Ko e tamai ‘a Lehopoamé, ‘a Solomone, na‘e hoko ko e tu‘i ‘o ‘Isileli ‘i he ta‘u ‘e 40. (1 Tu‘i 11:42) Hili ‘a e mate ‘a ‘ene tamaí, na‘e fononga ‘a Lehopoame mei Selusalema ki Sīkemi ke ne hoko ko e tu‘i. (2 Kal. 10:1) Na‘á ne manavasi‘i ke hoko ko e tu‘i hono hokó? Na‘e ‘iloa ‘a Solomone ‘i he lahi ‘a hono potó. Na‘e vave ‘a e pau ke fakamo‘oni‘i ‘e Lehopoame pe na‘á ne poto fe‘unga ke fakalelei‘i ha palopalema faingata‘a.

Na‘e ongo‘i lōmekina ‘a e kau ‘Isilelí pea nau fekau‘i atu ha kau fakafofonga ke tala ange kia Lehopoame ‘a e me‘a na‘a nau loto ke ne faí: “Ko ho‘o tamaí na‘á ne ‘ai ke faingata‘a ‘emau ‘ioké. Ka ‘o kapau te ke ‘ai ke faingofua ange ‘a e ngāue faingata‘a ‘a ho‘o tamaí peá ke fakama‘ama‘a ‘a e ‘ioke mamafa na‘á ne hilifaki kiate kimautolú, te mau tauhi kiate koe.”​—2 Kal. 10:3, 4.

Ko ha fili faingata‘a na‘e pau ke fai ‘e Lehopoamé. Kapau te ne fai ki he me‘a ‘oku loto ki ai ‘a e kakaí, ko ia mo hono fāmilí mo e fa‘ahinga ‘i he palasí ‘e pau nai ke nau mo‘ui ‘o ‘ikai ma‘u ‘a e tu‘umālie na‘a nau anga ki aí. Kae kehe, kapau te ne fakafisinga‘i ‘a e kole ‘a e kakaí, te nau angatu‘u nai kiate ia. Ko e hā ‘a e me‘a na‘á ne faí? Na‘á ne ‘uluaki talanoa mo e kau tangata ta‘umotu‘a ‘a ia na‘a nau tokoni‘i ‘a ‘ene tamaí. Na‘a nau tala ange kiate ia ke ne fanongo ki he kakaí. Ka ‘i he hili iá na‘e talanoa ‘a Lehopoame mo hono to‘ume‘á peá ne fili ke ngaohikovi‘i ‘a e kakaí. Na‘á ne tala kiate kinautolu: “Te u ‘ai ke mamafa ange ‘a ho‘omou ‘ioké, pea te u fakalahi atu ki ai. Na‘e tautea kimoutolu ‘e he‘eku tamaí ‘aki ‘a e ngaahi uipi, ka te u fai pehē ‘aki ‘a e ngaahi uipi mata māsila.”​—2 Kal. 10:6-14.

‘Okú ke sio ai ki ha lēsoni kiate kitautolu? ‘I he ‘ahó ni, ‘oku tau ma‘u ‘a e fa‘ahinga ta‘umotu‘a tokolahi kuo nau tauhi kia Sihova ‘i he ngaahi ta‘u lahi pea ‘e lava ke nau tokoni‘i kitautolu ke tau fai ha ngaahi fili lelei. ‘Ai ke tau fakapotopoto pea fanongo kiate kinautolu.​—Siope 12:12.

Na‘e fakatahataha‘i ‘e Lehopoame ‘i he taimi ko ení ‘a ‘ene kau taú ke tau‘i ‘a e ngaahi matakali na‘e angatu‘ú. Kae kehe, na‘e fekau‘i atu ‘e Sihova ‘ene  palōfita ko Semaiá ke ne tala kiate kinautolu: “Kuo pau ke ‘oua na‘a mou ‘alu hake ‘o tau‘i homou fanga tokoua ‘Isilelí. Kuo pau ke mou taki taha foki ki hono fale, he kuó u fakatupunga ‘a e me‘á ni ke hoko.”​—1 Tu‘i 12:21-24. *​—Sio ki he fakamatala ‘i lalo.

Na‘e faingofua kia Lehopoame ke ne fanongo kia Sihova? Ko e hā ‘a e fakakaukau ‘a e kakaí fekau‘aki mo honau tu‘i fo‘oú? Na‘á ne tala ange te ne tautea‘i kinautolu “‘aki ‘a e ngaahi uipi mata māsila,” ka he‘ikai te ne fai ‘i he taimi ko ení ha me‘a fekau‘aki mo e angatu‘u fakafokifā ko ení! (Fakafehoanaki mo e 2 Kalonikali 13:7.) Kae kehe, tatau ai pē pe ko e hā ‘a e fakakaukau ‘a e kakaí fekau‘aki mo iá, ko e tu‘í mo ‘ene kau taú “na‘a nau talangofua ki he folofola ‘a Sihová ‘o nau foki ki ‘api, ‘o hangē pē ko e me‘a na‘e tala ange ‘e Sihova kiate kinautolú.”

Ko e hā ‘a e lēsoni kiate kitautolú? ‘Oku fakapotopoto ma‘u pē ke talangofua ki he ‘Otuá, ‘o tatau ai pē pe ‘oku manuki‘i kitautolu ‘e he kakaí ‘i he‘etau fai peheé. ‘E tāpuaki‘i ma‘u pē ‘e he ‘Otuá kitautolu ‘i he taimi ‘oku tau talangofua aí.​—Teu. 28:2.

Na‘e tāpuaki‘i ‘a Lehopoame ‘i he‘ene talangofuá? Na‘e kei pule‘i pē ‘e Lehopoame ‘a e ongo matakali ‘o Siuta mo Penisimaní, pea na‘á ne fili ke langa ha ngaahi kolo fo‘ou ‘i he ongo vahefonua ko iá. Na‘á ne ‘ai foki ha ngaahi kolo ke toe mālohi ange ‘o “mātu‘aki tu‘u kaukaua ‘aupito.” (2 Kal. 11:5-12) Ko e me‘a ‘oku toe mahu‘inga angé, na‘á ne talangofua ‘i ha taimi ki he ngaahi lao ‘a Sihová. Koe‘uhi na‘e kamata ke lotu ‘a e pule‘anga matakali ‘e hongofulú ki he ngaahi ‘aitolí, na‘e fononga ‘a e tokolahi mei ai ki Selusalema ke poupou kia Lehopoame mo e lotu mo‘oní. (2 Kal. 11:16, 17) Ko ia koe‘uhi ko e talangofua ‘a Lehopoame kia Sihová, na‘e hoko ai ‘o toe mālohi ange ‘a hono pule‘angá.

‘I he hoko ‘o mālohi ‘a e pule‘anga ‘o Lehopoamé, na‘á ne fai ‘a e me‘a faikehe. Na‘e tuku ‘ene talangofua ki he lao ‘a Sihová pea kamata ke ne lotu ki he ngaahi ‘otua loí! Ka ko e hā hono ‘uhingá? Na‘e tākiekina ‘e he‘ene fa‘eé, ‘a ia ko ha ‘Āmoni, ‘a e fili na‘á ne faí? (1 Tu‘i 14:21) ‘Oku ‘ikai ke tau ‘ilo‘i, ka na‘e muimui ‘a e pule‘angá ki he‘ene fa‘ifa‘itaki‘anga koví. Ko ia na‘e faka‘atā ai ‘e Sihova ‘a Tu‘i Sīsake ‘o ‘Isipité ke ne hamu ‘a e ngaahi kolo lahi ‘i he pule‘anga ‘o Siutá. Na‘e hoko eni neongo na‘e ‘ai ‘e Lehopoame ke mālohi ‘aupito ‘a e ngaahi kolo ko iá!​—1 Tu‘i 14:22-24; 2 Kal. 12:1-4.

Na‘e hoko ‘o toe kovi ange ‘a e tu‘ungá ‘i he ha‘u ‘a Sīsake mo ‘ene kau taú ke ‘ohofi ‘a Selusalema, ‘a ia na‘e pule ai ‘a Lehopoamé. ‘I he tu‘unga ko ení, na‘e ‘oange ai ‘e he palōfita ko Semaiá ‘a e pōpoaki ko eni mei he ‘Otuá kia Lehopoame mo ‘ene kau hou‘eikí: “Kuo mou li‘aki au, ko ia kuó u li‘aki atu foki kimoutolu ki he nima ‘o Sīsaké.” Na‘e anga-fēfē ‘a e fakafeangai ‘a Lehopoame ki he akonaki ko iá? ‘I ha founga mātu‘aki lelei! ‘Oku pehē ‘e he Tohi Tapú: “Na‘e fakatōkilalo‘i ‘e he hou‘eiki ‘o ‘Isilelí mo e tu‘í kinautolu pea nau pehē: ‘‘Oku mā‘oni‘oni ‘a Sihova.’” Ko ia ai, na‘e fakahaofi ‘e Sihova ‘a Lehopoame, pea na‘e ‘ikai ke faka‘auha ‘a Selusalema.​—2 Kal. 12:5-7, 12.

‘I he hili iá, na‘e hokohoko atu ‘a e pule ‘a Lehopoame ki he pule‘anga Siutá. Ki mu‘a ke ne maté, na‘á ne foaki ‘a e ngaahi me‘a‘ofa lahi ki hono ngaahi fohá. ‘Oku ngalingali na‘á ne loto ke fakapapau‘i he‘ikai te nau angatu‘u ki honau tokoua ko ‘Āpaiá, ‘a ia ‘e hoko ko e tu‘i hono hokó. (2 Kal. 11:21-23) ‘I he‘ene fai iá, na‘e ngāue fakapotopoto ange ai ‘a Lehopoame ‘i he taimi na‘á ne kei si‘i ange aí.

Neongo na‘e fai ‘e Lehopoame ha ngaahi me‘a lelei, ‘oku pehē ‘e he Tohi Tapú ‘o fekau‘aki mo ‘ene pulé: “Na‘e fai ‘e he tu‘í ‘a e me‘a na‘e kovi.” Ko e hā hono ‘uhingá? Koe‘uhí “he na‘e ‘ikai ke ne fakapapau‘i ‘i hono lotó ke kumi kia Sihova.” Ko ia na‘e ‘ikai ke hōifua ‘a Sihova kiate ia.​—2 Kal. 12:14.

Ko e hā ‘oku lava ke tau ako mei he mo‘ui ‘a Lehopoamé? Na‘á ne talangofua ki he ‘Otuá ‘i he taimi ‘e ni‘ihi. Pea na‘á ne fai ha ngaahi me‘a lelei ma‘á e kakai ‘a Sihová. Ka na‘e ‘ikai te ne ma‘u ha vaha‘angatae vāofi mo Sihova, pea na‘e ‘ikai te ne ma‘u ha holi mālohi ke fakahōifua‘i ia. Ko ia, na‘e tuku ai ‘ene fai ‘a e me‘a totonú peá ne kamata lotu ki he ngaahi ‘otua loí. Te ke fifili nai: ‘‘I he taimi na‘e tali ai ‘e Lehopoame ‘a e fakatonutonu ‘a Sihová, ne hoko mo‘oni ení koe‘uhi na‘á ne ongo‘i fakame‘apango‘ia lahi ‘i he‘ene ngaahi fehālaakí peá ne loto  ke fakahōifua‘i ‘a e ‘Otuá? Pe koe‘uhí pē ko e me‘a na‘e pehē ‘e he ni‘ihi kehé ‘oku totonu ke ne faí?’ (2 Kal. 11:3, 4; 12:6) Ki mui ange ‘i he‘ene mo‘uí na‘á ne toe fai ‘a e me‘a na‘e kovi. Na‘á ne kehe ‘aupito mei he‘ene kui tangata ko Tu‘i Tēvitá! Ko e mo‘oni na‘e fai ‘e Tēvita ‘a e ngaahi fehālaaki. Ka na‘á ne fakatomala mo‘oni ‘i he angahala mamafa na‘á ne faí. Pea na‘á ne ‘ofa ‘ia Sihova mo e lotu mo‘oní ‘i he kotoa ‘o ‘ene mo‘uí.​—1 Tu‘i 14:8; Saame 51:1, 17; 63:1.

‘E lava ke tau ako ‘a e me‘a lahi mei he talanoa ko eni ‘i he Tohi Tapú. ‘Oku lava ke fakaongoongolelei‘i ‘a e kakaí ‘i he‘enau tokonaki ma‘a honau fāmilí pea fai ‘a e ngaahi me‘a lelei ma‘á e ni‘ihi kehé. Ka ke ma‘u ‘a e hōifua ‘a Sihová, kuo pau ke tau lotu kiate ia ‘i ha founga ‘oku fakahōifua kiate ia, pea kuo pau ke tau ma‘u ha vaha‘angatae mālohi mo ia.

Ke a‘usia ‘a e taumu‘a ko iá, ‘oku fiema‘u ke tau ‘ofa lahi kia Sihova. Hangē pē ko ‘etau tauhi ke mo‘ui ha afi ‘aki hono toe ‘ai ki ai ha fefié, ‘oku tau tauhi ke mo‘ui ‘etau ‘ofa ki he ‘Otuá ‘aki hono ako ma‘u pē ‘a ‘ene Folofolá, fakalaulauloto ki ai, pea kītaki ‘i he lotú. (Saame 1:2; Loma 12:12) Pea ko e ‘ofa ko ení te ne ue‘i kitautolu ke fakahōifua‘i ‘a Sihova ‘i he me‘a kotoa pē ‘oku tau faí. ‘E ue‘i ai foki kitautolu ke tau ongo‘i fakame‘apango‘ia mo‘oni ‘i he taimi ‘oku tau fai ai ha ngaahi fehālaaki pea kole kia Sihova ke ne fakamolemole‘i kitautolu. He‘ikai leva ke tau hangē ai ko Lehopoamé ka te tau hanganaki faitōnunga ‘i he lotu mo‘oní.​—Sute 20, 21.