1. Hangē ko ia ʻoku hiki ʻi he Saame 18:​46, ʻoku fakahoa ʻe Tēvita ʻa Sihova ki he hā?

 ʻOKU tau moʻui ʻi ha māmani ʻa ia ko e ngaahi pole taʻeʻamanekiná ʻe lava ke ne veuki—pe naʻa mo hono liliu fakaʻaufuli—ʻetau moʻuí. He fakamālō ē ko kitautolu ʻi he lava ke tau hanga kia Sihova ko e ʻOtuá ki ha tokoni! ʻI he kupu ki muʻá, naʻe fakamanatu mai ai ko Sihova ʻa e ʻOtua moʻuí pea ʻokú ne mateuteu maʻu pē ke tokoniʻi kitautolu. ʻI heʻetau hokosia ʻene poupoú, ʻoku fakapapauʻi mai ai “ko Sihová ʻoku moʻui!” (Lau ʻa e Saame 18:46.) Kae kehe, ʻi he hili pē hono talaki iá, naʻe ui ʻe Tēvita ʻa e ʻOtuá ko “hoku Makatuʻú.” Ko e hā te ne fakatatau ai ʻa Sihova, ʻa e ʻOtua moʻuí, ki ha meʻa mate—ki ha maka?

2. Ko e hā ʻoku totonu ai ke tau mahuʻingaʻia ʻi he moʻoniʻi meʻa ko ia naʻe ui ʻe Tēvita ʻa Sihova ko “hoku Makatuʻú”?

² ʻI he kupu ko ení, te tau lāulea ki he ʻuhinga ʻoku lave ai kia Sihova ko ha makatuʻú mo e meʻa ʻoku akoʻi mai ʻe he lea fakaefakatātā ko iá ʻo fekauʻaki mo iá. Te tau toe ako ki he founga ʻe lava ke tau vakai ai kiate ia ko hotau Makatuʻu. Fakaʻosí, te tau lāulea ki he ngaahi founga ʻe lava ke tau faʻifaʻitaki ai ki he ngaahi ʻulungaanga ʻo Sihova hangē ha maká.

ʻUHINGA KO HA MAKATUʻU AI ʻA SIHOVA

3. ʻOku anga-fēfē hono faʻa ngāueʻaki ʻe he Tohi Tapú ʻa e foʻi lea “makatuʻu”? (Sio ki he fakatātā .)

³ ʻOku ngāueʻaki ʻe he Tohi Tapú ʻa e foʻi lea “makatuʻu” ko ha lea fakaefakatātā ke tokoniʻi kitautolu ke mahinoʻi lelei ʻa e ngaahi ʻulungaanga ʻo Sihová. ʻOku faʻa hā ia ʻi he ngaahi konga tohi ʻoku fakahīkihikiʻi ai ia ko ha ʻOtua ʻoku ʻikai hano tatau. Ko e fuofua lave kia Sihova “ko e Makatuʻu” ʻoku maʻu ia ʻi he Teutalōnome 32:4. ʻI he lotu ʻa ʻAná naʻá ne pehē “ʻoku ʻikai ha makatuʻu ʻe hangē ko homau ʻOtuá.” (1 Sām. 2:2) Naʻe ui ʻe Hapakuke ʻa Sihova ko “hoku Makatuʻu.” (Hap. 1:12) Ko e tokotaha-tohi ʻo e Saame 73 naʻá ne ui ʻa e ʻOtuá ko e “makatuʻu ʻi hoku lotó.” (Saame 73:26) Pea naʻa mo Sihova naʻá ne lave kiate ia tonu ko ha makatuʻu. (ʻAi. 44:8) Tau lāulea angé ki he ʻulungaanga ʻe tolu hangē ha maká ʻoku  fakahāhā ʻe Sihova pea ako ki he founga ʻe lava ke tau ʻai ai ia ko “hotau Makatuʻú.”—Teu. 32:31.

4. ʻOku anga-fēfē hoko ʻa Sihova ko ha hūfangaʻangá? (Saame 94:22)

⁴ Ko Sihová ko ha hūfangaʻanga. Hangē pē ko e hoko ha fuʻu maka ko e toitoiʻanga ʻo ha taha mei ha matangi, ʻoku maluʻi kitautolu ʻe Sihova ʻi heʻetau fehangahangai mo e ngaahi tuʻunga ʻokú ne fakamanamanaʻi ʻetau moʻuí. (Lau ʻa e Saame 94:22.) ʻOkú ne hanganaki maluʻi kitautolu pea taʻofi kitautolu mei he tofanga ʻi ha maumau tuʻuloa. Pea ʻokú ne talaʻofa mai ʻa e meʻa lahi ange: ʻE faai atu pē ʻo ne fakangata ha meʻa pē ʻokú ne fakamanamanaʻi ʻetau nongá mo e malú.—ʻIsi. 34:​25, 26.

5. ʻE lava fēfē ke hoko ʻa Sihova ko hotau makatuʻu Hūfangaʻanga?

⁵ Ko e founga ʻe taha ʻoku tau ʻai ai ʻa Sihova ko hotau makatuʻu Hūfangaʻangá ko e lotu kiate ia. ʻI he taimi ʻoku tau lotu aí, ʻoku ʻomai ʻe Sihova ʻa e “nonga ʻa e ʻOtuá” ʻa ia ʻokú ne maluʻi hotau lotó mo e ʻatamaí. (Fil. 4:​6, 7) Fakakaukau ki he hokosia ʻa Artem, ko ha tokoua naʻe tuku pilīsone koeʻuhi ko ʻene tuí. Naʻe toutou fakaʻeke ia ʻe ha tokotaha fakatotolo anga-kakaha ʻa ia naʻá ne tenge mo fakamaaʻi ia. “Naʻá ku loto-mafasia ʻi ha taimi pē naʻe fekauʻi mai ʻe he tokotaha fakatotoló ke u ʻalu ange. . . . Naʻá ku lotu maʻu pē kia Sihova. Naʻá ku kole ke u maʻu ha nonga ʻi hoku lotó mo ha poto,” ko e lea ia ʻa Artem. “Ko e ngaahi founga ʻa e tokotaha fakatotoló naʻe ʻikai haʻane ngāue ʻiate au. . . . ʻI he tokoni ʻa Sihová, naʻe hangē ia naʻá ku tuʻu ʻi mui ʻi ha ʻā maka.”

6. Ko e hā ʻoku lava ai ke tau falala maʻu pē kia Sihová? (ʻAisea 26:​3, 4)

⁶ Ko Sihová ʻoku falalaʻanga. Hangē ha makatuʻu ʻoku taʻengaue, ʻoku ʻi ai maʻu pē ʻa Sihova maʻa kitautolu. ʻOku lava ke tau falala kiate ia koeʻuhí “ko e Makatuʻu taʻengata” ia. (Lau ʻa e ʻAisea 26:​3, 4.) Te ne moʻui maʻu pē ke fakahoko ʻene ngaahi talaʻofá, fanongo ki heʻetau ngaahi lotú, pea ʻomai ʻa e poupou ʻoku tau fiemaʻú. ʻOku toe lava ke tau fakafalala kia Sihova koeʻuhí ʻokú ne mateaki ki he faʻahinga ʻoku tauhi kiate iá. (2 Sām. 22:26) ʻE ʻikai ʻaupito ke ne fakangaloʻi ʻa e meʻa ʻoku tau faí, pea te ne fakapaleʻi maʻu pē kitautolu.—Hep. 6:10; 11:6.

7. Ko e hā te tau hokosia ʻi he taimi ʻoku tau falala ai kia Sihová? (Sio foki ki he fakatātaá.)

⁷ ʻOku tau ʻai ʻa Sihova ko hotau Makatuʻu ʻi he taimi ʻoku tau falala kakato ai kiate iá. ʻOku tau falala ko ʻetau talangofua kiate ia naʻa mo e ʻi he ngaahi taimi faingataʻá, te tau maʻu ʻaonga ai. (ʻAi. 48:​17, 18) ʻI heʻetau hokosia ʻene poupoú, ko ʻetau falala pau kiate iá ʻe tupulaki. Te tau hoko leva ai ʻo mateuteu lelei ange ke fehangahangai mo e ngaahi ʻahiʻahi ʻa ia ko Sihova pē ʻe lava ke ne tokoniʻi kitautolu ke ikuʻi iá. Ko e meʻa ʻoku faʻa hokó, ʻi he lolotonga ʻa e ngaahi tuʻunga ʻoku ʻikai ha toe taha ke hanga ki ai ki ha tokoní, ʻoku tau toki ʻiloʻi ai ʻoku falalaʻanga maʻu pē ʻa Sihova. “Ko e taimi naʻá ku fakamoleki ʻi he pilīsoné ko e vahaʻa taimi lelei taha ia ʻi hoku vahaʻangatae mo e ʻOtuá,” ko e lea ia ʻa Vladimir. “Naʻá ku ako ke falala lahi ange kia Sihova koeʻuhí naʻá ku toko taha pē pea ʻikai puleʻi ʻa e tuʻungá.”

8. (a) Ko e hā ʻoku lava ai ke tau pehē ko Sihová ʻoku tuʻu maʻu? (e) ʻOku anga-fēfē ʻetau maʻu ʻaonga ʻi he hoko ʻa e ʻOtuá ko hotau Makatuʻú? (Saame 62:​6, 7)

⁸ Ko Sihová ʻoku tuʻu maʻu. ʻI he hangē ha fuʻu  pā maká, ko Sihová ʻoku tuʻu maʻu. ʻOku taʻealaliliu hono ʻulungāngá pea ko ʻene taumuʻá ʻoku taʻemauea. (Mal. 3:6) ʻI he fehangahangai ʻa Sihova mo e angatuʻu ʻi ʻĪtení, naʻe ʻikai ke ne hoko ʻo ueʻia. Hangē ko ia naʻe tohi ʻe Paulá, ko Sihova ʻoku ʻikai lava “ke ne fakafisingaʻi ʻa ia tonu.” (2 Tīm. 2:​13, fkm. ʻi lalo.) ʻOku ʻuhinga ení neongo pe ko e hā ʻa e meʻa ʻoku hokó pe meʻa ʻoku fai ʻe he niʻihi kehé, heʻikai ʻaupito ke liliu ʻe Sihova ʻa hono ngaahi ʻulungāngá, ko ʻene taumuʻá, pe ngaahi tuʻungá. ʻI he falala pau ki hotau ʻOtua ʻoku tuʻu maʻú, ʻe lava ke tau hanga kiate ia ki ha fakamoʻui mo ha tokoni ke fekuki mo e ngaahi taimi taʻemanongá.—Lau ʻa e Saame 62:​6, 7.

9. Ko e hā ʻokú ke ako mei he hokosia ʻa e Tatyana?

⁹ ʻOku tau ʻai ʻa Sihova ko hotau Makatuʻu ʻaki ʻetau tokangataha ki hono ngaahi ʻulungāngá pea ʻaki hono fakamaʻu ʻene taumuʻá ki hotau ʻatamaí. Ko e fai peheé ʻe lava ke ne tokoniʻi kitautolu ke nofoʻaki tuʻu maʻu fakaeongo ʻi heʻetau kātekina ʻa e ngaahi ʻahiʻahí. (Saame 16:8) Naʻe moʻoni eni ʻi he tuʻunga ʻo ha tuofefine ko Tatyana, ʻa ia naʻe tuku pōpula ʻi ha fale koeʻuhi ko ʻene tuí. “Naʻá ku nofo toko taha pē,” ko ʻene leá ia. “Naʻe faingataʻa ʻi he kamatá. Naʻá ku faʻa ongoʻi loto-siʻi.” Kae kehe, ʻi heʻene sio ki he anga ʻo e felāveʻi hono ʻahiʻahí mo e taumuʻa ʻa Sihová, naʻe malava ai ke ne fekuki mo ia pea toe maʻu ʻa e mālohi fakaeongo. Naʻá ne pehē: “Ko hono mahinoʻi ʻa e ʻuhinga naʻe hoko ai ení naʻe tokoni ia ke u manatuʻi ʻoku ou kātekina ʻa e ngaahi tuʻunga ko ení koeʻuhi ko Sihova. Kuo tokoniʻi ai au ke ʻoua te u fakakaukau pē fekauʻaki mo au.”

10. ʻE lava fēfē ke hoko ʻa Sihova ko hotau Makatuʻu ʻi he taimí ni?

¹⁰ ʻI he kahaʻú, te tau fetaulaki mo e ngaahi ʻahiʻahi ʻa ia ʻe fiemaʻu ai ke tau falala kia Sihova ʻo lahi ange ia ʻi ha toe taimi ki muʻa. Ko e taimi eni ke fakaivimālohiʻi ai ʻetau tuipau te ne tokonaki mai ha meʻa pē ʻoku tau fiemaʻu ke kātaki faitōnunga. ʻE lava fēfē ke tau fai iá? Lau ʻa e ngaahi fakamatala Fakatohitapú mo e ngaahi hokosia ʻa e Kau Fakamoʻoni ʻi onopōní. ʻIloʻi ʻa e founga kuo fakahāhā ai ʻe he ʻOtuá ʻa e ngaahi ʻulungaanga hangē ha maká ke poupouʻi ʻene kau sevānití. Fakakaukau loloto ki he ngaahi fakamatala ko iá. Ko e fai peheé ʻe lava ke ne tokoniʻi koe ke ʻai ʻa Sihova ko ho Makatuʻu.

FAʻIFAʻITAKI KI HE NGAAHI ʻULUNGAANGA ʻO SIHOVA HANGĒ HA MAKÁ

11. Ko e hā ʻoku tau loto ai ke faʻifaʻitaki ki he ngaahi ʻulungaanga ʻo Sihova hangē ha maká? (Sio foki ki he puha “ Ko ha Taumuʻa ki he Fanga Tokoua Kei Siʻí.”)

¹¹ Kuo tau lāulea ki he anga hono fakamoʻoniʻi ʻa e hangē Sihova ko ha makatuʻú. Fakakaukau he taimí ni ki he founga ʻe lava ke tau faʻifaʻitaki ai ki hono ngaahi ʻulungaanga hangē ha maká. Ko e lelei ange ʻetau fai peheé, ko ʻetau mateuteu lelei ange ia ke langa hake ʻa e fakatahaʻangá. Ko e fakatātaá, naʻe ʻoange ʻe Sīsū kia Saimone ʻa e hingoa ko e Kīfasi (ʻoku liliu ko e “Pita”), ʻa ia ʻoku ʻuhingá “Ko ha Konga Maka.” (Sione 1:42) Naʻe fakahaaʻi ʻe he meʻá ni te ne hoko ko ha matavai ʻo e fakafiemālie mo e fakatuʻumaʻu ʻi he fakatahaʻangá. Ko e kau mātuʻa ʻi he fakatahaʻangá ʻoku fakamatalaʻi kinautolu “ko e malumalu ʻo ha fuʻu maka.” ʻOkú ne fakatātaaʻi ʻa e  founga ʻoku nau maluʻi ai ʻa e faʻahinga ʻi he fakatahaʻangá. (ʻAi. 32:2) Ko e moʻoni, ʻoku maʻu ʻaonga ʻa e fakatahaʻangá ʻi he taimi ʻoku faʻifaʻitaki ai ʻa e kotoa—ʻo e fanga tokouá mo e fanga tuofāfiné—ki he ngaahi ʻulungaanga ʻo Sihova hangē ha maká.—ʻEf. 5:1.

12. Fakamatalaʻi ʻa e ngaahi founga ʻe lava ke tau hoko ai ko ha hūfangaʻanga ki he niʻihi kehé.

¹² Hoko ko ha hūfangaʻanga. ʻI he taimi ʻe niʻihi, ʻe lava nai ke tau hoko ko ha hūfangaʻanga moʻoni ki hotau fanga tokouá ʻi he ngaahi fakatamaki fakanatulá, moveuveu fakapolitikalé, pe taú. ʻI he ʻalu ke toe kovi ange ʻa e tuʻunga “ʻi he ngaahi ʻaho fakaʻosí,” ʻoku ʻikai ha veiveiua te tau maʻu ʻa e faingamālie lahi ange ke tau fetokoniʻaki. (2 Tīm. 3:1) ʻE lava foki ke tau ʻoatu ʻa e poupou fakaeongo mo e fakalaumālie ki hotau fanga tokouá. Ko e founga ʻe taha ʻe lava ke tau fai ai iá ko e ʻai ke nau ongoʻi ʻoku talitali lelei kinautolu ʻi he Fale Fakatahaʻangá, ʻo tokoni ki he ʻātakai māfana ʻi he fakatahaʻangá. ʻOku tau moʻui ʻi ha māmani anga-kakaha, taʻeʻofa mo fakamafasia. Ko ia ʻi he maʻu ʻe hotau fanga tokouá mo e fanga tuofāfiné ʻa e ngaahi fakatahá, ʻoku tau loto ke fai ʻa e meʻa kotoa ʻoku tau malavá ke ʻai ke nau ongoʻi ʻofeina, fakaivifoʻou mo malu.

13. ʻE lava fēfē ke hoko ʻa e kau mātuʻá ko ha hūfangaʻanga ki he niʻihi kehé? (Sio foki ki he fakatātaá.)

¹³ ʻE lava ke hoko ʻa e kau mātuʻá ko ha hūfangaʻanga ki he faʻahinga ʻi he fakatahaʻangá ʻoku nau kātekina ʻa e ngaahi matangi moʻoní pe fakaefakatātaá. Lolotonga ʻa e ngaahi fakatamakí mo e ngaahi fiemaʻu fakafaitoʻo fakavavevavé, ko e kau mātuʻá ʻoku nau tamuʻomuʻa ke fokotuʻutuʻu ʻa e ngaahi tokoni ʻaonga. ʻOku nau toe ʻoatu ʻa e tokoni fakalaumālie. Ko e fanga tokouá te nau hehema ke fakaofiofi ki ha mātuʻa kapau ʻokú ne ʻiloa ko ha tokotaha anga-fakaalaala, kaungāongoʻi pea loto-lelei ke fanongo. Ko e ngaahi ʻulungaanga peheé ʻokú ne ʻai ʻa e niʻihi kehé ke nau ongoʻi ʻoku tokangaekina kinautolu; ko ia ai, ʻoku faingofua ange leva  ke nau ngāueʻaki ha faʻahinga tataki Fakatohitapu pē ʻe ʻoatu nai ʻe ha mātuʻa.—1 Tes. 2:​7, 8, 11.

14. ʻE lava fēfē ke tau fakahaaʻi ʻoku tau falalaʻanga?

¹⁴ Hoko ʻo falalaʻanga. ʻOku tau loto ke falala mai ʻa e niʻihi kehé kiate kitautolu, tautefito ʻi he ngaahi taimi faingataʻá. (Pal. 17:17) ʻE lava fēfē ke tau fakatupulekina ha ongoongo ʻo e hoko ʻo falalaʻangá? ʻE lava ke tau feinga ke fakahāhā hokohoko ʻa e ngaahi ʻulungaanga fakaʻotuá, hangē ko e fai maʻu pē ki heʻetau leá pea fai hotau lelei tahá ke tauhi-taimi. (Māt. 5:37) ʻE lava ke tau toe ʻoatu ha tokoni ʻaonga ʻi he taimi ʻoku fiemaʻu aí. Tānaki atu ki aí, ʻoku tau fakapapauʻi ʻoku tau fakakakato ʻa e ngaahi ngāue ʻoku vaheʻi maí ʻo fakatatau ki he fakahinohino ʻoku ʻomaí.

15. ʻOku anga-fēfē maʻu ʻaonga ʻa e fakatahaʻangá ʻi he taimi ʻoku falalaʻanga ai ʻa e kau mātuʻá?

¹⁵ Ko e kau mātuʻa falalaʻangá ʻoku nau ʻaonga ki he fakatahaʻangá. Anga-fēfē? Ko e kau malangá ʻoku nau ongoʻi ʻoku poupouʻi kinautolu ʻi he taimi ʻoku faingofua ai ke nau fetuʻutaki mo e kau mātuʻá, hangē ko ʻenau ʻovasia kulupu ngāue fakamalangá. ʻOku toe ongoʻi ʻe he kau malangá ʻoku tokangaʻi lelei kinautolu ʻi heʻenau ʻiloʻi ʻoku loto-lelei ʻa e kau mātuʻá ke tokoniʻi kinautolu. Pea ʻi he taimi ʻoku fakatuʻunga ai ʻe he kau mātuʻá ʻenau akonakí ʻi he Tohi Tapú mo e ʻū tohi ʻa e tamaioʻeiki anga-tonú kae ʻikai ʻi heʻenau ngaahi fakakaukau pē ʻanautolú, ʻoku falala ʻa e kaungālotú kiate kinautolu. ʻOku  maʻu ʻe he fanga tokouá mo e fanga tuofāfiné ha ʻuhinga lahi ange ke falala pau ki ha mātuʻa ʻokú ne tauhi ke fakapulipuli ʻa e ngaahi meʻa fakafoʻituituí pea fakahoko ʻa e meʻa ʻokú ne pehē te ne faí.

16. ʻOku anga-fēfē ʻetau maʻu ʻaonga mo e niʻihi kehé ʻi he taimi ʻoku tau tuʻu maʻu aí?

¹⁶ Hoko ʻo tuʻu maʻu. ʻE lava ke tau hoko ko ha tākiekina lelei ki he niʻihi kehé kapau ʻoku tau tuʻu maʻu ki he meʻa ʻoku totonú pea kapau ʻoku tau fai ʻa e ngaahi fili ʻoku makatuʻunga fefeka ʻi he ngaahi tefitoʻi moʻoni Fakatohitapú. ʻI heʻetau tupulekina ʻi he tuí mo e ʻilo totonú, ʻoku tau hoko ai ʻo tuʻu maʻu ange ʻi he moʻoní. ʻOku ʻikai ke tau lotolotoua, sēlue, pe tākiekinangofua ʻe he ngaahi akonaki loí mo e fakakaukau fakamāmaní. (ʻEf. 4:14; Sēm. 1:​6-8) Ko ʻetau tui kia Sihova mo ʻene ngaahi talaʻofá ʻokú ne ʻai ke tau mafamafatatau ʻi heʻetau maʻu ʻa e ngaahi ongoongo koví. (Saame 112:​7, 8) ʻOku tau toe lava ʻo tokoniʻi ʻa e faʻahinga ʻoku nau fehangahangai nai mo e ʻahiʻahí.—1 Tes. 3:​2, 3.

17. Ko e hā ʻokú ne tokoniʻi ʻa e kau mātuʻá ke nau hoko ko ha tākiekina tuʻumaʻú?

¹⁷ Ko e kau mātuʻá ʻoku totonu ke nau anga-fakamaʻumaʻu ʻi heʻenau ngaahi tōʻongá, fakakaukau lelei, maau pea fakakaukau fakaʻatuʻi. ʻOku hoko ʻa e kau tangata ko ení ko ha tākiekina tuʻumaʻu ki he niʻihi kehé pea fakaivimālohiʻi ʻa e fakatahaʻangá ʻaki ʻenau “piki maʻu ki he folofola moʻoní.” (Tai. 1:9; 1 Tīm. 3:​1-3) Fakafou ʻi he faʻifaʻitakiʻanga mo e ʻaʻahi fakatauhisipi ʻa e kau mātuʻá, ʻoku nau tokoniʻi ai ʻa e kau malangá ke nau maʻu maʻu pē ʻa e fakatahá, kau tuʻumaʻu ʻi he ngāue fakamalangá, pea ako fakafoʻituitui. ʻI he fehangahangai ʻa e fanga tokouá mo e fanga tuofāfiné mo e ngaahi meʻa fakatupu puputuʻú, ʻe lava ke fai ʻe he kau mātuʻá ha meʻa ʻaki hono fakalototoʻaʻi kinautolu ke hanganaki tokangataha kia Sihova mo ʻene ngaahi talaʻofá.

18. Ko e hā ʻoku tau loto ai ke fakahīkihikiʻi ʻa Sihova pea ʻunuʻunu ofi ange kiate iá? (Sio foki ki he puha “ Ko ha Founga ke ʻUnuʻunu Ofi Ange kia Sihova.”)

¹⁸ Hili ʻa e lāulea ki he ngaahi ʻulungaanga fakaofo ʻo Sihová, ʻe lava ke tau lea ʻo hangē ko Tuʻi Tēvitá: “ʻOfa ke fakahīkihikiʻi ʻa Sihova, ko hoku Makatuʻú.” (Saame 144:1) ʻE ʻikai ʻaupito ke taʻelavameʻa ʻa Sihova ʻi hono tuʻunga ko ha ʻOtua ʻe lava ke tau falala ki ai. ʻI he kotoa ʻetau moʻuí, naʻa mo e aʻu ki he taʻumotuʻá, ʻoku tau maʻu ha ʻuhinga ke talaki: “Ko ia ʻa hoku Makatuʻú,” ʻo tuipau te ne tokoniʻi maʻu pē kitautolu ke tau lakalakaimonū fakalaumālie.—Saame 92:​14, 15.