Fehuʻi mei he Kau Lautohí
Ko e hā naʻe liliu ai ʻa e ʻuluaki konga ʻo e Saame 12:7 ko e “Te ke maluʻi kinautolu,” ʻo ʻuhinga ki he kau “faingataʻaʻiá” (veesi 5) kae ʻikai ʻuhinga ki he “folofola ʻa Sihová” (veesi 6)?
ʻOku fakahaaʻi ʻi he potutohí ko e veesi ko ení ʻoku ʻuhinga ia ki he kakai.
ʻI he Saame 12:1-4, ʻoku tau lau ai “kuo mole atu ʻa e kakai faitōnungá mei he lotolotonga ʻo e faʻahinga ʻo e tangatá.” Pea ʻi he Saame 12:5-7 leva, ʻokú ne pehē ai:
“‘Koeʻuhi ko hono lōmekina ʻa e faingataʻaʻiá,
Koeʻuhi ko e māpuhoi ʻa e masivá,
Te u tuʻu hake ʻo fai ha meʻa,’ ko e folofola ia ʻa Sihová.
‘Te u fakahaofi kinautolu mei he faʻahinga ʻoku nau tōʻongafai taʻetokaʻi kiate kinautolú.’
Ko e folofola ʻa Sihová ʻoku haohaoa;
ʻOku hangē ia ha siliva kuo sivi ʻi ha fōnise ʻumeá, ʻo sivi tuʻo fitu ke maʻa.
Te ke maluʻi kinautolu, ʻe Sihova;
Te ke maluʻi ʻa e tokotaha taki taha ʻo kinautolu mei he toʻutangata ko ení ʻo taʻengata.”
ʻOku fakahaaʻi ʻi he veesi 5 ʻa e lea ʻa Sihova fekauʻaki mo e “faingataʻaʻiá.” Te ne fakahaofi kinautolu.
ʻOku tānaki mai ʻi he veesi 6 “ko e folofola ʻa Sihová ʻoku haohaoa,” “ʻoku hangē ia ha siliva kuo sivi.” Ko ha fakakaukau eni ʻoku loto-tatau ki ai ʻa e kau Kalisitiane anga-līʻoá.—Saame 18:30; 119:140.
Fakakaukau angé he taimí ni ki he veesi hokó, Saame 12:7: “Te ke maluʻi kinautolu, ʻe Sihova; te ke maluʻi ʻa e tokotaha taki taha ʻo kinautolu mei he toʻutangata ko ení ʻo taʻengata.” ʻOku anga-fēfē ʻetau ʻiloʻi ko e muʻaki konga tohi faka-Hepeluú ʻoku totonu ke liliu ia ke ʻuhinga ki he kau “faingataʻaʻiá” kae ʻikai ki he “folofola ʻa Sihová”?
Koeʻuhí ko e veesi 7 ko e toki ʻosi pē ia ʻa e lave fekauʻaki mo e “folofola ʻa Sihová,” ʻe fakamulituku nai ʻa e niʻihi ʻoku ʻuhinga ʻa e “kinautolu” ki he folofola ʻa e ʻOtuá. Pea ʻoku tau ʻiloʻi kuo maluʻi ʻe he ʻOtuá ʻa e Tohi Tapú neongo ʻa e feinga lahi ʻa e kau fakafepakí ke tapui mo fakaʻauha ia.—ʻAi. 40:8; 1 Pita 1:25.
Kae kehe, ko e meʻa ʻoku leaʻaki ʻi he veesi 5 ʻoku toe moʻoni pē mo ia. Ko Sihova kuó ne tokoniʻi mo fakahaofi ʻa e “faingataʻaʻiá” mo e “lōmekiná” pea te ne fai pehē ai pē.—Siope 36:15; Saame 6:4; 31:1, 2; 54:7; 145:20.
Ko ia ai, ʻoku lava fēfē ke tau fakamulituku ʻoku ʻuhinga ʻa e veesi 7 ki he kakaí?
ʻOku fakahaaʻi mai ia ʻi he kakano ʻo e saame ko ení.
Naʻe ʻohake ʻi he Saame 12:1 ʻa e tuʻunga ʻo e ‘kakai faitōnunga’ kuo lohiakiʻi kinautolu. Hili iá, ʻoku fakamatala ai ko Sihová te ne tuʻu hake ki he faʻahinga ʻoku nau ngāuehalaʻaki honau ʻeleló. Ko e sāmé ʻokú ne fakapapauʻi mai ʻe lava tau falala ki he ʻOtuá ke ne fai ha meʻa maʻa hono kakaí koeʻuhi ko ʻene folofolá ʻoku haohaoa.
Ko ia ʻoku ʻuhinga ʻa e veesi 7 ko Sihova te ne leʻohi mo maluʻi ʻa e faʻahinga ʻoku faingataʻaʻia ʻi hono maʻukovia ʻe he kau fulikivanú.
ʻOku tapua atu ʻi heʻetau liliú ʻa e konga tohi faka-Masoleti Hepeluú. ʻI he Sepituakini Faka-Kalisí ʻoku ngāueʻaki tuʻo ua ai ʻa e “kitautolu” ʻi he veesi 7, ʻa ia ʻoku lave fakafoki ia ki he faʻahinga faitōnunga ʻoku faingataʻaʻia mo lōmekiná. Fakaʻosí, ʻoku pehē ʻi he veesi 7 ko e “tokotaha taki taha” ʻo e faʻahinga faitōnungá ʻe maluʻi kinautolu “mei he toʻutangata ko ení,” mei he kau tangata ʻoku nau pouaki ʻa e tōʻonga fakalieliá. (Saame 12:7, 8) ʻI he Tākumu faka-Alameá, ko e ʻuluaki konga ʻo e veesi 7 ʻoku toe ngāueʻaki ai ʻa e “kinautolu” pea ʻoku pehē: “Ko koe, ʻe ʻEIKI, te ke maluʻi ʻa e māʻoniʻoní, te ke maluʻi kinautolu mei he toʻutangata fulikivanu ko ení ʻo taʻengata.” ʻOku tānaki eni ki he fakamoʻoni ko e Saame 12:7 ʻoku ʻikai ʻuhinga ia ki he folofola ʻa e ʻOtuá.
Ko ia ai, ʻoku ʻomai ʻe he veesi ko ení ʻa e ʻamanaki ki he “kakai faitōnungá” ko e ʻOtuá te ne fai ha meʻa.
