1-2. ʻOku anga-fēfē hono fakalototoʻaʻi kitautolu ʻe he ngaahi lea ʻa Sihova ʻi he ʻAisea 65:16, 17 ke ʻoua te tau foʻí?

“ʻOUA ʻE FOʻI!” Ko e kaveinga fakaueʻiloto ia ʻo e polokalama fakataha-lahi fakavahe ki he 2017. Naʻe fakahaaʻi mai ʻi he polokalamá ʻa e founga ʻe lava ke tau kātekina ai ʻa e ngaahi ʻahiʻahi ʻoku tau tofanga aí. Kuo ʻosi atu ʻa e taʻu ʻe fā mei ai, pea ko kitautolu eni, ʻoku tau kei kātaki pē ʻi he moʻui ʻi he fokotuʻutuʻu lolotonga ko ení.

² Ko e hā kuó ke fekuki mo ia ki muí ni maí? Ko e mate ha mēmipa ʻi he fāmilí pe ko ha kaumeʻa ʻofeina? Ko ha mahaki fakatupu mate? Ko e ʻahiʻahi ʻo e hoholo ke motuʻa angé? Ko ha fakatamaki fakanatula, fakamālohi pe fakatanga? Pe ko e nunuʻa ʻo ha mahaki, hangē ko e mahaki fakaʻauha COVID-19? He fakaʻamu ē ko kitautolu ke aʻu ki he ʻaho ʻa ia ko e meʻa kotoa ko iá ʻe tuku kotoa ia ki mui​—ʻe ngalo ia pea heʻikai ʻaupito ke toe hoko!​—Lau ʻa e ʻAisea 65:16, 17.

3. Ko e hā kuo pau ke tau fai he taimi ní, pea ko e hā hono ʻuhingá?

³ Ko e moʻui ʻi he fokotuʻutuʻu ko ení ʻoku faingataʻa, pea te tau fehangahangai nai naʻa mo e ngaahi pole faingataʻa ange ʻi he kahaʻú. (Māt. 24:21) ʻOku hā mahino, ʻoku fiemaʻu ke tau hokohoko atu hono fakaivimālohiʻi ʻetau kātakí. Ko e hā hono ʻuhingá? Koeʻuhí naʻe pehē ʻe Sīsū: “ʻI hoʻomou kātakí te mou fakahaofi ai hoʻomou moʻuí.” (Luke 21:19) Ko e fakakaukau ki he anga hono kātekina lavameʻa ʻe he niʻihi kehé ʻa e ngaahi ʻahiʻahi meimei tatau mo kitautolú ʻe lava ke fakaivimālohiʻi ai ʻetau kātakí.

4. Ko e hā ʻoku lava ai ke tau pehē ko Sihova ʻa e faʻifaʻitakiʻanga lelei taha ʻo e kātakí?

⁴ Ko hai ʻa e faʻifaʻitakiʻanga lelei taha ʻo e kātakí? Ko Sihova ko e ʻOtuá. ʻOkú ke ofo ʻi he tali ko iá? Mahalo ʻoku pehē, kae ʻoua leva ke ke fakakaukau ki ai. Ko e māmani ko ení ʻoku ʻi he malumalu ia ʻo e pule ʻa e Tēvoló, pea ʻoku fonu palopalema. ʻOku maʻu ʻe Sihova ʻa e mālohi ke fakangata ia he taimí ni, ka ʻokú ne tatali ke  toki fakahoko ia ʻi ha ʻaho ʻi he kahaʻú. (Loma 9:22) ʻI he lolotongá ni, ʻoku hanganaki kātaki hotau ʻOtuá ke aʻu ki he taimi kotofa ko iá. Tau lāulea angé ki he meʻa ʻe hiva kuo fili ʻe Sihova ke ne kātakiʻi.

5. Kuo anga-fēfē hono lumaʻi ʻa e huafa ʻo e ʻOtuá, pea ʻoku anga-fēfē hoʻo ongoʻi fekauʻaki mo iá?

⁵ Ko e luma kuo fai ki hono huafá. ʻOku ʻofa ʻa Sihova ʻi hono huafá, pea ʻokú ne loto ke fakaʻapaʻapaʻi ia ʻe he tokotaha kotoa. (ʻAi. 42:8) Ka ʻi he taʻu ʻe 6,000 nai, ko hono huafa leleí kuo lumaʻi. (Saame 74:10, 18, 23) Naʻe kamata eni ʻi he ngoue ʻo ʻĪtení ʻi he taimi naʻe tukuakiʻi ai ʻe he Tēvoló (ʻoku ʻuhingá ko ha “Tokotaha Laukovi Loi”) ʻa e ʻOtuá ʻokú ne taʻofi ha meʻa naʻe fiemaʻu ʻe ʻĀtama mo ʻIvi ke na hoko ai ʻo fiefia. (Sēn. 3:1-5) Talu mei ai, kuo tukuakiʻi loi ʻa Sihova ʻokú ne taʻofi mei he faʻahinga ʻo e tangatá ʻa e meʻa ʻoku nau fiemaʻu moʻoní. Naʻe hohaʻa ʻa Sīsū fekauʻaki mo e luma naʻe fai ki he huafa ʻo ʻene Tamaí. ʻI he ʻuhinga ko iá, naʻá ne akoʻi ki heʻene kau ākongá ke lotu: “Ko ʻemau Tamai ʻoku ʻi hēvani, ke fakamāʻoniʻoniʻi ho huafá.”​—Māt. 6:9.

6. Ko e hā kuo fakaʻatā ai ʻe Sihova ʻa e taimi feʻungaʻānoa ki muʻa ke ne fakaleleiʻi ʻa e ʻīsiu fekauʻaki mo hono tuʻunga-haú?

⁶ Ko e fakafepaki ki hono tuʻunga-haú. ʻOku maʻu ʻe Sihova ʻa e totonu fakaʻaufuli ke pule ki hēvani mo māmani, pea ko ʻene founga pulé ko e lelei tahá ia. (Fkh. 4:11) Ka kuo feinga ʻa e Tēvoló ke takihalaʻi ʻa e kau ʻāngeló mo e faʻahinga ʻo e tangatá ke fakakaukau ʻoku ʻikai ke maʻu ʻe he ʻOtuá ʻa e totonu ko iá. Ko e ʻīsiu fekauʻaki mo e tuʻunga-hau fakaleveleva ʻo Sihová heʻikai ke fakaleleiʻi ia ʻi ha ʻaho pē taha. ʻI ha founga fakapotopoto, kuo fakaʻatā ʻe he ʻOtuá ʻa e taimi feʻungaʻānoa ki he kakaí ke nau sio ʻi he taimi ʻoku feinga ai ʻa e tangatá ke pule pē kiate kinautolu taʻekau ai ʻa e Tokotaha-Fakatupú, ʻoku nau iku ki he taʻelavameʻa. (Sel. 10:23) Ko e ola ʻo e kātaki ʻa e ʻOtuá, ʻe fakaleleiʻi ai ʻa e ʻīsiú ʻo tā-tuʻo-taha. ʻE fakatonuhiaʻi ia ʻi heʻene fakamoʻoniʻi ko hono Puleʻangá pē ʻe lava ke ne ʻomai ʻa e melino mo e malu moʻoni ki he māmaní.

7. Ko hai kuo angatuʻu kia Sihová, pea ko e hā te ne fai kiate kinautolú?

⁷ Ko e angatuʻu ʻa e niʻihi ʻo ʻene fānaú. Naʻe haohaoa hono fakatupu ʻe Sihova ʻene fānau laumālié mo e tangatá, ʻo taʻehamele. Ka ko e foha ʻāngelo angatuʻu ko Sētané (ʻoku ʻuhingá ko e “Tokotaha Fakafepaki”) naʻá ne fakatafokiʻi ʻa e ongo meʻa fakaetangata haohaoá, ʻa ʻĀtama mo ʻIvi meia Sihova. Naʻe kau ʻi he angatuʻú ʻa e kau ʻāngelo kehe mo e faʻahinga ʻo e tangatá. (Sute 6) Ki mui ai, naʻa mo e faʻahinga ʻi he puleʻanga ʻo ʻIsilelí, ʻa e kakai fili ʻa e ʻOtuá, naʻa nau talitekeʻi ia pea tafoki ʻo lotu ki he ngaahi ʻotua loí. (ʻAi. 63:8, 10) Naʻe ongoʻi tonu ʻe Sihova kuo lavakiʻi ia. Neongo ia, kuó ne kātaki, pea te ne hokohoko atu ke kātaki kae ʻoua leva kuo hoko mai ʻa e taimi ke ne fakangata ʻa e angatuʻú kotoa. ʻE ʻomai ai ʻa e tāpuaki fakanonga ki heʻene faʻahinga mateakí, ʻa ia ʻoku nau kātakiʻi fakataha mo ia ʻa e kovi ʻi he fokotuʻutuʻu ko ení!

8-9. Ko e hā ʻa e ngaahi loi kuo fai fekauʻaki mo Sihová, pea ʻoku anga-fēfē ʻetau tali ki aí?

⁸ Ko e ngaahi loi hokohoko ʻa e Tēvoló. Naʻe tukuakiʻi ʻe Sētane ko e sevāniti anga-tonu ʻa Sihova ko Siopé pehē ki he kau lotu faitōnunga ʻa Sihová ʻoku nau tauhi pē ki he ʻOtuá ʻi ha ngaahi ʻuhinga siokita. (Siope 1:8-11; 2:3-5) Kuo kei fai pē ʻe he Tēvoló ʻa e tukuakiʻi tatau ʻo aʻu mai ki he ʻahó ni. (Fkh. 12:10) ʻE lava ke tau fai ʻetau tafaʻakí ʻo fakamoʻoniʻi ʻoku ʻikai ʻaupito ke moʻoni ʻa e ngaahi loi ʻa Sētané ʻaki ʻetau kātakiʻi hotau ngaahi ʻahiʻahí pea nofoʻaki mateaki kia Sihova koeʻuhi ko ʻetau ʻofa kiate Iá. Hangē ko Siopé, ʻe tāpuakiʻi kitautolu koeʻuhi ko ʻetau kātakí.​—Sēm. 5:11.

⁹ ʻOku ngāueʻaki ʻe Sētane ʻa e kau taki lotu loí ke nau tala ʻoku anga-kakaha ʻa Sihova pea ko e tupuʻanga ia ʻo e faingataʻaʻia ʻa e tangatá. ʻOku aʻu ʻo pehē ʻe he niʻihi ʻi he mate ʻa e fānaú, ko e  ʻOtuá naʻá ne ʻave kinautolú koeʻuhi naʻá ne fiemaʻu ha kau ʻāngelo tokolahi ange ʻi hēvani. He laukovi loi ē ko ia! ʻOku tau ʻiloʻi lelei ʻa e moʻoní. ʻI he taimi ʻoku tau tofanga ai ʻi ha puke lahi pe mate ha taha ʻoku tau ʻofa ai, ʻoku ʻikai ʻaupito ke tau tukuakiʻi hotau ʻOtuá. ʻI hono kehé, ʻoku tau maʻu ʻa e tui ʻe ʻi ai ʻa e ʻaho te ne fakatonutonu ai ʻa e ngaahi meʻá. ʻOku lava ke tau tala ki he tokotaha kotoa te nau fiefanongó ko ha ʻOtua ʻofa moʻoni ʻa Sihova. ʻOku lava ai ke ne fai ha tali lelei ki he tokotaha ʻokú ne luma kiate iá.​—Pal. 27:11.

10. Ko e hā ʻoku fakahaaʻi mai ʻi he Saame 22:23, 24 fekauʻaki mo Sihová?

¹⁰ Ko e faingataʻaʻia ʻene kau sevāniti ʻofeiná. Ko Sihova ko ha ʻOtua manavaʻofa. ʻOkú ne fehiʻa ke fanongo mai ki heʻetau tangi koeʻuhi ko e faingataʻa ʻoku tau kātekiná mahalo koeʻuhi ko e fakatanga, mahamahaki pe ko ʻetau taʻehaohaoá. (Lau ʻa e Saame 22:23, 24.) ʻOku ongoʻi ʻe Sihova ʻetau mamahí; ʻokú ne loto ke taʻofi ia pea te ne taʻofi ia. (Fakafehoanaki mo e ʻEkisoto 3:7, 8; ʻAisea 63:9.) ʻE hoko mai ʻa e ʻaho “te ne holoholo ʻa e loʻimata kotoa pē mei [hotau] matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa.”​—Fkh. 21:4.

11. ʻOku ongoʻi fēfē ʻa Sihova ʻi he puli atu ʻene kau sevāniti mateakí ʻi he maté?

¹¹ Māvae mo hono ngaahi kaumeʻa kuo nau maté. ʻOku anga-fēfē ongoʻi ʻa Sihova fekauʻaki mo e kau tangata mo e kau fefine faitōnunga kuo nau maté? ʻOkú ne holi ke toe sio kiate kinautolu! (Siope 14:15) ʻE lava ke ke sioloto atu ki he lahi ʻo e ongoʻi ʻe Sihova ʻa e puli atu hono kaumeʻa ko ʻĒpalahamé? (Sēm. 2:23) Pe ko Mōsese, naʻá ne folofola “mata ki he mata” mo iá? (ʻEki. 33:11) Pea kuo pau pē ʻokú ne fakaʻamu ke fanongo ki hono hivaʻi ʻe Tēvita mo e kau tangata tohi-sāmé ʻenau ngaahi hiva fakahīkihiki mālié! (Saame 104:33) Neongo ko e ngaahi kaumeʻa ko eni ʻo e ʻOtuá ʻoku nau mohe ʻi he mate, kuo ʻikai ke nau ngalo ʻia Sihova. (ʻAi. 49:15) ʻOkú ne manatuʻi ʻa e fakaikiiki kotoa  honau ngaahi ʻulungāngá. ʻI ha ʻuhinga, “ʻoku nau moʻui kotoa pē ʻi heʻene vakaí.” (Luke 20:38, fkm. ʻi lalo) ʻI he ʻaho ʻe taha, te ne toe fokotuʻu mai kinautolu, pea te ne toe fanongo ki heʻenau ngaahi lotu tōtōiví pea tali ʻenau lotú. Kapau kuo mole hao ʻofaʻanga ʻi he maté, ʻofa ke fakanonga mo fakafiemālieʻi koe ʻe he ngaahi fakakaukau ko ení.

12. Ko e hā ʻoku tautefito ai ʻa e mamahi ʻa Sihova ʻi he lolotonga ʻo e ngaahi ʻaho fakaʻosi fulikivanu ko ení?

¹² Ko hono ngaohikovia ʻa e faʻahinga ʻo e tangatá ʻe he fulikivanú. ʻI he kamata ʻa e angatuʻu ʻi ʻĪtení, naʻe ʻiloʻi ʻe Sihova ʻe fakaʻaʻau ke kovi ange ʻa e ngaahi tuʻungá ki muʻa ke fakaleleiʻí. ʻOku fehiʻa ʻa Sihova ʻi he fulikivanu, fakamaau taʻetotonu mo e fakamālohi ʻi he māmani he ʻaho ní. Kuo tautefito maʻu pē ʻene kaungāongoʻi ki he faʻahinga ʻoku tuʻu laveangofua tahá​—ko e faʻahinga vaivai mo ʻikai ha maluʻí, ko e paeá pehē foki ki he uitoú. (Sāk. 7:9, 10) ʻOku tautefito ʻa e mamahi ʻa Sihová ʻi he taimi ʻokú ne vakai ai ki heʻene kau sevāniti faitōnungá ʻoku ngaohikovia mo tuku pilīsone. Hoko ʻo fakapapauʻi ʻokú ne ʻofa ʻiate kimoutolu kotoa ʻoku kātaki fakataha mo iá.

13. ʻOku anga-fēfē hono tuku hifo ʻa e fāmili fakaetangatá ʻi he ʻao ʻo e ʻOtuá, pea ko e hā te ne fai ki aí?

¹³ Ko e tuʻunga ololalo ʻo e fāmili fakaetangatá. ʻOku fiefia ʻa Sētane ke tuku hifo ʻa e faʻahinga ʻo e tangatá, ʻa ia naʻe fakatupu ʻi he ʻīmisi ʻo e ʻOtuá. ʻI he ʻafio ʻa e ʻOtuá ki he “lahi fau ʻa e fulikivanu ʻa e tangatá” ʻi he ʻaho ʻo Noá, “naʻe fakaʻiseʻisa ʻa Sihova ʻi heʻene ngaohi ʻa e tangatá ʻi he māmaní, pea naʻe mamahi hono lotó.” (Sēn. 6:5, 6, 11) Kuo lelei ange ʻa e ngaahi tuʻungá talu mei ai? Halaʻatā! He fiefia ē ko e Tēvoló ʻi heʻene sio ki he hulutuʻa ʻa e fehokotaki fakasino taʻetāú ʻi he founga kotoa, kau ai ʻa e tōʻonga taʻetaau ʻi he vahaʻa ʻo e tangata mo e fefine pea mo e tangata mo e tangata mo e fefine mo e fefine! (ʻEf. 4:18, 19) ʻOku tautefito ʻa e fiefia ʻa Sētané ʻi heʻene fakatupunga ʻa e faʻahinga ʻi he lotu moʻoní ke nau faiangahalá. ʻI he ʻosi ʻa e kātaki ʻa Sihová, te ne fakahāhā ʻene fehiʻa moʻoni ʻi he tōʻonga taʻetaau kotoa pē.

14. Ko e hā ʻoku fai ʻe he tangatá ki he meʻa fakatupu ʻa e ʻOtuá ʻi he māmaní?

¹⁴ Ko hono fakaʻauha ʻene fakatupú. ʻOku ʻikai ngata pē ʻa e hoko ʻa e kovi ʻi he ‘pule ʻa e tangata ki ha tangata,’ ka ʻokú ne maumauʻi ʻa e māmaní mo e fanga manu naʻe fakatupu ʻe Sihova pea ʻoange ke tokangaʻi ʻe he tangatá. (Tml. 8:9; Sēn. 1:28) ʻOku fakatokanga ʻa e kau mataotaó ko e ngāue ʻa e tangatá ʻe lava ke ne ʻai ke pulia atu ʻa e kalasi * meʻamoʻui ʻe taha miliona ʻi he taʻu siʻi ka hokó. Tā neʻineʻi ke nau hohaʻa ki he ʻātakaí! Kae mālō, kuo talaʻofa ʻe Sihova “ke fakaʻauha ʻa e faʻahinga ʻoku nau fakaʻauha ʻa e māmaní” pea ʻai ʻa e māmaní kotoa ke hoko ko ha palataisi.​—Fkh. 11:18; ʻAi. 35:1.

15-16. Ko e hā ʻoku totonu ke ne ueʻi kitautolu ke kātaki fakataha mo Sihová? Fakatātaaʻi.

¹⁵ Fakakaukau atu ki he ngaahi palopalema fakalotomamahi kuo kātakiʻi ʻe heʻetau Tamai fakahēvaní ʻi he taʻu ʻe laui afe. (Sio ki he puha “ Meʻa ʻOku Kātakiʻi ʻe Sihová.”) ʻE lava ke fakangata ʻe Sihova ʻa e fokotuʻutuʻu fulikivanu ko ení ʻi ha taimi pē. Ka ko ʻene kātakí kuo fakamoʻoniʻi ʻene hoko ko ha tāpuaki kiate kitautolu! ʻE lava ke tau fakakaukau nai ki ai ʻo peheni. Tau pehē pē ʻoku tala ange ki ha tangata mo hono uaifí ko ʻena kiʻi pēpē teʻeki fanauʻí ʻoku hoko ki ai ha palopalema fakaesino mafatukituki pea ʻe faingataʻa ʻene moʻuí pea te ne mate kei siʻi pē. Neongo ko ha meʻa fakalotosiʻi eni ki he ongo mātuʻá, ʻokú na kei fiefia pē ʻi he fanauʻi ʻena kiʻi tamá. Ko ʻena ʻofa ʻi he kiʻi tamá ʻokú ne ueʻi kinaua ke kātakiʻi ha faʻahinga faingataʻa pē koeʻuhi ke tauhi hake ia ʻi he moʻui lelei taha ʻe ala lavá.

¹⁶ ʻI he tuʻunga meimei tatau, ko e kotoa ʻo e  hako ʻo ʻĀtama mo ʻIví ʻoku nau taʻehaohaoa ʻi hono fanauʻi mai ki he māmaní. Neongo ia, ʻoku ʻofa ʻa Sihova kiate kinautolu pea tokangaʻi kinautolu. (1 Sio. 4:19) Pea ʻi he ʻikai hangē ko e ongo mātuʻa fakaetangata ʻi heʻetau fakatātaá, ʻe lava ʻe Sihova ke fai ha meʻa ki ai. Kuó ne fokotuʻu ʻa e ʻaho te ne toʻo atu ai ʻa e faingataʻaʻia ʻokú ne fakamamahiʻi ʻa e faʻahinga ʻo e tangatá. (Māt. 24:36) ʻIkai ʻoku totonu ke ueʻi kitautolu ʻe heʻene ʻofá ke tau kātaki fakataha mo ia ʻi he lōloa taha ʻe fiemaʻú?

17. ʻOku anga-fēfē hono fakalototoʻaʻi kitautolu ʻe he fakamatala kia Sīsū ʻi he Hepelū 12:2, 3 ke hanganaki kātakí?

¹⁷ ʻOku fokotuʻu ʻe Sihova ʻa e faʻifaʻitakiʻanga haohaoa ʻo e kātakí. Naʻe lavameʻa ʻa Sīsū ʻi heʻene faʻifaʻitaki ki he kātaki ʻene Tamaí. ʻI he tuʻunga ko ha tangata, naʻe kātakiʻi ʻe Sīsū ʻa e ngaahi lea fakafilí, fakamāʻí pea mo ha ʻakau fakamamahi koeʻuhi ko kitautolu. (Lau ʻa e Hepelū 12:2, 3.) Ko e faʻifaʻitakiʻanga ʻa Sihova ʻo e kātakí ʻoku ʻikai ha veiveiua naʻá ne ʻoange kia Sīsū ʻa e mālohi ke ne kātaki. ʻE lava ke fakaivimālohiʻi foki ai mo kitautolu.

18. ʻOku anga-fēfē hono tokoniʻi kitautolu ʻe he 2 Pita 3:9 ke tau mahinoʻi ʻa e meʻa kuo fakahoko ʻi he kātaki ʻa Sihová?

¹⁸ Lau ʻa e 2 Pita 3:9. ʻOku ʻiloʻi ʻe Sihova ʻa e taimi lelei taha ke fakangata ai ʻa e māmani fulikivanu ko ení. Ko ʻene kātakí kuo fakaʻatā ai ke fakatahatahaʻi mai ha fuʻu kakai lahi ʻe laui miliona, ʻoku nau lotu mo fakahīkihikiʻi ia. ʻOku nau fiefia kotoa ʻi he kātaki fuoloa ʻa Sihová ʻo fanauʻi mai kinautolu, ako ke ʻofa kiate ia, pea nau fakatapui kiate ia. Ko e fili ʻa Sihova ke kātakí ʻe fakatonuhiaʻi kakato ʻi he taimi te ne fakapaleʻi fiefia ai ʻa e laui miliona ʻo kitautolu kuo tau kātaki ʻo aʻu ki he ngataʻangá!

19. Ko e hā ʻoku totonu ke tau fakapapauʻi ke faí, pea ko e hā hotau palé?

¹⁹ ʻOku tau ako meia Sihova ʻa e founga ke kātaki ai fakataha mo e fiefiá. Neongo ʻa e fakalotomamahi mo e faingataʻa kotoa kuo fakatupunga ʻe Sētané, ʻoku kei hoko pē ʻa Sihova ko e “ʻOtua fiefiá.” (1 Tīm. 1:11) ʻE lava foki ke tau nofoʻaki fiefia lolotonga ʻetau tatali anga-kātaki kia Sihova ke ne fakamāʻoniʻoniʻi hono huafá, fakatonuhiaʻi hono tuʻunga-haú, fakangata ʻa e fulikivanú kotoa pea fakangata ʻetau ngaahi palopalema he lolotonga ní. Tau fakapapauʻi ke kātaki pea fiemālie ʻi hono ʻiloʻi ko ʻetau Tamai fakahēvaní ʻoku kātaki foki mo ia. Kapau te tau fai pehē, ʻe hoko moʻoni ʻa e ngaahi lea ko ení kiate kitautolu taki taha: “Fiefia ē ka ko e tangata ko ia ʻokú ne hanganaki kātakiʻi ʻa e ʻahiʻahí, koeʻuhí ʻi heʻene hoko ʻo maʻu ʻa e hōifuá te ne maʻu ai ʻa e kalauni ʻo e moʻuí, ʻa ia naʻe talaʻofa ʻe Sihova ki he faʻahinga ʻoku hokohoko atu ʻenau ʻofa kiate Iá.”​—Sēm. 1:12.