Kuó ke lau fakalelei ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

Ko e hā ʻa e meʻa mahuʻinga ʻe lava ke fai ʻe he mātuʻá ke akoʻi ʻaki ʻenau kau taʻu hongofulu tupú ke nau tauhi kia Sihova?

ʻOku mātuʻaki mahuʻinga ki he mātuʻá ke nau ʻofa ki heʻenau fānau taʻu hongofulu tupú pea fakahāhā ʻa e anga-fakatōkilalo ʻi heʻenau faʻifaʻitakiʻangá. ʻOku toe mahuʻinga ki he mātuʻá ke fakahāhā ʻa e ʻiloʻiló pea feinga mālohi ke mahinoʻi ʻenau kau taʻu hongofulu tupú.​—w15 11/15, p. 9-11.

Ko e hā ʻa e meʻa ʻoku totonu ke tau fakakaukau ki ai ki muʻa ke tau leá?

Ke tau ngāueleleiʻaki hotau ʻeleló, ʻoku totonu ke tauhi maʻu ʻi heʻetau fakakaukaú (1) taimi ke lea aí (Koh. 3:7), (2) meʻa ke leaʻakí (Pal. 12:18), mo e (3) founga ke leaʻakí (Pal. 25:15).​—w15 12/15, p. 19-22.

Ko e hā naʻe poupou ai ʻa Sihova ki he ngaahi tau ʻi ʻIsileli ʻo e kuonga muʻá?

ʻOku anga-ʻofa ʻa Sihova. Kae kehe, naʻe ʻi ai ha tuʻunga naʻá ne fakaʻatā ai ke fai ʻa e taú ʻi he hoko ha kovi mo e fakamanamana anga-fakamamahi ki hono kakaí. Ko e ʻOtuá pē naʻá ne fili ʻa e faʻahinga ke kau ʻi he taú mo e taimi ke fakahoko aí.​—wp16.1, p. 4-5.

Ko e hā ʻoku ʻikai totonu ai ke vakai ki he tuʻitapú ko e fetongi ʻo Pita?

ʻI he Mātiu 16:17, 18 ʻoku ʻikai ke fakahaaʻi ai ʻe hoko ʻa e ʻapositolo ko Pitá ko e ʻulu ʻo e fakatahaʻanga Kalisitiané. ʻOku fakahaaʻi ʻi he Tohi Tapú ʻi he ʻikai ko Pita ʻokú ne maʻu ʻa e mafaí, ʻe hoko ʻa Sīsū ko e maka tuliki ʻo e fakatahaʻangá. (1 Pita 2:4-8)​—wp16.1, p. 10-12.

ʻOku totonu ke fēfē ʻetau fakafeangai ki ha taha ʻoku maʻu ʻinasi ʻi he maá mo e uainé ʻi he Fakamanatú?

ʻOku ʻikai ke hakeakiʻi ʻe he kau Kalisitiané ʻa e faʻahinga ʻoku maʻu ʻinasí. Ko ha tokotaha ʻoku pani moʻoni, heʻikai ke ne loto ke hakeakiʻi ia; pea heʻikai ke ne loto ke talaki fakahāhā hono tuʻunga ʻi he ʻao ʻo e ʻOtuá. (Māt. 23:8-12)​—w16.01, p. 23-24.

Ko e hā ʻe lava ke tau ako mei he founga naʻe hoko ai ʻa ʻĒpalahame ko e kaumeʻa ʻo e ʻOtuá?

Naʻe maʻu ʻe ʻĒpalahame ʻa e ʻilo ki he ʻOtuá, ngalingali meia Semi. Pea naʻe maʻu ʻe ʻĒpalahame ʻa e hokosiá mei he feangainga ʻa e ʻOtuá kiate ia mo hono fāmilí. ʻE lava ke tau fai ʻa e meʻa tatau.​—w16.02, p. 9-10.

Neongo ʻoku fakanatula pē ke mateaki ki hotau fāmilí mo e ngaahi kaumeʻá, ko e hā kuo pau ke tau tokanga ki aí?

Koeʻuhí ko ʻetau taʻehaohaoá, ʻoku lava ke takihalaʻi kitautolu ʻe heʻetau ngaahi ongoʻí. (Sel. 17:9) Ko ia, kapau ʻoku fai ʻe he tokotaha ʻoku tau ʻofa aí ha kovi pea mavahe mei he moʻoní, kuo pau ke tau manatuʻi ʻoku mahuʻinga ange ke tau mateaki kia Sihova ʻo laka ange ʻi ha toe taha. (Māt. 22:37)​—w16.02 p. 27-28.

ʻOku totonu ki he kau Kalisitiané ke lotu ʻi ha potu toputapu?

ʻI ha senituli, naʻe vakai ʻa e kau Siú ki he temipale fisifisimuʻa ʻi Selusalemá ko ha senitā ia ʻenau lotú. Ka naʻe pehē ʻe Sīsū ko e kotoa ʻo e ngaahi meʻa ko ení ʻe liliu pea ko e “kau lotu moʻoní” te nau lotu “ʻi he laumālie mo e moʻoni.” (Sione 4:23)​—wp16.2, p. 8-10.

Naʻe anga-fēfē hono fakafika ʻa e vahe mo e veesi ʻi he Tohi Tapú?

Ko ha faifekau ʻi he senituli hono 13 ko Stephen Langton naʻá ne vahevahe ʻa e Tohi Tapú ki he ngaahi vahé. Ko e kau Siu hiki-tataú naʻa nau ʻuluaki vahevahe faka-veesi ʻa e Tohi Tapu faka-Hepeluú, pea ʻi he senituli 16, ko ha tokotaha mataotao ko Robert Estienne naʻá ne fai ʻa e meʻa tatau ki he Ngaahi Konga Tohi Tapu Faka-Kalisi Kalisitiane.​—wp16.2, p. 14-15.

Naʻe ʻave moʻoni ʻe Sētane ʻa Sīsū ki he temipalé ke ʻahiʻahiʻi ai ia?

ʻOku ʻikai lava ke tau fakapapauʻi ia. ʻI he Mātiu 4:5 mo e Luke 4:9 ʻoku lava ke ʻuhinga ia naʻe ʻave ʻa Sīsū ki ai ʻi ha vīsone pe naʻá ne tuʻu ʻi he foʻi feituʻu māʻolunga ʻi he temipalé.​—w16.03, p. 31-32.

Ko e hā ʻa e founga ʻe lava ke hangē ʻetau ngāue fakafaifekau faka-Kalisitiané ko e hahaú?

ʻOku faʻu māmālie ʻa e hahaú pea ʻoku fakaivifoʻou mo fakatolonga moʻui. Ko e hahaú ko ha tāpuaki ia mei he ʻOtuá. (Teu. 33:13) Ko hono fakatahaʻi ʻa e feinga ʻoku fai ʻe he kakai ʻa e ʻOtuá ʻi he ngāue fakafaifekaú ʻoku meimei tatau mo e hahaú.​—w16.04, p. 4.