1-2. ʻI he founga fē ʻe lava ke hangē nai ai ha Kalisitiane ko ha fuʻu fale fungavaka māʻolunga ʻaupito? (1 Kolinitō 15:58)

 ʻI HE konga ki mui ʻo e 1970 tupú, naʻe langa ha fuʻu fale māʻolunga ʻaupito fungavaka 60 ʻi loto Tōkiō, Siapani. Naʻe fifili ʻa e kakaí pe ʻe malava fēfē ke ne matuʻuaki ʻa e ngaahi mofuike ʻoku faʻa hoko ʻi he kolo ko iá. Ko e hā ʻa e fakapulipulí? Naʻe tisaini ʻe he kau langá ʻa e falé ke fefeka ka ʻi he taimi tatau ke ngaofengofua ke ne matuʻuaki ʻa e ngalulu ʻa e mofuiké. Ko e kau Kalisitiané ʻoku nau hangē ko e fuʻu fale fungavaka māʻolunga ʻaupito ko iá. ʻI he founga fē?

² Ko ha Kalisitiane kuo pau ke ne tauhi maʻu ha mafamafatatau ʻi he tuʻu maʻú mo e ngaofengofuá. ʻOku fiemaʻu ke ne hoko ʻo mālohi mo taʻengaue ʻi heʻene haʻu ko ia ki hono pouaki ʻa e ngaahi lao mo e tuʻunga ʻa Sihová. (Lau ʻa e 1 Kolinitō 15:58.) ʻOkú ne “mateuteu ke talangofua” pea ʻoku ʻikai ke ne fakangaloku. ʻI he tafaʻaki ʻe tahá, ʻoku fiemaʻu ke ne “fakaʻatuʻi,” pe ngaofengofua, ʻi he taimi ʻoku fakaʻatā ai ia ʻe hono tuʻungá pe aʻu ʻo fiemaʻu ke fai pehē. (Sēm. 3:17) Ko ha Kalisitiane kuó ne ako ke maʻu ʻa e vakai mafamafatatau ko ení te ne fakaʻehiʻehi mei he hoko ʻo fuʻu fakataputapuí pe hoko ʻo fakangofua tavale tōtuʻá. ʻI he kupu ko ení, te tau lāulea ai ki he founga ʻe lava ke tau hoko ai ʻo taʻengaué. Te tau toe vakai ki he founga ʻe nima ʻoku feinga ʻa Sētane ke fakavaivaiʻiʻaki ʻetau fakapapaú pea ako ki he founga ʻe lava ke tau talitekeʻi ai ʻene ngaahi feingá.

3. Ko e hā ʻa e ngaahi lao ʻa e Tokotaha Foaki-Lao Aoniú ʻoku maʻu ʻi he Ngāue 15:28, 29?

³ ʻI he tuʻunga ko e Tokotaha Foaki-Lao Aoniú, kuo fakahaaʻi maʻu pē ʻe Sihova ʻa e ngaahi lao mahino ki heʻene kakaí. (ʻAi.  33:22) Ko e fakatātaá, naʻe lave ʻa e kulupu pule ʻi he ʻuluaki senitulí ki he founga ʻe tolu ʻa ia kuo pau ke nofoʻaki tuʻu maʻu ai ʻa e kau Kalisitiané: (1) ʻAki hono talitekeʻi ʻa e tauhi ʻaitolí, (2) fakaʻapaʻapaʻi ʻa e toputapu ʻo e totó, pea (3) talangofua ki he ngaahi tuʻunga fakaeʻulungaanga māʻolunga ʻa e Tohi Tapú. (Lau ʻa e Ngāue 15:28, 29.) ʻE lava fēfē ke nofoʻaki tuʻu maʻu ʻa e kau Kalisitiane ʻi he ʻaho ní ʻi he tafaʻaki pau ʻe tolu ko ení?

4. ʻOku anga-fēfē ʻetau ʻave kia Sihova ʻa e anga-līʻoa maʻataʻataá? (Fakahā 4:11)

⁴ ʻOku tau talitekeʻi ʻa e tauhi ʻaitolí, ʻo lotu kia Sihova toko taha pē. Naʻá ne fekau ki he kau ʻIsilelí ke ʻoange kiate ia ʻa e anga-līʻoa maʻataʻatā. (Teu. 5:6-10) Pea ʻi he taimi naʻe fakataueleʻi ai ʻe he Tēvoló ʻa Sīsuú, naʻá ne fakahaaʻi mahino kuo pau ke tau lotu kia Sihova toko taha pē. (Māt. 4:8-10) Ko ia ai, ʻoku ʻikai ke tau lotu ki he ngaahi ʻaitolí. ʻOku ʻikai foki ke tau ʻaitoliʻaki ʻa e faʻahinga ʻo e tangatá​—tatau ai pē pe ko ha kau taki lotu, kau taki fakapolitikale pe ko ha kau sitā ʻi he māmani ʻo e sipotí mo e fakafiefiá​—ʻo fakafeangai kiate kinautolu hangē ha ngaahi ʻotuá. ʻOku tau tuʻu ʻi he tafaʻaki ʻa Sihová pea lotu pē ki he tokotaha naʻá ne “fakatupu ʻa e ngaahi meʻa kotoa pē.”​—Lau ʻa e Fakahā 4:11.

5. Ko e hā ʻoku tau pouaki ai ʻa e lao ʻa Sihova fekauʻaki mo e toputapu ʻo e moʻuí mo e totó?

⁵ ʻOku tau pouaki ʻa e lao ʻa Sihova fekauʻaki mo e toputapu ʻo e moʻuí mo e totó. Ko e hā hono ʻuhingá? Koeʻuhí ʻoku pehē ʻe Sihova ko e totó ʻokú ne fakafofongaʻi ʻa e moʻuí, ko ha meʻaʻofa mahuʻinga meiate ia. (Liv. 17:14) ʻI he taimi naʻe fuofua fakaʻatā ai ʻe Sihova ʻa e tangatá ke nau kai ʻa e kakanoʻi-manú, naʻá ne fakahinohinoʻi kinautolu ke ʻoua te nau kai ʻa e totó. (Sēn. 9:4) Naʻe toe fai ʻe Sihova ʻa e fekau ko ení ʻi heʻene ʻoange ʻa e Lao ʻa Mōsesé ki ʻIsilelí. (Liv. 17:10) Pea naʻá ne ʻoange ʻa e fakahinohino ki he kulupu pule ʻo e ʻuluaki senitulí ke tuʻutuʻuni ki he kau Kalisitiane kotoa ke “fakaʻehiʻehi ai pē . . . mei he totó.” (Ngā. 15:28, 29) ʻOku tau talangofua taʻetoeueʻia ki he fekau ko ení ʻi heʻetau fai ʻa e ngaahi fili fakafaitoʻó. b

6. Ko e hā ʻa e ngaahi feinga ʻoku tau fai ke moʻuiʻaki ʻa e ngaahi tuʻunga fakaeʻulungaanga māʻolunga ʻa Sihová?

⁶ ʻOku tau talangofua kakato ki he ngaahi tuʻunga fakaeʻulungaanga māʻolunga ʻa Sihová. (Hep. 13:4) ʻI hono ngāueʻaki ʻa e lea fakaefakatātā maeʻeeʻa, ko e ʻapositolo ko Paulá ʻokú ne faleʻi mai ke tau “ʻai ke mate” ʻa e ngaahi kupu hotau sinó​—ʻa ia, ke tau feinga mālohi ke toʻo atu ʻa e ngaahi holi fakakakano fehālaakí. ʻOku tau fakaʻehiʻehi mei he sio pe fai ha meʻa pē ʻe lava ke taki atu ki he fehokotaki fakasino taʻetāú. (Kol. 3:5; Siope 31:1) ʻI heʻetau fehangahangai mo e fakatauelé, ʻoku tau talitekeʻi ʻi he taimi pē ko iá ha faʻahinga fakakaukau pe tōʻonga ʻe lava ke ne maumauʻi ʻetau kaumeʻa mo e ʻOtuá.

7. Ko e hā ʻoku totonu ke tau fakapapauʻi ke faí, pea ko e hā hono ʻuhingá?

⁷ ʻOku ʻamanekina mai ʻe Sihova ke tau “talangofua mei he lotó.” (Loma 6:17) Ko ʻene tatakí ʻa e lelei taha maʻu pē kiate kitautolú, pea ko ʻene ngaahi laó ʻoku ʻikai ke toe ala liliu. (ʻAi. 48:17, 18; 1 Kol. 6:9, 10) ʻOku tau feinga ke fakahōifuaʻi ʻa Sihova pea fakahāhā ʻa e vakai tatau mo e tokotaha-tohi-sāmé ʻa ia naʻá ne talaki: “Kuó u fakapapau ke talangofua ki hoʻo ngaahi tuʻutuʻuní ʻi he taimi kotoa pē, ʻo aʻu ki he ikuʻangá.” (Saame 119:112) Kae kehe, ʻe feinga ʻa Sētane ke fakavaivaiʻi ʻetau fakapapaú. Ko e hā ʻa e ngaahi founga ʻokú ne ngāueʻakí?

8. ʻOku anga-fēfē hono ngāueʻaki ʻe Sētane ʻa e fakatangá ʻi he feinga ke fakavaivaiʻi ʻetau fakapapaú?

⁸ Fakatanga. ʻOku ngāueʻaki ʻe he Tēvoló ʻa e ngaahi ʻoho fakaesino mo fakaeongo ʻi he feinga  ke fakavaivaiʻi ʻetau fakapapaú. Ko ʻene taumuʻá ke “folofua” kitautolu, ke maumauʻi hotau vahaʻangatae mo Sihová. (1 Pita 5:8) Ko e kau Kalisitiane ʻi he ʻuluaki senitulí naʻe fakamanamanaʻi, haha pea tāmateʻi koeʻuhí ko ʻenau fakapapau ke tuʻu maʻú. (Ngā. 5:27, 28, 40; 7:54-60) ʻOku hokohoko atu hono ngāueʻaki ʻe Sētane ʻa e fakatangá ʻi he ʻahó ni. ʻOku hā mahino eni ʻi he fakafeangai anga-fakamamahi ʻa e kau fakafepakí ki hotau fanga tokoua ʻi Lūsiá mo e ngaahi fonua kehé pea mo e ngaahi ʻoho fakatāutaha ʻa e kau fakafepakí.

9. Fakatātaaʻi ʻa e fiemaʻu ke tau tokanga ki he ngaahi tenge olopotó.

⁹ Ngaahi tenge olopotó. ʻOku ngāueʻaki ʻe Sētane “ʻa e ngaahi ngāue kākā” ʻo tānaki atu ki he ngaahi ʻoho fakahangatonu mataʻāʻaá. (ʻEf. 6:11) Fakakaukau ki he faʻifaʻitakiʻanga ʻa ha tokoua ko Bob, naʻe tokoto falemahaki ke fai hano tafa lahi. Naʻá ne fakahā ki he kau toketaá tatau ai pē pe ko e hā ʻa e tuʻungá heʻikai ke ne tali ha huhu toto. Naʻe loto-lelei ʻa e toketā faitafá ke fakaʻapaʻapaʻi ʻene filí. Neongo ia, ʻi he pō ki muʻa ke fai ʻa e tafá, naʻe ʻaʻahi ʻa e toketā fakamohé kia Bob hili ʻa e foki hono fāmilí ki honau ʻapí. Naʻá ne tala ange kia Bob ʻoku ngalingali heʻikai huhu ha toto kiate ia ka te nau teuteu pē ia naʻa fiemaʻu. Mahalo naʻe fakakaukau ʻa e toketaá ʻe liliu ʻa e fakakaukau ʻa Bob ʻi he ʻikai ke ʻi ai hono fāmilí. Ka naʻe nofoʻaki tuʻu maʻu ʻa Bob, ʻo tala ange heʻikai ʻaupito ke ne tali ha huhu toto ʻi ha faʻahinga tuʻunga pē.

10. Ko e hā ko ha tauhele ai ʻa e fakaʻuhinga fakaetangatá? (1 Kolinitō 3:19, 20)

¹⁰ Fakaʻuhinga fakaetangata. Kapau ʻoku tau vakai ki he ngaahi meʻá mei ha vakai fakaetangata, te tau tukunoaʻi nai ʻa Sihova mo ʻene ngaahi tuʻungá. (Lau ʻa e 1 Kolinitō 3:19, 20.) “Ko e poto ʻo e māmani ko ʻení” ʻoku faʻa fakamānako ki he ngaahi holi fakakakanó. Ko e niʻihi ʻi he kau Kalisitiane ʻi Peakamosi mo Taiatailá naʻa nau ohi ʻa e tauhi ʻaitolí mo e ngaahi vakai taʻetaau naʻe anga-maheni ʻi he ongo kolo ko iá. Naʻe ʻoatu ʻe Sīsū ha akonaki mālohi ki he ongo fakatahaʻangá ki heʻena makātakiʻi ʻa e fehokotaki fakasino taʻetāú. (Fkh. 2:14, 20) ʻI he ʻahó ni, ʻoku tau fehangahangai mo e tenge ke ohi ʻa e ngaahi fakakaukau halá. Ko e ngaahi mēmipa ʻo e fāmilí mo e mahení te nau ngāuehalaʻaki nai ʻetau ngaahi ongoʻí pea fakalotoʻi kitautolu ke tau fakangaloku. Ko e fakatātaá, ʻoku nau taukaveʻi nai ko e ʻulutukua ki heʻetau ngaahi holí ʻoku ʻikai ke mahuʻinga ia pea ko e ngaahi tuʻunga fakaeʻulungaanga ʻa e Tohi Tapú ʻoku ʻolokuonga.

11. ʻI heʻetau tuʻu maʻú, ko e hā kuo pau ke tau fakaʻehiʻehi mei aí?

¹¹ ʻI he taimi ʻe niʻihi, ʻoku tau fakaʻuhinga nai ko e tataki ʻoku ʻomai ʻe Sihová ʻoku ʻikai ke feʻunga ia. ʻE aʻu nai ʻo fakataueleʻi kitautolu ke ʻoua te tau “fai pē ki he ngaahi meʻa kuo tohí.” (1 Kol. 4:6) Naʻe halaia ʻa e kau taki lotu ʻi he ʻaho ʻo Sīsuú ʻi he angahala ko ení. ʻI hono tānaki ʻa e ngaahi tuʻutuʻuni faʻu ʻe he tangata ki he Laó, naʻa nau hilifaki ai ha kavenga mamafa ki he kakai lāuvalé. (Māt. 23:4) ʻOku ʻomai ʻe Sihova kiate kitautolu ʻa e tataki māʻalaʻala fakafou ʻi heʻene Folofolá pea mo ʻene kautahá. ʻOku ʻikai ha ʻuhinga ke tau toe tānaki ha meʻa ki he fakahinohino ʻokú ne tokonaki maí. (Pal. 3:5-7) Ko ia ai, ʻoku tau fai pē ki he ngaahi meʻa kuo tohi ʻi he Tohi Tapú pea ʻoku ʻikai ke tau faʻu ʻa e ngaahi lao maʻá e kaungātuí fekauʻaki mo e ngaahi meʻa fakafoʻituituí.

12. ʻOku anga-fēfē hono pouaki ʻe Sētane ʻa e “ngaahi fakaʻuhinga hala”?

¹² Ngaahi kākā. ʻOku ngāueʻaki ʻe Sētane ʻa e “ngaahi fakaʻuhinga hala” kākā mo e “ngaahi meʻa ʻo e māmaní” ke takihalaʻi mo fakamavahevaheʻi ʻa e kakaí. (Kol. 2:8) ʻI he ʻuluaki senitulí, naʻe kau heni ʻa e ngaahi filōsofia naʻe makatuʻunga ʻi he ngaahi fakaʻuhinga fakaetangata, ngaahi akonaki faka-Siu taʻefakatohitapu, pea mo e akonaki ko e kau Kalisitiané  kuo pau ke nau tauhi ʻa e Lao ʻa Mōsesé. Ko e ngaahi kākā eni koeʻuhí naʻa nau toʻo ʻa e tokanga ʻa e kakaí mei he Matavai moʻoni ʻo e potó, ʻa Sihova. ʻI he ʻahó ni, ʻoku ngāueʻaki ʻe Sētane ʻa e mītiá mo e netiueka fakasōsialé ke fakamafola ʻa e ngaahi talanoa sasala mo e ngaahi ongoongo loi ʻo pouaki ʻe he kau taki fakapolitikalé. Naʻe hokolahia eni ʻi he lolotonga ʻa e mahaki fakaʻauha COVID-19. c Ko e Kau Fakamoʻoni ʻa Sihova naʻa nau fanongo ki he fakahinohino naʻe ʻomai mei heʻetau kautahá naʻa nau fakaʻehiʻehi mei he loto-moʻua tōtuʻa naʻe hokosia ʻe he faʻahinga naʻa nau fanongo ki he fakamatala fakatupu takihalá.​—Māt. 24:45.

13. Ko e hā kuo pau ke tau tokanga ai ki he ngaahi fakahohaʻá?

¹³ Ngaahi fakahohaʻa. Kuo pau ke ʻoua naʻa ngalo ʻiate kitautolu “ʻa e ngaahi meʻa ʻoku mahuʻinga angé.” (Fil. 1:9, 10) Ko e ngaahi fakahohaʻá ʻe lava ke ne toʻo atu ʻa e konga lahi hotau taimí mo e tokangá ʻa ia naʻe mei vaheʻi ki he ngaahi ngāue ʻoku ʻaonga angé. Ko e ngaahi meʻa anga-maheni ʻo e moʻuí​—hangē ko e kai, inu, fakafiefia mo e ngāue paʻangá​—ʻe lava ke hoko ko ha fakahohaʻa kapau te tau fakaʻatā ia ke hoko ko e meʻa muʻomuʻa taha ʻi heʻetau moʻuí. (Luke 21:34, 35) Tānaki atu ki aí, ʻi he ʻaho kotoa ʻoku nafui kitautolu ʻaki ʻa e ngaahi ongoongo fekauʻaki mo e fekīhiaki fakasōsiale mo e ngaahi ʻīsiu fakapolitikale. Heʻikai ʻaupito ke tau tuku ke fakahohaʻasi kitautolu ʻe he ngaahi tālanga ko ení. He ka ʻikai, ʻe kamata nai ke tau kau ki ha tafaʻaki ʻi hotau ʻatamaí mo e lotó. ʻOku ngāueʻaki ʻe Sētane ʻa e ngaahi founga kotoa naʻe lave ki ai ʻi ʻolungá mo e taumuʻa ke fakavaivaiʻi ʻetau fakapapau ke fai ʻa e meʻa ʻoku totonú. Tau lāulea angé ki he founga ʻe lava ke tau talitekeʻi ai ʻene ngaahi feingá pea nofoʻaki tuʻu maʻu.

14. Ko e hā ʻa e meʻa ʻe taha ʻe lava ke ne tokoniʻi kitautolu ke nofoʻaki tuʻu maʻu ʻi he tafaʻaki ʻa Sihová?

¹⁴ Fakakaukauloto ki hoʻo fakatapuí mo e papitaisó. Naʻá ke fou ʻi he ongo sitepu ko iá koeʻuhí naʻá ke loto ke tuʻu ʻi he tafaʻaki ʻa Sihová. Fakakaukau atu ki he meʻa naʻá ne tokoniʻi koe ke hoko ʻo tuipau kuó ke maʻu ʻa e moʻoní. Naʻá ke maʻu ʻa e ʻilo totonu fekauʻaki mo Sihová pea kamata ke ke fakaʻapaʻapa mo ʻofa kiate ia ko hoʻo  Tamai fakahēvani. Naʻá ke fakatupulekina ʻa e tui pea ueʻi koe ke fakatomala. Naʻe ueʻi koe ʻe ho lotó ke siʻaki ʻa e ngaahi tōʻonga halá pea moʻui ʻo fehoanaki mo e finangalo ʻo e ʻOtuá. Naʻá ke ongoʻi fiemālie ʻi hoʻo lāuʻilo ki he fakamolemole ʻa e ʻOtuá. (Saame 32:1, 2) Naʻá ke maʻu ʻa e ngaahi fakataha faka-Kalisitiané pea kamata ke vahevahe ki he niʻihi kehé ʻa e ngaahi meʻa fakaofo naʻá ke akó. ʻI he tuʻunga ko ha Kalisitiane ʻosi fakatapui mo papitaiso, ʻokú ke ʻaʻeva he taimí ni ʻi he hala ki he moʻuí, ʻo fakapapauʻi ke ʻoua ʻe ʻalu hē mei ai.​—Māt. 7:13, 14.

15. Ko e hā ʻoku ʻaonga ai ʻa e akó mo e fakalaulaulotó?

¹⁵ Ako ʻa e Folofola ʻa e ʻOtuá pea fakalaulauloto ki ai. Hangē pē ko e tuʻu mālohi ha fuʻu ʻakau kapau kuo faiaka loloto, ʻe lava ke tau nofoʻaki tuʻu maʻu kapau ko ʻetau tuí ʻoku faiaka loloto ʻi he Folofola ʻa e ʻOtuá. ʻI he tupu ha fuʻu ʻakau, ko hono aká ʻoku tupu ʻo toe loloto ange pea mafola mamaʻo atu. ʻI heʻetau ako mo fakalaulaulotó, ʻoku tau fakaivimālohiʻi ai ʻetau tuí pea fakalolotoʻi ʻetau tuipau ko e ngaahi founga ʻa e ʻOtuá ʻa e lelei tahá. (Kol. 2:6, 7) Fakakaukauloto ki he founga naʻe tokoniʻi ai ʻe he fakahinohino, tataki mo e maluʻi ʻa Sihová ʻa ʻene kau sevāniti ʻi he kuohilí. Ko e fakatātaá, naʻe tokanga ʻa ʻIsikeli ʻi hono fua fakalelei ʻe ha ʻāngelo ʻa e temipale ʻi he vīsoné. Naʻe fakaivimālohiʻi ʻe he vīsone ko ení ʻa ʻIsikeli, pea ʻoku tokonaki mai ai ʻa e ngaahi lēsoni ʻaonga kiate kitautolu ki he founga ʻe lava ke tau pouaki ai ʻa e ngaahi tuʻunga ʻa Sihova ki he lotu moʻoní. d (ʻIsi. 40:1-4; 43:10-12) Ko kitautolu foki ʻoku tau maʻu ʻaonga ʻi he taimi ʻoku tau vaheʻi ai ʻa e taimi ke ako mo fakalaulauloto ki he ngaahi meʻa loloto ange ʻi he Folofola ʻa e ʻOtuá.

16. Naʻe anga-fēfē hono maluʻi ʻe ha loto tuʻu maʻu ʻa Bob? (Saame 112:7)

¹⁶ Fakatupulekina ha loto tuʻu maʻu. Naʻe talaki ʻe Tuʻi Tēvita ʻene ʻofa taʻetoeueʻia kia Sihová ʻi heʻene hiva: “ʻOku tuʻu maʻu ʻa hoku lotó, ʻe ʻOtua.” (Saame 57:7) ʻE lava ke tau maʻu foki mo ha loto tuʻu maʻu, ʻo falala kakato kia Sihova. (Lau ʻa e Saame 112:7.) Fakakaukau ki hono tokoniʻi ʻe he meʻá ni ʻa Bob, naʻe lave ki ai ki muʻá. ʻI hono fakahā kiate ia ʻe teuteu pē ha toto naʻa fiemaʻu ki hono tafá, naʻá ne tali ange he taimi pē ko iá kapau ʻe aʻu ki ha tuʻunga te nau  huhu ha toto kiate ia, te ne mavahe leva mei he falemahakí. Ki mui ai, naʻe pehē ʻe Bob, “Naʻe ʻikai haʻaku toumoua pe hohaʻa ʻe taha.”

17. Ko e hā ʻe lava ke tau ako mei he hokosia ʻa Bob? (Sio foki ki he fakatātaá.)

¹⁷ Naʻe tuʻu maʻu ʻa Bob koeʻuhí naʻá ne ʻosi fai ʻene fili ke tuʻu maʻu ki muʻa fuoloa ke ne ʻalu ki he falemahakí. ʻUluakí, naʻá ne holi ke ʻai ʻa e loto ʻo Sihová ke fiefia. Uá, naʻá ne ako fakalelei ʻa e meʻa ʻoku leaʻaki ʻe he Tohi Tapú mo ʻetau ʻū tohi Fakatohitapú fekauʻaki mo e toputapu ʻo e moʻuí mo e totó. Tolú, naʻá ne tuipau ko e muimui ʻi he tataki ʻa Sihová ʻe maʻu mei ai ʻa e ngaahi ʻaonga tuʻuloa. Ko kitautolu foki ʻe lava ke tau maʻu ha loto tuʻu maʻu neongo pe ko e hā ha ʻahiʻahi ʻoku tau fehangahangai nai mo ia.

18. ʻOku anga-fēfē hono akoʻi mai ʻe he faʻifaʻitakiʻanga ʻa Pēlaké ke tau falala kia Sihova? (Sio ki he tā ʻi he takafí.)

¹⁸ Falala kia Sihova. Fakakaukau ki he lavameʻa ʻa Pēlake koeʻuhi ko e falala ki he tataki ʻa Sihová. Neongo naʻe ʻikai ʻiloa ha pā pe ko ha tao ʻi he fonuá kotoa, naʻe fekau ʻe Sihova kiate ia ke ne ʻalu atu ʻo faitau mo e kau tau ʻosi fakanaunau-tau lelei ʻa e ʻeikitau Kēnani ko Sīselá. (Fkm. 5:8) Naʻe tala ange ʻe he palōfita fefine ko Tēpolá kia Pēlake ke ne ʻalu hifo ki he feituʻu tokaleleí ke fetaulaki ai mo Sīsela mo ʻene ngaahi saliote ʻe 900. Neongo ʻe hā ngali kaunga lelei ki he ngaahi salioté ʻenau ʻi he feituʻu tokaleleí, naʻe talangofua pē ʻa Pēlake. ʻI he ʻalu hifo ʻa e kau sōtiá ki Moʻunga Tēpoá, naʻe ʻohifo ʻe Sihova ha fuʻu ʻuha lōvai mei he langí. Naʻe pipiki ʻa e vaʻe ʻo e ngaahi saliote ʻa Sīselá ʻi he pelepelá, pea naʻe foaki ʻe Sihova kia Pēlake ʻa e ikuná. (Fkm. 4:1-7, 10, 13-16) ʻI he tuʻunga meimei tatau, ʻe foaki mai ʻe Sihova ʻa e ikuná kiate kitautolu kapau te tau falala kiate ia pea ki he tataki ʻokú ne tokonaki mai fakafou ʻi hono kau fakafofongá.​—Teu. 31:6.

19. Ko e hā ʻokú ke loto ai ke nofoʻaki tuʻu maʻú?

¹⁹ Ko ʻetau faitau ke nofoʻaki tuʻu maʻú ʻe hokohoko atu pē ia ʻi heʻetau kei moʻui ʻi he fokotuʻutuʻu ko ení. (1 Tīm. 6:11, 12; 2 Pita 3:17) ʻOfa ke tau fakapapauʻi ke ʻoua ʻe fepālekina holo kitautolu ʻe he fakatangá, ngaahi tenge olopotó, fakaʻuhinga fakaetangatá, ngaahi kākaá mo e fakahohaʻá. (ʻEf. 4:14) ʻI hono kehé, tau tuʻu maʻu ʻi heʻetau anga-līʻoa kia Sihová pea taʻengaue ʻi heʻetau talangofua ki heʻene ngaahi fekaú. ʻI he taimi tatau, ʻoku fiemaʻu ke tau hoko ʻo fakaʻatuʻi. ʻI he kupu hono hokó, te tau lāulea ai ki he hoko ʻa Sihova mo Sīsū ko e faʻifaʻitakiʻanga haohaoa ʻo e fakaʻatuʻí.