1. Fakatatau ki he 1 Pita 5:2, ko e hā ʻa e monū ʻoku maʻu ʻe he kau mātuʻá?

 KO E kau mātuʻa Kalisitiané kuo tuku ke nau tokangaʻi ʻa e fanga sipi mahuʻinga ʻa Sihová. ʻOku koloaʻaki ʻe he kau tangata anga-līʻoa ko ení honau monū ke ngāue maʻa honau fanga tokouá mo e fanga tuofāfiné, pea ʻoku nau ngāue mālohi ke hoko ko e “kau tauhi-sipi . . . [ʻoku] nau tauhi moʻoni kinautolu.” (Sel. 23:4; lau ʻa e 1 Pita 5:2.) He fakamālō ē ko kitautolu ʻi hono maʻu ʻa e kau tangata pehē ʻi heʻetau ngaahi fakatahaʻangá!

2. Ko e hā ʻa e ngaahi ʻahiʻahi ʻe fehangahangai nai mo e kau mātuʻa ʻe niʻihi?

² ʻI hono fakahoko ʻe he kau mātuʻá honau fatongiá, ʻoku nau fehangahangai mo e ngaahi pole lahi. Ko e taha, ko hono tokangaʻi ha fakatahaʻanga ʻoku kau ki ai ʻa e ngāue lahi. Ko Tony, ko ha mātuʻa ʻi ʻAmelika, naʻe pau ke ne ako ke anga-fakanānā lahi ange fekauʻaki mo e lahi ʻo e ngāue naʻá ne talí. ʻOkú ne pehē: “ʻI he kamata ʻa e mahaki fakaʻauha COVID-19, naʻe toe lahi ange ʻa e ngāue naʻá ku fai ke fokotuʻutuʻu ʻa e ngaahi fakatahá mo e ngāue fakafaifekaú. Ka neongo ʻa e ngāue lahi naʻá ku faí, naʻe kei lahi pē ʻa e meʻa ke faí. Faai atu pē, ko ʻeku lau Tohi Tapú, ako fakafoʻituituí mo e lotú naʻe kamata ke tōmokosi.” Ko Ilir, ko ha mātuʻa ʻi Kosovou, naʻá ne fehangahangai mo ha pole kehe. ʻI he taimi naʻá ne ʻi ha feituʻu ai naʻe fai ai ha tau, naʻe faingataʻa ke ne talangofua ki he tataki fakateokalatí. ʻOkú ne pehē: “Ko ʻeku loto-toʻá naʻe ʻahiʻahiʻi ʻi he taimi naʻe ʻomai ai ʻe he ʻōfisi vaʻá ha vāhenga-ngāue ke u tokoniʻi ʻa e fanga tokoua ʻi ha feituʻu fakatuʻutāmaki. Naʻá ku ilifia, pea ko e tatakí naʻe hā ngali ʻikai hano ʻaonga.” Ko Tim, ko ha misinale ʻi ʻĒsia, naʻe faingataʻa ke ne fai ʻa e meʻa kotoa naʻe fiemaʻu ke ne fakahokó ʻi he ʻaho taki taha. ʻOkú ne pehē: “ʻI he taimi ʻe niʻihi, naʻá ku ongoʻi helaʻia fakaʻatamai mo fakaeongo.” Ko e hā ʻe lava ke tokoni ki he kau mātuʻa ʻoku nau fehangahangai mo e ngaahi pole meimei tatau?

3. ʻE lava fēfē ke maʻu ʻaonga ʻa e tokotaha kotoa mei he lāulea ki he faʻifaʻitakiʻanga ʻa Fakamaau Kitioné?

 ³ Ko e kau mātuʻá ʻe lava ke nau ako mei he faʻifaʻitakiʻanga ʻa Fakamaau Kitioné. (Hep. 6:12; 11:32) Naʻá ne hoko ko ha tokotaha-maluʻi mo ha tauhi-sipi ʻo e kakai ʻa e ʻOtuá. (Fkm. 2:16; 1 Kal. 17:6) Hangē ko Kitioné, ko e kau mātuʻá kuo fakanofo ke nau tokangaʻi ʻa e kakai ʻa e ʻOtuá lolotonga ha taimi mātuʻaki faingataʻa. (Ngā. 20:28; 2 Tīm. 3:1) ʻE lava ke tau ako mei he anga-fakanānā, anga-fakatōkilalo mo e talangofua ʻa Kitioné. Naʻe ʻahiʻahiʻi ʻene kātakí ʻi heʻene fakahoko hono vāhenga-ngāué. Pe ʻoku tau ngāue ko ha mātuʻa pe ʻikai, ʻe lava ke tau fakatupulekina ʻa e houngaʻia ki heʻetau kau mātuʻá. ʻE lava ke tau poupouʻi ʻa e kau tangata fakalaumālie ngāue mālohi ko ení.​—Hep. 13:17.

4. Naʻe anga-fēfē hono fakahāhā ʻe Kitione ʻa e anga-fakanānaá mo e anga-fakatōkilaló?

⁴ Ko Kitioné ko ha tangata anga-fakanānā mo anga-fakatōkilalo. b ʻI hono tala ange ʻe he ʻāngelo ʻa Sihová kia Kitione kuo fili ia ke ne fakahaofi ʻa ʻIsileli mei he kau Mitiani mālohí, naʻe tali ange ʻe he tangata anga-fakatōkilalo ko iá: “Ko e haʻa ʻoku ou ʻi aí ko e siʻi taha ia ʻia Manasé, pea ko e tokotaha taʻeʻiloa taha au ʻi he fale ʻo ʻeku tamaí.” (Fkm. 6:15) Naʻá ne ongoʻi taʻefeʻunga ke fakahoko ʻa e vāhenga-ngāué, ka naʻe ʻafioʻi ʻe Sihova te ne malava ia. ʻI he tokoni ʻa Sihová, naʻe fakakakato lavameʻa ʻe Kitione hono vāhenga-ngāué.

5. ʻE anga-fēfē nai hano ʻahiʻahiʻi ʻa e anga-fakanānā mo e anga-fakatōkilalo ʻa ha mātuʻa?

⁵ ʻOku fai ʻe he kau mātuʻá honau lelei tahá ke fakahāhā ʻa e anga-fakanānaá mo e anga-fakatōkilaló ʻi he meʻa kotoa pē. (Mai. 6:8; Ngā. 20:18, 19) ʻOku ʻikai ke nau ʻafaʻi ʻenau ngaahi malavá pe lavameʻá; pea ʻoku ʻikai ke nau nōfoʻi ʻi heʻenau ngaahi fehālaakí pe tōnounoú. Ka neongo ia, ko ha mātuʻa te ne fehangahangai nai mo e ngaahi ʻahiʻahi. Ko e fakatātaá, te ne tali nai ha ngaahi vāhenga-ngāue pea toki ʻiloʻi ʻoku faingataʻa ke fakahoko kotoa ia. Pe ʻe fakaangaʻi nai ia ki he founga naʻá ne fakahoko ai ha vāhenga-ngāue ʻe taha pe fakahīkihikiʻi ia ki he founga naʻá ne fakahoko ai ha vāhenga-ngāue kehe. Ko e hā ʻe lava ke ako ʻe he kau mātuʻá meia Kitione ʻa ia ʻe tokoni kiate kinautolu ʻi he ngaahi tuʻunga peheé?

6. Ko e hā ʻe lava ke ako ʻe he kau mātuʻá fekauʻaki mo e anga-fakanānaá meia Kitioné? (Sio foki ki he fakatātaá.)

 ⁶ Kole ha tokoni. Ko ha tokotaha anga-fakanānā ʻokú ne lāuʻilo ki hono ngaahi ngataʻanga fakafoʻituituí. Ko Kitione naʻá ne anga-fakanānā ʻaki ʻene loto-lelei ke kole tokoni ki he niʻihi kehé. (Fkm. 6:27, 35; 7:24) Ko e kau mātuʻa fakapotopotó ʻoku nau fai ʻa e meʻa meimei tatau. Ko Tony, naʻe lave ki ai ki muʻá, ʻokú ne fakamatala: “Koeʻuhi ko e founga naʻe ʻohake ai aú, naʻá ku hehema ke tali ʻa e ngāue lahi ange ʻi he meʻa naʻe malava moʻoni ke u fakahokó. Ko ia naʻá ku fili ke fakakau ʻa e kaveinga ʻo e anga-fakanānaá ʻi heʻema lotu fakafāmilí pea kole ki hoku uaifí ke ne ʻomai ʻene ngaahi fakakaukaú. Naʻá ku toe vakaiʻi ʻi he jw.org ʻa e vitiō Akoʻi, Falala, pea Fakaivia ʻa e Niʻihi Kehé, ʻo Hangē ko Sīsuú.” Naʻe kamata ke fakaafeʻi ʻe Tony ʻa e niʻihi kehé ke nau tokoni ke fua hono fatongiá. Ko e hā ʻa e olá? ʻOku pehē ʻe Tony: “Ko e ngāue ʻi he fakatahaʻangá ʻoku fakahoko lelei, pea ʻoku ou maʻu ʻa e taimi lahi ange ke langa hake fakalaumālie au.”

7. Kapau ʻe fakaangaʻi ʻa e kau mātuʻá, ʻe lava fēfē ke nau faʻifaʻitaki kia Kitione? (Sēmisi 3:13)

⁷ Tali anga-malū ʻo ka fakaangaʻi. ʻOku toe hoko ko ha ʻahiʻahi ki he kau mātuʻá kapau ʻoku fakaangaʻi kinautolu. ʻOku lava ke toe tokoni ʻa e faʻifaʻitakiʻanga ʻa Kitioné. ʻOku ʻikai ha veiveiua ʻi heʻene lāuʻilo ki heʻene ngaahi taʻehaohaoá tonu, naʻá ne tali anga-malū ʻi hono fakaangaʻi ia ʻe he kau ʻIfalemí. (Fkm. 8:1-3) Naʻe ʻikai ke fai ʻe Kitione ha tali ʻita. Naʻá ne fakahāhā ʻa e fakakaukau fakatōkilalo ʻaki ʻa e fanongo ki heʻenau ngaahi hohaʻá, pea fakaleleiʻi pōtoʻi ʻa e tuʻunga faingataʻá. Ko e kau mātuʻa fakapotopotó ʻoku nau faʻifaʻitaki kia Kitione ʻaki ʻa e fanongo tokanga pea fai ha tali anga-malū ʻo ka fakaangaʻi. (Lau ʻa e Sēmisi 3:13.) ʻOku nau tokoni ai ki he melino ʻi he fakatahaʻangá.

8. ʻOku totonu ke fēfē ʻa e tali ʻa e kau tangata kuo ʻosi fakanofó kapau ʻoku nau maʻu ha fakahīkihiki? ʻOmai ha fakatātā.

⁸ ʻAve ʻa e fakahīkihikí kia Sihova. ʻI hono fakalāngilangiʻi ʻa Kitione ki hono ikunaʻi ʻo e kau Mitianí, naʻá ne fakahangataha ʻa e tokangá kia Sihova. (Fkm. 8:22, 23) ʻE anga-fēfē nai ʻa e faʻifaʻitaki ʻa e kau tangata kuo ʻosi fakanofó kia Kitioné? ʻE lava ke nau ʻave ʻa e lāngilangí kia Sihova ki he meʻa ʻoku nau fakahokó. (1 Kol. 4:6, 7) Ko e fakatātaá, kapau ʻoku fakaongoongoleleiʻi ha mātuʻa ki heʻene malava fakafaiakó, ʻe lava ke ne fakahanga ʻa e tokangá ki he matavai ʻo e fakahinohinó, ʻa e Folofolá, pe ki he ako ʻoku tau maʻu mei he kautaha ʻa Sihová. Ko e kau mātuʻá te nau fakakaukauloto nai ʻi he taimi ʻe niʻihi pe ʻoku nau tohoakiʻi mai ha tokanga taʻetotonu kiate kinautolu. Fakakaukau ki he hokosia ʻa ha mātuʻa ko Timothy. ʻI hono toki fakanofo iá, naʻá ne saiʻia ʻi hono fakahoko ʻa e ngaahi malanga maʻá e kakaí. ʻOkú ne pehē: “Naʻá ku ngāueʻaki ʻa e ngaahi talateu mo e talanoa fakatātā fakatuputupulangi. Naʻe faʻa fakahīkihikiʻi ai au ʻe he niʻihi kehé. Ko e meʻa pangó, naʻe tohoakiʻi mai ai ʻa e tokangá kiate au kae ʻikai ki he Tohi Tapú pe ko Sihova.” Faai atu ʻa e taimí, naʻe vakai ʻa Timothy naʻe fiemaʻu ke fakatonutonu ʻene founga fakafaiakó ke fakaʻehiʻehi ai mei hono tohoakiʻi mai ʻa e tokanga taʻetotonú kiate ia. (Pal. 27:21) Ko e hā ʻa e olá? ʻOkú ne pehē: “ʻOku tala mai ʻe he faʻahinga kehekehe ʻa e anga hono tokoniʻi kinautolu ʻe heʻeku malangá ke nau fekuki mo ha palopalema, kātekina ha ʻahiʻahi pe ʻunuʻunu ofi ange kia Sihova. ʻOku ou maʻu ʻa e fiefia lahi ange mei he ngaahi fakamatala ko iá ʻi he fakahīkihiki naʻá ku maʻu ʻi he ngaahi taʻu kuo maliu atú.”

9. Naʻe anga-fēfē hono ʻahiʻahiʻi ʻa e talangofua mo e loto-toʻa ʻa Kitioné? (Sio ki he tā ʻi he takafí.)

⁹ Hili hono fakanofo ʻa Kitione ko ha fakamāú, ko ʻene talangofuá mo e loto-toʻá naʻe ʻahiʻahiʻi. Naʻe ʻoange kiate ia ʻa e vāhenga-ngāue fakatuʻutāmaki ke fakaʻauha ʻa e ʻōlita ʻo Pēali ʻa ʻene tamaí. (Fkm. 6:25, 26) Ki mui ai, hili hono fakatahatahaʻi  ha kau tau, naʻe tuʻo ua hono fekauʻi ʻa Kitione ke ne fakatokosiʻi ia. (Fkm. 7:2-7) Fakaʻosí, naʻe tala kiate ia ke ne ʻohofi ʻa e ʻapitanga ʻo e filí ʻi he lolotonga ʻa e poʻulí.​—Fkm. 7:9-11.

10. ʻE anga-fēfē nai hano ʻahiʻahiʻi ʻa e talangofua ʻa ha mātuʻa?

¹⁰ Ko e kau mātuʻá ʻoku totonu ke nau “mateuteu ke talangofua.” (Sēm. 3:17) Ko ha mātuʻa talangofua ʻokú ne loto-lelei ke fakamoʻulaloa ki he meʻa ʻoku leaʻaki ʻe he Folofolá pea ki he tataki mei he kautaha ʻa e ʻOtuá. ʻOkú ne fokotuʻu ai ha faʻifaʻitakiʻanga lelei ki he niʻihi kehé. Neongo ia, ko ʻene talangofuá ʻe ʻahiʻahiʻi nai. Ko e fakatātaá, ʻe faingataʻa nai ke ne laka fakataha mo e tataki ʻokú ne maʻú. ʻI he tuʻunga ʻe niʻihi, ʻokú ne fifili nai pe ʻoku ʻaonga pe fakapotopoto moʻoni ha tataki pau. Pe ʻe kole ange nai ke ne fakahoko ha vāhenga-ngāue ʻe fakamanamanaʻi ai ʻene tauʻatāiná. ʻE lava fēfē ke faʻifaʻitaki ʻa e kau mātuʻá ki he talangofua ʻa Kitioné ʻi he tuʻunga peheé?

11. Ko e hā ʻe lava ke tokoni ki he kau mātuʻá ke nau hoko ʻo talangofuá?

¹¹ Fanongo tokanga ki he tatakí pea ngāueʻaki ia. Naʻe tala ʻe he ʻOtuá kia Kitione ʻa e founga ke fakaʻauha ai ʻa e ʻōlita ʻene tamaí, ko e feituʻu ke langa ai ha ʻōlita foʻou kia Sihova, pea mo e monumanu ke feilaulauʻí. Naʻe ʻikai ke toe fehuʻia ʻe Kitione ʻa e tatakí​—naʻá ne muimui pē ki ai. ʻI he ʻahó ni, ʻoku maʻu ʻe he kau mātuʻá ʻa e ngaahi tataki mei he kautaha ʻa Sihová fakafou ʻi he ngaahi faitohi, fanongonongo mo e fakahinohino fekauʻaki mo ʻetau lelei fakalaumālié mo e fakaesinó. ʻOku tau ʻofa ʻi heʻetau kau mātuʻá koeʻuhi ko ʻenau muimui faitōnunga ki he tataki fakateokalatí. ʻOku maʻu ʻaonga mei ai ʻa e fakatahaʻangá kotoa.​—Saame 119:112.

12. ʻE lava fēfē ke ngāueʻaki ʻe he kau mātuʻá ʻa e Hepelū 13:17 kapau ʻoku ʻi ai ha liliu ʻi he tataki fakateokalatí?

¹² Loto-lelei ke feʻunuʻaki. Manatuʻi naʻe tala ʻe Sihova kia Kitione ke fakatokosiʻi ʻene kau taú ʻaki ʻa e pēseti ʻe 99 nai. (Fkm. 7:8) Naʻá ne mei fakakaukau nai: ‘ʻOku fiemaʻu moʻoni ʻa e liliu ko ení? ʻE ʻaonga eni?’ Neongo ia, naʻe talangofua ʻa Kitione. Ko e kau mātuʻa ʻi he ʻaho ní ʻoku nau faʻifaʻitaki kia Kitione ʻaki hono fakahoko ʻa e ngaahi liliu ʻoku fokotuʻu mai ʻi he tataki fakateokalatí. (Lau ʻa e Hepelū 13:17.) Ko e fakatātaá, ʻi he 2014 naʻe liliu ʻe he Kulupu Pulé ʻa e founga ʻoku fakapaʻanga ai ʻa e ngaahi langa Fale Fakatahaʻangá mo e Holo ʻAsemipilií. (2 Kol. 8:12-14) Ko e ngaahi fakatahaʻangá heʻikai ke nau toe totongi fakafoki ha nō. ʻI hono kehé, ko e ngaahi fakatahaʻanga ʻi māmani lahí ʻe fakatahaʻi ʻenau ngaahi tokoní ke lava ai ʻo langa ʻa e ngaahi fale fakateokalatí ʻi ha feituʻu pē naʻe fiemaʻu ai, ʻo tatau ai pē pe ko e hā ʻa e malava fakapaʻanga ʻa e fakatahaʻanga fakalotofonuá. ʻI he taimi naʻe ʻiloʻi ai ʻe José ʻa e liliú, naʻá ne veiveiua pe ʻe ngāue ia, ʻo fakakaukau: ‘Heʻikai faifai ange pea lava ʻo langa naʻa mo ha Fale Fakatahaʻanga ʻe taha. ʻOku ʻikai ko e founga eni ʻoku fakahoko ai ʻa e ngaahi meʻá ʻi he tapa ko eni ʻo e māmaní.’ Ko e hā naʻá ne tokoniʻi ʻa José ke poupou ki he tatakí? ʻOkú ne pehē: “Ko e ngaahi lea ʻi he Palōveepi 3:5, 6 naʻe fakamanatu mai ai ke u falala kia Sihova. Pea kuo  mātuʻaki fakaofo ʻa e olá! ʻOku ʻikai ngata pē ʻetau langa ʻa e ngaahi Fale Fakatahaʻanga lahi ange ka kuo tau ako ke tokoni ʻi he ngaahi founga kehekehe koeʻuhi ke hoko ai ha vahevahe tatau.”

13. (a) Ko e hā naʻe tuipau ki ai ʻa Kitioné? (e) ʻE lava fēfē ke faʻifaʻitaki ʻa e kau mātuʻá kia Kitione? (Sio foki ki he fakatātaá.)

¹³ Fakahoko loto-toʻa ʻa e finangalo ʻo Sihová. Naʻe talangofua ʻa Kitione kia Sihova neongo ʻene ngaahi manavaheé pea mo e tuʻunga fakatuʻutāmaki naʻá ne ʻi aí. (Fkm. 9:17) Hili hono maʻu ʻa e fakapapau meia Sihová, naʻe tuipau kakato ʻa Kitione ʻe poupouʻi ia ʻe he ʻOtuá ʻi heʻene maluʻi ʻa e kakai ʻa e ʻOtuá. Ko e kau mātuʻa ʻi he ngaahi feituʻu ʻoku tapui ai ʻa e ngāué ʻoku nau faʻifaʻitaki kia Kitione. ʻOku nau takimuʻa loto-toʻa ʻi he ngaahi fakatahá mo e ngāue fakafaifekaú neongo ʻa e fakamanamana ʻo hono puke kinautolu, fakaʻeke, mole ʻa e ngāué pe ko e anga-fakamālohí. c Lolotonga ʻa e fuʻu mamahi lahí, ʻe fiemaʻu ki he kau mātuʻá ʻa e loto-toʻa ke talangofua ki he ngaahi fakahinohino te nau maʻú​—neongo pe ʻoku fakatuʻutāmaki fēfē. Ko e ngaahi fakahinohinó ʻe fekauʻaki nai mo hono talaki ha pōpoaki hangē ha ʻuha-ʻaisí pea ke hao ʻi he ʻoho ʻa Koki ʻo Mēkokí.​—ʻIsi. 38:18; Fkh. 16:21.

14. Naʻe anga-fēfē hono ʻahiʻahiʻi ʻa e kātaki ʻa Kitioné?

¹⁴ Ko e vāhenga-ngāue ʻo Kitione ko ha fakamāú naʻe kau ki ai ʻa e ngāue lahi fakaesino. ʻI he hola ʻa e kau Mitianí lolotonga ʻa e faitau ʻi he poʻulí, naʻe tulimui atu ʻa Kitione ʻiate kinautolu mei he Teleʻa ʻo Sisililí ʻo aʻu ki he Vaitafe Sioataní, ʻa ia ʻoku ngalingali naʻe takatakaiʻi ʻe ha vaotā fihifihi. (Fkm. 7:22) Naʻe ngata pē ʻa Kitione ʻi Sioatani? ʻIkai! Neongo ʻa e helaʻiá, naʻá ne kolosi atu mo ʻene kau tangata ʻe toko 300 ʻo nau kei tulimui atu pē. Faifai pē, naʻa nau maʻu ʻa e kau Mitianí pea ikunaʻi kinautolu.​—Fkm. 8:4-12.

15. Ko fē nai ʻa e taimi ʻe ʻahiʻahiʻi ai ʻa e kātaki ʻa ha mātuʻa?

¹⁵ Ko ha mātuʻa te ne ongoʻi mātuʻaki helaʻia fakaesino, fakaeʻatamai pe fakaeongo ʻi he taimi  ʻe niʻihi mei hono tokangaʻi ʻa e fakatahaʻangá mo hono fāmilí. ʻI he ngaahi tuʻunga peheé, ʻe lava fēfē ke faʻifaʻitaki ʻa e kau mātuʻá kia Kitione?

16-17. Ko e hā naʻá ne tokoniʻi ʻa Kitione ke kātakí, pea ko e hā ʻa e falala pau ʻe lava ke maʻu ʻe he kau mātuʻá? (ʻAisea 40:28-31) (Sio foki ki he fakatātaá.)

¹⁶ Falala ko Sihova te ne fakaivimālohiʻi koe. Naʻe falala ʻa Kitione ʻe ʻoange ʻe Sihova kiate ia ʻa e mālohi, pea naʻe ʻikai siva ʻene ʻamanakí. (Fkm. 6:14, 34) ʻI he taimi ʻe taha, naʻe ʻalu lalo atu ʻa Kitione mo ʻene kau tangatá ʻo tulimui ʻi ha ongo tuʻi Mitiani lolotonga iá naʻe heka kāmeli nai ʻa e ongo tuʻí. (Fkm. 8:12, 21) Ka ʻi he tokoni ʻa e ʻOtuá, ko e kau ʻIsilelí naʻa nau kei fakapapauʻi pē ke ikunaʻi kinautolu. ʻI he tuʻunga meimei tatau ko e kau mātuʻá ʻe lava ke nau falala kia Sihova, ʻa e tokotaha “ʻoku ʻikai ʻaupito te ne helaʻia pe ongosia.” Te ne foaki kiate kinautolu ʻa e mālohi ʻi he taimi ʻoku nau fiemaʻu ai iá.​—Lau ʻa e ʻAisea 40:28-31.

¹⁷ Fakakaukau ki he hokosia ʻa Matthew, ko ha mēmipa ʻo ha Kōmiti Fetuʻutaki Fakafalemahaki. Ko e hā ʻokú ne tokoniʻi ia ke kātakí? ʻOku pehē ʻe Matthew: “Kuó u hokosia ʻa e moʻoni ʻo e Filipai 4:13. ʻI he taimi lahi ʻi heʻeku helaʻia pea ʻosi kotoa hoku iví, naʻá ku lotu lahi, ʻo kōlenga ki he ʻOtuá ki ha mālohi fakaesino mo fakaʻatamai ke poupouʻiʻaki hoku fanga tokouá. ʻI he ngaahi mōmeniti ko iá, naʻá ku ongoʻi hono fakaivia au ʻe he laumālie ʻo Sihová, ʻo tokoniʻi au ke u kātaki.” Hangē ko Kitioné, ko ʻetau kau mātuʻa anga-līʻoá ʻoku nau fehangahangai nai mo e ngaahi fakafaingataʻaʻiaʻanga lolotonga ʻenau tauhi taʻesiokita ʻa e tākangá. Ko e moʻoni, ʻoku fiemaʻu ke nau lāuʻilo ki honau ngaahi fakangatangata fakaesino mo fakaeongó pea ngāue ʻo fakatatau ki ai. Neongo ia, ʻe lava ke nau falala ʻe fanongo ʻa Sihova ki heʻenau ngaahi kole ki ha tokoní pea fakaivimālohiʻi kinautolu ke nau kātaki.​—Saame 116:1; Fil. 2:13.

18. ʻI he fakamanatú, ʻe lava fēfē ke faʻifaʻitaki ʻa e kau mātuʻá kia Kitione?

¹⁸ ʻOku ʻi ai ʻa e ngaahi lēsoni taimi totonu mo ʻaonga ʻe lava ke ako ʻe he kau mātuʻá meia Kitione. ʻOku totonu ke fakahāhā ʻe he kau mātuʻá ʻa e anga-fakanānā mo e anga-fakatōkilalo fakatouʻosi ʻi he lahi ʻo e ngāue ʻoku nau fuá pea mo e founga ʻo ʻenau tali ki he fakaangá pe fakahīkihikí. Kuo pau ke nau fakahāhā ʻa e talangofua mo e loto-toʻa, tautefito ʻi he fakaofiofi atu ko ia ke ngata ʻa e fokotuʻutuʻu ko ení. Pea ʻoku fiemaʻu ke nau maʻu ʻa e falala neongo pe ko e hā ha fakafaingataʻaʻiaʻanga te nau fehangahangai nai mo ia, ko e ʻOtuá ʻe lava ke ne fakaivimālohiʻi kinautolu. Ko e moʻoni, ʻoku tau houngaʻia ʻi he kau tauhi-sipi ngāue mālohi ko iá pea “hanganaki fakamahuʻingaʻi ʻa e kau tangata peheé.”​—Fil. 2:29.