ʻOku ʻikai tala mai ia ʻi he Tohi Tapú. Ka ʻoku fakaeʻa mai ai ʻa e ngaahi fakaikiiki fakatupu tokanga ʻa ia naʻe kaunga nai ki heʻena filí.

Naʻe tala ange ʻe ha ʻāngelo kia Mele te ne hoko ʻo feitama pea fāʻele. ʻI he taimi naʻe ʻoatu ai ʻe he ʻāngeló ʻa e pōpoaki ko ení, ko Mele mo Siosifa naʻá na lolotonga nofo ʻi Nāsaleti, ʻa e kolo tupuʻanga ʻo Siosifá ʻi Kāleli. (Luke 1:26-31; 2:4) Ki mui ai, ʻi heʻenau haʻu mei ʻIsipité, naʻa nau foki ki Nāsaleti. Naʻe tupu hake ai ʻa Sīsū peá ne hoko ko ha Nāsaleti. (Māt. 2:19-23) Ko ia ʻoku feʻungamālie hono fakafekauʻaki ʻa e kotoa ʻo e toko tolu ko ení​—ʻa Sīsū, Siosifa mo Mele—​pea mo Nāsaleti.

Naʻe ʻi ai ha kāinga ʻo Mele ko ʻIlisapesi, naʻá ne nofo ʻi Siuta. Ko ʻIlisapesí ko e uaifi ia ʻo e taulaʻeiki ko Sākalaiá pea naʻá ne hoko ko e faʻē ʻa Sione Papitaisó. (Luke 1:5, 9, 13, 36) Naʻe ʻaʻahi ʻa Mele kia ʻIlisapesi pea nofo mo ia ʻi ha māhina ʻe tolu ʻi Siuta. Pea naʻe foki leva ʻa Mele ki Nāsaleti. (Luke 1:39, 40, 56) Ko ia naʻe kiʻi maheni ai ʻa Mele mo e feituʻu ʻo Siutá.

ʻI he faai atu ʻa e taimí, naʻe talangofua ʻa Siosifa ki he tuʻutuʻuni “ke lēsisita kinautolu.” Ko ia naʻe fononga ʻa Siosifa mei Nāsaleti ki Pētelihema, ʻa ia ko e “kolo ʻo Tēvitá” pea ko e feituʻu ia naʻe kikiteʻi ʻe ʻaloʻi ai ʻa e Mīsaiá. (Luke 2:3, 4; 1 Sām. 17:15; 20:6; Mai. 5:2) Hili hono fāʻeleʻi ʻe Mele ʻa Sīsū ʻi aí, naʻe ʻikai ke ʻamanekina ʻe Siosifa ʻa Mele ke fononga lōloa ʻo foki ki Nāsaleti mo ha pēpē toki fanauʻi. Naʻa nau nofo ʻi Pētelihema, ʻa ia naʻe kilomita nai ʻe hiva (maile nai ʻe 6) mei Selusalema. Ko ia ʻe feʻungamālie ai ke na ʻave ʻena kiʻi valevalé ki he temipalé pea fai ʻa e feilaulau naʻe fiemaʻú.​—Liv. 12:2, 6-8; Luke 2:22-24.

Naʻe tala ʻe he ʻāngelo ʻa e ʻOtuá ki muʻa ange kia Mele ko ʻene tamá te ne maʻu ‘ʻa e taloni ʻo Tēvitá’ pea te ne “pule ko e Tuʻi.” Naʻe fakakaukau nai ʻa Siosifa mo Mele naʻe mātuʻaki mahuʻinga ke fanauʻi ʻa Sīsū ʻi he kolo ʻo Tēvitá? (Luke 1:32, 33; 2:11, 17) Naʻá na fakakaukau nai naʻe fakapotopoto ke nau nofo ai pē ai pea tatali ki ha tataki lahi ange mei he ʻOtuá kiate kinaua.

ʻOku ʻikai ke tau ʻiloʻi pe ko e hā ʻa e fuoloa ʻo ʻenau ʻi Pētelihemá ʻi he taimi naʻe aʻu atu ai ʻa e niʻihi ʻo e kau vavaló. Kae kehe, ʻi he taimi ko iá, naʻe nofo ʻa e fāmilí ʻi ha fale, pea naʻa nau sio ai ki heʻena “kiʻi tamá,” ʻoku ʻikai ke ne kei valevale. (Māt. 2:11) ʻOku hā ngali ʻi he ʻikai ke nau foki ki Nāsaletí, naʻa nau nofo ai pē ʻi Pētelihema ʻo hoko ai pē ko honau ʻapi.

Naʻe tuʻutuʻuni ʻa Hēlota ke tāmateʻi ʻa e “tamaiki tangata kotoa pē ʻi Pētelihema . . . mei he taʻu uá ʻo faai hifo.” (Māt. 2:16) ʻI hono maʻu ha fakatokanga fakaʻotua fekauʻaki mo e tuʻutuʻuni ko ení, naʻe hola ʻa Siosifa mo Mele ki ʻIsipite fakataha mo Sīsū pea nau nofo ai kae ʻoleva ke mate ʻa Hēlota. Ki mui ai, naʻe ʻave ʻe Siosifa hono fāmilí ki Nāsaleti. Ko e hā naʻe ʻikai ke nau foki ai ki Pētelihemá? Ke hao mei he foha anga-fakamamahi ʻo Hēlotá, ʻa ʻAkileosi, naʻá ne ʻi Siuteá, pea ke talangofua ki he fakatokanga ʻa e ʻOtuá. ʻI Nāsaleti, naʻe lava ke ʻohake malu ai ʻe Siosifa ʻa Sīsū ko ha tokotaha lotu moʻoni ʻa e ʻOtuá.​—Māt. 2:19-22; 13:55; Luke 2:39, 52.

ʻOku ngalingali naʻe mate ʻa Siosifa ki muʻa ke fakaava ʻe Sīsū ʻa e hala ki he moʻui ʻi hēvaní. Ko ia ko Siosifa ʻe fokotuʻu hake ke moʻui ʻi he māmaní. Ko e tokolahi ʻe malava ke nau fetaulaki mo ia pea ʻilo ʻa e ngaahi fakaikiiki lahi ange meiate ia ki he ʻuhinga naʻá ne nofo ai pē mo Mele ʻi Pētelihema hili hono ʻaloʻi ʻo Sīsuú.