1-2. (a) Ko e hā ʻa e fakatokanga naʻe ʻoange ʻe Sīsū ki heʻene kau ākongá? (e) Ko e hā naʻe ʻulutukua ai ʻa e kau ākongá ki he vaivaiʻanga fakaetangatá? (Sio foki ki he fakatātaá.)

 “KO E moʻoni, ʻoku vēkeveke ʻa laumālie ka ʻoku vaivai ʻa kakano.” a (Māt. 26:41e) ʻI he ngaahi lea ko eni ʻa Sīsuú, naʻá ne fakahaaʻi ʻokú ne mahinoʻi hotau tuʻunga taʻehaohaoá. Ka naʻe toe fakakau ʻi heʻene ngaahi leá ha fakatokanga: Tokanga telia ʻa e falala tōtuʻá. Ki muʻa siʻi ʻi he pō pē ko iá, ko e kau ākongá naʻa nau fakahaaʻi ʻi he loto-maʻu ʻenau fakapapau ke pīkitai ki honau ʻEikí. (Māt. 26:35) Naʻe lelei ʻenau fakaueʻilotó. Neongo ia, naʻe ʻikai ke nau ʻiloʻi ʻe vave ʻenau fakavaivai ki he tengé. Ko ia ai, naʻe fakatokanga ʻa Sīsū kiate kinautolu: “Mou hanganaki leʻo mo lotu maʻu ai pē, koeʻuhi ke ʻoua naʻa mou hū ki ha ʻahiʻahi.”—Māt. 26:41a.

² Ko e meʻa pangó, naʻe ʻikai ke hanganaki leʻo ʻa e kau ākongá. ʻI hono puke ʻa Sīsuú, naʻa nau pīkitai kiate ia pe naʻa nau tō ʻi he fakatauele ke holá? ʻI he ʻikai mateuteu ʻa e kau ākongá, naʻa nau fai ʻa e meʻa tofu pē naʻa nau pehē heʻikai ʻaupito te nau faí—naʻa nau liʻaki ʻa Sīsū.—Māt. 26:56.

3. (a) Ke nofoʻaki mateaki kia Sihová, ko e hā kuo pau ai ke tau fakaʻehiʻehi mei he falala tōtuʻá? (e) Ko e hā te tau lāulea ki ai ʻi he kupu ko ení?

³ ʻOku ʻikai ʻaonga ke tau ohi ʻa e falala tōtuʻá. Ko e moʻoni, ʻoku tau fakapapauʻi ke ʻoua ʻe fakaʻatā ha meʻa ke ne fakatafokiʻi kitautolu meia Sihova. Neongo ia, ʻoku tau taʻehaohaoa foki pea tōngofua ʻi he ʻahiʻahí. (Loma 5:12; 7:​21-23) ʻE lava ke tau fehangahangai mo ha ngaahi tuʻunga, ʻo ʻikai ha fakatokanga, ʻa ia  ʻokú ne ʻai ʻa e ʻalunga koví ke hā fakamānako ʻaupito. Ke nofoʻaki mateaki kia Sihova mo hono ʻAló, ʻoku fiemaʻu ke tau muimui ki he faleʻi ʻa Sīsū ke tau hanganaki leʻohi kitautolu mei he fakatauele ke faiangahalá. Ko e kupu ko ení ʻe lava ke ne tokoniʻi kitautolu ke fai ia. ʻUluakí, te tau lāulea ki he ngaahi tafaʻaki kuo pau ke tautefito ai ʻetau ʻāʻaá. Te tau lāulea leva ki he founga ke tau leʻohi ai kitautolu mei he ʻahiʻahí. Fakaʻosí, te tau lāulea ki he founga ke hanganaki leʻo aí.

NOFOʻAKI ʻĀʻĀ—ʻI HE NGAAHI TAFAʻAKI FĒ?

4-5. Ko e hā ke tau nofoʻaki ʻāʻā ai naʻa mo e aʻu ki he fanga kiʻi angahala īkí?

⁴ Naʻa mo e fanga kiʻi angahala īkí ʻe lava ke ne fakavaivaiʻi hotau vahaʻangatae mo Sihová. Pehē foki, ʻe lava ke taki atu ai kitautolu ke fakahoko ʻa e ngaahi angahala ʻoku mafatukituki angé.

⁵ Ko kitautolu kotoa ʻoku tau fehangahangai mo e fakatauele ke faiangahalá. Ka ko e tokotaha taki taha ʻo kitautolu ʻoku ʻi ai ʻa e ngaahi tafaʻaki ʻoku tau tuʻu laveangofua ai, pe ko e fakahoko ha angahala mamafa, kau ʻi ha faʻahinga founga ʻo e tōʻonga taʻemaʻá, pe tō ʻi he tauhele ʻo e fakakaukau fakamāmaní. Ko e fakatātaá, ʻoku faitau nai ha taha mo e fakatauele ke fehokotaki fakasino taʻetāú. Ko ha taha ʻoku mālohi nai ʻene hehema ki he ngaahi tōʻonga taʻemaʻá, hangē ko e fakalielia-toko-tahá pe sio ʻi he ʻata fakalieliá. Neongo ia ʻoku fāinga nai ha tokotaha mo e manavahē tangatá, fakakaukau faʻifaʻitelihá, ʻita vavé pe ko ha toe meʻa kehe. Hangē ko ia naʻe fakahaaʻi ʻe Sēmisí, “ʻoku ʻahiʻahiʻi ʻa e tokotaha taki taha ʻi hono tohoakiʻi mo fakataueleʻi ʻe heʻene holi pē ʻaʻaná.”—Sēm. 1:14.

6. Ko e hā kuo pau ke tau sivisiviʻí?

⁶ ʻOkú ke ʻiloʻi pe ko e hā ʻa e ngaahi tafaʻaki ʻoku faingofua taha ai hono fakataueleʻi koé? ʻOku ʻikai lelei ke tau kākaaʻi pē kitautolu ʻaki ʻetau pehē ʻoku ʻikai hatau vaivaiʻanga pe fakamulituku ʻo pehē ʻoku tau fuʻu mālohi ke tō ʻi he faihalá. (1 Sio. 1:8) He ko ē, ʻoku fakahaaʻi ʻe Paula naʻa mo e faʻahinga ʻoku nau “maʻu ʻa e ngaahi tuʻunga taau fakalaumālié” te nau tō nai ʻi he fakatauelé kapau ʻoku ʻikai ke nau hanganaki leʻo. (Kal. 6:1) Kuo pau ke tau sivisiviʻi hifo pē kitautolu pea lāuʻilo ki he ngaahi tafaʻaki ʻoku ʻikai ke tau mālohi aí.—2 Kol. 13:5.

7. Ko e hā ʻoku totonu ke tau fai ki ai ha tokanga makehé? Fakatātaaʻi.

⁷ ʻI heʻetau ʻiloʻi pē ʻa e ngaahi tafaʻaki ʻoku tau tuʻu laveangofua taha ai ki he fakatauelé, ko e hā ʻoku totonu ke tau faí? Fakaivimālohiʻi ʻetau malava ke talitekeʻi ʻa e fakatauelé! Ke fakatātaaʻi, ʻi he taimi ʻo e Tohi Tapú ko e tafaʻaki naʻe tuʻu laveangofua taha ki hano ʻohofi  ʻi he ʻā ʻo e koló ko hono ngaahi matapaá. Ko ia ai, ko e ngaahi matapaá naʻe leʻohi malu tahá. ʻI he tuʻunga meimei tatau, ʻoku fiemaʻu ke tau fai ha tokanga makehe ki ha faʻahinga tafaʻaki pē ʻoku tau ʻiloʻi ʻoku tautefito ai ʻetau vaivaí.—1 Kol. 9:27.

FOUNGA KE TAU LEʻOHI AI KITAUTOLÚ

8-9. Naʻe mei lava fēfē ke fakaʻehiʻehi ʻa e talavou naʻe fakamatalaʻi ʻi he Palōveepi vahe 7 mei hono fakahoko ʻa e angahala mamafá? (Palōveepi 7:​8, 9, 13, 14, 21)

⁸ ʻE lava fēfē ke tau leʻohi kitautolu? Fakakaukau ki he meʻa ʻe lava ke tau ako mei he talavou naʻe lāulea ki ai ʻi he Palōveepi vahe 7. Naʻá ne fehokotaki fakasino taʻetaau mo ha fefine ʻulungaanga taʻetaau. ʻOku tala mai ʻi he veesi 22 ko e talavoú naʻe “fakafokifā pē” ʻene muimui ʻiate iá. Kae hangē ko ia ʻoku hā ʻi he ngaahi veesi ki muʻá, naʻá ne fou ʻi he ngaahi sitepu ki muʻa pea toki hoko ení ʻa ia naʻe takitaki māmālie atu ai ia ki he faiangahalá.

⁹ Ko e hā naʻe taki atu ki heʻene faiangahalá? ʻUluakí, ʻi he efiafí, naʻá ne “lue atu ʻi he halá ʻo ofi ki he tuliki ʻoku ʻi ai ʻa e [fefine ʻulungaanga taʻetāú].” Naʻá ne laka atu leva ʻi he hala ki hono falé. (Lau ʻa e Palōveepi 7:​8, 9.) Hokó, ʻi heʻene sio ki he fefiné, naʻe ʻikai ke ne tafoki. ʻI hono kehé, naʻá ne fakaʻatā ke ʻuma ange ʻa e fefiné kiate ia pea fanongo ki heʻene talanoa fekauʻaki mo e ngaahi feilaulau feʻinasiʻaki naʻá ne faí, mahalo ʻi ha feinga ke ʻai ʻa e talavoú ke ne fakakaukau naʻe ʻikai ko ha tokotaha kovi ia. (Lau ʻa e Palōveepi 7:​13, 14, 21.) Kapau naʻe fakaʻehiʻehi pē ʻa e talavoú mei he ngaahi fakatuʻutāmaki naʻe taki atu ki he angahalá, naʻá ne mei leʻohi ai ia mei he fakatauelé mo e faiangahalá.

10. ʻE anga-fēfē nai hono fai ʻe ha tokotaha he ʻahó ni ʻa e fehālaaki tatau mo e talavoú?

¹⁰ Ko e talanoa ko eni ʻa Solomoné ʻokú ne fakatātaaʻi ʻa e meʻa ʻe lava ke hoko ki ha tokotaha pē ʻoku lotu kia Sihova. Te ne fai nai ha angahala mamafa pea ki mui aí ʻokú ne ongoʻi naʻe hoko “fakafokifā pē” ʻa e meʻa kotoa. Pe te ne pehē nai, “Naʻe hokonoa pē.” Ka neongo ia, kapau ʻokú ne fakakaukau ki he meʻa moʻoni naʻe hokó, ngalingali te ne fakatokangaʻi tā naʻá ne fou ʻi he ngaahi sitepu taʻefakapotopoto naʻe taki atu ki heʻene faiangahalá. Naʻe kau nai ʻi he ngaahi sitepu ko iá ʻa e feohi koví, fakafiefia ʻikai leleí, pe toutou ʻaʻahi ki he ngaahi feituʻu ʻoku fehuʻiá—tatau ai pē pe naʻá ne ʻi ai tonu pe ʻi he ʻinitanetí. Mahalo pē naʻe ʻikai ke ne toe lotu, lau ʻa e Tohi Tapú, maʻu ʻa e ngaahi fakatahá, pe kau ʻi he ngāue fakafaifekaú. ʻI he hangē ko e talavou naʻe lāulea ki ai ʻi he Palōvēpí, tā naʻe ʻikai ke hoko “fakafokifā pē” ʻene faiangahalá.

11. Ko e hā ʻoku totonu ke tau fakaʻehiʻehi mei aí ke ʻoua te tau tō ki he faiangahalá?

¹¹ Ko e hā ʻa e lēsoni kiate kitautolú? ʻOku ʻikai ngata pē ʻa e fiemaʻu ke tau fakaʻehiʻehi mei he angahalá kae pehē foki ki he ngaahi sitepu ʻoku taki atu ki he faiangahalá. Ko e poini tofu pē ia naʻe fakamamafaʻi ʻe Solomoné hili ʻene talanoa ki he talavoú mo e fefine ʻulungaanga taʻetāú. ʻI he lave ki he fefiné, ʻokú ne fakamatala: “ʻOua naʻá ke hē atu ki hono ngaahi halá.” (Pal. 7:25) ʻOkú ne toe lea fekauʻaki mo e fefine tōʻonga fakalielia ko iá: “Fakamamaʻo ʻaupito meiate ia; ʻoua naʻa fakaofiofi ki he hūʻanga ʻo hono falé.” (Pal. 5:​3, 8) ʻIo, ʻoku tau maluʻi kitautolu mei he angahalá ʻaki ʻa e hanganaki fakamamaʻo ʻaupito mei he ngaahi tuʻunga ʻe taki atu ki aí. b ʻE kau nai ki heni ʻa e fakaʻehiʻehi mei he ngaahi tuʻunga pe ngaahi ngāue pau ʻoku ʻikai ke hala ia ki he kau Kalisitiané ka ʻoku anga-maheni ʻene taki kitautolu ki he ʻahiʻahí.—Māt. 5:​29, 30.

12. Ko e hā ʻa e fakapapau naʻe fai ʻe Siopé, pea naʻe tokoni fēfē ia ke ne maluʻi ia mei he ʻahiʻahí? (Siope 31:1)

¹² Ke fakaʻehiʻehi mei he ngaahi tuʻunga ʻe taki atu ki he faiangahalá, ʻe fiemaʻu ke tau fai ha fakapapau mālohi. Ko e meʻa ia naʻe fai ʻe Siopé.  Naʻá ne “fai ha fuakava mo [hono] matá” ke ʻoua ʻaupito te ne sio ʻo holi taʻetaau ki he kau fefine kehé. (Lau ʻa e Siope 31:1.) Ko e fai pau ki he fakapapau ko iá te ne hanganaki fakamamaʻo ai mei hono fai ha tono. Ko kitautolu foki ʻe lava ke tau fai ha fakapapau ke fakaʻehiʻehi mei ha meʻa pē ʻoku ngalingali ʻe taki atu ki he ʻahiʻahí.

13. Ko e hā kuo pau ai ke tau leʻohi ʻetau fakakaukaú? (Sio foki ki he fakatātaá.)

¹³ Kuo pau ke tau toe leʻohi ʻetau fakakaukaú. (ʻEki. 20:17) Ko e niʻihi ʻoku nau tui ʻoku ʻikai ke hala ʻa e fakaʻānaua ki he ngaahi holi taʻetotonú kehe pē ko e tokotahá ʻoku ʻikai ke ne fakatōliʻa ʻa e holí. Ka ko e fakakaukau peheé ʻoku hala. Ko e tokotaha ʻoku nōfoʻi ʻi ha holi koví ʻokú ne ʻai ke toe mālohi ange ʻa e holí. ʻI ha ʻuhinga, ʻokú ne fakatupu ai ʻe ia ha ʻahiʻahi, ʻa ia ʻe pau ke ne talitekeʻi he taimí ni. Ko e moʻoni, ʻe hū ki hotau ʻatamaí ʻa e fakakaukau halá ʻi he taimi ʻe niʻihi. Ka ko e kií ke siʻaki ʻa e ngaahi fakakaukau ko iá ʻi he taimi pē ko iá pea fetongiʻaki ʻa e ngaahi fakakaukau leleí. ʻI heʻetau fai iá, ʻoku tau taʻofi ai ʻa e ngaahi fakakaukau halá mei heʻene tupulaki ʻo hoko ko ha holi mālohi ʻoku faingataʻa ke faitau mo ia pea aʻu nai ʻo taki atu kitautolu ke fakahoko ha angahala mamafa.—Fil. 4:8; Kol. 3:2; Sēm. 1:​13-15.

14. Ko e hā ha toe meʻa ʻe lava ke tokoni ke tau leʻohi kitautolu mei he ʻahiʻahí?

¹⁴ Ko e hā ha toe meʻa ʻe lava ke tau fai ke leʻohi ai kitautolu mei he ʻahiʻahí? ʻOku fiemaʻu ke tau tuipau fakaʻaufuli te tau maʻu ʻaonga maʻu pē ʻi he talangofua ki he ngaahi lao ʻa Sihová. Ko e taimi ʻe niʻihi te tau fāinga nai ke fakatonutonu ʻetau ngaahi fakakaukaú mo e holí ke fehoanaki mo e meʻa ʻoku hōifua ki ai ʻa e ʻOtuá, ka ko e nonga ʻo e ʻatamaí ʻa ia te tau hokosiá ʻe tuha moʻoni ia mo e feingá.

15. ʻE anga-fēfē tokoni ʻa hono fakatupulekina ʻa e ngaahi holi totonú ke leʻohi kitautolu mei he ʻahiʻahí?

¹⁵ ʻOku fiemaʻu ke tau fakatupulekina ʻa e ngaahi holi totonú. Kapau ʻoku tau ako ke “fehiʻa ki he koví, pea ʻofa ki he leleí,” te tau fakaivimālohiʻi ai ʻetau fakapapau ke fai ʻa e meʻa ʻoku totonú pea fakaʻehiʻehi mei he ngaahi tuʻunga ʻe taki atu ki he faiangahalá. (ʻĒm. 5:15) Ko e ngaahi holi totonú te ne toe fakaivimālohiʻi kitautolu ke nofoʻaki tuʻu maʻu kapau ʻoku tau fehangahangai mo ha fakatauele naʻe ʻikai ke tau ʻamanekina pe taʻealakalofi.

16. ʻE lava fēfē ke tokoniʻi kitautolu ʻe he ngaahi ngāue fakalaumālié ke tau hanganaki leʻó? (Sio foki ki he fakatātaá.)

 ¹⁶ ʻE lava fēfē ke tau fakatupulekina ʻa e ngaahi holi totonú? ʻOku totonu ke tau femoʻuekina ʻi he lahi taha ʻe ala lavá ʻi he ngaahi ngāue fakalaumālié. ʻI heʻetau maʻu ʻa e ngaahi fakataha faka-Kalisitiané pe kau ʻi he ngāue fakafaifekaú, heʻikai ke faingofua ai hono fakataueleʻi kitautolu ke fai ʻa e meʻa ʻoku koví. ʻI hono kehé, ʻoku tau langa hake ʻetau holi ke fakahōifuaʻi ʻa Sihová. (Māt. 28:​19, 20; Hep. 10:​24, 25) ʻI he lau mo ako ʻa e Folofola ʻa e ʻOtuá pea fakalaulauloto ki aí, ʻoku tau fakaivimālohiʻi ai ʻetau ʻofa ki he leleí mo ʻetau fehiʻa ki he koví. (Sios. 1:8; Saame 1:​2, 3; 119:​97, 101) Manatuʻi, naʻe tala ʻe Sīsū ki heʻene kau ākongá: “Lotu maʻu ai pē, koeʻuhi ke ʻoua naʻa mou hū ki ha ʻahiʻahi.” (Māt. 26:41) ʻI heʻetau fakamoleki ʻa e taimi mo ʻetau Tamai fakahēvaní ʻi he lotu, ʻoku tau ngāueʻaongaʻaki ai ʻene tokoní pea fakaivimālohiʻi ʻetau fakapapau ke fakahōifuaʻi iá.—Sēm. 4:8.

HANGANAKI LEʻO

17. Ko e hā ʻa e hehema naʻe toutou ʻulutukua ki ai ʻa Pitá?

¹⁷ ʻOku ngalingali ʻe lava ke tau huʻi fakaʻaufuli atu ʻa e ngaahi hehema taʻehaohaoa ʻe niʻihi. Ka te tau fakatokangaʻi nai ko e ngaahi hehema ʻe niʻihi ʻoku nau kei fakahohaʻasi pē kitautolu. Fakakaukau ki he tuʻunga ʻo e ʻapositolo ko Pitá. Naʻá ne ʻulutukua ki he manavahē tangatá ʻi he taimi naʻá ne fakaʻikaiʻi tuʻo tolu ai ʻa Sīsuú. (Māt. 26:​69-75) Naʻe hā ngali kuo ikuʻi ʻe Pita ʻa e manavahē ko iá ʻi heʻene faifakamoʻoni loto-toʻa ʻi he ʻao ʻo e Sanetalimí. (Ngā. 5:​27-29) Kae kehe, ʻi ha ngaahi taʻu ki mui ai, ʻi he “manavahē ki he faʻahinga ko ia ʻo e haʻa kamú,” naʻá ne taʻofi fakataimi ʻene kai fakataha mo e kau Kalisitiane Senitailé. (Kal. 2:​11, 12) Naʻe toe foki mai ʻa e manavahē ʻa Pitá. Mahalo pē naʻe ʻikai ʻaupito ke ne ikuʻi fakaʻaufuli ia.

18. Ko e hā ʻe lava ke hoko ki he niʻihi ʻo e ngaahi hehema fehālaakí?

¹⁸ Te tau fehangahangai nai mo ha tuʻunga meimei tatau. Anga-fēfē? Ko ha hehema naʻa tau fakakaukau kuo tau ʻosi siʻaki ʻe toe foki mai nai ke ʻahiʻahiʻi kitautolu. Ko e fakatātaá, naʻe fakahaaʻi moʻoni ʻe ha tokoua: “Naʻá ku talitekeʻi ʻa e ʻata fakalieliá ʻi he taʻu ʻe 10 pea fakatuipauʻi kiate au kuó u ikuʻi ʻa e palopalema ko iá. Ka ko hoku vaivaiʻangá naʻe hangē ia ha kulī fekai ʻoku tuku toi mai, ʻo tatali ki he taimi totonú ke ne ʻoho ai.” ʻOku taau ke fakaongoongoleleiʻi,  naʻe ʻikai ke ne foʻi. Naʻá ne ʻiloʻi ʻe fiemaʻu ke ne feinga lahi ʻi he ʻaho taki taha ke talitekeʻi ʻa e tōʻonga kovi ko ení—mahalo ʻi he toenga ʻene moʻui ʻi he fokotuʻutuʻu ko ení. ʻI he tokoni hono uaifí mo e kau mātuʻa ʻi heʻene fakatahaʻangá, naʻá ne ngāue mālohi ange ke talitekeʻi ʻa e ʻata fakalieliá.

19. ʻE lava fēfē ke tau talitekeʻi ha hehema taʻeʻunua?

¹⁹ ʻE lava fēfē ke tau talitekeʻi ha hehema taʻeʻunua koeʻuhí ke ʻoua te tau fakatōliʻa ia? ʻAki ʻa e muimui ki he faleʻi ʻa Sīsū fekauʻaki mo e ʻahiʻahí: “Mou hanganaki leʻo.” Naʻa mo e ngaahi taimi ʻokú ke ongoʻi ai ʻokú ke mālohí, hokohoko atu ke fakaʻehiʻehi mei he ngaahi tuʻunga ʻe lava ke taki atu ki he ʻahiʻahí. (1 Kol. 10:12) Hanganaki ngāueʻaki ʻa e ngaahi founga naʻá ne ʻai koe ke ke lavameʻá. ʻOku fakahaaʻi ʻi he Palōveepi 28:14: “ʻOku fiefia ʻa e tangata ʻoku tuʻu mateuteu maʻu peé.”—2 Pita 3:14.

KO E NGAAHI PALE ʻO E HANGANAKI LEʻÓ

20-21. (a) Ko e hā ʻa e ngaahi pale te tau maʻu ʻi heʻetau hanganaki leʻohi kitautolu mei he ʻahiʻahí? (e) Kapau ʻoku tau fai ʻetau tafaʻakí, ko e hā ʻe fai ʻe Sihova maʻatautolú? (2 Kolinitō 4:7)

²⁰ ʻOku lava ke tau fakapapauʻi ko ʻetau hanganaki leʻohi kitautolu mei he ʻahiʻahí ʻoku tuha ia mo e feingá. Neongo pe ko e hā ha “fiefia fakataimi” ʻe ʻomai nai ʻe he angahalá, ko e moʻuiʻaki ʻa e ngaahi tuʻunga ʻa Sihová te ne ʻai ke tau fiefia mamaʻo ange. (Hep. 11:25; Saame 19:8) Ko hono ʻuhingá he naʻe fakatupu kitautolu ke tau moʻui ʻo fakatatau ki heʻene ngaahi foungá. (Sēn. 1:27) Ko ia ai te tau maʻu ha konisēnisi maʻa pea fakapapauʻi ai te tau maʻu ʻa e moʻui taʻengatá.—1 Tīm. 6:12; 2 Tīm. 1:3; Sute 20, 21.

²¹ Ko e moʻoni, “ʻoku vaivai ʻa kakano.” Ka ʻoku ʻikai ʻuhinga ení ʻoku ʻikai hatau tokoni. ʻOku tuʻu mateuteu ʻa Sihova ke ʻomai kiate kitautolu ʻa e mālohi ʻoku fiemaʻú. (Lau ʻa e 2 Kolinitō 4:7.) Kae kehe, fakatokangaʻi ko e mālohi ʻoku ʻomai ʻe he ʻOtuá ko e mālohi ia ʻoku mahulu atu ʻi he tuʻunga anga-mahení. Ko e mālohi anga-mahení—ʻa e feinga ʻoku tau fai ʻi he ʻaho taki taha ke leʻohi kitautolu mei he ʻahiʻahí—ko e meʻa ia ʻa kitautolu ke tokonaki. Kapau ʻoku tau fai ʻetau tafaʻakí, ʻe lava ke tau falala pau ʻe tali ʻe Sihova ʻetau ngaahi lotu ki ha mālohi lahi angé ʻi heʻetau fiemaʻu iá. (1 Kol. 10:13) ʻIo, fakataha mo e tokoni ʻa Sihová, ʻe lava ke tau hanganaki leʻohi kitautolu mei he ʻahiʻahí.