‘OKU fonu ‘i he Tohi Tapú ‘a e ngaahi fakahāhā loto-mo‘oni mei he kau tangata na‘a nau “ma‘u ‘a e ngaahi ongo ‘o hangē pē ko kitautolú.” (Sēm. 5:17) Ko e fakatātaá, ‘e lava ke tau mahino‘i lelei ‘a e ‘uhinga ‘a Paula ‘i he‘ene lea‘aki ‘a e ngaahi lea ‘oku hiki ‘i he Loma 7:21-24: “‘I he taimi ‘oku ou loto ai ke fai ‘a e me‘a ‘oku totonú, ‘oku ‘iate au ‘a e hehema ke fai ‘a e me‘a ‘oku koví. . . . He toki tangata faka‘ofa ē ka ko au!” ‘I he‘etau faitau mo ‘etau ngaahi ta‘ehaohaoá tonu ‘oku fakafiemālie ke ‘ilo na‘e ma‘u ‘e Paula ‘a e ongo‘i tatau.

Na‘e toe fakahaa‘i ‘e Paula ‘a e ngaahi ongo‘i loto-mo‘oni kehe. ‘I he Kalētia 2:20, na‘á ne fakahaa‘i ‘ene tuipau ko Sīsū na‘á ne “‘ofeina [ia] peá ne tuku atu ia koe‘uhi ko [ia]” tonu! ‘Oku fakamatala‘i ai “‘a e ngaahi ongo ‘o hangē pē ko kitautolú”? Mahalo ‘oku ‘ikai ke pehē ma‘u pē.

Kapau ‘oku tau kei ongo‘i kovi koe‘uhi ko ‘etau ngaahi fehālaaki ‘i he kuohilí, he‘ikai nai ke tau tui ‘oku ‘ofa ‘a Sihova ‘iate kitautolu pea fakamolemole‘i kitautolu, pea ‘e lava ke mātu‘aki faingata‘a ke vakai ki he feilaulau huhu‘í ko ha me‘a‘ofa fakafo‘ituitui kiate kitautolu. ‘Oku loto mo‘oni ‘a Sīsū ke tau vakai ki he huhu‘í ‘i he founga ko iá? Kapau ko ia, ko e hā ‘e lava ke tokoni kiate kitautolu ke fai iá? Tau sivisivi‘i angé ‘a e ongo fehu‘i ko iá.

‘Io, ‘oku loto ‘a Sīsū ke tau vakai ki he‘ene feilaulaú ko ha me‘a‘ofa fakafo‘ituitui. ‘E lava fēfē ke tau fakapapau‘i ia? Sioloto atu ki he me‘a ‘oku hiki ‘i he Luke 23:39-43. Na‘e tautau ha tangata ‘i ha ‘akau fakamamahi ofi kia Sīsū. Na‘á ne fakahaa‘i ange ‘okú ne ongo‘i halaia ‘i he‘ene ngaahi fehālaaki he kuohilí. Kuo pau pē ko e faihia mafatukituki koe‘uhi ko e tautea anga-fakamamahi ko ení na‘e fai pē ki he kau faihia mātu‘aki kovi peheé. ‘I he hoha‘a ki he me‘a na‘e hokó, na‘e kōlenga ‘a e tangatá kia Sīsū: “Manatu‘i au ‘i ho‘o hoko ki ho Pule‘angá.”

Na‘e anga-fēfē tali ‘a Sīsū? Sioloto atu ki he langa lahi ‘i he‘ene feinga ke hanga hake ki he tangatá. Neongo ‘a e langá, na‘á ne feinga ke malimali loto-māfana pea fakapapau‘i ki he tangatá: “‘Oku ou tala mo‘oni atu kiate koe ‘i he ‘ahó ni, te ke ‘i Palataisi mo au.” Kuo pau pē na‘e fakamanatu ange ‘e Sīsū ki he tangatá “ko e Foha ‘o e tangatá, na‘e . . . ha‘ú . . . ke foaki ‘ene mo‘uí ko ha huhu‘i ko e fetongi ‘o e tokolahi.” (Māt. 20:28) Ka na‘á ke fakatokanga‘i na‘e fakamamafa‘i anga-‘ofa ‘e Sīsū ‘a e natula fakafo‘ituitui ‘ene feilaulaú? Na‘á ne anga-fakakaume‘a pea ngāue‘aki ‘a e fetonginauna fakafo‘ituitui ko e “te ke” mo e “au.” Pea na‘á ne ‘ai ia ke ‘i ha tu‘unga fakafo‘ituitui ‘i he‘ene lave ki he ‘amanaki ‘a e tangatá, ke mo‘ui ‘i ha palataisi ‘i he māmaní.

‘Oku ‘ikai ha veiveiua, na‘e loto ‘a Sīsū ke tali ‘e he tangata ko ení ‘ene feilaulaú ko ha me‘a‘ofa fakafo‘ituitui. Kapau na‘e ongo‘i peheni ‘a Sīsū fekau‘aki mo ha faihia na‘e te‘eki ke ne ma‘u ha faingamālie ke tauhi ki he ‘Otuá, ko e mo‘oni te ne ongo‘i peheni fekau‘aki mo ha Kalisitiane ‘osi papitaiso kuó ne ‘osi tauhi ki he ‘Otuá. Ko e hā leva ‘e lava ke tokoni kiate kitautolu ke fakatupulekina ha ongo‘i lelei fekau‘aki mo kitautolu neongo ‘etau ngaahi angahala ‘i he kuohilí?

Na‘e tākiekina ‘e he ngāue fakafaifekau ‘a Paulá ‘a e anga ‘ene vakai ki he feilaulau ‘a Sīsuú. Anga-fēfē?  Na‘á ne fakamatala: “‘Oku ou fakafeta‘i kia Kalaisi Sīsū ko hotau ‘Eikí, ‘a ia na‘á ne ‘omi kiate au ‘a e mālohi, koe‘uhí na‘á ne lau au ‘oku ou faitōnunga ‘aki ‘ene vahe‘i au ki ha ngāue toputapu, neongo na‘á ku hoko ki mu‘a ko ha tokotaha laukovi ki he ‘Otuá pea ko ha tokotaha fakatanga pea ko ha tangata anga-ta‘etoka‘i.” (1 Tīm. 1:12-14) Ko e vāhenga-ngāue ‘a Paulá na‘e fakapapau‘i ange ai kiate ia ‘a e meesi, ‘ofa mo e falala ‘a Sīsū kiate ia fakafo‘ituituí. Na‘e toe ‘omai foki ‘e Sīsū kiate kitautolu taki taha ha ngāue fakafaifekau. (Māt. 28:19, 20) ‘E lava ke kaunga ia kiate kitautolu ‘i ha founga meimei tatau?

Ko Albert, ‘a ia na‘á ne foki mai ki muí ni kia Sihova hili hono tu‘usi ‘i he meimei ta‘u ‘e 34, ‘okú ne fakamatala: “‘Oku ‘i mu‘a ma‘u pē ‘iate au ‘a ‘eku angahalá. Ka ‘i he‘eku ‘i he ngāue fakafaifekaú, ‘oku ou ongo‘i, ‘o hangē ko e ‘apositolo ko Paulá, kuo ‘omai kiate au ha ngāue toputapu meia Sīsū. ‘Oku langa hake ai au pea ‘ai ke u hanganaki ma‘u ha fakakaukau pau fekau‘aki mo au tonu, ko ‘eku mo‘uí mo hoku kaha‘ú.”—Saame 51:3.

Ko Allan, ‘a ia na‘á ne faihia mo anga-fakamālohi ki mu‘a ke ne ako ‘a e mo‘oní, ‘okú ne pehē: “‘Oku ou kei fakakaukau pē ki he kotoa ‘o e maumau na‘á ku fakatupunga ki he kakaí. ‘I he taimi ‘e ni‘ihi, ‘oku ‘ai ai au ke u ongo‘i loto-mafasia. Ka ‘oku ou fakamālō kia Sihova ‘i he‘ene faka‘atā ha tokotaha angahala hangē ko aú ke ‘oatu ‘a e ongoongo leleí ki he ni‘ihi kehé. ‘I he‘eku sio ki he tali ‘a e kakaí ki he ongoongo leleí, ‘oku fakamanatu mai ai ‘a e lelei mo e anga-‘ofa ‘a Sihová. ‘Oku ou ongo‘i ‘okú ne ngāue‘aki au ke tokoni ki he ni‘ihi kehe ‘oku nau fāinga mo ha puipuitu‘a meimei tatau.”

Ko ‘etau ngāue fakafaifekaú tonu ‘oku faka‘atā ai kitautolu ke fakahangataha hotau iví ki he ngaahi ngāue mo e fakakaukau paú. ‘Oku fakapapau‘i mai ai ‘a e meesi, ‘ofa mo e falala mai ‘a Sīsū kiate kitautolú.

‘I he te‘eki a‘u ki he taimi ‘e faka‘auha ‘osi ai ‘a e fokotu‘utu‘u fulikivanu ‘a Sētané, ko hotau lotó ‘e hokohoko atu nai ‘ene fakahalaia‘i kitautolú koe‘uhi ko ‘etau fehālaaki ‘i he kuohilí. Ko e hā ‘e tokoni kiate kitautolu ke tau‘i ‘a e ngaahi ongo‘i peheé?

“‘Oku ou sai‘ia ‘i he pehē ko ia ‘oku ‘lahi ange ‘a e ‘Otuá ‘i hotau lotó,’” ko e lau ia ‘a Jean, ‘a ia ‘okú ne fāinga ma‘u pē mo e ongo‘i halaia koe‘uhi ko ‘ene mo‘ui lōua ‘i he‘ene kei si‘í. (1 Sio. 3:19, 20) Ko kitautolu foki ‘e lava ke tau ma‘u ‘a e fiemālie ‘i hono ‘ilo‘i ‘oku mahino‘i lelei ange ‘e Sihova mo Sīsū hotau tu‘unga angahala‘iá ‘iate kitautolu. Manatu‘i, na‘á na tokonaki anga-‘ofa mai ‘a e huhu‘í, ‘o ‘ikai ma‘á e fa‘ahinga haohaoa ‘o e tangatá, ka ma‘á e fa‘ahinga angahala fakatomalá.—1 Tīm. 1:15.

‘Oku tau fakapapau‘i ki hotau lotó ‘a e mo‘oni mahu‘inga ko ení ‘i he‘etau fakalaulauloto ‘i he fa‘a lotu ki he anga ‘o e fakafeangai ‘a Sīsū ki he fa‘ahinga ‘o e tangata ta‘ehaohaoá pea ‘i he‘etau fai hotau lelei tahá ke fakahoko ‘a e ngāue fakafaifekau kuó ne vahe‘i maí. ‘I he fai peheé, hangē ko Paulá, ‘e lava ke ke pehē: “[Ko Sīsū] na‘á ne ‘ofeina au peá ne tuku atu ia koe‘uhi ko aú.”