ʻOku finangalo moʻoni ʻa Sihova ki ha ongo meʻa ʻokú na mali ke na hoko ʻo fiefia pea maʻu ha haʻi tuʻuloa mo vāofi. (Māt. 19:4-6) Kapau ʻokú ke fakaʻamu ke mali, ʻe lava fēfē ke ke maʻu ha hoa mali lelei? ʻI he tuʻunga ko hotau Tokotaha-Fakatupu, ʻoku ʻiloʻi ʻe Sihova ʻa e meʻa ʻe taki atu ki ha faialea mo e nofo mali lavameʻa. Ko ia ai, kapau te ke ngāueʻaki ʻa e ngaahi tefitoʻi moʻoni kuó ne ʻomaí, te ke maʻu ʻa e ngaahi ola lelei tahá. Fakakaukau ki he niʻihi ʻo e ngaahi tefitoʻi moʻoni ko iá.

ʻUluakí, ʻoku pau ke tau mahinoʻi ʻa e meʻa ko ení: “Ko e lotó ʻoku kākā ange ia ʻi ha toe meʻa pea ʻoku holiholivale.” (Sel. 17:9) ʻI he feinga ha taha ke kumi pea maʻu ha hoa mali ki he kahaʻú, ʻe lava ke tupulaki vave ʻena ngaahi feongoʻiʻakí pea kāsia ai ʻa e ngaahi fakaʻuhinga leleí. ʻI he fakatuʻunga ʻe he kakaí ha fili ke mali ʻo fakatefito pē ʻi he ongoʻí, ʻoku faʻa iku atu pē ki ha fakatamaki. (Pal. 28:26) Ko e ʻuhinga ia ʻoku taʻefakapotopoto ai ki ha ongo meʻa ke fakahāhā ʻena ngaahi ongoʻi fekoekoeʻí ʻi he kamata pē ʻena kaumeʻá pe fai ha ngaahi tukupā ki muʻa ke na feʻilongaki leleí.

ʻOku pehē ʻi he Palōveepi 22:3: “Ko e tokotaha fakapotopotó ʻokú ne sio ki he fakatuʻutāmakí peá ne toi, ka ko e tokotaha taʻetaukeí ʻokú ne hanganaki laka atu pē ʻo ne fuesia ʻa e ngaahi nunuʻá.” Ko e hā ʻa e fakatuʻutāmaki hono ngāueʻaki ʻa e ngaahi uepisaiti faialeá? Ko e meʻa fakamamahí, ko e niʻihi kuo nau aʻusia ha hokosia kovi ʻi hono ngāuekākāʻaki kinautolu ʻe he kau sola naʻa nau fetaulaki ʻi he ʻinitanetí. Pehē foki, kuo faʻu ʻe he kakai taʻefaitotonú ʻa e ngaahi ʻakauni loi ke kākaaʻiʻaki ʻa e kakai taʻefakapotopotó ke maʻu mei ai ha paʻanga. ʻI he taimi ʻe niʻihi, ko e faʻahinga naʻa nau teke mui ʻi he ngaahi kākā anga-fakamamahí naʻa nau taku ko e Kau Fakamoʻoni kinautolu.

Fakakaukau ki ha toe fakatuʻutāmaki ʻe taha. ʻOku ngāueʻaki ʻe he ngaahi saiti faialea ʻe niʻihi ʻa e ngaahi polokalama fakakomipiuta ke fakahoa ʻaki ʻa e kakaí. Kae kehe, ʻoku ʻikai ha fakamoʻoni ʻoku ola lelei ʻa e ngaahi founga ko iá. ʻE fakapotopoto ke falala ki ha founga ʻoku faʻu ʻe he tangatá ke fakapapauʻiʻaki ʻa e lavameʻa ha meʻa mahuʻinga hangē ko e nofo malí? ʻE lava fēfē ke ala fakahoa ʻa e ngaahi polokalama fakakomipiuta ko iá mo e ngaahi tefitoʻi moʻoni Fakatohitapú?​—Pal. 1:7; 3:5-7.

ʻOku ʻi ai ha tefitoʻi moʻoni ʻi he Palōveepi 14:15 ʻoku pehē: “Ko e tokotaha taʻefakapotopotó ʻokú ne tui ki he lea kotoa pē, ka ko e tokotaha fakapotopotó ʻokú ne fakakaukauʻi ʻene laka taki  taha.” Ki muʻa ke fakakaukau ki ha taha ke hoko ko ha hoa mali, ʻoku fiemaʻu ke ke ʻilo lelei ʻa e tokotahá. Ka ʻe faingataʻa ke fai pehē ʻi he fetaulaki ʻi he ʻinitanetí. Neongo kapau ʻokú mo fakatou ʻilo ki hoʻomo ngaahi fakamatala fakafoʻituituí pea fakamoleki ʻa e taimi ʻi he fetohiʻakí, ʻe lava moʻoni ke ke pehē ʻokú ke ʻiloʻi ʻa e tokotahá? Ko e niʻihi naʻa nau fakakaukau kuo nau maʻu honau ʻofaʻangá naʻa nau ʻohovale ʻi he meʻa naʻa nau ʻiloʻi ʻi he faai atu pē ʻo nau fetaulaki mo e tokotahá.

Naʻe pehē ʻe he tokotaha-tohi-sāmé: “ʻOku ʻikai te u feohi mo e kau tangata kākaá, pea ʻoku ou fakaʻehiʻehi mei he faʻahinga ʻoku nau fufū honau tuʻunga totonú.” (Saame 26:4) Ko e tokolahi ʻoku nau tōʻongaʻaki ʻa e loi ʻi heʻenau ngaahi fakamatala fakafoʻituitui ʻi he faialea ʻi he ʻinitanetí ʻo ʻai ke nau hā fakamānako ange. Te nau fufū nai honau anga totonú pe ʻikai fakahaaʻi ia ʻi heʻenau fetohiʻaki ʻi he ʻinitanetí. Lolotonga ʻoku ʻi ai ʻa e niʻihi ʻoku nau lau kinautolu ko e Kau Fakamoʻoni ʻa Sihova, ko ha kau Kalisitiane ʻosi papitaiso moʻoni kinautolu? ʻOku nau matuʻotuʻa fakalaumālie? ʻOku nau maʻu ha vahaʻangatae fakafoʻituitui mo Sihova? ʻOku fakaʻapaʻapaʻi kinautolu ʻi heʻenau fakatahaʻangá? Pe ʻoku ʻikai ke nau hoko ko e kau faʻifaʻitakiʻanga lelei pe “ko e ngaahi feohi koví”? (1 Kol. 15:33; 2 Tīm. 2:20, 21) Pea ʻoku nau ʻatā Fakatohitapu ke mali? ʻOku fiemaʻu ke ke ʻiloʻi ʻa e ngaahi meʻa ko ení, ka ʻoku faingataʻa ke ʻiloʻi ia taʻekau ki ai hano fakapapauʻi mei ha Kau Fakamoʻoni kehe ʻoku nau ʻiloʻi lelei ʻa e tokotahá. (Pal. 15:22) Pea ko e moʻoni, ko ha sevāniti mateaki ʻa Sihova heʻikai te ne fakakaukau ke “hoko ʻo haʻi hōhoatamaki” mo ha tokotaha taʻetui.​—2 Kol. 6:14; 1 Kol. 7:39.

ʻI he vakai ki he ngaahi fakatuʻutāmaki hono ngāueʻaki ʻa e ngaahi uepisaiti faialeá, ʻoku ʻi ai ʻa e ngaahi founga lelei ange ke kumi ai ha hoa pea fakatupulekina ha vahaʻangatae ʻe taki atu nai ki ha nofo mali lāngilangiʻia. ʻE lava fēfē ke ke maʻu ʻa e ngaahi faingamālie ke fetaulaki ai mo ha hoa? ʻI he taimi ʻoku ʻikai ke tapui ai ʻa e fakatahataha fakatahá, ko e Kau Fakamoʻoni ʻa Sihová ʻoku lava ke nau feʻilongaki ʻi heʻenau maʻu ʻa e ngaahi fakatahá, ʻasemipilií, fakataha-lahí mo e ngaahi fakatahataha kehe.

ʻI he taimi ʻoku ʻikai ke malava ai ke fai ʻa e ngaahi fakatahataha ko ení, hangē ko e lolotonga ʻa e mahaki fakaʻauha COVID-19, ʻoku tau ngāueʻaki ʻetau ngaahi meʻangāue fakaʻilekitulōniká ke maʻu ʻa e ngaahi fakatahá, ʻa ia ʻoku ʻi ai ʻa e ngaahi faingamālie ke maheni ai mo e Kau Fakamoʻoni teʻeki mali kehé. ʻE lava ke ke vakai ki he anga ʻenau kau ki he ngaahi fakatahá pea fanongo ki heʻenau fakahāhā ʻenau tuí. (1 Tīm. 6:11, 12) ʻE lava foki ke mou fetalanoaʻaki ʻi ha loki talanoa hili ʻa e fakatahá. ʻI he ngaahi fakatahataha fakasōsiale ʻi he ʻinitanetí mo e niʻihi ʻo e Kau Fakamoʻoní, ʻe lava ke ke vakai ai ki he anga ʻo e fakafeangai ʻa e tokotaha ʻokú ke saiʻia aí ki he kakaí, pea ʻe lava ke fakahaaʻi ai ʻa e anga moʻoni ʻo e tokotahá. (1 Pita 3:4) ʻI he faai atu ʻa e taimí, ʻi hoʻomo maheni lelei angé, ʻe lava ke ke fakapapauʻi pe ʻoku meimei tatau hoʻomo ngaahi taumuʻá pea vakai pe ʻokú mo hoamālie.

ʻI hono kumi ʻe he kakai teʻeki malí ha hoa mali ʻi he ngaahi founga ʻoku fehoanaki mo e ngaahi tefitoʻi moʻoni Fakatohitapú, ʻoku ngalingali te nau hokosia ʻa e moʻoni ʻo e palōveepi ʻoku pehē: “Ko e tokotaha ʻokú ne maʻu ha uaifi [pe husepāniti] leleí kuó ne maʻu ha meʻa lelei, pea ʻokú ne maʻu ʻa e hōifua ʻa Sihová.”​—Pal. 18:22.