9. Ko e hā ko ha founga lelei ai ke mateuteu ki he fakatangá ‘a hono ako ma‘uloto ‘a e ngaahi veesi Tohi Tapú?

⁹ Ako ma‘uloto ho‘o ngaahi veesi Tohi Tapu manakó. (Māt. 13:52) He‘ikai nai ke fu‘u haohaoa ho‘o manatú, ka ‘e lava ke ngāue‘aki ‘e Sihova hono laumālie mā‘oni‘oni mālohí ke fakamanatu atu kiate koe ‘a e ngaahi veesi Tohi Tapu ko iá. (Sione 14:26) Fakatokanga‘i ‘a e me‘a na‘e lea‘aki ‘e ha tokoua na‘e tuku pilīsone ‘i Siamane Hahake pea ‘ave ki ha kemi fakamamahi: “He tāpuaki ē ko ia ‘i he taimi ko iá ne u ‘osi ma‘uloto ‘a e ngaahi veesi Tohi Tapu ‘e lauingeau! Neongo na‘á ku toko taha, na‘á ku hanganaki fakalaulauloto ki he ngaahi kaveinga kehekehe ‘i he Tohi Tapú.” Ko e ngaahi veesi Tohi Tapu ko iá na‘á ne tokoni‘i hotau tokouá ke nofo ofi kia Sihova​—pea ke kātaki faitōnunga.

10. Ko e hā ‘oku totonu ai ke tau ako ma‘uloto ‘a e ngaahi hivá?

¹⁰ Ako ma‘uloto mo hiva‘i ‘a e ngaahi hiva fakahīkihiki kia Sihová. ‘I hono tuku pilīsone ‘i Filipaí, na‘e hiva‘i ‘e Paula mo Sailosi ‘a e ngaahi hiva fakalaumālie ‘a ia na‘á na ma‘uloto. (Ngā. 16:25) ‘I he tu‘unga meimei tatau, ‘i he taimi na‘e ‘ave fakamālohi ai hotau fanga tokoua ‘i he Sovieti ‘Iunioni ki mu‘á ki Saipīliá, na‘e anga-fēfē ‘enau fakaivimālohi‘i kinautolú? Na‘e manatu‘i ‘e Tuofefine Mariya Fedun: “Na‘a mau hiva‘i ‘a e ngaahi hiva kotoa na‘a mau ‘ilo‘í, ‘a e ngaahi hiva mei he  tohi hivá.” Na‘á ne pehē na‘e fakalototo‘a‘i ‘e he ngaahi hiva ko iá kinautolu kotoa pea tokoni ke nau ongo‘i ofi ange kia Sihova. ‘Okú ke ongo‘i mālohi ange ‘i he taimi ‘okú ke hiva‘i ai ho‘o hiva fakalaumālie manakó? Pe‘i ako ma‘uloto ‘a e ngaahi hiva ko iá he taimí ni!​—Sio ki he puha “ ‘Omi ‘a e Loto-To‘a.”

11-12. (a) Fakatatau ki he 1 Sāmiuela 17:37, 45-47, ko e hā na‘e loto-to‘a ai ‘a Tēvitá? (e) Ko e hā ‘a e lēsoni mahu‘inga ‘oku tau ako mei he fa‘ifa‘itaki‘anga ‘a Tēvitá?

¹¹ Ke fehangahangai mo e fakatangá, ‘oku fiema‘u kiate koe ‘a e loto-to‘a. Kapau ‘okú ke ongo‘i ‘oku ‘ikai te ke ma‘u ‘a e ‘ulungaanga ko iá, ko e hā ‘e lava ke ke faí? Manatu‘i ko e loto-to‘a mo‘oní ‘oku ‘ikai fakatu‘unga ia ‘i ho lahí, mālohí pe malavá. Fakakaukau ki he fakatātā fekau‘aki mo ki‘i Tēvita ‘i he‘ene fehangahangai mo Kolaiaté. ‘I hono fakahoa atu ki he fu‘u saianiti ko iá, ko Tēvita na‘á ne si‘isi‘i ange, vaivai ange pea ‘ikai lelei ‘ene me‘ataú. Na‘e ‘ikai ke ‘i ai ha‘ane heletā. Ka, na‘á ne mātu‘aki loto-to‘a. Na‘e lele atu ‘a Tēvita ‘i he loto-to‘a ke tau‘i ‘a e fu‘u saianiti hīkisia ko iá.

¹² Ko e hā na‘e mātu‘aki loto-to‘a ai ‘a Tēvitá? Na‘á ne tuipau mo‘oni na‘e kau ‘a Sihova mo ia. (Lau ‘a e 1 Sāmiuela 17:37, 45-47.) Na‘e ‘ikai tokangataha ‘a Tēvita ia ki he fu‘u lahi ‘o Kolaiaté ‘i hono fakahoa kiate iá. ‘I hono kehé, na‘á ne tokangataha ki he valevale fau ‘o Kolaiaté ‘i hono fakahoa atu kia Sihová. Ko e hā ‘oku tau ako mei he fakamatala ko ení? Te tau ongo‘i loto-to‘a kapau ‘oku tau tuipau ‘oku kau ‘a Sihova mo kitautolu pea ‘oku tau fakapapau‘i ko hotau kau fakafepakí ‘oku nau valevale fau ‘i hono fakahoa atu ki he ‘Otua Māfimafi-Aoniú. (2 Kal. 20:15; Saame 16:8) ‘E lava fēfē ke tau langa hake ‘etau loto-to‘á he taimí ni​—ki mu‘a ke hoko mai ‘a e fakatangá?

13. ‘E lava fēfē ke tau langa hake ‘etau loto-to‘á? Fakamatala‘i.

¹³ ‘E lava ke tau langa hake ‘etau loto-to‘á he taimí ni ‘i hono malanga‘i fakahāhā ‘a e ongoongo lelei ‘o e Pule‘anga ‘o e ‘Otuá. Ko e hā hono ‘uhingá? Koe‘uhi ko e ngāue fakamalangá ‘oku ako‘i ai kitautolu ke falala kia Sihova pea iku‘i ha fa‘ahinga manavahē tangata pē. (Pal. 29:25) Hangē pē ko hono fakaivimālohi‘i ‘e he fakamālohisinó hotau uouá, ko ‘etau loto-to‘á ‘oku fakaivimālohi‘i ia ‘i he taimi ‘oku tau malanga ai ‘i he fale ki he falé, ‘i he feitu‘u kakaí, ‘i he founga ‘ikai anga-mahení mo e ngaahi feitu‘u pisinisí. Kapau te tau fakatupulekina ‘a e loto-to‘a he taimí ni ke malangá, te tau mateuteu lelei ai ke hanganaki malanga na‘a mo e taimi ‘e tapui ai ‘etau ngāué.​—1 Tes. 2:1, 2.

14-15. Ko e hā ‘a e ngaahi lēsoni ‘e lava ke tau ako meia Nancy Yuen mo Valentina Garnovskaya?

 ¹⁴ ‘E lava ke tau ako ‘a e me‘a lahi mei he fa‘ifa‘itaki‘anga ‘a e ongo tuofāfine faitōnunga na‘á na fakahāhā ‘a e loto-to‘a makehe. Ko Nancy Yuen ‘a ia ‘oku fute pē ‘e nima (mita ‘e 1.5) hono lōloá, ka na‘e ‘ikai ke ne ilifiangofua. * Na‘á ne fakafisi ke tuku ‘ene malanga‘i ‘a e ongoongo lelei ‘o e Pule‘anga ‘o e ‘Otuá. Ko hono olá, na‘e tuku pilīsone ia ‘i he ta‘u ‘e 20 nai ‘i Siaina Kominiusi. Ko e kau ma‘u mafai na‘a nau faka‘eke iá na‘a nau pehē ko e “tokotaha ongongata‘a taha ia” ‘i honau fonuá!

¹⁵ ‘I he tu‘unga meimei tatau, ko Valentina Garnovskaya na‘e tuku pilīsone ‘i he Sovieti ‘Iunioni ki mu‘á ‘i he taimi kehekehe ‘e tolu pea ko hono fakakātoá ko e ta‘u ‘e 21 nai. * Ko e hā hono ‘uhingá? Na‘á ne fakapapau‘i ke hanganaki malanga pea na‘e ui ia ‘e he kau ma‘u mafaí “ko ha faihia mātu‘aki fakatu‘utāmaki.” Ko e hā na‘á ne ‘ai ‘a e ongo fefine faitōnunga ko ení ke na mātu‘aki loto-to‘á? Na‘á na tuipau na‘e kau ‘a Sihova mo kinaua.

16. Ko e hā ‘a e kī ki he loto-to‘a mo‘oní?

¹⁶ Hangē ko ia na‘a tau lāulea ki aí, ke langa hake ‘a e loto-to‘á, kuo pau ke ‘oua te tau tokangataha ki hotau mālohí mo ‘etau malavá tonu. ‘I hono kehé, kuo pau ke tau tui ‘oku kau ‘a Sihova mo kitautolu pea ko ia ‘a e tokotaha te ne faitau ma‘atautolú. (Teu. 1:29, 30; Sāk. 4:6) Ko e kī ia ki he loto-to‘a mo‘oní.

17-18. Hangē ko ia ‘oku lēkooti ‘i he Sione 15:18-21, ko e hā ‘a e fakatokanga na‘e ‘omai ‘e Sīsuú? Fakamatala‘i.

¹⁷ ‘Oku tau fiefia ‘i hono faka‘apa‘apa‘i kitautolu ‘e he ni‘ihi kehé, ka ‘oku ‘ikai totonu ke tau fakakaukau ‘oku ‘ikai hatau mahu‘inga kapau ‘oku fehi‘anekina‘i kitautolu ‘e he kakaí. Na‘e pehē ‘e Sīsū: “Fiefia ē ko kimoutolu ‘o ka fehi‘anekina‘i kimoutolu ‘e he tangatá, pea ‘o ka nau ka fakamavahe‘i mo luma‘i kimoutolu, pea si‘aki homou hingoá ‘o hangē ha me‘a ‘oku fulikivanú koe‘uhi ko e Foha ‘o e tangatá.” (Luke 6:22) Ko e hā na‘e ‘uhinga ki ai ‘a Sīsuú?

¹⁸ Na‘e ‘ikai ke pehē ‘e Sīsū ia ‘e fiefia ‘a e kau Kalisitiané ‘i hono fehi‘anekina‘i kinautolú. ‘I hono kehé, na‘á ne ‘omai ha fakatokanga fekau‘aki mo e me‘a ‘e hokó. ‘Oku ‘ikai ko ha konga kitautolu  ‘o e māmaní. ‘Oku tau mo‘ui ‘o fehoanaki mo e ngaahi akonaki ‘a Sīsuú pea malanga‘i ‘a e pōpoaki na‘á ne malanga‘í. Ko hono olá, ‘oku fehi‘anekina‘i ai kitautolu ‘e he māmaní. (Lau ‘a e Sione 15:18-21.) ‘Oku tau loto ke fakahōifua‘i ‘a Sihová. Kapau ‘oku fehi‘a ‘a e kakaí ‘iate kitautolu koe‘uhi ‘oku tau ‘ofa ‘i he‘etau Tamaí, ko e palopalema pē ia ‘a kinautolu.

19. ‘E lava fēfē ke tau fa‘ifa‘itaki ki he fa‘ifa‘itaki‘anga ‘a e kau ‘apositoló?

¹⁹ ‘Oua ‘aupito na‘a faka‘atā ha me‘a ‘oku lea‘aki pe fai ‘e he fa‘ahinga ‘o e tangatá ke ne ‘ai koe ke ke maa‘i ‘a e hoko ko e taha ‘o e Kau Fakamo‘oni ‘a Sihová. (Mai. 4:5) ‘E lava ke tau ako ke fekuki mo e manavahē tangatá ‘aki ‘a e fakakaukau ki he fa‘ifa‘itaki‘anga na‘e fokotu‘u ‘e he kau ‘apositolo ‘i Selusalemá ‘i he hili pē hono tāmate‘i ‘o Sīsuú. Na‘a nau ‘ilo ‘a e lahi ‘o e fehi‘a ‘a e kau taki lotu Siú ‘iate kinautolú. (Ngā. 5:17, 18, 27, 28) Neongo ia, ‘i he ‘aho taki taha na‘a nau hokohoko atu ke ‘alu ki he temipalé pea talaki fakahāhā kinautolu ko e kau ākonga ‘a Sīsū. (Ngā. 5:42) Na‘e ‘ikai ke nau faka‘atā ‘a e manavaheé ke ne ta‘ofi kinautolu. Ko kitautolu foki ‘e lava ke tau ikuna‘i ‘etau manavahē tangatá tonu ‘aki hono fakahaa‘i ma‘u pē pea talaki fakahāhā ko kitautolú ko e Kau Fakamo‘oni ‘a Sihova​—‘i he ngāue‘angá, ‘i he ‘apiakó, pea ‘i hotau feitu‘ú.​—Ngā. 4:29; Loma 1:16.

20. Ko e hā na‘e fiefia ai ‘a e kau ‘apositoló neongo hono fehi‘anekina‘i kinautolú?

²⁰ Ko e hā na‘e fiefia ai ‘a e kau ‘apositoló? Na‘a nau ‘ilo‘i ‘a e ‘uhinga na‘e fehi‘anekina‘i ai kinautolú, pea na‘a nau lau ko ha monū ia ke ngaohikovia koe‘uhi ko hono fai ‘a e finangalo ‘o Sihová. (Luke 6:23; Ngā. 5:41) Na‘e tohi ki mui ‘e he ‘apositolo ko Pitá: “Neongo kapau ‘oku mou faingata‘a‘ia koe‘uhiā ko e mā‘oni‘oní, te mou fiefia.” (1 Pita 2:19-21; 3:14) ‘I he‘etau mahino‘i ‘oku fehi‘anekina‘i kitautolu koe‘uhi ko ‘etau fai ‘a e me‘a ‘oku totonú, he‘ikai ‘aupito te tau faka‘atā ‘a hono fehi‘anekina‘i kitautolu ‘e he kakaí ke ne lōmekina kitautolu ‘aki ‘a e manavahē.

21-22. (a) Ko e hā kuó ke fili ke fai ke teuteu ai ki he fakatangá? (e) Ko e hā te tau lāulea ki ai ‘i he kupu hoko maí?

²¹ ‘Oku ‘ikai ke tau ‘ilo‘i pe ko fē ‘a e taimi ‘e hoko ai ha fakatanga pe ko ha fakataputapui ‘o uesia ‘etau lotu kia Sihová. Kae kehe, ‘oku tau ‘ilo ‘e lava ke tau teuteu he taimí ni ‘aki hono fakaivimālohi‘i hotau vaha‘angatae mo Sihová, ‘aki hono langa hake ‘etau loto-to‘á pea ako ke fekuki mo hono fehi‘anekina‘i kitautolu ‘e he kakaí. Ko e ngaahi teuteu ‘oku tau fai he taimi ní ‘e tokoni ia kiate kitautolu ke tau tu‘u ma‘u ‘i he kaha‘ú.

²² Kae fēfē kapau ‘e a‘u ‘o tapui ‘etau lotú? ‘I he kupu hoko maí, te tau lāulea ai ki he ngaahi tefito‘i mo‘oni te ne tokoni‘i kitautolu ke hokohoko atu ‘etau tauhi kia Sihová na‘a mo e ‘i he malumalu ‘o e fakataputapuí.