1-2. Hangē ko Loté, ko e hā ʻa e pole ʻoku fehangahangai mo e kau Kalisitiane ʻi he ʻaho ní?

 ʻI HE fekauʻaki mo e ngaahi tuʻunga fakaeʻulungaanga ʻoku pouaki ʻe he māmani ko ení, ʻoku tau maʻu ʻa e ongoʻi tatau mo Lote māʻoniʻoni. Naʻe “fakalotomafasiaʻi lahi [ia] ʻe he faikovi taʻemīngao ʻa e kakai maumau-laó,” he naʻá ne ʻiloʻi ko ʻetau Tamai fakahēvaní ʻokú ne fehiʻa ʻi he tōʻonga koví. (2 Pita 2:7, 8) Ko e manavahē ki he ʻOtuá mo e ʻofa kiate iá naʻá ne ueʻi ʻa Lote ke ne talitekeʻi ʻa e ngaahi tuʻunga fakaeʻulungaanga ololalo ʻa e kakai takatakai ʻiate iá. ʻOku takatakaiʻi foki kitautolu ʻe he kakai ʻoku ʻikai loko ʻi ai pe halaʻatā haʻanau fakaʻapaʻapaʻi ʻa e ngaahi tuʻunga fakaeʻulungaanga ʻa Sihová. Neongo ia, ʻe lava ke tau nofoʻaki maʻa fakaeʻulungaanga kapau te tau tauhi maʻu ʻetau ʻofa ki he ʻOtuá pea fakatupulekina ha manavahē totonu kiate ia.​—Pal. 14:2.

² Ko ia ke fai iá, ʻoku ʻomai ʻe Sihova ʻa e fakalototoʻa mo e fakaueʻiloto anga-ʻofa ʻi he tohi ʻa Palōvēpí. Ko e kau Kalisitiané kotoa, ʻa e kau tangata mo e kau fefine, ʻa e talavou mo e taʻumotuʻa, te nau maʻu ʻaonga moʻoni mei he lāulea ki he faleʻi fakapotopoto ʻoku maʻu aí.

3. Fakatatau ki he Palōveepi 17:3, ko e hā ʻa e ʻuhinga ʻe taha ʻoku fiemaʻu ke tau maluʻi ai hotau lotó? (Sio foki ki he fakatātaá.)

³ Ko ha ʻuhinga tefito ke maluʻi ai hotau lotó he ʻoku sivisiviʻi ia ʻe Sihova. ʻOku ʻuhinga ení ʻokú ne sio fakalaka atu ʻi he meʻa ʻoku hā atu ki tuʻa meiate kitautolu ki he niʻihi kehé pea vakai ki hotau tangata moʻoni ʻi lotó. (Lau ʻa e Palōveepi 17:3.) Te ne ʻofa ʻiate kitautolu kapau ʻoku tau fakafonu hotau ʻatamaí ʻaki ʻene poto foaki-moʻuí. (Sione 4:14) Heʻikai ai ke tau fakaʻatā ke fakakonahi kitautolu ʻe he ngaahi tuʻunga fakaeʻulungaanga taʻetaau mo e loi  ʻoku haʻu meia Sētane mo hono māmaní. (1 Sio. 5:18, 19) ʻI heʻetau ʻunuʻunu ofi ange kia Sihová, ko ʻetau ʻofa mo e fakaʻapaʻapa kiate iá ʻe tupulaki. Koeʻuhi ʻoku ʻikai ke tau loto ke fakalotomamahiʻi ʻetau Tamaí, te tau fehiʻa naʻa mo e fakakaukau atu pē ke faiangahalá. ʻI hono fakataueleʻi kitautolu ke faihalá, ʻeke hifo, ‘ʻE lava fēfē ke u fakalotomamahiʻi ʻiloʻilo pau ʻa e Tokotaha kuó ne fakahaaʻi mai kiate au ʻa e ʻofa lahí?’​—1 Sio. 4:9, 10.

4. Naʻe anga-fēfē hono maluʻi ʻe he manavahē kia Sihová ha tuofefine mei he tō ʻi he fakatauelé?

⁴ Ko Marta, ko ha tuofefine ʻi Kolōtia naʻe fakataueleʻi ke ne fai ha ʻulungaanga taʻetaau, naʻá ne tohi: “Naʻe faingataʻa ke u fakakaukau lelei pea ke lōmia ʻa e holi ke fiefia fakataimi ʻi he faiangahala. Ka ko e manavahē kia Sihová naʻá ne maluʻi aú.” b Naʻe anga-fēfē hono maluʻi ia ʻe he manavahē-ʻOtuá? Naʻe pehē ʻe Marta naʻá ne fakalaulauloto ki he ngaahi nunuʻa ʻe ʻomai ʻe ha fili kovi. ʻE lava ke tau fai ʻa e meʻa tatau. Ko e nunuʻa kovi tahá te tau fakalotomamahiʻi ʻa Sihova pea heʻikai ke tau lotu ai kiate ia ʻo taʻengata.​—Sēn. 6:5, 6.

5. Ko e hā ʻe lava ke ke ako mei he hokosia ʻa Leo?

⁵ ʻI he taimi ʻoku tau manavahē ai kia Sihová, ʻoku tau tokanga ke ʻoua te tau kumi kalofanga ki hono fai ha tōʻonga kovi. Ko Leo, ʻokú ne nofo ʻi Kongo, naʻá ne ako ʻa e lēsoni ko iá. Hili ha taʻu ʻe fā mei heʻene papitaisó, naʻá ne hoko ʻo feohi kovi. Naʻá ne fakakaukau ko e koloa pē ke ʻoua naʻá ne fai ha ngaahi tōʻonga kovi, heʻikai ke ne faiangahala ai kia Sihova. Neongo ia, naʻe vave hono taki atu ia ʻe he feohi koví ke ngāuehalaʻaki ʻa e ʻolokaholó pea fai ʻa e ʻulungaanga taʻetaau. Naʻe kamata leva ke ne fakakaukauloto ki he meʻa naʻe akoʻi ange ʻe heʻene ongo mātuʻa Kalisitiané pea mo e fiefia naʻe mole meiate iá. Ko e hā ʻa e olá? Naʻe foki mai ʻene fakakaukau leleí. ʻI he tokoni ʻa e kau mātuʻá, naʻá ne toe foki kia  Sihova. ʻI he ʻahó ni, ʻokú ne ngāue fiefia ko ha mātuʻa pea mo ha tāimuʻa makehe.

6. Ko hai ʻa e ongo fefine fakaefakatātā te tau lāulea ki ai ʻi he taimi ní?

⁶ Tau lāulea angé ki he Palōveepi vahe 9, ʻa ia ʻoku tau lau ai fekauʻaki mo e potó pea mo e valé, ʻo fakahoa ki ha ongo fefine. (Fakafehoanaki mo e Loma 5:14; Kalētia 4:24.) ʻI heʻetau fai iá, manatuʻi ko e māmani ʻo Sētané ʻoku maʻunimā ʻe he fehokotaki fakasino taʻetāú mo e ʻata fakalieliá. (ʻEf. 4:19) Ko ia ʻoku mātuʻaki mahuʻinga ke hokohoko atu ʻetau fakatupulekina ʻa e manavahē-ʻOtuá pea tafoki mei he koví. (Pal. 16:6) Ko ia ai, ko kitautolu kotoa, tatau ai pē pe ko e tangata pe fefine, ʻe lava ke tau maʻu ʻaonga mei he meʻa ʻoku fakahaaʻi mai ʻi he vahe ko ení. Ko e ongo fefiné ʻoku fakamatalaʻi ʻokú na fakatou fakaaʻu atu ha fakaafe ki he taʻetaukeí​—ki he “faʻahinga ʻoku ʻikai ke fakakaukau leleí.” Ko kinaua taki taha, ʻoku hangē ʻokú na pehē, ‘Haʻu ki hoku falé ʻo maʻu meʻatokoni.’ (Pal. 9:1, 5, 6, 13, 16, 17) Ka ʻoku ʻi ai ʻa e kehekehe lahi ʻi he ola ʻe hokó.

7. Fakatatau ki he Palōveepi 9:13-18, ʻoku iku ki he hā ʻa e fakaafe ko ení? (Sio foki ki he fakatātaá.)

⁷ Fakakaukau ki he fakaafe mei he ‘fefine valé.’ (Lau ʻa e Palōveepi 9:13-18.) ʻOkú ne kaila taʻeufi atu ki he faʻahinga ʻoku ʻikai ke nau fakakaukau leleí, “Haʻu ki heni” ʻo kai. Ko e hā ʻa e olá? “ʻOku ʻi ai ʻa e faʻahinga kuo mole ʻa honau mālohí ʻi he maté.” ʻOkú ke manatuʻi nai ʻa e lea fakaefakatātā meimei tatau ʻoku maʻu ʻi he ngaahi vahe ki muʻa ʻo e Palōvēpí. ʻOku fakatokanga mai ai fekauʻaki mo e “fefine tōʻonga fakalieliá” mo “ʻulungaanga taʻetāú.” ʻOku tala mai ai: “Ko hono falé ʻoku ngoto hifo ki he maté.” (Pal. 2:11-19) ʻOku fakatokanga mai ʻi he Palōveepi 5:3-10 ki ha “fefine tōʻonga fakalielia” ʻe taha ʻa ia “ko hono vaʻé ʻoku ʻalu hifo ki he maté.”

8. Ko e hā ʻa e fili ke faí?

⁸ Ko e faʻahinga ʻoku nau fanongo ki he ‘fefine valé’ ʻoku ʻi ai ha fili ke nau fai: Te nau tali ʻene fakaafé pe talitekeʻi ia? Te tau fehangahangai nai mo ha fili pehē. ʻI he fakataueleʻi ke fai ha fehokotaki fakasino taʻetaau pe sio ʻi he ʻata fakalieliá, hangē ko ia ʻoku hā ʻi he mītiá mo e ʻInitanetí, ko e hā te tau faí?

9-10. Ko e hā ʻa e ngaahi ʻuhinga ʻe niʻihi ʻoku totonu ke tau fakaʻehiʻehi ai mei he tōʻonga fakaefehokotaki fakasino taʻetāú?

⁹ ʻOku ʻi ai ʻa e ngaahi ʻuhinga lelei ʻoku totonu ke tau fakaʻehiʻehi ai mei he tōʻonga fakaefehokotaki fakasino taʻetāú. Ko e ‘fefine valé’ ʻoku fakamatalaʻi ʻokú ne pehē: “ʻOku melie ʻa e vai ʻoku kaihaʻasi maí.” ʻOku ʻuhinga ki he hā ʻa e “vai ʻoku kaihaʻasi maí”? ʻOku fakatatau ʻe he Tohi Tapú ʻa e vā fakaefehokotaki fakasino ʻi he vahaʻa ʻo ha ongo meʻa mali ki he vai fakaivifoʻou. (Pal. 5:15-18) Ko e husepānití mo e uaifí  ʻe lava ke na maʻu ʻa e fiefia ʻi he ngaahi tōʻonga fakaefehokotaki fakasino totonu ʻi loto ʻi heʻena nofo mali fakalaó. Ka, he kehe ē ko e “vai ʻoku kaihaʻasi maí.” ʻOku lava ke ʻuhinga ia ki he fehokotaki fakasino taʻetaau taʻefakalaó. ʻOku faʻa fai fakafufū ia, ʻo hangē pē ko ha tokotaha kaihaʻa ʻokú ne faʻa kaihaʻa fakafufū. Ko e “vai ʻoku kaihaʻasi maí” ʻoku hā ngali melie nai kapau ko e faʻahinga ʻoku nau fakahoko iá ʻoku nau ongoʻi ʻe ʻikai ʻiloʻi ʻa honau ʻalunga angahalaʻiá. He fakaloloma ē ko ia! ʻOku ʻafioʻi ʻe Sihova ʻa e meʻa kotoa. ʻOku halaʻatā ha meʻa ʻe lava ke kona ange ʻi he mole ʻa ʻene hōifuá, ko ia ʻoku halaʻatā ha “melie” ʻe taha ʻo e mole fakamamahi ko iá. (1 Kol. 6:9, 10) Ka ʻoku ʻikai ko ia pē.

¹⁰ Ko e fehokotaki fakasino taʻetāú ʻe lava ke ne fakatupunga ʻa e mā, ongoʻi taʻetaau, feitama ʻikai fiemaʻu mo e fāmili movetevete. ʻOku hā mahino, ko e ʻalunga ʻo e potó ke fakaʻehiʻehi mei he ‘fale’ ʻo e fefine valé mo ʻene fakaafe kaí. Tānaki atu ki he fehangahangai mo e mate fakalaumālié, ko e kakai ʻulungaanga taʻetaau tokolahi ʻoku nau maʻu ʻa e ngaahi mahaki ʻo taki atu ki he mate mutukia. (Pal. 7:23, 26) ʻI he veesi 18 ʻo e vahe 9 ʻoku fakaʻosiʻaki: “Ko ʻene kau fakaafé ʻoku nau ʻi he takele ʻo e Faʻitoká.” Ko e hā leva ʻoku tali ai ʻe he tokolahi ʻene fakaafe kākā ʻoku taki atu ki he faingataʻá?​—Pal. 9:13-18.

11. Ko e hā ʻoku mātuʻaki fakatupu maumau ai ʻa e sio ʻi he ʻata fakalieliá?

¹¹ Ko e ʻata fakalieliá ko ha tauhele anga-maheni ia. ʻOku fakakaukau ʻa e niʻihi ko e sio ʻi he ʻata fakalieliá ʻoku ʻikai hano maumau. ʻI hono kehé, ko e ʻata fakalieliá ʻoku fakatupu maumau, ololalo mo fakatupu maʻunimā. Ko e ʻata taʻetāú ʻi heʻene hū ki he ʻatamaí ʻoku nofo fuoloa ia ai pea faingataʻa ke toʻo mei ai. Ko e toe kovi angé, ko e ʻata fakalieliá ʻoku ʻikai ke ne ʻai ke mate ʻa e ngaahi holi fehālaakí; ʻokú ne tafunaki ia. (Kol. 3:5; Sēm. 1:14, 15) ʻIo, ko e tokolahi ʻoku nau sio ʻi he ʻata fakalieliá ʻoku nau faʻa fai ʻa e ngaahi tōʻonga taʻetaau.

12. ʻOku anga-fēfē ʻetau fakahāhā ʻoku tau leʻohi kitautolu mei he ngaahi ʻata ʻokú ne langaʻi ʻa e holi fakaefehokotaki fakasinó?

¹² Ko e hā ʻoku totonu ke tau fai ʻi he tuʻunga ko e kau Kalisitiane kapau ʻe ʻasi hake ha ʻata fakalielia ʻi heʻetau meʻangāue fakaʻilekitulōniká? ʻOku totonu ke tau tāmateʻi ʻa e ʻata ko iá ʻi he taimi pē ko iá. ʻE tokoni ke tau fai iá kapau te tau manatuʻi ko ʻetau koloa mahuʻinga tahá ʻa hotau vahaʻangatae mo Sihová. Ko hono moʻoní, ko e ngaahi ʻata ʻoku ʻikai ke lau ko ha ʻata fakalieliá te ne kei langaʻi nai ʻa e holi fakaefehokotaki fakasinó. Ko e hā ke fakaʻehiʻehi ai mei aí? Koeʻuhí ʻoku ʻikai ke tau loto ke tau kiʻi laka atu ʻi he sitepu ke fai ha tono ʻi hotau lotó. (Māt. 5:28, 29) Ko ha mātuʻa ʻi Taileni ko David ʻokú ne pehē: “ʻOku ou ʻeke hifo: ‘Neongo ko e ngaahi ʻatá ʻoku ʻikai nai ko ha ʻata fakalielia, ʻe fakahōifua kia Sihova kapau te u hanganaki sio ki ai?’ Ko e fakaʻuhinga ko ení ʻokú ne tokoniʻi au ke fai fakapotopoto.”

13. Ko e hā te ne tokoniʻi kitautolu ke fai fakapotopotó?

¹³ ʻOku tokoniʻi kitautolu ke tau fai fakapotopoto ʻaki hono fakatupulekina ha manavahē totonu ke ʻoua ʻe taʻefakahōifuaʻi ʻa Sihova. Ko e manavahē-ʻOtuá ko e “kamataʻanga ia,” pe ko e makatuʻunga “ʻo e potó.” (Pal. 9:10) ʻOku fakatātaaʻi lelei eni ʻi he kamataʻanga ʻo e Palōveepi vahe 9, ʻa ia ʻoku tau lau ai fekauʻaki mo e fefine fakaefakatātā ʻe tahá, ʻoku fakamatalaʻi ko “poto moʻoni.”

14. Ko e hā ʻa e fakaafe kehe ʻoku ʻomai ʻi he Palōveepi 9:1-6?

¹⁴ Lau ʻa e Palōveepi 9:1-6. ʻOku tau lau heni fekauʻaki mo ha fakaafe ʻoku haʻu mei he Matavai mo e Makatuʻunga ʻo e poto moʻoní, ko hotau Tokotaha-Fakatupu poto fakaʻaufulí. (Pal. 2:6; Loma 16:27) Ko e fakatātā naʻe ngāueʻaki hení ʻoku lave ki ha fuʻu fale lahi mo ha pou ʻe fitu. ʻOku fakatātaaʻi heni ko Sihová ʻokú ne nima-homo pea ʻokú ne talitali lelei ʻa e faʻahinga kotoa ʻoku nau loto ke ngāueʻaki hono potó ʻi heʻenau moʻuí.

15. Ko e hā ʻoku fakaafeʻi mai ʻe he ʻOtuá ke tau faí?

 ¹⁵ Ko Sihova ko ha Tokotaha-Tokonaki nima-homo, hulu fau. Ko e ongo ʻulungaanga ko ení ʻoku tapua mai ʻe “poto moʻoni,” ʻo fakatātaaʻi ʻi he Palōveepi vahe 9 ko ha fefine. ʻOku lave ʻa e fakamatalá ko e fefine fakaefakatātā ko ení kuó ne teuteu kakato ʻa ʻene kakanoʻi-manú, huʻi ʻa ʻene uainé, pea fokotuʻutuʻu ʻa ʻene ngaahi tēpile ʻi hono falé. (Pal. 9:2, fkm. ʻi lalo) ʻIkai ko ia pē, fakatatau ki he veesi 4 mo e 5: “[Ko e fakasino ʻo potó] ʻokú ne pehē ki he tokotaha ʻoku ʻikai ke fakakaukau leleí: ‘Haʻu, ʻo kai ʻa ʻeku maá.’” Ko e hā ʻoku totonu ai ke tau ʻalu ki he fale ʻo poto moʻoní pea kai ʻa e meʻakai ʻokú ne ʻomaí? ʻOku loto ʻa Sihova ke hoko ʻene fānaú ʻo poto mo malu. ʻOku ʻikai ke ne loto ke tau ako ʻa e ngaahi lēsoni ʻo e moʻuí ʻi he founga faingataʻá​—fakafou ʻi he hokosia fakamamahi mo e ngaahi fakaʻiseʻisa taʻetuku. Ko e ʻuhinga ia “ʻokú ne tuku tauhi ʻa e poto ʻaongá ki he faitotonú.” (Pal. 2:7) ʻI heʻetau maʻu ha manavahē totonu kia Sihova, te tau loto ke fakahōifuaʻi ia. ʻOku tau fanongo ki heʻene akonaki fakapotopotó, pea fiefia ke ngāueʻaki ia.​—Sēm. 1:25.

16. Naʻe anga-fēfē hono tokoniʻi ʻe he manavahē-ʻOtuá ʻa Alain ke ne fai ha fili fakapotopoto, pea ko e hā ʻa e olá?

¹⁶ Fakakaukau ki he anga hono tokoniʻi ʻe he manavahē-ʻOtuá ʻa Alain ke ne fai ha fili fakapotopoto. Ko e mātuʻa Kalisitiane mo faiako ko ení naʻá ne pehē, “Ko e tokolahi hoku kaungāngāué naʻa nau vakai ki he ngaahi faiva fakalieliá ko ha founga ia ki hono akoʻi ʻa e fehokotaki fakasinó.” Ka naʻe ʻikai ke kākaaʻi ai ʻa Alain. “Koeʻuhi ko e manavahē-ʻOtuá,” ko ʻene leá ia, “Naʻá ku mātuʻaki fakafisi ke sio ʻi he ngaahi faiva ko iá. Naʻá ku fakamatalaʻi foki ʻa hono ʻuhingá ki hoku kaungāngāué.” Naʻá ne ngāueʻaki ʻa e faleʻi meia ‘poto moʻoní’ ke “laka atu ki muʻa ʻi he hala ʻo e mahinó.” (Pal. 9:6) Koeʻuhi ko e tuʻu maʻu ʻa Alain, naʻe maongo ia ki he niʻihi hono kaungāfaiakó pea ʻi he taimí ni ʻoku nau ako ʻa e Tohi Tapú pea maʻu ʻa e ngaahi fakatahá.

17-18. Ko e hā ʻa e ngaahi tāpuaki ʻoku maʻu ʻe he faʻahinga ʻoku nau tali ʻa e fakaafe meia ‘poto moʻoní,’ pea ko e hā ʻe lava ke nau fakatuʻotuʻa atu ki aí? (Sio foki ki he fakatātaá.)

¹⁷ ʻI hono ngāueʻaki ʻa e talanoa fekauʻaki mo e ongo fefine fakaefakatātaá, kuo fakatoka ai ʻe Sihova ʻa e makatuʻunga ke tau maʻu ha kahaʻu faitāpuekina. Ko e faʻahinga ʻoku nau tali ʻa e fakaafe mei he “fefine vale” mo longoaʻá ʻoku nau tokangataha ki he fiefia ʻi he ngaahi mālie ʻoku fai fakafufū mo “melie.” Ko hono moʻoní, ʻoku nau vakai ko e moʻuí pē eni, ʻo tukunoaʻi ʻa e kahaʻú. Ko honau ikuʻangá ʻoku ʻi he “takele ʻo e Faʻitoká.”​—Pal. 9:13, 17, 18.

¹⁸ He kehe ē ko ia mei he faʻahinga ʻoku nau tali ʻa e fakaafe meia ‘poto moʻoní’! Ko ʻene kau fakaafé ʻoku nau fiefia ʻi ha kātoanga kai ʻa ia kuo fokotuʻutuʻu lelei mo fakatupu moʻui lelei, ko ha kātoanga  kai ʻo e ngaahi meʻakai fakalaumālie kuo teuteu lelei. (ʻAi. 65:13) Fakafou ʻi he palōfita ko ʻAiseá, ʻoku pehē ʻe Sihova: “Fanongo tokanga mai kiate au, pea kai ʻa e meʻakai ʻoku leleí, pea te mou maʻu ai ʻa e fiefia lahi ʻi he meʻakai lelei moʻoní.” (ʻAi. 55:1, 2) ʻOku tau ako ke ʻofa ʻi he meʻa ʻoku ʻofa ai ʻa Sihová pea fehiʻa ʻi he meʻa ʻokú ne fehiʻa aí. (Saame 97:10) Pea ʻoku tau maʻu ʻa e fiemālie ʻi hono fakaafeʻi ʻa e niʻihi kehé ke nau maʻu ʻaonga meia “poto moʻoni.” ʻOku hangē ia haʻatau “kaila mei he ngaahi feituʻu māʻolunga ʻi he koló: ‘ʻIlonga ʻa ia ʻoku taʻetaukeí, tuku ke ne haʻu ki heni.’” Ko ʻene ʻaonga kiate kitautolu mo e faʻahinga ʻoku nau tali iá ʻoku ʻikai ki he mōmeniti pē ko ení. ʻOku tuʻuloa ia, ʻo fakaʻatā ai kitautolu ke “moʻui” taʻengata ʻi heʻetau “laka atu ki muʻa ʻi he hala ʻo e mahinó.”​—Pal. 9:3, 4, 6.

19. ʻI he fehoanaki mo e Tangata Malanga 12:13, 14, ko e hā ʻoku totonu ke tau fakapapauʻi ke faí? (Sio foki ki he puha “ ʻAonga ʻa e Manavahē-ʻOtuá Kiate Kitautolu.”)

¹⁹ Lau ʻa e Tangata Malanga 12:13, 14. ʻOfa ke hokohoko atu hono maluʻi ʻe he manavahē-ʻOtuá hotau lotó pea tokoniʻi kitautolu ke tau nofoʻaki maʻa fakaeʻulungaanga mo fakalaumālie lolotonga ʻa e ngaahi ʻaho fakaʻosi fulikivanu ko ení. Ko e manavahē totonu ko iá te ne ueʻi kitautolu ke tau hanganaki fakaafeʻi ʻa e tokolahi taha ʻe ala lavá ke kumi kia “poto moʻoni” pea maʻu ʻaonga mei ai.