1. Hangē ko ia ʻoku hiki ʻi he Tangata Malanga 7:20, ko e hā ʻa e moʻoni naʻe fakahaaʻi ʻe Tuʻi Solomoné?

 NAʻE tohi ʻe Tuʻi Solomone: “ʻOku ʻikai ha tangata māʻoniʻoni ʻi he māmaní ʻokú ne fai maʻu pē ʻa e meʻa ʻoku leleí pea ʻikai ʻaupito ke ne faiangahala.” (Tml. 7:20) He moʻoni ē ko ia! ʻOku tau faiangahala kotoa. (1 Sio. 1:8) Ko ia ʻoku fiemaʻu kiate kitautolu kotoa ʻa e fakamolemole mei he ʻOtuá pea mei he kaungāfaʻahinga ʻo e tangatá.

2. ʻOku anga-fēfē hoʻo ongoʻí ʻi hano fakamolemoleʻi koe ʻe ha kaumeʻa ofi?

² ʻOku ʻikai ha veiveiua ʻokú ke manatuʻi ha taimi naʻá ke fakalotomamahiʻi ai ha kaumeʻa ofi. Naʻá ke loto ke fakatonutonu ia pea fakaleleiʻi homo vahaʻangataé, ko ia naʻá ke kole fakamolemole loto-moʻoni. Naʻe anga-fēfē hoʻo ongoʻí ʻi hono fakamolemoleʻi loto-lelei koe ʻe ho kaumeʻá? Naʻá ke maʻu ha ongoʻi nonga? ʻIo, pea fiefia foki!

3. Ko e hā te tau tokangataha ki ai ʻi he kupu ko ení?

³ ʻOku tau loto ke hoko ʻa Sihova ko hotau Kaumeʻa ofi tahá, ka ʻi he taimi ʻe niʻihi, te tau leaʻaki pe fai ha meʻa ʻe fakalotomamahi kiate ia. Ka ko e hā ʻe lava ke tau fakapapauʻi ai ʻoku vēkeveke ʻa Sihova ke fakamolemolé? ʻI he founga fē ʻoku makehe ai ʻa e fakamolemole ʻa Sihová ʻi hono fakahoa ki he fakamolemole ʻoku tau faí? Pea ko e fakaʻosí, ko hai ʻe lava ke ne maʻu ʻa e fakamolemole ʻa e ʻOtuá?

4. Ko e hā ʻoku lava ai ke tau fakapapauʻi ko Sihova ʻokú ne mateuteu ke fakamolemolé?

⁴ ʻOku fakapapauʻi mai ʻe he Folofola ʻa e ʻOtuá ko Sihová ʻokú ne mateuteu ke fakamolemole. ʻI he taimi naʻe fakahaaʻi ai ʻe Sihova  ʻa ia tonu kia Mōsese ʻi Moʻunga Sainaí, naʻá Ne folofola fakafou ʻi ha ʻāngelo: “Ko Sihova, ʻa Sihova, ko ha ʻOtua mohu meesi mo manavaʻofa, tuai ki he houhau pea fonu ʻi he ʻofa mateaki mo e moʻoni, ʻokú ne fakahaaʻi ʻa e ʻofa mateaki ki he laui afe, ʻo fakamolemoleʻi ʻa e faihalá mo e laka halá pea mo e angahalá.” (ʻEki. 34:6, 7) Ko Sihova ko ha ʻOtua anga-lelei mo faimeesi ʻokú ne mateuteu maʻu pē ke fakamolemoleʻi ʻa e kau faiangahala fakatomalá.​—Nehe. 9:17; Saame 86:15.

5. Fakatatau ki he Saame 103:13, 14, ko e hā ʻoku fai ʻe Sihova ʻi heʻene ʻiloʻi lelei ʻa e kakaí?

⁵ ʻI he tuʻunga ʻo Sihova ko hotau Tokotaha-Fakatupú, ʻokú ne ʻiloʻi ʻa e meʻa kotoa fekauʻaki mo kitautolu. Fakakaukau atu ki ai! ʻOkú ne ʻiloʻi ʻa e fakaikiiki kotoa fekauʻaki mo e tokotaha kotoa ʻi he māmani ko ení. (Saame 139:15-17) Ko ia ʻoku lava ke ne vakai ki he ngaahi taʻehaohaoa kotoa naʻa tau maʻu tukufakaholo mei heʻetau ongo mātuʻá. ʻOku aʻu ʻo ne toe lāuʻilo ki he ngaahi meʻa kotoa naʻe hoko ʻi heʻetau moʻuí ʻa ia kuó ne fakafuo hotau angaʻitangatá. ʻI hono ʻiloʻi lelei ko eni ʻe Sihova ʻa e faʻahinga ʻo e tangatá, ko e hā ʻokú ne ueʻi ai ia ke ne faí? ʻOku ueʻi ai ia ke ne faimeesi mai kiate kitautolu.​—Saame 78:39; lau ʻa e Saame 103:13, 14.

6. Kuo anga-fēfē hono fakamoʻoniʻi ʻe Sihova ʻokú ne vēkeveke ke fakamolemolé?

⁶ Kuo fakamoʻoniʻi ʻe Sihova ʻokú ne vēkeveke ke fakamolemole. ʻOkú ne mahinoʻi koeʻuhi ko e meʻa naʻe fai ʻe he ʻuluaki tangatá, ʻa ʻĀtama, ʻoku tau hoko kotoa ai ʻo ʻi he malumalu ʻo e malaʻia ʻo e angahalá mo e maté. (Loma 5:12) Naʻe ʻikai ʻi ai ha founga ke tau fakatauʻatāinaʻi ai kitautolu pe ko ha toe taha mei he malaʻia ko iá. (Saame 49:7-9) Kae kehe, ko hotau ʻOtua ʻofá naʻá ne fakahāhā ʻa e manavaʻofa pea fokotuʻutuʻu ke fakatauʻatāinaʻi kitautolu. Ko e hā naʻá ne faí? Hangē ko ia ʻoku fakahaaʻi ʻi he Sione 3:16, naʻe fekauʻi mai ʻe Sihova hono ʻAlo tofu-pē-taha-ne-fakatupú ke pekia maʻa kitautolu. (Māt. 20:28; Loma 5:19) Naʻe fetongi ʻe Sīsū kitautolu​—ʻo faingataʻaʻia ʻi he tautea maté​—ke fakatauʻatāinaʻi ha taha pē ʻokú ne ngāueʻi ʻa e tui kiate iá. (Hep. 2:9) He fakamamahi ē kia Sihova ke vakai ki hono ʻAlo ʻofeiná ʻokú ne pekia ʻi ha mate langa fakaʻulia mo fakamā! Ko e moʻoni, naʻe ʻikai mei fakaʻatā ʻe Sihova hono ʻAló ke pekia kapau naʻe ʻikai ke Ne loto ke fakamolemoleʻi kitautolu.

7. Ko hai ha niʻihi ʻi he Tohi Tapú naʻe fakamolemoleʻi loto-lelei ʻe Sihova?

⁷ Ko e Tohi Tapú ʻoku fonu ʻi he ngaahi faʻifaʻitakiʻanga ʻo e faʻahinga taautaha naʻe fakamolemoleʻi loto-lelei kinautolu ʻe Sihova.  (ʻEf. 4:32) Ko hai ʻoku haʻu ki hoʻo fakakaukaú? Mahalo ʻokú ke fakakaukau kia Tuʻi Manase. Ko e tangata fulikivanu ko iá naʻá ne faiangahala kia Sihova ʻi he ngaahi founga fakalilifu. Naʻá ne takimuʻa ʻi he lotu loí. Naʻá ne tāmateʻi ʻene fānaú tonu, ʻo feilaulauʻaki kinautolu ki he ngaahi ʻotua panganí. Naʻe aʻu ʻo ne fokotuʻu ha ʻīmisi kuo tongi ʻo ha ʻotua loi ʻi he temipale toputapu ʻo Sihová. ʻOku fakamatala ʻa e Tohi Tapú fekauʻaki mo ia: “Naʻá ne fai ʻo lahi ʻaupito ʻa e meʻa naʻe kovi ʻi he vakai mai ʻa Sihová, ke fakalotomamahiʻi ai ia.” (2 Kal. 33:2-7) Neongo ia, ʻi he taimi naʻe fakahaaʻi ai ʻe Manase ʻa e fakatomala loto-moʻoní, naʻe fakamolemoleʻi loto-lelei ia ʻe Sihova. Naʻe aʻu ʻo fakafoki ia ʻe he ʻOtuá ki hono tuʻunga ko e tuʻí. (2 Kal. 33:12, 13) Mahalo ʻokú ke toe fakakaukau foki kia Tuʻi Tēvita, naʻá ne fakahoko ʻa e ngaahi angahala mamafa kia Sihova, ʻo kau ai ʻa e tonó mo e tāmaté. Neongo ia, ʻi he taimi naʻe fakatomala loto-moʻoni ai ʻa Tēvitá pea fakahaaʻi ʻene faihalá, naʻe fakamolemoleʻi foki ia ʻe Sihova. (2 Sām. 12:9, 10, 13, 14) ʻIo, ʻe lava ke tau fakapapauʻi ko Sihová ʻokú ne vēkeveke ke fakamolemole. Pea hangē ko ia te tau vakai ki aí, ko ʻene malava ke fakamolemolé ʻoku makehe ʻi hono fakahoa ki he faʻahinga ʻo e tangatá.

8. ʻOku anga-fēfē kaunga ʻa e tuʻunga makehe ʻo Sihova ko ha Fakamāú ki heʻene malava ke fakamolemolé?

⁸ Ko Sihova ʻa e “Fakamaau ʻo māmaní kotoa.” (Sēn. 18:25) Ko ha fakamaau lelei ʻoku fiemaʻu ke ne mahinoʻi lelei ʻa e laó. ʻOku moʻoni eni ʻi heʻene haʻu kia Sihová koeʻuhí ʻoku ʻikai ngata pē ʻene hoko ko hotau Fakamāú, ka ʻokú ne toe hoko ko hotau Tokotaha Foaki-Laó. (ʻAi. 33:22) ʻOku ʻikai ha toe taha tuku kehe ʻa Sihova ʻokú ne maʻu ha ongoʻi loloto mo mālohi ki he tonú mo e halá. Ko e hā ʻoku toe fiemaʻu ki ha fakamaau lelei? ʻOku fiemaʻu ke ne malava ʻo sivisiviʻi ʻa e ngaahi moʻoniʻi meʻa kotoa ʻi ha keisi ki muʻa peá ne fakahoko ha tuʻutuʻuni. ʻI he tuʻunga ko ení, ko Sihova toko taha pē ʻa e Fakamaau lelei tahá.

9. Ko e hā ʻa e fakamatala ʻoku ala maʻu ʻe Sihova ʻi heʻene fili pe te ne fakamolemoleʻi ha taha?

⁹ ʻI he ʻikai ke hangē ko e kau fakamaau fakaetangatá, ko Sihova ʻokú ne mahinoʻi haohaoa maʻu pē ʻa e ngaahi moʻoniʻi meʻa kotoa ʻi ha keisi ʻoku ʻomi kiate ia. (Sēn. 18:20, 21; Saame 90:8) ʻOku ʻikai ke ne hangē ko e faʻahinga ʻo e tangatá ʻo fakangatangata pē ʻenau fakamāú ʻi he meʻa ʻoku nau sio pe fanongo ki aí. ʻOkú ne mahinoʻi kakato ʻa e anga hono tākiekina ʻa e ngaahi tōʻonga ʻa ha taha ʻe hono faʻunga fakakēnisí, founga naʻe ʻohake ai iá pea mo hono ʻātakaí pehē foki ki hono tuʻunga fakaeongo mo fakaʻatamaí. ʻOku toe ʻafioʻi foki ʻe Sihova ʻa e lotó. ʻOkú ne lāuʻilo kakato ki he fakaueʻiloto, taumuʻa mo e holi ʻa e tokotaha taki taha. ʻOku ʻikai ʻaupito ha meʻa ʻe lava ke puli meia Sihova. (Hep. 4:13) Ko ia ko e fakamolemole ʻa Sihová ʻoku makatuʻunga maʻu pē ʻi heʻene ʻiloʻi kakato ha tuʻunga.

10. Ko e hā ʻe lava ke tau pehē ai ko e fakamaau ʻa Sihová ʻoku totonu maʻu pē? (Teutalōnome 32:4)

¹⁰ Ko e fakamaau ʻa Sihová ʻoku totonu maʻu pē. ʻOku ʻikai ʻaupito ke ne filifilimānako. Ko ʻene fakamolemolé ʻoku ʻikai ʻaupito ke fakatuʻunga ia ʻi he fōtunga hāmai, koloa, tuʻunga pe malava ʻa ha taha. (1 Sām. 16:7; Sēm. 2:1-4) ʻOku ʻikai ha taha ʻe lava ke ne tenge ʻa Sihova ke ne fai ha meʻa pe totongi fufū Ia. (2 Kal. 19:7) Ko ʻene ngaahi filí ʻoku ʻikai ʻaupito tākiekina ia ʻe he ʻitá pe fakaʻofaʻiá. (ʻEki. 34:7) ʻOku ʻikai ha veiveiua, ko e mahino mo e vavanga loloto ʻoku maʻu ʻe Sihová ʻokú ne ʻai ai ia ke ne hoko ko e Fakamaau lelei tahá.​—Lau ʻa e Teutalōnome 32:4.

11. Ko e hā hono makehe ʻo e fakamolemole ʻa Sihová?

¹¹ Ko e kau hiki-tohi ʻo e Ngaahi Konga Tohi Tapu Faka-Hepeluú naʻa nau ʻiloʻi ko e fakamolemole ʻa Sihová ʻoku makehe. ʻI he ngaahi tuʻunga ʻe niʻihi, naʻa nau ngāueʻaki ha foʻi lea faka-Hepelū ʻa ia ʻoku pehē ʻi ha maʻuʻanga fakamatala ʻe taha “ʻoku ngāueʻaki tāfataha pē ia ke fakaʻilongaʻi ʻaki ʻa e fakamolemole ʻoku fakaaʻu atu ʻe he ʻOtuá  ki ha tokotaha faiangahala, pea ʻoku ʻikai ʻaupito ngāueʻaki ia ke fakahaaʻi ʻa e faʻahinga fakamolemole māʻulalo ange ʻoku fai ʻe he faʻahinga ʻo e tangatá.” Ko Sihova pē taha ʻokú ne maʻu ʻa e mafai ke fakamolemoleʻi fakaʻaufuli ha tokotaha faiangahala fakatomala. Ko e hā ʻe hoko ʻi he taimi ʻoku fakamolemoleʻi ai kitautolu ʻe Sihová?

12-13. (a) Ko e hā ʻe maʻu ʻe ha taha ʻi hono fakamolemoleʻi ia ʻe Sihová? (e) ʻOku fuoloa fēfē ʻa e ʻaonga ʻo e fakamolemole ʻa Sihová?

¹² ʻI he taimi ʻoku tau tali ai ʻa e foʻi moʻoni ko ia kuo fakamolemoleʻi kitautolu ʻe Sihová, ʻoku tau maʻu ai “ʻa e ngaahi taimi ʻo e fakaivifoʻoú,” kau ai ʻa e nonga ʻo e ʻatamaí mo ha konisēnisi maʻa. Ko e fakamolemole ko iá ʻoku ʻikai lava ke haʻu ia mei he tangatá ka kuo pau ke haʻu meia “Sihova tonu.” (Ngā. 3:19) ʻI he taimi ʻoku fakamolemoleʻi ai kitautolu ʻe Sihová, ʻokú ne fakaleleiʻi fakaʻaufuli ai hono vahaʻangatae mo kitautolú ʻo hangē ia naʻe ʻikai ʻaupito ke tau faiangahalá.

¹³ ʻI hono fakamolemoleʻi pē kitautolu ʻe Sihová, heʻikai ʻaupito te ne toe tukuakiʻi pe tauteaʻi kitautolu ki he angahala ko iá. (ʻAi. 43:25; Sel. 31:34) ʻOku ʻave ʻe Sihova meiate kitautolu ʻetau ngaahi angahalá ʻo “hangē ko e mamaʻo ʻa e hopoʻanga laʻaá mei he tōʻanga laʻaá.” * (Saame 103:12) ʻI heʻetau fakakaukauloto ki he lahi ʻo e fakamolemole ʻa Sihová, ʻoku tau fonu ʻi he houngaʻia mo e ʻapasia. (Saame 130:4) Ka ko hai ʻe lava ke ne hokosia ʻa e fakamolemole ko eni meia Sihová?

14. Ko e hā kuo tau ako mai fekauʻaki mo e fili ʻa Sihova ke fakamolemolé?

¹⁴ Hangē ko ia kuo tau vakai ki aí, ko e fili ʻa Sihova ke fakamolemolé ʻoku ʻikai ke makatuʻunga ia ʻi he lahi pe siʻisiʻi ʻo e angahalá. Pehē foki, kuo tau ako ko Sihová ʻokú ne ngāueʻaki ʻene ʻilo ko hotau Tokotaha-Fakatupú, Tokotaha Foaki-Laó mo e Fakamāú ʻi he taimi ʻokú ne fili ai pe te ne fakamolemoleʻi ha taha. Ko e hā ʻa e ngaahi tafaʻaki ʻoku fakakaukau ki ai ʻa Sihová?

15. Fakatatau ki he Luke 12:47, 48, ko e hā ʻa e tafaʻaki ʻe taha ʻoku fakakaukau ki ai ʻa Sihová?

¹⁵ Ko e tafaʻaki ʻe taha ʻoku fakakaukau ki ai ʻa Sihová pe naʻe ʻiloʻi ʻe he tokotaha faiangahalá ko ʻene meʻa naʻe faí naʻe hala. Naʻe fakamāʻalaʻala eni ʻe Sīsū, hangē ko ia naʻe hiki ʻi he Luke 12:47, 48. (Lau.) Ko ha tokotaha ʻokú ne faʻufaʻu loto-lelei ke fai ha meʻa fulikivanu pea ʻiloʻi lelei ʻokú ne fai ha meʻa ʻoku fakalotomamahi kia Sihova ʻokú ne faiangahala mamafa. Ko ha tokotaha pehē ʻokú ne ʻi ha tuʻunga  fakatuʻutāmaki ke ʻikai fakamolemoleʻi ia. (Mk. 3:29; Sione 9:41) Ko e moʻoni, ʻi he taimi ʻe niʻihi ʻoku tau fai ʻa e ngaahi meʻa neongo ʻoku tau ʻiloʻi ʻoku hala. ʻOku ʻi ai ha ʻamanaki maʻa kitautolu ʻi he tuʻunga ko iá? ʻIo! Pea ʻoku taki atu heni kitautolu ki ha toe tafaʻaki ʻe taha ʻoku fakakaukau ki ai ʻa Sihova.

16. Ko e hā ʻa e fakatomala, pea ko e hā ʻoku mātuʻaki mahuʻinga ai ia kapau ʻoku tau loto ke fakamolemoleʻi kitautolu ʻe Sihova?

¹⁶ Ko e tafaʻaki ʻe taha ʻoku fakakaukau ki ai ʻa Sihová pe ʻoku fakatomala loto-moʻoni ʻa e tokotaha faiangahalá. ʻOku ʻuhinga ki he hā ʻa e fakatomala? Ke fakatomalá ʻoku ʻuhinga iá “ke liliu ʻa e ʻatamai, tōʻonga pe taumuʻa ʻa ha taha.” ʻOku kau ki ai ʻa e ongoʻi fakaʻiseʻisa ha tokotaha mo loto-mamahi lahi fekauʻaki mo e meʻa kovi naʻá ne faí pe ko e ʻikai ke ne fai ʻa e meʻa totonú. Ko ha tokotaha fakatomala ʻoku ʻikai ngata pē ʻene mamahi ʻi heʻene faihalá kae pehē foki ki he tuʻunga vaivai fakalaumālie naʻá ne ʻi ai ʻo iku atu ai ki he ngaahi faihala ko iá. Manatuʻi ko Tuʻi Manase mo Tēvita naʻá na fakatou faiangahala mamafa; ka, naʻe fakamolemoleʻi kinaua ʻe Sihova koeʻuhi naʻá na fakatomala loto-moʻoni. (1 Tuʻi 14:8) ʻIo, kuo pau ke vakai ʻa Sihova ki ha fakamoʻoni ʻo ha fakatomala kae malava ke ne fai ha fakamolemole. Ka ʻoku ʻikai feʻunga pē ke tau ongoʻi fakatomala fekauʻaki mo ha ʻalunga angahalaʻia pe ko ha angahala naʻa tau fai. Kuo pau ke tau mateuteu ke fai ha meʻa. * ʻOku tau aʻu mai ai ki ha toe tafaʻaki ʻe taha ʻoku fakakaukau ki ai ʻa Sihova.

17. Ko e hā ʻa e liliu, pea ko e hā ʻoku mātuʻaki mahuʻinga ai ia kapau ʻoku tau loto ke fakaʻehiʻehi mei hono toe fai ha angahala ʻi he kuohilí? (ʻAisea 55:7)

¹⁷ Ko e liliú ko ha toe tafaʻaki mahuʻinga ia ʻoku fakakaukau ki ai ʻa Sihova. ʻOku ʻuhinga ia ki he “tafoki.” ʻI hono toe fakalea ʻe tahá, ko ha tokotaha kuo pau ke ne liliu ʻa hono ʻalungá ʻaki ʻa e liʻaki ʻene ngaahi founga koví pea tuli ki he founga ʻa Sihová. (Lau ʻa e ʻAisea 55:7.) Ko e tokotahá kuo pau ke ne liliu hono ʻatamaí koeʻuhi ke tataki ia ʻe he fakakaukau ʻa Sihová. (Loma 12:2; ʻEf. 4:23) Kuo pau ke ne fakapapauʻi ke liʻaki ʻene ngaahi founga fakaefakakaukau mo e tōʻonga kovi ki muʻá. (Kol. 3:7-10) Ko e moʻoni, ko ʻetau tui ki he feilaulau ʻa Kalaisí ʻokú ne tokonaki mai ʻa e makatuʻunga moʻoni ke fakamolemoleʻi kitautolu ʻe Sihova pea fakamaʻa kitautolu mei he  angahalá. ʻE fakaaʻu mai ʻe Sihova ʻa e mahuʻinga ʻo e feilaulau ko iá kiate kitautolu ʻi he taimi ʻokú ne vakai mai ai ʻoku tau feinga loto-moʻoni ke liliu ʻetau tōʻongá.​—1 Sio. 1:7.

18. Ko e hā kuo tau lāulea ki ai fekauʻaki mo e fakamolemole ʻa Sihová?

¹⁸ Tau sivisiviʻi nounou angé ʻa e niʻihi ʻo e ngaahi poini tefito kuo tau lāulea ki aí. Ko e moʻoni, ko Sihova ʻa e Tokotaha Fakamolemole lahi taha ʻi he ʻunivēsí. Ko e hā ʻa e makatuʻunga ki heʻetau lea peheé? ʻUluakí, ʻokú ne mateuteu maʻu pē ke fakamolemole. Uá, ʻokú ne ʻafioʻi lelei kitautolu. ʻOkú ne lāuʻilo haohaoa ki hotau faʻungá, pea ʻokú ne ʻi he tuʻunga lelei taha ke fakapapauʻi pe ʻoku tau fakatomala moʻoni. Pea ko e tolú, ʻi he taimi ʻoku fakamolemoleʻi ai kitautolu ʻe Sihová, ʻokú ne lapaʻi ia pe tāmateʻi ʻosi. ʻOku fakaʻatā heni kitautolu ke tau maʻu ha konisēnisi maʻa pea maʻu ʻene hōifuá.

19. Neongo ʻoku tau taʻehaohaoa mo kei faiangahala pē, ko e hā ʻe lava ai ke tau hoko ʻo fiefiá?

¹⁹ Ko e moʻoni, ko ʻetau toki haohaoá pē, heʻikai ai ke tau toe faiangahalá. Neongo ia, ʻe lava ke tau maʻu ha fakafiemālie mei he ngaahi lea ʻoku maʻu ʻi he Insight on the Scriptures, Voliume 2, peesi 771: “Koeʻuhi ʻoku fakakaukau ʻa Sihova ʻi he faimeesi ki he vaivaiʻanga fakakakano ʻene kau sevānití, ʻoku ʻikai fiemaʻu ai ke nau toutou ongoʻi fakaʻiseʻisa ʻi heʻenau ngaahi fehālaaki tupu mei he taʻehaohaoa tukufakaholó. (Saame 103:8-14; 130:3) Kapau ʻoku nau fai honau lelei tahá ke ʻaʻeva ʻi he ngaahi founga ʻa e ʻOtuá ʻe lava ke nau fiefia. (Fil. 4:4-6; 1 Sio. 3:19-22).” He fakakaukau fakalototoʻa ē ko ia!

20. Ko e hā te tau lāulea ki ai ʻi he kupu hono hokó?

²⁰ ʻOku tau houngaʻia ʻi he mateuteu ʻa Sihova ke fakamolemoleʻi kitautolu ʻi he taimi ʻoku tau fakatomala loto-moʻoni ai ʻi he ngaahi angahala naʻa tau faí. Ka ʻe lava fēfē ke tau faʻifaʻitaki ki he fakamolemole ʻa Sihová? ʻI he ngaahi founga fē ʻoku meimei tatau ai ʻetau fakamolemolé mo e fakamolemole ʻa Sihová, ka ʻi he ngaahi founga fē ʻokú na kehekehe aí? Ko e hā ʻoku mahuʻinga ai hono mahinoʻi ʻa e faikehekehe ko iá? ʻI he kupu hono hokó ʻe tali ai ʻa e ngaahi fehuʻi ko iá.