1. Ko e hā kuo pau ke tau fai ke hao ai ʻi he ʻaho ʻo Sihová?

 ʻI HE lave ʻa e Tohi Tapú ki he “ʻaho ʻo Sihová,” ʻoku ʻuhinga ia ki he taimi ʻe fakamāuʻi ai ʻe Sihova ʻa hono ngaahi filí pea fakahaofi ʻa ʻene kakaí. ʻI he kuohilí, naʻe fakahoko ʻe Sihova ʻi he taimi ʻe niʻihi ʻa e ngaahi fakamaau. (ʻAi. 13:1, 6; ʻIsi. 13:5; Sēf. 1:8) ʻI hotau taimí, “ko e ʻaho ʻo Sihová” ʻoku kamataʻaki ʻa e ʻohofi ʻo Pāpilone ko e Lahí pea fakaʻosiʻaki ʻa e tau ʻo ʻĀmaketoné. Ke hao ʻi he “ʻaho” ko iá, ʻoku fiemaʻu ke tau mateuteu ʻi he taimí ni. Naʻe akoʻi ʻe Sīsū kuo pau ke ʻoua ʻe ngata pē ʻetau hoko ʻo mateuteu ki he ‘fuʻu mamahi lahí’ kae toe “hanganaki mateuteu” ki ai.​—Māt. 24:21; Luke 12:40.

2. Ko e hā ʻe lava ke tau maʻu ʻaonga ai mei he 1 Tesalonaiká?

² ʻI he ʻuluaki tohi fakamānavaʻi ʻa e ʻapositolo ko Paulá ki he kau Tesalonaiká, naʻá ne ngāueʻaki ha ngaahi talanoa fakatātā ke tokoniʻi ʻa e kau Kalisitiané ke nau hanganaki mateuteu ki he ʻaho lahi ʻo e fakamaau ʻa Sihová. Naʻe ʻiloʻi ʻe Paula ko e ʻaho ʻo Sihová heʻikai hoko mai ia ʻi he taimi ko iá. (2 Tes. 2:1-3) Neongo ia, naʻá ne ekinaki ki hono fanga tokouá ke nau mateuteu ki he ʻaho ko iá ʻo hangē pē ʻe hoko mai ʻapongipongí, pea ko kitautolu foki ʻe lava ke tau ngāueʻaki ʻene faleʻí. Tau lāulea angé ki heʻene fakamatala fekauʻaki mo e ngaahi meʻa ko ení: (1) Founga ʻe aʻu mai ai ʻa e ʻaho ʻo Sihová, (2) ko hai ʻe hao ʻi he ʻaho ko iá, pea (3) ko e founga ʻe lava ke tau mateuteu ai ke haó.

3. ʻOku anga-fēfē haʻu ʻa e ʻaho ʻo Sihová ʻo hangē ko ha kaihaʻa ʻi he poʻulí? (Sio foki ki he fakatātaá.)

³ “Hangē ko ha kaihaʻa ʻi he poʻulí.” (1 Tes. 5:2) Ko e ʻuluaki eni ʻi he lea fakaefakatātā ʻe tolu naʻe ngāueʻaki ke fakamatalaʻi ʻa e aʻu  mai ʻa e ʻaho ʻo Sihová. Ko e kau kaihaʻá ʻoku nau faʻa ngāue fakavave pea ʻi he poʻulí ke maʻungatāmaki ai ʻa e kakaí. Ko e ʻaho ʻo Sihová ʻe aʻu fakafokifā mai, ʻo fakaʻohovale ki he tokolahi taha ʻo e kakaí. Naʻa mo e kau Kalisitiane moʻoní te nau ʻohovale nai ʻi he vave ko ia ke tatala mai ʻa e ngaahi meʻa kuo hokó. Ka ʻi he ʻikai hangē ko e fulikivanú, heʻikai ke fakaʻauha kitautolu.

4. ʻI he founga fē ʻoku hangē ai ʻa e ʻaho ʻo Sihová ko e langā ʻa ha fefine feitamá?

⁴ “Hangē tofu pē ko e langā ʻa ha fefine feitama.” (1 Tes. 5:3) Ko ha faʻē feitama ʻoku ʻikai lava ke ne tomuʻa ʻiloʻi ʻa e taimi tofu pē te ne langā aí. Ka neongo ia, ʻoku ʻikai haʻane veiveiua ʻe taha ʻe hoko ia. ʻI heʻene langaá, ʻoku ngalingali ʻe hoko fakafokifā ia, langa lahi pea hokohoko. ʻOku pehē pē, ʻoku ʻikai ke tau ʻiloʻi ʻa e ʻaho mo e houa ʻe kamata ai ʻa e ʻaho ʻo Sihová. Neongo ia, ʻoku tau fakapapauʻi ʻoku haʻu ia pea ko e fakamaau ʻa e ʻOtuá ki he fulikivanú ʻe hoko fakafokifā mai ia pea ʻikai ala kalofi.

5. ʻI he founga fē ʻoku hangē ai ʻa e fuʻu mamahi lahí ko e mafoa ʻa e atá?

⁵ Hangē ko e mafoa ʻa e atá. Ko e talanoa fakatātā hono tolu ʻa Paulá ʻoku toe lave ki he kau kaihaʻa ʻi he poʻulí. Ka ʻoku fakahanga ʻe Paula ʻene fakamatalá ki ha tafaʻaki ʻe taha ʻo hangē ʻokú ne fakahoa ʻa e ʻaho ʻo Sihová ki he mafoa ʻa e atá. (1 Tes. 5:4) Ko e kau hae fale ʻoku nau haʻu ʻi he poʻulí ʻe lava ke nau moʻua ʻi he kaihaʻá ʻo ʻikai ke nau fakatokangaʻi ʻa e ʻalu ʻa e taimí. Pea ʻe maʻa hake nai ʻa e ʻahó ʻo maʻu kinautolu pea fakaeʻa atu ai kinautolu. Ko e fuʻu mamahi lahí ʻe pehē pē ʻene fakaeʻa atu ʻa e faʻahinga ʻa ia, hangē ko e kau kaihaʻá, ʻoku nau nofo pē ʻi he fakapoʻulí ʻaki ʻa e fakamatematē ʻi he ngaahi ngāue ʻoku taʻefakahōifua ki he ʻOtuá. ʻI he ʻikai hangē ko kinautolú, ʻe lava ke tau hoko ʻo mateuteu ʻaki hono talitekeʻi ʻa e tōʻonga ʻoku taʻefakahōifua kia Sihová pea tuli ki he “faʻahinga kotoa pē ʻo e leleí mo e māʻoniʻoní mo e moʻoní.” (ʻEf. 5:8-12) ʻOku hoko atu ʻa Paula ʻo lave ki ha talanoa fakatātā ʻe ua ke fakamatalaʻiʻaki ʻa e faʻahinga heʻikai te nau haó.

6. ʻI he ʻuhinga fē ʻoku mohe ai ʻa e tokolahi taha ʻo e kakaí? (1 Tesalonaika 5:6, 7)

⁶ “Ko e faʻahinga ʻoku mohé.” (Lau ʻa e 1 Tesalonaika 5:6, 7.) Naʻe fakahoa ʻe Paula ʻa e faʻahinga heʻikai ke nau hao ʻi he ʻaho ʻo Sihová ki he kakai ʻoku nau mohé. ʻOku ʻikai ke nau ʻiloʻi ʻa e meʻa ʻoku hoko takatakaí pe ko e ʻalu ʻa e taimí. Ko ia ai, ʻoku ʻikai ke nau ʻiloʻi ʻa e ngaahi meʻa mahuʻinga ʻoku hokó pe fai ha ngāue ʻo fakatatau ki ai. Ko e tokolahi taha ʻo e kakaí ʻi he ʻahó ni ʻoku nau mohe ʻi ha ʻuhinga fakalaumālie. (Loma 11:8) ʻOku nau fakataʻetaʻetokanga ki he fakamoʻoni ʻoku tau lolotonga moʻui “ʻi he ngaahi ʻaho fakaʻosí” pea ko e fuʻu mamahi lahí ʻoku vavé ni ke hoko mai. Ko e ngaahi meʻa lalahi ʻoku hoko ʻi he māmaní te ne fafangu nai ʻa e niʻihi mei he mohe fakalaumālié pea ueʻi kinautolu ke fakahāhā ha kiʻi mahuʻingaʻia ʻi heʻetau pōpoaki ʻo e Puleʻangá. Neongo ia, ko e tokolahi ʻoku nau toe foki pē ʻo mohe kae ʻikai ke nofoʻaki ʻāʻā. Naʻa mo e niʻihi ʻoku nau tui ki ha ʻaho ʻo e fakamāú ʻoku nau fakakaukau ʻoku kei mamaʻo ia. (2 Pita 3:3, 4) Kae kehe, ʻoku tau ʻiloʻi ko e akonaki fakamānavaʻi ke nofoʻaki ʻāʻaá ʻoku toe fakavavevave ange ia ʻi he ʻaho taki taha.

7. ʻOku anga-fēfē ʻa e hoko ʻa e faʻahinga ʻoku teu ke nau fehangahangai mo e houhau ʻa e ʻOtuá ʻo hangē ko e kau konaá?

⁷ “Ko e faʻahinga ʻoku konaá.” Naʻe fakahoa ʻe he ʻapositoló ʻa e faʻahinga ʻoku teu ke nau fehangahangai mo e houhau ʻa e ʻOtuá ki he kau faʻa konaá. Ko e kakai ʻoku huʻakavaʻiá ʻoku tuai ke nau fakafeangai ki he meʻa ʻoku hoko takatakai ʻiate kinautolú, pea ʻoku nau fai ʻa e ngaahi fili fakavalevale. ʻI he tuʻunga meimei tatau, ko e fulikivanú ʻoku ʻikai ke nau tali ʻa e fakatokanga ʻa e ʻOtuá. ʻOku nau fili ha ʻalunga ʻoku taki atu ki honau fakaʻauhá. Ka ʻoku tala ki he kau Kalisitiané ke nau tauhi maʻu ʻenau fakakaukau leleí. (1 Tes. 5:6) ʻOku fakamatalaʻi ʻe ha mataotao Tohi Tapu ʻa e fakakaukau lelei ko ení ko ha “tuʻunga nonga mo tuʻu maʻu ʻo e ʻatamaí ʻa ia ʻokú ne fuatautau mo fakafuofua totonu ʻa e ngaahi meʻá pea fakamafeia ai kitautolu ke fai ʻa e fili ʻoku tonú.” Ko e hā kuo pau ke tau nofoʻaki nonga ai mo tuʻu maʻú? Koeʻuhi ke ʻoua te tau fihia ʻi he ngaahi ʻīsiu fakapolitikale pe fakasōsiale ʻo e ʻaho ní. Ko e tenge ke kau ki ha faʻahi ʻi he ngaahi meʻa ko ení ʻe fakalalahi ʻi he ʻalu ke toe ofi ange ki he ʻaho ʻo Sihová. Neongo ia, ʻoku fiemaʻu ke ʻoua te tau loto-moʻua fekauʻaki mo e founga te tau fakafeangai aí. Ko e laumālie ʻo e ʻOtuá ʻe lava ke ne tokoniʻi kitautolu ke maʻu ha tuʻunga fakaʻatamai nonga mo tuʻu maʻu pea ke fai ʻa e ngaahi fili fakapotopoto.​—Luke 12:11, 12.

8. ʻOku fakatātaaʻi fēfē ʻi he 1 Tesalonaika 5:8 ʻa e ngaahi ʻulungaanga te ne tokoniʻi kitautolu ke nofoʻaki ʻāʻā pea tauhi maʻu ʻetau fakakaukau leleí? (Sio foki ki he fakatātaá.)

⁸ “Tui ʻa e sifa-fatafata . . . pea tui ʻa e tatā.” ʻOku fakahoa kitautolu ʻe Paula ki he kau sōtia ʻoku nau ʻāʻā pea tui honau teunga taú. (Lau ʻa e 1 Tesalonaika 5:8.) Ko ha sōtia ʻoku lolotonga faifatongia ʻoku ʻamanekina ke ne mateuteu ki he taú ʻi he taimi kotoa pē. ʻOku pehē pē mo kitautolu. ʻOku tau nofoʻaki mateuteu ki he ʻaho ʻo Sihová ʻaki hono tui ha sifa-fatafata ʻo e tuí mo e ʻofá pea tui ha tātā ʻo e ʻamanakí. Ko e ngaahi ʻulungaanga ko ení ʻe lava ke ne tokoniʻi lahi kitautolu.

9. ʻOku anga-fēfē hono maluʻi kitautolu ʻe heʻetau tuí?

⁹ Ko ha sifa-fatafata naʻá ne maluʻi ʻa e mafu ʻo ha sōtia. Ko e tuí mo e ʻofá ʻokú na maluʻi ʻa hotau lotó. Te na tokoniʻi kitautolu ke hanganaki tauhi ki he ʻOtuá pea muimui kia Sīsū. ʻOku fakapapauʻi mai ʻe he tuí ʻe fakapaleʻi kitautolu ʻe Sihova koeʻuhi ko ʻetau kumi kiate ia ʻaki hotau lotó kotoa. (Hep. 11:6) ʻE ueʻi ai kitautolu ke nofoʻaki mateaki ki hotau Takí, ʻa Sīsū, neongo kapau ʻoku ʻuhinga iá kuo pau ke tau kātekina ʻa e ngaahi faingataʻa. ʻE lava ke tau langa hake ʻa e tui ke fehangahangai ai mo e ngaahi pole ʻi he moʻuí  ʻaki ʻa e ako mei he faʻifaʻitakiʻanga ʻa e faʻahinga tāutaha ʻi onopooni naʻa nau tauhi maʻu ʻa e anga-tonú neongo ʻa e fakatangá pe faingataʻa fakaʻekonōmiká. Pea ʻe lava ke tau fakaʻehiʻehi mei he tauhele ʻo e tuli ki he meʻa fakamatelié ʻaki ʻa e faʻifaʻitaki ki he faʻahinga naʻa nau fakafaingofuaʻi ʻenau moʻuí ke fakamuʻomuʻa ʻa e ngaahi meʻa ʻo e Puleʻangá. b

10. ʻOku anga-fēfē hono tokoniʻi kitautolu ʻe he ʻofa ki he ʻOtuá pea mo hotau kaungāʻapí ke kātakí?

¹⁰ Ko e ʻofá ʻoku toe mātuʻaki mahuʻinga ke tau nofoʻaki ʻāʻā ai pea tauhi maʻu ʻetau fakakaukau leleí. (Māt. 22:37-39) Ko e ʻofa ki he ʻOtuá ʻokú ne tokoniʻi kitautolu ke kātaki ʻi he ngāue fakamalangá neongo ha faʻahinga faingataʻa pē ʻe hoko mai ai. (2 Tīm. 1:7, 8) Koeʻuhi ko ʻetau ʻofá ʻoku fakaaʻu atu ki he faʻahinga ʻoku ʻikai ke nau tui tatau mo kitautolu, ʻoku tau hanganaki malanga pea hanganaki ngāueʻi ai hotau feituʻu ngāué, naʻa mo e faifakamoʻoni ʻi he telefoní mo e faitohí. ʻOku ʻikai ke mole ʻetau ʻamanaki ʻe ʻi ai e ʻaho ʻe liliu ai ʻa hotau ngaahi kaungāʻapí pea kamata ke nau fai ʻa e meʻa ʻoku totonú.​—ʻIsi. 18:27, 28.

11. ʻOku anga-fēfē hono tokoniʻi kitautolu ʻe he ʻofa ki he kaungātuí? (1 Tesalonaika 5:11)

¹¹ Ko ʻetau ʻofa ki he kaungāʻapí ʻoku kau ai ʻa e kaungā-Kalisitiané. ʻOku tau fakahāhā ʻa e ʻofa ko iá ʻaki ʻa e “hanganaki fefakalototoʻaʻaki mo felangahakeʻaki.” (Lau ʻa e 1 Tesalonaika 5:11.) Hangē ko e kau sōtia ʻoku nau ngāue uma ki he uma ʻi he taú, ʻoku tau fefakalototoʻaʻaki. Ko e moʻoni, ko ha sōtia te ne fakalaveaʻi fāinoa nai ha kaungā-sōtia ʻi he uhouhonga ʻo e taú, ka heʻikai ʻaupito te ne fai ʻosi fakakaukauʻi ia. Hangē pē ko iá, heʻikai ʻaupito te tau fakalotomamahiʻi ʻiloʻilo pau ʻa hotau fanga tokouá pe fetongi ʻa e koví ʻaki ʻa e kovi. (1 Tes. 5:13, 15) ʻOku tau fakahāhā foki ʻetau ʻofá ʻaki ʻa e fakaʻapaʻapa ki he fanga tokoua ʻoku nau tokangaʻi ʻa e fakatahaʻangá. (1 Tes. 5:12) ʻI he fai ʻe Paula ʻa e tohi ko ení, ko e fakatahaʻanga Tesalonaiká naʻe teʻeki ke taʻu ʻe taha hono fokotuʻú. ʻOku ngalingali ko e kau tangata ʻosi fakanofó naʻa nau taʻetaukei pea fai nai mo e ngaahi fehālaaki. Neongo ia, naʻa nau tuha mo e fakaʻapaʻapa. ʻI he fakaofi mai ʻa e fuʻu mamahi lahí, ʻe fiemaʻu nai ke tau falala ki he kau mātuʻa fakalotofonuá ki ha tataki ʻo toe lahi ange ia ʻi he taimí ni. ʻE motuhia nai ʻetau fetuʻutaki mo e ʻuluʻi ʻapitanga ʻi māmaní mo e ʻōfisi vaʻá;  ko ia ʻoku mahuʻinga ke tau ako ke ʻofa mo fakaʻapaʻapaʻi ʻetau kau mātuʻá he taimí ni. Pe ko e hā pē ʻoku hokó, tau tauhi maʻu ʻetau fakakaukau leleí, ʻo ʻikai tokangataha ki heʻenau ngaahi taʻehaohaoá, kae tokangataha ki he moʻoniʻi meʻa ko Sihova fakafou ʻia Kalaisi ʻokú ne tataki ʻa e kau tangata faitōnunga ko ení.

12. ʻOku anga-fēfē hono maluʻi ʻe heʻetau ʻamanakí ʻetau fakakaukaú?

¹² Hangē pē ko hono maluʻi ʻe ha tatā ʻa e ʻulu ʻo ha sōtia, ko ʻetau ʻamanaki ʻo e fakamoʻuí ʻokú ne maluʻi ʻetau fakakaukaú. ʻI hono maʻu ha ʻamanaki mālohi, ʻoku tau ʻiloʻi ai ko e meʻa ʻoku tuʻuaki mai ʻe he māmaní ko e koto taʻeʻaonga. (Fil. 3:8) Ko ʻetau ʻamanakí ʻokú ne tokoniʻi kitautolu ke hanganaki nonga mo tuʻu maʻu. Naʻe hoko moʻoni eni kia Wallace mo Laurinda, ʻokú na ngāue ʻi ʻAfilika. ʻI loto ʻi ha uike ʻe tolu, naʻe fakatou mole ʻi he maté ʻa e taha ʻi heʻena ongo mātuʻá. Koeʻuhi ko e COVID-19, naʻe ʻikai malava ke na foki ki ʻapi ke fakataha mo hona fāmilí. Naʻe tohi ʻe Wallace: “Ko e ʻamanaki ʻo e toetuʻú ʻokú ne tokoniʻi au ke fakakaukau kiate kinaua, ʻo ʻikai ki he tuʻunga naʻá na ʻi ai ʻi hona ngaahi ʻaho fakaʻosi ʻi he māmani ko ení, ka ki he tuʻunga te na ʻi ai ʻi hona ngaahi fuofua ʻaho ʻi he māmani foʻoú. ʻOku fakanonga au ʻe he ʻamanaki ko ení ʻi heʻeku fāinga mo e loto-mamahí pe ongoʻi ʻo ʻena mole atú.”

13. Ko e hā ʻe lava ke tau fai ke maʻu ʻa e laumālie māʻoniʻoní?

¹³ “ʻOua ʻe taʻofi ʻa e afi ko e laumālié ʻiate kimoutolú.” (1 Tes. 5:19, fkm. ʻi lalo) Naʻe fakahoa ʻe Paula ʻa e laumālie māʻoniʻoní ki ha afi ʻi loto ʻiate kitautolu. ʻI heʻetau maʻu ʻa e laumālie ʻo e ʻOtuá, ʻoku tau loto-māfana ai ʻi he faivelenga mo e vēkeveke ki he meʻa ʻoku totonú pea fakaivia ke ngāue kia Sihova. (Loma 12:11) Ko e hā ʻe lava ke tau fai ke maʻu ʻa e laumālie māʻoniʻoní? ʻE lava ke tau lotu fekauʻaki mo ia, ako ʻa e Folofola fakamānavaʻi ʻa e ʻOtuá, pea poupou ki heʻene kautaha ʻoku tataki ʻe hono laumālié. Ko hono fai iá ʻe tokoniʻi ai kitautolu ke fakatupulekina ʻa e “fua ʻo e laumālié.”​—Kal. 5:22, 23.

14. Ko e hā kuo pau ke tau fakaʻehiʻehi mei ai kapau ʻoku tau loto ke hokohoko atu hono maʻu ʻa e laumālie ʻo e ʻOtuá? (Sio foki ki he fakatātaá.)

¹⁴ Hili hono ʻomai ʻe he ʻOtuá kiate kitautolu hono laumālie māʻoniʻoní, kuo pau ke tau tokanga ke “ʻoua ʻe taʻofi ʻa e afi ko e laumālié” mei  heʻene ngāue ʻiate kitautolú. ʻOku foaki ʻe he ʻOtuá ʻa hono laumālié ki he faʻahinga pē ʻoku nau tauhi maʻu ʻa e fakakaukau maʻa mo e tōʻonga maʻa. Heʻikai ke hokohoko atu ʻene foaki mai ʻa hono laumālié kapau ʻoku tau tukulotoa ʻa e ngaahi fakakaukau taʻemaʻá pea fakahoko ia. (1 Tes. 4:7, 8) Ke hokohoko atu hono maʻu ʻa e laumālie māʻoniʻoní, kuo pau foki ke ʻoua te tau “taʻetokaʻi ʻa e ngaahi kikité.” (1 Tes. 5:20) Ko e “ngaahi kikité” ʻa ia ʻoku lave ki ai hení ʻoku ʻuhinga ia ki he ngaahi pōpoaki ʻoku fakamānavaʻi ʻe he laumālie ʻo e ʻOtuá, ʻo kau ki ai ʻa e ʻaho ʻo Sihová pea mo e fakavavevave ʻa hotau taimí. ʻOku ʻikai ke tau fakangalongaloʻi ʻa e ʻaho ko iá, ʻo pehē heʻikai hoko mai ʻa ʻĀmaketone ia ʻi hotau taimí. ʻI hono kehé, ʻoku tau fakavaveʻi ia​—ʻo hanganaki tauhi maʻu ia ʻi he ʻatamaí​—ʻaki hono tauhi maʻu ʻa e tōʻonga totonú pea hanganaki femoʻuekina ʻi he “ngaahi ngāue ʻo e anga-līʻoa fakaʻotuá” ʻi he ʻaho kotoa.​—2 Pita 3:11, 12.

15. ʻE lava fēfē ke tau fakaʻehiʻehi mei hono kākaaʻi ʻe he fakamatala halá mo e fakamatala fakangalilelei fakatēmenioó? (1 Tesalonaika 5:21)

¹⁵ ʻI he kahaʻu ofi maí, ko e kau fakafepaki ʻo e ʻOtuá te nau talaki ʻi ha founga: “Melino mo malu!” (1 Tes. 5:3) Ko e fakamatala fakangalilelei fakamānavaʻi ʻe he tēmenioó te ne fakafonu ʻa e māmaní, ʻo takihalaʻi ʻa e tokolahi tahá. (Fkh. 16:13, 14) Fēfē kitautolu? Heʻikai ke kākaaʻi kitautolu kapau te tau “fakapapauʻi ʻa e ngaahi meʻa kotoa pē.” (Lau ʻa e 1 Tesalonaika 5:21.) Ko e foʻi lea faka-Kalisi ʻoku liliu ko e “fakapapauʻi” naʻe ngāueʻaki ʻo felāveʻi mo hono siviʻi ʻa e ngaahi mētale mahuʻingá. Ko ia ʻoku fiemaʻu ke tau siviʻi ʻa e meʻa ʻoku tau fanongo ki aí pe ko e meʻa ʻoku tau laú ke fakapapauʻi pe ʻoku moʻoni. Naʻe mahuʻinga ia ki he kau Tesalonaiká, pea ʻe toe mahuʻinga ange ia kiate kitautolu ʻi he fakaofi mai ko ia ʻa e fuʻu mamahi lahí. ʻI he ʻikai ke tali tavale ʻa e meʻa ʻoku leaʻaki ʻe he niʻihi kehé, ʻoku tau ngāueʻaki ʻetau malava fakaefakakaukaú ke fakahoa ʻa e meʻa ʻoku tau laú pe ko e meʻa ʻoku tau fanongo ki aí pea mo e meʻa ʻoku leaʻaki ʻe he Tohi Tapú mo e kautaha ʻa Sihová. ʻI hono fai iá, heʻikai ke kākaaʻi ai kitautolu ʻe ha fakamatala fakangalilelei pe faʻufaʻu fakatēmeniō.​—Pal. 14:15; 1 Tīm. 4:1.

16. Ko e hā ʻa e ʻamanaki papau ʻoku tau maʻú, pea ʻoku ueʻi ai kitautolu ke tau fai ʻa e hā?

¹⁶ ʻI he tuʻunga ko ha kulupu, ko e kau sevāniti ʻa e ʻOtuá te nau hao atu ʻi he fuʻu mamahi lahí. Neongo ia, ko kitautolu tāutaha ʻoku ʻikai ke tau ʻiloʻi pe ko e hā ʻe hoko ʻapongipongí. (Sēm. 4:14) Ka neongo ia, tatau ai pē pe te tau moʻui atu ʻi he fuʻu mamahi lahí pe mate ki muʻa ai, ʻe fakapaleʻi kitautolu ʻaki ʻa e moʻui taʻengatá kapau ʻoku tau nofoʻaki faitōnunga. Ko e kau paní te nau ʻi hēvani fakataha mo Kalaisi. Ko e fanga sipi kehé te nau ʻi he māmani palataisí. ʻOfa ke tau tokangataha kotoa ki heʻetau ʻamanaki fakaofó pea hanganaki mateuteu ki he ʻaho ʻo Sihová!