1, 2. (a) Ko e hā ʻoku tau loto-moʻua aí? (Sio ki he ʻuluaki fakatātā ʻi he kupú ni.) (e) Ko e hā te tau lāulea ki ai ʻi he kupu ko ení?

 ʻI HE ʻahó ni, ko Sētané “ʻokú ne ʻalu fano holo ʻo hangē ha laione ngungulú, ʻi he kumi ki ha taha ke ne folofua.” (1 Pita 5:8; Fkh. 12:17) Ko e olá, ʻoku hoko ai ʻa e moʻuí ʻo fakamafasia pea naʻa mo e kau sevāniti ʻa e ʻOtuá ʻoku nau hokosia ʻa e loto-moʻuá. Naʻe hokosia foki ʻe he kau sevāniti ʻa e ʻOtuá ʻi he kuohilí ʻa e ngaahi mōmeniti ʻo e loto-moʻuá. Ko e fakatātaá, ʻoku pehē ʻe he Tohi Tapú naʻe ʻi ai ʻa e taimi naʻe loto-moʻua ai ʻa Tuʻi Tēvita. (Saame 13:2) Pea naʻe hokosia ʻe he ʻapositolo ko Paulá ʻa e “loto-moʻua fekauʻaki mo e kotoa ʻo e ngaahi fakatahaʻangá.” (2 Kol. 11:28) Ka ko e hā ʻe lava ke tau fai ʻi he taimi ʻoku lōmekina ai kitautolu ʻe he loto-moʻuá?

² Naʻe tokoniʻi ʻe heʻetau Tamai ʻofa fakahēvaní ʻene kau sevāniti ʻi he kuohilí ke nau maʻu ha fakafiemālie mei he loto-moʻuá, pea ʻokú ne loto ke ne fai ʻa e meʻa tatau kiate kitautolu ʻi he ʻahó ni. ʻOku ekinaki mai ʻa e Tohi Tapú: “Lī atu hono kotoa ʻo hoʻomou loto-moʻuá kiate ia, koeʻuhí he ʻokú ne tokanga mai kiate kimoutolu.” (1 Pita 5:7) Kae kehe, ʻe lava fēfē ke ke fai ia? Te tau lāulea ki he founga ʻe fā. ʻE lava ke ke (1) lotu, (2) lau mo fakalaulauloto ki he Folofola ʻa e ʻOtuá, (3) tuku ke tokoniʻi koe ʻe he laumālie māʻoniʻoni ʻo Sihová, mo e (4) talanoa ki ha taha ʻokú ke falala ki ai fekauʻaki mo e anga hoʻo ongoʻí. ʻI heʻetau sivisiviʻi ʻa e founga ʻe fā ko  ení, feinga ke ʻiloʻi ʻa e tafaʻaki te ke loto ke fakaleleiʻí.

3. ʻE lava fēfē ke ke “li hoʻo kavenga kia Sihova”?

³ Ko e ʻuluaki founga ʻe lava ke tau lī atu ai ʻetau loto-moʻuá kia Sihová ko e lotu loto-moʻoni. ʻI he taimi ʻokú ke loto-moʻua aí, ʻoku fiemaʻu ʻe hoʻo Tamai fakahēvaní ke ke fakahaaʻi ange ʻa e ngaahi meʻa kotoa ʻoku ʻi ho lotó. Naʻe kōlenga ʻe he tokotaha-tohi-saame ko Tēvitá kia Sihova: “Fanongo, Elohimi, ki heʻeku lotu.” ʻI he saame tatau, naʻe toe pehē ai ʻe Tēvita: “Li hoʻo kavenga kia Sihova, he te ne poupou koe ʻe ia.” (Saame 55:1, 22) Hili hono fai ʻa e kotoa hoʻo malavá ke fakaleleiʻi ʻa e palopalemá, ko hoʻo lotu loto-moʻoni kia Sihová ʻe tokoniʻi ai koe ke fakasiʻisiʻi ʻa e loto-hohaʻá. Ka ʻoku anga-fēfē ngāue ʻa e lotú? ʻE lava fēfē ke tokoniʻi kitautolu ʻe he lotú ke fakaʻehiʻehi ai mei hono lōmekina kitautolu ʻe he loto-moʻuá?​—Saame 94:18, 19.

4. ʻI he taimi ʻoku tau loto-moʻua aí, ko e hā ʻoku mātuʻaki mahuʻinga ai ʻa e lotú?

⁴ Lau ʻa e Filipai 4:6, 7. ʻOku anga-fēfē hono tali ʻe Sihova ʻetau ngaahi lotu loto-moʻoní mo e lotu tōtōiví? ʻE lava ke ne tokoniʻi kitautolu ke tau ongoʻi nonga pea fakaʻehiʻehi mei hono maʻu ʻa e ngaahi ongoʻi mo e fakakaukau ʻikai leleí. ʻI he ʻikai ke tau loto-moʻua mo manavaheé, ʻoku tokoniʻi kitautolu ʻe he ʻOtuá ke tau maʻu ʻa e ongoʻi nonga moʻoni ʻi loto ʻa ia kuo faifai ange pea tau hokosiá. ʻOku tokolahi hotau fanga tokoua mo e fanga tuofāfine kuo nau maʻu ʻa e nonga ko ení. ʻE lava foki ke ke hokosia ia. ʻE lava ʻe he “nonga ʻa e ʻOtuá” ʻo tokoniʻi koe ke ke ikuʻi ha faʻahinga pole pē! ʻE lava ke ke falala kakato ki he talaʻofa ʻa Sihová: “ʻOua ʻe kilokilo holo, he ko ho ʻOtua au: Te u poupou koe ʻe au; ʻio, te u tokoni kiate koe.”​—ʻAi. 41:10.

5. ʻE lava fēfē ke tokoniʻi koe ʻe he Folofola ʻa e ʻOtuá ke ke maʻu ʻa e nonga ʻi lotó?

⁵ Ko e founga hono ua ke maʻu ai ʻa e nonga ʻi lotó, ko e lau pea fakalaulauloto ki he ngaahi veesi Tohi Tapú. Ko e hā ʻoku mahuʻinga ai ení? Ko e Tohi Tapú ko e Folofola ia ʻa e ʻOtuá. ʻOku ʻi loto ai ʻa e ngaahi faleʻi fakapotopoto mo ʻaonga mei heʻetau Tokotaha-Fakatupú. Neongo hoʻo ongoʻi loto-moʻuá, ʻe lava ke ke fakakaukau fakamātoato ki he ngaahi fakakaukau ʻa e ʻOtuá pea fakalaulauloto ki he founga ʻe lava ke fakaivimālohiʻi ai koe ʻe heʻene ngaahi akonakí. ʻE tokoniʻi heni koe ke ke ikuʻi, fakasiʻisiʻi pe aʻu ʻo fakaʻehiʻehi mei he loto-moʻuá. ʻOku fakafehokotaki moʻoni ʻe Sihova ʻa hono lau ʻene Folofolá mo e hoko ʻo ‘malohi bea loto toʻa’ kae ʻikai ko e ‘manavahe pe bubutuu.’​—Sios. 1:7-9, PM.

6. ʻE lava fēfē ke ke maʻu ʻaonga mei he ngaahi lea ʻa Sīsuú?

⁶ ʻI he Folofola ʻa e ʻOtuá, ʻoku tau lau ai ki he anga ʻo e lea ʻa Sīsū ki he kakaí. Naʻa nau saiʻia ʻaupito ke fanongo kiate ia koeʻuhí naʻe fakafiemālie mo fakaivifoʻou ʻene ngaahi leá, tautefito ki he faʻahinga naʻe vaivai mo loto-mafasiá. (Lau ʻa e Mātiu 11:28-30.) Naʻe tokanga ʻaupito ʻa Sīsū ki he anga ʻo e ongoʻi ʻa e niʻihi kehé. (Mk. 6:30-32) Hangē pē ko e talaʻofa ʻa Sīsū te ne tokoniʻi ʻa e kau ʻapositolo naʻe fononga holo mo iá, te ne tokoniʻi foki mo kitautolu ʻi he ʻahó ni. ʻOku ʻikai fiemaʻu ke tau fakataha mo Sīsū ka ne toki tokoniʻi kitautolu. Ko ia ʻi he taimi ʻokú ke loto-moʻua aí, ʻe lava ke ke fakapapauʻi te ne ʻi ai ke tokoniʻi koe ʻi he taimi totonu. ʻOku ʻomai ʻe Sīsū ʻa e ʻamanaki mo e loto-toʻa, ʻa ia ʻe tokoniʻi ai kitautolu ke tau ikuʻi ʻa e loto-moʻuá.​—Hep. 2:17, 18; 4:16.

7. Ko e hā ʻa e ʻaonga ʻoku tau maʻu mei he laumālie māʻoniʻoni ʻo e ʻOtuá?

⁷ Naʻe talaʻofa ʻe Sīsū ʻe ʻomai ʻe heʻetau Tamaí ʻa e laumālie māʻoniʻoní ʻi he taimi ʻoku tau kole ai iá. (Luke 11:10-13) ʻE anga-fēfē ke tokoniʻi kitautolu ʻe he founga hono tolu ko ení ke fakasiʻisiʻi ʻa e loto-moʻuá? ʻOku tokoniʻi kitautolu  ʻe he laumālie māʻoniʻoní pe ivi ngāue ʻo e ʻOtuá ke tau fakatupulekina ʻa e ngaahi ʻulungaanga lelei ʻoku maʻu ʻe hotau ʻOtua māfimafiʻiá. (Kol. 3:10) ʻI he Tohi Tapú, ʻoku ui ʻa e ngaahi ʻulungaanga ko ení ko e “fua ʻo e laumālié.” (Lau ʻa e Kalētia 5:22, 23.) ʻI he taimi ʻoku tau fakatupulekina ai ʻa e ngaahi ʻulungaanga lelei ko ení, ʻe lelei ange ai hotau vahaʻangatae mo e niʻihi kehé, pea te tau fakaʻehiʻehi ai mei he ngaahi tuʻunga te ne fakatupunga ʻa e loto-moʻuá. Tau vakai angé ki he anga hono tokoniʻi kitautolu ʻe he fua ʻo e laumālié ʻi he ngaahi founga pau.

8-12. ʻE lava fēfē ke tokoniʻi koe ʻe he fua ʻo e laumālie māʻoniʻoni ʻo e ʻOtuá?

⁸ “ʻOfa, fiefia, melino.” ʻI he taimi ʻokú ke fakafeangai anga-fakaʻapaʻapa ai ki he niʻihi kehé, te ke ʻiloʻi ai ʻoku siʻisiʻi ange hoʻo loto-moʻuá. Anga-fēfē? ʻI hoʻo fakahāhā ʻa e ʻofa fakatokouá, manavaʻofa lolotó mo e tokaʻí, ʻoku lava ke ke fakaʻehiʻehi ai mei he ngaahi tuʻunga ʻokú ne faʻa fakatupunga koe ke maʻu ʻa e ngaahi ongoʻi ʻikai lelei hangē ko e ʻitá, ongoʻi feifeitamakí mo e loto-mafasiá. ʻOku hoko eni ʻo faingofua ange ai ke tauhi maʻu ʻa e melino mo e niʻihi kehé.​—Loma 12:10.

⁹ “Kātaki-fuoloa, anga-lelei, lelei.” ʻOku pehē ʻe he Tohi Tapú: “Hoko ʻo feangaleleiʻaki, manavaʻofa kaungāongoʻi, ʻo fefakamolemoleʻaki mātuʻaki loto-lelei.” (ʻEf. 4:32) ʻI he taimi te tau muimui ai ki he faleʻi ko iá, te tau maʻu ai ha vahaʻangatae melino mo e niʻihi kehé, pea te tau taʻofi ai ha ngaahi tuʻunga ʻe lava ke ne ʻai ai kitautolu ke tau loto-moʻua. Pehē foki, ʻe faingofua ange ai ke fekuki mo ha ngaahi tuʻunga ʻe malanga hake koeʻuhí ko ʻetau taʻehaohaoá.

¹⁰ “Tui.” ʻI he ʻahó ni, ʻoku tau faʻa loto-moʻua ki he paʻangá mo e ngaahi meʻa fakamatelié. (Pal. 18:11) ʻE lava fēfē ke tau fakaʻehiʻehi mei he faʻahinga loto-moʻua ko ení? Kuo pau ke tau muimui ki he akonaki ʻa e ʻapositolo ko Paulá ke tau “fiemālie pē ʻi he ngaahi meʻa lolotongá.” Ko e tui mālohi kia Sihová ʻe tokoniʻi ai kitautolu ke tau falala kiate ia te ne tokonaki anga-ʻofa mai ʻa e ngaahi meʻa ʻoku tau fiemaʻú. Kuó ne talaʻofa mai: “ʻE ʻikai ʻaupito te u mavahe meiate koe pea ʻe ʻikai ʻaupito te u liʻaki koe.” Ko e ʻuhinga ia ʻoku lava ke tau lea fakataha ai mo Paulá: “Ko Sihova ʻa hoku tokoní; ʻe ʻikai te u ilifia. Ko e hā ʻe lava ke fai mai ʻe he tangatá kiate au?”​—Hep. 13:5, 6.

¹¹ “Anga-malū, mapuleʻi-kita.” Fakakaukau ki he ʻaonga mo e tokoni te ke maʻu ʻi hoʻo fakahāhā ʻa e anga-maluú mo e mapuleʻi-kitá. Ko e ongo ʻulungaanga ko ení te ne maluʻi koe mei hono fai pe leaʻaki ha ngaahi meʻa te ne ʻai ai koe ke ke loto-moʻua aí, pea ʻe tokoni ia ke ke fakaʻehiʻehi ai mei he “loto-kona fakatupu koví, ʻitá, lilí, fekailangakí, mo e laukoví.”​—ʻEf. 4:31.

¹² ʻOku fiemaʻu ke ke anga-fakatōkilalo kae lava ke ke falala ki he “toʻukupu māfimafi ʻo e ʻOtuá” pea “lī atu hono kotoa ʻo [hoʻo] loto-moʻuá kiate ia.” (1 Pita 5:6, 7) Kapau ʻokú ke anga-fakatōkilalo, ʻe poupouʻi mo tokangaʻi koe ʻe Sihova. ʻI hoʻo ʻiloʻi ʻa e meʻa ʻokú ke lava ʻo faí mo e meʻa heʻikai ke ke lava ʻo faí, ʻe ʻikai te ke falala pē kiate koe. ʻE siʻisiʻi ai hoʻo loto-moʻuá koeʻuhí te ke falala pē ki he ʻOtuá.​—Mai. 6:8.

13. Ko e hā naʻe ʻuhinga ki ai ʻa Sīsū ʻi heʻene pehē: “ʻOua ʻaupito naʻa loto-moʻua”?

¹³ ʻI he Mātiu 6:34 (lau), ʻoku tau maʻu ai ʻa e faleʻi fakapotopoto ʻa Sīsuú: “ʻOua ʻaupito naʻa loto-moʻua.” Ko e akonaki ko ení ʻoku hā ngali faingataʻa ke tau ngāueʻaki. Ka ko e hā naʻe ʻuhinga ki ai ʻa Sīsuú? ʻOku tau ʻiloʻi naʻe ʻi ai ʻa e taimi naʻe loto-moʻua ai ʻa Tēvita mo Paula. Naʻe ʻikai ke ʻuhinga ʻa Sīsuú, heʻikai ʻaupito ke ongoʻi loto-moʻua ʻa e faʻahinga ʻoku tauhi ki he ʻOtuá. ʻI hono kehé, naʻá ne tokoniʻi ʻene kau ākongá ke nau mahinoʻi ko e loto-moʻua ʻoku ʻikai fiemaʻú pe loto-moʻua tōtuʻá he ʻikai ke  fakaleleiʻi ai ʻa e ngaahi palopalemá. ʻE ʻi ai ʻa e ngaahi pole ʻi he ʻaho taki taha, ko ia ʻoku ʻikai totonu ke fakalahi ʻe he kau Kalisitiané ʻenau loto-moʻuá ʻaki ʻenau fakakaukau ki he ngaahi palopalema ʻi he kuohilí pe palopalema ʻi he kahaʻú. ʻE lava fēfē ke tokoniʻi koe ʻe he faleʻi ʻa Sīsuú ke fakasiʻisiʻi ʻa e loto-moʻua tōtuʻá?

14. Hangē ko Tēvitá, ʻe lava fēfē ke ke fakasiʻisiʻi hoʻo loto-moʻuá?

¹⁴ ʻI he taimi ʻe niʻihi, ʻoku loto-moʻua ʻa e kakaí koeʻuhí ko e ngaahi fehālaaki naʻa nau fai ʻi he kuohilí. ʻOku nau ongoʻi halaia tōtuʻa nai fekauʻaki mo e meʻa naʻa nau faí, neongo kuo ʻosi atu ha ngaahi taʻu lahi mei ai. ʻI he taimi ʻe taha, naʻe ongoʻi lōmekina ʻa Tuʻi Tēvita koeʻuhí ko ʻene ngaahi fehālākí. Naʻá ne pehē: “Ne u kaila ʻi he toʻe ʻa hoku ʻatamai.” (Saame 38:3, 4, 8, 18) ʻI he tuʻunga ko iá, naʻe ngāue fakapotopoto ʻa Tēvita. Naʻá ne falala ki he meesi mo e fakamolemole ʻa Sihová. Pea naʻe fiefia leva ʻa Tēvita ʻi heʻene ʻiloʻi kuo fakamolemoleʻi ia ʻe Sihova.​—Lau ʻa e Saame 32:1-3, 5. 

15. (a) Ko e hā mo ha toe meʻa ʻe lava ke tau ako meia Tēvita? (e) Ko e hā ʻe lava ke ke fai ke fakasiʻisiʻi ai ʻa e loto-moʻuá? (Sio ki he puha “ Ngaahi Founga ʻe Tokoni ke Fakasiʻisiʻi ʻa e Loto-Moʻuá.”)

¹⁵ ʻE ʻi ai ʻa e taimi te ke loto-moʻua nai ai fekauʻaki mo e ngaahi meʻa lolotongá. Ko e fakatātaá, ʻi he taimi naʻe tohi ai ʻe Tēvita ʻa e Saame 55, naʻá ne ilifia naʻa tāmateʻi ia. (Saame 55:2-5) Neongo ia, naʻe ʻikai ke ne tuku ʻa e loto-moʻuá ke maumauʻi ʻene falala-pau kia Sihová. Naʻe kōlenga ʻa Tēvita kia Sihova ke tokoniʻi ia mo hono ngaahi palopalemá, ka naʻá ne ʻiloʻi naʻe toe mahuʻinga ke ne fai ha meʻa fekauʻaki mo hono tuʻungá. (2 Sām. 15:30-34) ʻOku lava ke ke ako ha lēsoni meia Tēvita. ʻI he ʻikai fakaʻatā ʻa e loto-moʻuá ke ne lōmekina koé, fai ʻa e meʻa te ke malavá ke fakaleleiʻi ʻa e palopalemá pea falala kia Sihova ke ne tokangaʻi koe.

16. ʻE lava fēfē ke fakaivimālohiʻi hoʻo tuí ʻe he ʻuhinga ʻo e huafa ʻo e ʻOtuá?

¹⁶ ʻI he taimi ʻe niʻihi ʻe ongoʻi loto-moʻua nai ha Kalisitiane fekauʻaki mo ha ngaahi palopalema ʻi he kahaʻú. Ka ʻoku ʻikai fiemaʻu ia ke ke hohaʻa ki he ngaahi meʻa kuo teʻeki ai ke hokó. Ko e hā hono ʻuhingá? Koeʻuhí ʻi he taimi lahi, ko e ngaahi meʻa ʻe hokó he ʻikai ke fuʻu kovi ia ʻo hangē ko ia naʻa tau fakakaukau atu ki aí. ʻIkai ko ia pē, manatuʻi ʻoku ʻikai ha tuʻunga ia ʻe taʻemalava ke puleʻi ʻe he ʻOtuá. ʻOku tau ʻiloʻi ʻa e ʻuhinga hono huafá tonu “ʻOkú ne Fakatupunga ke Hoko.” (ʻEki. 3:14) Ko ia ai, ʻoku ʻikai fiemaʻu ke tau hohaʻa ʻo fekauʻaki mo e kahaʻú, koeʻuhí ʻoku fakahaaʻi ʻe he huafa ʻo e ʻOtuá ko ʻene ngaahi taumuʻa kotoa maʻá e faʻahinga ʻo e tangatá ʻe fakahoko ia. ʻE lava ke ke fakapapauʻi ʻe tāpuakiʻi ʻe he ʻOtuá ʻene faʻahinga faitōnungá, pea tokoniʻi kinautolu ke fakasiʻisiʻi ʻenau loto-moʻua fekauʻaki mo e kuohilí, ʻahó ni mo e kahaʻú.

17, 18. ʻE lava fēfē ke tokoni kiate koe ʻa e fetuʻutaki leleí ʻi he taimi ʻokú ke ongoʻi loto-moʻua aí?

¹⁷ Ko e founga hono fā ʻe lava ke ne tokoniʻi  koe ʻi he taimi ʻokú ke loto-moʻua aí, ko e talanoa tauʻatāina mo faitotonu mo ha taha ʻokú ke falala ki ai. ʻE malava ke tokoni kiate koe ho hoa malí, kaumeʻa ofí pe ko ha mātuʻa ʻi he fakatahaʻangá ke ke mahinoʻi lelei ange ho tuʻungá. ʻOku tala mai ʻe he Tohi Tapú: “Ka hu ʻa e hohaʻa ki he loto ʻo ha tangata, oku ne pelukiʻi ia: Ka ʻoku fakafiefiaʻi ʻe ha lea lelei.” (Pal. 12:25) ʻOku toe pehē ʻe he Tohi Tapú: “ʻOku maumau fakakaukau ʻa e ʻikai fai ha alea: Ka ʻoku tuʻu ʻo ka tokolahi ʻa e faleʻi.”​—Pal. 15:22.

¹⁸ ʻOku toe tokoni ʻa e ngaahi fakataha ʻa e fakatahaʻangá ke fakasiʻisiʻi ʻetau loto-moʻuá. ʻI he fakataha ʻo e uike taki taha, ʻokú ke fakamoleki ai ʻa e taimi mo ho fanga tokouá mo e fanga tuofāfiné, ʻa ia ʻoku nau tokanga kiate koe pea loto ke fakalototoʻaʻi koe. (Hep. 10:24, 25) Ko e “fefakalototoʻaʻaki” peheé ʻe fakaivimālohiʻi ai koe pea ʻai ai koe ke faingofua ange hoʻo ikuʻi ha faʻahinga loto-moʻua pē.​—Loma 1:12.

19. Ko e hā ʻoku lava ai ke ke fakapapauʻi ko ho vahaʻangatae mo e ʻOtuá te ne fakaivimālohiʻi koé?

¹⁹ Naʻe ʻiloʻi ʻe ha tokotaha mātuʻa ʻi Kānata ʻa e mahuʻinga ke lī atu ʻene loto-moʻuá kia Sihova. Naʻá ne maʻu ha ngāue fakatupu mafasia, ko e faiako mo e faifaleʻi ki he fānau akó, pea naʻá ne ʻi ha tuʻunga mahamahaki ko e fakatupunga ʻe he loto-moʻuá. Ko e hā naʻá ne tokoniʻi ia ke ne mālohí? Hiliō ʻi he meʻa kotoa, naʻá ne ngāue mālohi ke fakaivimālohiʻi hono vahaʻangatae mo Sihová. Naʻe toe tokoni lahi kiate ia hono ngaahi kaumeʻa moʻoní lolotonga ʻa e ngaahi taimi faingataʻa ko iá, pea naʻá ne fakahāhā tauʻatāina mo faitotonu ki hono uaifí ʻene ngaahi ongoʻí. Tānaki atu ki aí, naʻe tokoniʻi ia ʻe hono kaungāmātuʻá mo e ʻovasia sēketí ke ne fakakaukau ki hono tuʻungá mei he anga ʻo e vakai ʻa Sihová. Pehē foki, naʻe tokoni ha toketā ki he tokoua ko ení ke ne mahinoʻi ʻa hono tuʻunga moʻui leleí, pea naʻe malava ai ke ne fai ha ngaahi liliu ki heʻene taimi-tēpilé mo kumi ha taimi ke mālōlō mo fakamālohisino ai. Faifai atu pē, naʻá ne ako ki he founga ke puleʻi ai hono tuʻungá mo ʻene ngaahi ongoʻí. ʻI he taimi ʻoku ʻikai malava ai ke ne puleʻi ʻa e ngaahi meʻá, ʻokú ne falala ki he tokoni ʻa Sihová.

20. (a) ʻE lava fēfē ke tau lī atu ʻetau loto-moʻuá ki he ʻOtuá? (e) Ko e hā te tau lāulea ki ai ʻi he kupu hokó?

²⁰ ʻI he kupu ko ení, kuo tau ako ai ki he mahuʻinga ke lī atu ʻetau loto-moʻuá ki he ʻOtuá, ʻo fakafou ia ʻi he lotu kia Sihova pea lau ʻene Folofolá mo fakalaulauloto ki ai. Kuo tau toe ako ai ki he mahuʻinga ke tuku ʻa e laumālie māʻoniʻoni ʻo Sihová ke ne tokoniʻi kitautolu, talanoa mo ha taha ʻoku tau falala ki ai, pea maʻu ʻa e ngaahi fakataha faka-Kalisitiané. ʻI he kupu hokó, te tau ako ai ki he founga ʻoku tokoniʻi ai ʻe Sihova kitautolú ʻaki ʻene ʻomai kiate kitautolu ʻa e ʻamanaki ki ha pale.​—Hep. 11:6.