“Ko Sihova ko Hotau ʻOtua ko e Tahaʻi Sihova”
“Fanongo mai, ʻa Isileli, Ko Sihova ko hotau ʻOtua ko e tahaʻi Sihova ia.”—TEU. 6:4.
HIVA: 138, 2
1, 2. (a) Ko e hā naʻe ʻiloa ai ʻa e ngaahi lea ʻi he Teutalōnome 6:4? (e) Ko e hā naʻe leaʻaki ai ʻe Mōsese ʻa e ngaahi lea ko iá?
ʻI HE taʻu ʻe lauingeau, naʻe ngāueʻaki ʻe he kau Siú ʻa e ngaahi lea ʻi he Teutalōnome 6:4 ko e konga ia ʻo ʻenau lotu makehé. Ko e lotu ko ení naʻe ui ko e Semá, ʻa ia ko e ʻuluaki foʻi lea ia ʻo e vēsi ko iá ʻi he lea faka-Hepeluú. Ko e kau Siu tokolahi ʻoku nau leaʻaki ʻa e lotu ko ʻení ʻi he pongipongi pea ʻi he efiafi kotoa ke fakahaaʻi ʻenau anga-līʻoa maʻataʻatā ki he ʻOtuá.
2 Ko e ngaahi lea ko ení ko e konga ia ʻo e lea fakaʻosi naʻe ʻoange ʻe Mōsese ki he puleʻanga ʻo ʻIsilelí. ʻI he taʻu 1473 ki muʻa ʻia Kalaisí, naʻe ʻi he fonua ʻo Mōapé ʻa e kakai ko ení, ʻo nau mateuteu ke kolosi ʻi he Vaitafe Sioataní pea ke maʻu ʻa e Fonua ʻo e Talaʻofá. (Teu. 6:1) Naʻe taki ʻe Mōsese ʻa e kakaí ʻi he taʻu ʻe 40, pea naʻá ne fiemaʻu ke nau loto-toʻa koeʻuhí ke nau lava ai ʻo fehangahangai mo e ngaahi faingataʻa naʻe teu ke hokó. Naʻe fiemaʻu ke nau falala ki honau ʻOtua ko Sihová, pea faitōnunga kiate ia. Ko ia, ko e ngaahi lea fakaʻosi ʻa Mōsesé naʻe fakalototoʻaʻi ai kinautolu ke nau fai ʻa e meʻa tofu pē ko iá. Hili ʻene lave ki he Fekau ʻe Hongofulú mo e ngaahi lao kehe meia Sihová, naʻe ʻoange ai ʻe Mōsese ha fakamanatu mālohi ʻa ia ʻoku tau lau ʻi he Teutalōnome 6:4, 5. (Lau.)
3. Ko e hā ʻa e ngaahi fehuʻi te tau lāulea ki ai ʻi he kupu ko ení?
3 Naʻe ʻiloʻi ʻe he kau ʻIsilelí ko Sihova ko honau ʻOtuá ʻa e “tahaʻi Sihova.” Naʻe lotu ʻa e kau ʻIsileli faitōnungá ki he ʻOtua pē ʻe taha, ko e ʻOtua ʻenau fanga kuí. Ko ia, ko e hā naʻe fakamanatu ange ai ʻe Mōsese kiate kinautolu ko Sihova ko honau ʻOtuá ko e “tahaʻi Sihova”? Ko e hā ʻene fekauʻaki ʻa e moʻoniʻi meʻa ko iá mo e ʻofa ki hotau ʻOtuá ʻaki hotau lotó kotoa, moʻuí kotoa mo e mālohí kotoa? Pea ʻe lava fēfē ke tau ngāueʻaki ʻa e ngaahi lea ʻi he Teutalōnome 6:4, 5 ʻi he ʻahó ni?
KO HOTAU ʻOTUÁ KO E “TAHAʻI SIHOVA”
4, 5. (a) Ko e hā ʻa e ʻuhinga ʻe taha ʻo e kupuʻi lea “tahaʻi Sihova”? (e) ʻOku anga-fēfē ʻa e kehe ʻa Sihova mei he ngaahi ʻotua ʻo e ngaahi puleʻangá?
4 Makehe. Ko e kupuʻi lea “tahaʻi Sihova” ʻoku ʻuhinga iá ko Sihová ʻoku makehe, ʻo ʻikai ha taha ke na tatau pe hangē ko iá. Ko e hā naʻe ngāueʻaki ai ʻe Mōsese ʻa e kupuʻi lea ko iá? Naʻe hā ngali naʻe ʻikai ke ne feinga ke fakamoʻoniʻi ko e tui ko ia ki he tolu-tahaʻi-ʻotuá naʻe hala. Ko Sihova ʻa e Tokotaha-Fakatupu ʻo hēvani mo e māmaní pea ko e Tokotaha-Pule ia ʻo e ʻunivēsí. Ko ia tokotaha pē ʻa e ʻOtua moʻoní pea ʻoku ʻikai ha ʻotua ʻe tatau mo ia. (2 Sām. 7:22) Naʻe fakamanatu ki he kau ʻIsilelí ʻi he ngaahi lea ʻa Mōsesé ko Sihova pē naʻe totonu ke nau lotu ki aí. Naʻe ʻikai totonu ke nau faʻifaʻitaki ki he kakai takatakai ʻiate kinautolú, ko e faʻahinga ia naʻe lotu ki he ngaahi ʻotua loi mo e ngaahi ʻotua fefine. Ko e kakai ko ení naʻa nau tui ʻe lava ʻe honau ngaahi ʻotuá ʻo puleʻi ha niʻihi ʻo e ngaahi meʻa ʻo natulá.
5 Ko e fakatātaá, naʻe lotu ʻa e kau ʻIsipité ki he ʻotua ʻo e laʻaá ko Ra, ko e ʻotua fefine ʻo e langí ko Nut, ko e ʻotua ʻo e fonuá ko Geb, ko e ʻotua ʻo Nailá ko Hapi pea pehē ki he fanga monumanu tokolahi. Naʻe fakahaaʻi ʻe Sihova ʻene māʻolunga ange ia ʻi he ngaahi ʻotua loi ko ení ʻi he taimi naʻá ne ʻomai ai ʻa e Mala ʻe Hongofulú. Ko e ʻotua tefito ʻo e kau Kēnaní ko Pēali, ko ha ʻotua loi ʻa ia naʻe tui ʻa e kau Kēnaní ko ia naʻá ne ʻomai ʻa e moʻuí. Naʻa nau toe tui ko ia ʻa e ʻotua ʻo e langí, ʻuhá mo e afaá. ʻI he ngaahi fonua lahi, naʻe falala ʻa e kakaí ki he maluʻi ʻa Pēalí. (Nōm. 25:3) Naʻe fiemaʻu ki he kau ʻIsilelí ke nau manatuʻi ko honau ʻOtuá, ʻa e ‘ʻOtua moʻoní’ ʻoku makehe ia. Ko ia ʻa e “tahaʻi Sihova.”—Teu. 4:35, 39.
6, 7. Ko e hā ʻa e toe ʻuhinga ʻe taha ʻo e foʻi lea ko e “tahaʻi,” pea naʻe anga-fēfē hono fakamoʻoniʻi ʻe Sihova ko ia ʻa e “tahaʻi” Sihová?
6 Tuʻumaʻu mo Mateaki. Ko e foʻi lea ko e “tahaʻi” ʻi he kupuʻi lea “tahaʻi Sihova” ʻoku toe ʻuhinga iá ko ʻene taumuʻá mo ʻene ngaahi ngāué ʻoku falalaʻanga maʻu pē. Ko Sihova ko e ʻOtuá ʻoku ʻikai ke māvahevahe pe feliliuaki. ʻOkú ne faitōnunga, tuʻumaʻu, mateaki mo moʻoni maʻu pē. Ko e fakatātaá, naʻá ne talaʻofa kia ʻĒpalahame ʻe nofo hono hakó ʻi he Fonua ʻo e Talaʻofá. Pea naʻe lahi ʻa e ngaahi mana fakaofo naʻe fakahoko ʻe Sihová koeʻuhi ke ne kei tauhi ki he talaʻofa ko iá. Hili ʻa e taʻu ʻe fāngeau tolungofulu mei heʻene ʻoange ʻa e talaʻofa ko iá, kuo ʻikai ʻaupito liliu ʻa e taumuʻa ʻa Sihová.—Sēn. 12:1, 2, 7; ʻEki. 12:40, 41.
7 ʻI he taʻu ʻe lauingeau ki mui aí, naʻe ui ai ʻe Sihova ʻa e kau ʻIsilelí ko ʻene kau fakamoʻoni peá ne tala kiate kinautolu: “Ko au ia; naʻe ʻikai ha ʻotua ʻe faʻu ʻi muʻa ʻiate au, pea hili au ʻe ʻikai.” Naʻe toe fakahaaʻi mahino ʻe Sihova ko ʻene taumuʻá heʻikai ʻaupito ke liliu ʻi heʻene toe pehē: ‘Ko au ai pē.’ (ʻAi. 43:10, 13; 44:6; 48:12) Ko ha monū lahi ē ki he kau ʻIsilelí ke tauhi ki ha ʻOtua ʻoku tuʻumaʻu mo mateaki maʻu pē! Kuo tau maʻu ʻa e monū tatau ʻi he ʻahó ni.—Mal. 3:6; Sēm. 1:17.
8, 9. (a) Ko e hā ʻoku fiemaʻu mai ʻe Sihova mei heʻene kau lotú? (e) Naʻe anga-fēfē hono fakamamafaʻi ʻe Sīsū ʻa e mahuʻinga ʻo e ngaahi lea ʻa Mōsesé?
8 ʻIo, naʻe fakamanatu ʻe Mōsese ki he kau ʻIsilelí heʻikai ʻaupito ke liliu ʻa e ʻofa mo e tokanga ʻa Sihova kiate kinautolú. Ka naʻe ʻamanekina ʻe Sihova te nau ʻoatu kiate ia ʻenau ʻanga-līʻoa maʻataʻataá mo nau ʻofa kiate ia ʻaki honau lotó, moʻuí mo e mālohí kotoa. Naʻe fiemaʻu ki he ngaahi mātuʻá ke nau akoʻi ʻa Sihova ki heʻenau fānaú ʻi he faingamālie kotoa pē koeʻuhí ke lotu foki mo e fānaú kia Sihova pē.—Teu. 6:6-9.
9 ʻOku ʻikai ʻaupito ke liliu ʻa e taumuʻa ʻa Sihová, pea heʻikai ʻaupito te ne liliu ʻene ngaahi fiemaʻu tefito ki heʻene kau lotu moʻoní. Kapau ʻoku tau loto ke hōifua mai ʻa Sihova ki heʻetau lotú, kuo pau ke tau ʻoatu kiate ia ʻa e anga-līʻoa maʻataʻataá mo ʻofa kiate ia ʻaki hotau lotó, ʻatamaí mo e mālohí kotoa. Naʻe pehē ʻe Sīsū ko e fekau mahuʻinga tahá eni. (Lau ʻa e Maʻake 12:28-31.) ʻOfa ke tau ako ki he founga ʻe lava ke tau fakahaaʻi atu ai ʻi heʻetau ngaahi ngāué ʻoku tau tui “ko Sihova ko hotau ʻOtua ko e tahaʻi Sihova.”
ʻOATU KIA SIHOVA ʻA E ANGA-LĪʻOA MAʻATAʻATĀ
10, 11. (a) ʻI he ʻuhinga fē ke tāfataha ai pē ʻetau lotú kia Sihová? (e) Naʻe anga-fēfē hono fakahāhā ʻe he kau talavou Hepelū ʻi Pāpiloné ʻenau anga-līʻoa maʻataʻatā kia Sihová?
10 Ko Sihova tokotaha pē hotau ʻOtuá. ʻOku tau ʻoatu kiate ia ʻetau anga-līʻoa maʻataʻataá ʻi he taimi ʻoku tau lotu ai kiate ia tokotaha pē. ʻOku ʻikai lava ke tau lotu ki ha faʻahinga ʻotua pe fakakau ha ngaahi fakakaukau pe ngaahi tōʻonga loi ʻi heʻetau lotu kia Sihová. ʻOku ʻikai ko ha ʻotua pē ia ʻoku māʻolunga ʻi he ngaahi ʻotua kehé pe mālohi ange ʻiate kinautolu. Ko ia ʻa e ʻOtua moʻoní. ʻOku totonu ke tau lotu pē kia Sihova.—Lau ʻa e Fakahā 4:11.
11 ʻI he tohi ʻa Tanielá, ʻoku tau lau ai fekauʻaki mo e kau talavou Hepeluú, ko Taniela, ʻAnanaia, Misaeli mo ʻAsalaia. Naʻe fakahaaʻi ʻenau anga-līʻoa maʻataʻatā kia Sihová ʻaki ʻenau fakafisi ke kai ʻa e meʻakai naʻe taʻemaʻa ki he kau lotu ʻa Sihová. Pea naʻe fakafisi ʻa e ngaahi kaumeʻa ʻe toko tolu ʻo Tanielá ke nau punou ki he ʻaitolí, ʻa e ʻīmisi koula ʻo Nepukanesá. Naʻe muʻomuʻa ʻa Sihova kiate kinautolu. Naʻa nau mateaki kakato kiate ia.—Tan. 1:1–3:30.
12. ʻI hono ʻoatu kia Sihova ʻetau anga-līʻoa maʻataʻataá, ko e hā kuo pau ke tau fakaʻehiʻehi mei aí?
12 Kuo pau ke tau fakamuʻomuʻa ʻa Sihova ʻi heʻetau moʻuí. Kapau ʻoku tau loto ke ʻoatu kiate ia ʻetau anga-līʻoa maʻataʻataá, kuo pau ke tau tokanga ke ʻoua naʻa tau fakamuʻomuʻa ha ngaahi meʻa kehe. Ko e hā ʻa e ngaahi meʻa ko iá? ʻI he Fekau ʻe Hongofulú, naʻe fakahaaʻi ʻe Sihova ʻoku ʻikai totonu ki hono kakaí ke nau lotu ki ha ngaahi ʻotua kehe. ʻOku ʻikai totonu ke nau fai ha faʻahinga tōʻonga pē ʻo e tauhi ʻaitolí. (Teu. 5:6-10) ʻI he ʻahó ni, ʻoku lahi ʻa e faʻahinga kehekehe ʻo e tauhi ʻaitolí, pea ko e niʻihi ʻo kinautolu ʻoku faingataʻa ke ʻiloʻi. Ka kuo ʻikai ʻaupito ke liliu ʻe Sihova ʻene ngaahi fiemaʻú. ʻOkú ne kei hoko pē ko e “tahaʻi Sihova.” Tau vakai angé ki he founga ʻe lava ai ke tau fakaʻehiʻehi ʻi he ʻahó ni mei he tauhi ʻaitolí.
13. Ko e hā ʻa e meʻa ʻe lava ke tau kamata ke ʻofa lahi ange ai ʻia Sihová?
13 ʻI he Kolose 3:5 (lau), ʻoku tau lau ai fekauʻaki mo e ngaahi meʻa ʻe lava ke ne maumauʻi ʻetau kaumeʻa fekoekoeʻi mo Sihová. ʻOku tau ʻiloʻi ai ko e mānumanú ʻoku ʻi ai ʻene fekauʻaki mo e tauhi ʻaitolí. Anga-fēfē? ʻI he taimi ʻoku tau holi mālohi ai ki ha meʻa, ʻo hangē ko e maʻu ha paʻanga lahi pe moʻui tuʻumālié, ʻe lava ke ne puleʻi ʻetau moʻuí ʻo hangē ia ha ʻotua ʻoku mālohí. Ko e ngaahi angahala kotoa ʻoku lave ki ai ʻi he Kolose 3:5, ʻoku fekauʻaki ia mo e mānumanú ʻa ia ko e konga pē ia ʻo e tauhi ʻaitolí. Ko ia kapau ʻoku tau maʻu ha holi mālohi ki he ngaahi meʻa ko ení, ʻe kamata leva ke lahi ange ʻetau ʻofa ʻi he ngaahi meʻa ko iá ʻi heʻetau ʻofa ki he ʻOtuá. Kapau ʻoku hoko ʻa e ngaahi meʻa ko iá, heʻikai leva ke kei hoko ʻa Sihova ko e “tahaʻi Sihova” kiate kitautolu. ʻOku ʻikai ʻaupito ke tau loto ke hoko ia.
14. Ko e hā ʻa e fakatokanga naʻe ʻoatu ʻe he ʻapositolo ko Sioné fekauʻaki mo e ʻofa ki he ʻOtuá?
14 Naʻe fakamamafaʻi ʻe he ʻapositolo ko Sioné ha meʻa meimei tatau. Naʻá ne ʻomi ha fakatokanga kapau ʻe ʻofa ha taha ki he ngaahi meʻa ʻi he māmaní, “ʻa e holi ʻo e kakanó pea mo e holi ʻo e matá pea mo e fiehāʻaki ʻa e meʻa ʻokú te maʻú,” ko e tokotaha ko iá “ʻoku ʻikai ʻiate ia ʻa e ʻofa ki he Tamaí.” (1 Sio. 2:15, 16) ʻOku fiemaʻu leva ke tau sivisiviʻi maʻu pē kitautolu ke ʻiloʻi pe ʻoku tau ʻofa ki he māmaní. Te tau ʻiloʻi nai ai kuo kamata ke tohoakiʻi kitautolu ki he fakafiefiá, kakaí pea pehē ki he sīpinga vala mo e teuteu ʻa e māmani ko ení. Pe ʻoku tau loto nai ke fai ha “ngaahi meʻa lalahi” fakafou ʻi he ako māʻolunga angé. (Sel. 45:4, 5) ʻOku ofi ʻaupito ʻa e māmani foʻoú. ʻI heʻene peheé, ʻoku fiemaʻu ke tau manatuʻi ʻa e ngaahi lea mālohi ʻa Mōsesé! Kapau ʻoku tau mahinoʻi mo tui moʻoni “ko Sihova ko hotau ʻOtua ko e tahaʻi Sihova” te tau ʻoatu ai kiate ia ʻetau anga-līʻoa maʻataʻataá mo tauhi kiate ia ʻi he founga ʻokú ne finangalo ki aí.—Hep. 12:28, 29.
TAUHI MAʻU ʻA E FĀʻŪTAHA FAKA-KALISITIANÉ
15. Ko e hā naʻe fakamanatu ai ʻe Paula ki he kau Kalisitiané ʻoku taha pē ʻa e ʻOtuá, ʻa Sihova?
15 Ko e kupuʻi lea “tahaʻi Sihova” ʻoku tokoniʻi ai kitautolu ke tau mahinoʻi ʻoku finangalo ʻa Sihova ke hoko ʻene kau sevānití ʻo fāʻūtaha pea mo maʻu ʻa e taumuʻa tatau ʻi he moʻuí. ʻI he muʻaki fakatahaʻanga Kalisitiané, naʻe ʻi ai ʻa e kau Siu, kau Kalisi, kau Loma mo e kakai mei he ngaahi fonua kehé. Naʻa nau maʻu ʻa e ngaahi puipuituʻa, anga-fakafonua mo e ngaahi saiʻia kehekehe. Koeʻuhí ko e meʻa ko iá, naʻe faingataʻa ai ki he niʻihi ʻo kinautolu ke nau tali ʻa e founga foʻou ʻo e lotú pe siʻaki ʻenau ngaahi tōʻonga ki muʻá. Ko ia naʻe fiemaʻu ai ʻe Paula ke fakamanatu kiate kinautolu ko e kau Kalisitiané ʻoku nau maʻu ʻa e ʻOtua pē ʻe taha, ko Sihova.—Lau ʻa e 1 Kolinitō 8:5, 6.
16, 17. (a) Ko e hā ʻa e kikite kuo ʻosi fakahoko ʻi hotau ʻaho ní, pea ko e hā ʻa e olá? (e) Ko e hā ʻe lava ke ne fakavaivaiʻi ʻetau fāʻūtahá?
16 Kae fēfē ʻa e fakatahaʻanga Kalisitiané ʻi he ʻahó ni? Naʻe pehē ʻe he palōfita ko ʻAiseá “ʻe hoko ʻo pehe ʻi he kuonga ʻamui,” ko e kakai mei he ngaahi puleʻangá kotoa te nau haʻu fakataha ke lotu kia Sihova. Te nau pehē: “Te ne ako kiate kitautolu hano ngaahi ʻalunga pea te tau fou ʻi hono ngaahi founga.” (ʻAi. 2:2, 3) ʻOku tau fiefia ke mamata ki hono fakahoko ʻa e kikite ko ení ʻi he ʻahó ni! ʻOku haʻu hotau fanga tokouá mo e fanga tuofāfiné mei he ngaahi feituʻu kehekehe, lea kehekehe mo e ngaahi anga-fakafonua kehekehe. Ka ʻoku tau fāʻūtaha ʻi heʻetau lotu kia Sihová. Ka neongo ia, koeʻuhí ko e kehekehe hotau tuʻungá, ʻe hoko nai ha ngaahi palopalema ʻi he taimi ʻe niʻihi.
ʻOkú ke ngāue mālohi ke kei fāʻūtaha ai pē ʻa e fakatahaʻanga Kalisitiané? (Sio ki he palakalafi 16-19)
17 Ko e fakatātaá, ʻoku anga-fēfē hoʻo vakai ki he fanga tokoua mo e fanga tuofāfine ʻoku nau haʻu mei he ngaahi anga-fakafonua kehekehé? ʻE kehe ʻaupito nai ʻa e anga ʻenau leá, valá, ʻulungāngá mo e meʻakaí mei he fonua ʻokú ke haʻu mei aí. ʻOkú ke fakamamaʻo meiate kinautolu peá ke feohi pē koe mo e faʻahinga ʻoku tatau ʻa e meʻa ʻoku mou saiʻia aí? ʻOku anga-fēfē hoʻo vakai ki he kau mātuʻa ʻi ho feituʻú ʻa ia ʻoku nau iiki ange ʻiate koé pe haʻu mei he matakali pe anga-fakafonua kehekehé? Kapau heʻikai ke tau tokanga, te tau fakaʻatā nai ʻa e ngaahi faikehekehe ko ení ke ne uesia kitautolu mo maumauʻi ʻetau fāʻūtahá.
18, 19. (a) Ko e hā ʻa e akonaki ʻoku lave ki ai ʻi he ʻEfesō 4:1-3? (e) Ko e hā ʻe lava ke tau fai ke tokoni ki he fakatahaʻangá ke nofoʻaki fāʻūtahá?
18 ʻE lava fēfē ke tau fakaʻehiʻehi mei he ngaahi palopalema ko iá? Naʻe ʻoatu ʻe Paula ha faleʻi ʻaonga ki he kau Kalisitiane naʻe nofo ʻi ʻEfesoó, ko ha kolo naʻe tuʻumālie mo e kakaí naʻa nau haʻu mei he ngaahi puipuituʻa kehekehe. (Lau ʻa e ʻEfesō 4:1-3.) Naʻe lave ʻa Paula ki he ngaahi ʻulungaanga hangē ko e anga-fakatōkilaló, anga-malū, kātaki mo e ʻofá. Ko e ngaahi ʻulungaanga ko ení ʻoku nau hangē ha ngaahi pou tuliki mālohi ʻoku nau pukepuke ʻa e falé ke kei tuʻumaʻu. Ke tauhi ha fale ke ʻi ha tuʻunga lelei ai pē, ʻoku toe fiemaʻu ki ai ʻa e ngāue mālohi. Naʻe fiemaʻu ʻe Paula ki he kau Kalisitiane ʻi ʻEfesoó ke nau ngāue mālohi ke “tauhi maʻu ʻa e laumālie taha.”
19 Kuo pau kiate kitautolu kotoa ke tau fai hotau lelei tahá ke kei fāʻūtaha ai pē ʻa e fakatahaʻangá. ʻE lava fēfē ke tau fai iá? ʻUluakí, ʻoku fiemaʻu ke tau fakatupulekina mo fakahāhā ʻa e ngaahi ʻulungaanga naʻe lave ki ai ʻa Paulá: anga-fakatōkilaló, anga-malū, kātaki mo e ʻofá. Uá, ʻoku fiemaʻu ke tau ngāue mālohi ke pouaki ʻa e “haʻi fāʻūtaha ko e melinó.” Ko e ngaahi taʻefemahinoʻakí ko ha tōʻonga ia te ne fakatupunga ʻa e māvahevahé; ko ia ai, ʻoku fiemaʻu ke tau ngāue mālohi ke fakaleleiʻi ʻa e ngaahi taʻefemahinoʻakí koeʻuhí ke tau kei maʻu ai pē ʻa e melino mo e fāʻūtaha ʻi hotau haʻohaʻongá.
20. ʻE lava fēfē ke tau fakahāhā ʻoku tau mahinoʻi “ko Sihova ko hotau ʻOtua ko e tahaʻi Sihova”?
20 “Ko Sihova ko hotau ʻOtua ko e tahaʻi Sihova.” Ko ha fakamatala mālohi ia! Ko e tefitoʻi moʻoni ko iá naʻá ne fakaivimālohiʻi ai ʻa e kau ʻIsilelí ke nau kātekina ʻa e faingataʻá ʻi he taimi naʻa nau hū atu ai ʻo maʻu ʻa e Fonua ʻo e Talaʻofá. ʻOku lava ʻe he ngaahi lea ko iá ʻo fakaivimālohiʻi mo kitautolu foki, kae lava ke tau fou atu ʻi he fuʻu mamahi lahí pea pouaki ʻa e melinó mo e fāʻūtahá ʻi Palataisi. ʻOfa ke tau hokohoko atu hono ʻoatu kia Sihova ʻetau anga-līʻoa maʻataʻataá. ʻOku fiemaʻu ke tau ʻofa mo tauhi kiate ia ʻaki hotau lotó, ʻatamaí mo e mālohí kotoa pea ʻoku fiemaʻu ke tau ngāue mālohi ke tauhi maʻu ʻa e melinó mo e fāʻūtahá mo hotau fanga tokouá. Kapau te tau hokohoko atu ʻi hono fai ʻa e ngaahi meʻa ko ení, ʻe fakamāuʻi kitautolu ʻe Sīsū ko e fanga sipi pea te tau mamata ai ki hono fakahoko moʻoni ʻene ngaahi leá: “Haʻu, ʻa kimoutolu kuo tāpuekina ʻe heʻeku Tamaí, ʻo maʻu ʻa e Puleʻanga kuo teuteu maʻamoutolu talu mei he tanupou ʻo e māmaní.”—Māt. 25:34.