1-3. (a) Ko e hā ‘oku totonu ke tau fakakau ‘i he taha ‘o ‘etau ngaahi tui tefitó? (e) Ko e hā ‘oku mātu‘aki mahu‘inga ai ‘a e toetu‘ú? (Sio ki he ‘uluaki fakatātā ‘i he kupú ni.)

KAPAU na‘e ‘eke atu ‘e ha taha pe ko e hā ‘a e ngaahi akonaki tefito ‘i ho‘o tuí, ko e hā te ke lea‘akí? ‘Oku pau pē te ke pehē ‘okú ke tui ko Sihova ‘a e Tokotaha-Fakatupú mo e tokotaha ‘okú ne ‘omai kiate kitautolu ‘a e mo‘uí. Ngalingali te ke toe pehē foki ‘okú ke tui kia Sīsū Kalaisi, ‘a ia na‘á ne pekia ko ha huhu‘i. Ko e mo‘oni te ke talanoa fekau‘aki mo e Palataisi ‘i he māmaní ‘i he kaha‘ú, ‘a ia ‘e mo‘ui ta‘engata ai ‘a e kakaí. Ka te ke lave ki he toetu‘ú ko e taha ia ‘o ho‘o tui mahu‘inga tahá?

² ‘Oku tau ma‘u ‘a e ngaahi ‘uhinga lelei ke fakakau ‘a e toetu‘ú ‘i he taha ‘o ‘etau ngaahi tui tefitó, ‘o tatau ai pē pe ‘oku tau ‘amanaki ke hao atu ‘i he fu‘u mamahi lahí pea mo‘ui ta‘engata ‘i he māmaní. Na‘e fakahaa‘i ‘e he ‘apositolo ko Paulá ‘a e ‘uhinga ‘oku mātu‘aki mahu‘inga ai ‘a e toetu‘ú. Na‘á ne pehē: “Kapau, ko e mo‘oni, ‘oku ‘ikai ha toetu‘u ‘a e maté, tā kuo ‘ikai ke fokotu‘u hake ‘a Kalaisi.” Kapau na‘e ‘ikai ke fokotu‘u hake ‘a Sīsū, he‘ikai lava ke ne pule ko e Tu‘i ‘i hēvani, pea ‘e ta‘e‘aonga ‘a ‘etau malangá. (Lau ‘a e 1 Kolinitō 15:12-19.) Kae kehe, ‘oku tau ‘ilo‘i na‘e fokotu‘u hake ‘a Sīsū. Koe‘uhi ko  ‘etau tui ki he‘ene toetu‘ú, ‘oku ‘ikai ke tau hangē ai ko e kau Sātusi Siú, ‘a ia na‘a nau faka‘ikai‘i mālohi ‘e lava ke toe mo‘ui ‘a e kau maté. Na‘a mo hono fakakata‘aki kitautolu ‘e he ni‘ihi kehé, ‘oku kei mālohi ai pē ‘etau tui ‘e lava ke fokotu‘u hake ‘e he ‘Otuá ‘a e kau maté.​—Mk. 12:18; Ngā. 4:2, 3; 17:32; 23:6-8.

³ Na‘e pehē ‘e Paula ko e akonaki fekau‘aki mo e “toetu‘u ‘a e kau maté” ko e konga ia ‘o e “tokāteline tefito fekau‘aki mo e Kalaisí.” (Hep. 6:1, 2) Na‘á ne fakamamafa‘i ko e toetu‘ú ko e me‘a ia na‘á ne tui ki ai. (Ngā. 24:10, 15, 24, 25) Neongo ko ha tokāteline tefito ia, ko e taha ‘o e ngaahi me‘a mahu‘inga ‘oku tau ako mei he Folofola ‘a e ‘Otuá, ‘oku kei fiema‘u pē ke tau ako fakamākukanga fekau‘aki mo e toetu‘ú. (Hep. 5:12) Ko e hā hono ‘uhingá?

4. Ko e hā nai ‘a e ongo fehu‘i te tau ‘eke fekau‘aki mo e toetu‘ú?

⁴ ‘I he taimi ‘oku kamata ako ai ‘e he kakaí ‘a e Tohi Tapú, ‘oku nau fa‘a lau ‘a e ngaahi talanoa fekau‘aki mo e ngaahi toetu‘u ‘i he kuohilí, hangē ko e toetu‘u ‘a Lāsalosí. ‘Oku nau toe ako ‘o ‘ilo ko ‘Ēpalahame, Siope mo Taniela na‘a nau tuipau ‘e toe mo‘ui ‘a e kau maté ‘i he kaha‘ú. Kae kehe, ko e hā te ke lea‘akí kapau ‘e fiema‘u ‘e ha taha ke ke fakamo‘oni‘i mei he Tohi Tapú ‘a e ‘uhinga ‘e lava ke tau falala ai ki he ngaahi tala‘ofa ki he toetu‘ú ‘a ia na‘e fai ‘i he ta‘u ‘e lauingeau kuohilí? Pea ‘oku tala mai koā ‘e he Tohi Tapú ‘a e taimi ‘e hoko ai ‘a e toetu‘ú ‘i he kaha‘ú? Ko e tali ki he ongo fehu‘i ko iá ‘e fakaivimālohi‘i ai ‘etau tuí.

5. Ko e hā te tau ‘uluaki lāulea ki aí?

⁵ ‘E faingofua nai ke tau sioloto atu ki hano fokotu‘u hake ha taha ‘i he hili pē ‘ene maté. (Sione 11:11; Ngā. 20:9, 10) Ka ‘e lava ke tau falala ki ha tala‘ofa ‘e fokotu‘u hake ha taha ‘i ha ngaahi ta‘u, na‘a mo e ta‘u ‘e lauingeau ‘i he kaha‘ú? ‘E lava ke tau tui ki ai ‘o tatau ai pē pe na‘e fai ki ha tokotaha na‘e mate ‘i ha taimi fuoloa pe ko ha taha na‘e toki mate pē ki muí ni? Ko hono mo‘oní, kuó ke ‘osi tui ki ha toetu‘u na‘e hoko ‘i he ta‘u ‘e lauingeau hili ‘a e tala‘ofa na‘e fai ki aí. Ko e toetu‘u fē ia? Pea ko e hā hono kaunga ki ho‘o ‘amanaki ki ha toetu‘u ‘i he kaha‘ú?

6. Na‘e anga-fēfē kaunga ‘a Sīsū ki hono fakahoko ‘o e Saame 118?

⁶ ‘I hono ngāue‘aki ‘a e Saame 118, ‘a ia na‘e hiki nai ‘e Tēvita, tau lāulea angé ki ha toetu‘u na‘e tomu‘a tala ‘i ha ngaahi ta‘u lahi ki mu‘a. Ko e Saame ko ení ‘oku kau ai ‘a e ngaahi leá ni: “‘E Sihova, fakahaofi mu‘a kimautolu, ‘oku mau kōlenga atu!” mo e “Ke faitāpuekina ‘a e tokotaha ‘oku ha‘u ‘i he huafa ‘o Sihová.” Na‘e lave ‘a e kakaí ki he kikite ko eni fekau‘aki mo e Mīsaiá ‘i he taimi na‘e heka atu ai ‘a Sīsū ki Selusalema ‘i he ‘aho 9 ‘o Nīsaní, ko ha ngaahi ‘aho si‘i ki mu‘a ‘i he‘ene pekiá. (Saame 118:25, 26; Māt. 21:7-9) Ka na‘e anga-fēfē ‘a e lave ‘i he Saame 118 ki ha toetu‘u ‘e hoko ‘i ha ngaahi ta‘u lahi ‘i he kaha‘ú? Vakai angé ki ha toe me‘a na‘e lea‘aki ‘i he saame ko ení: “Ko e maka na‘e si‘aki ‘e he kau tufungá kuo hoko ia ko e maka-tuliki tefitó.”​—Saame 118:22.

7. Na‘e anga-fēfē hono si‘aki ‘a Sīsū ‘e he kau Siú?

⁷ Ko e ‘kau tufunga’ na‘a nau si‘aki ‘a e Mīsaiá ko e kau taki Siú. Na‘a nau fai ‘a e me‘a lahi ange ‘i hono tukunoa‘i pē ‘a Sīsū pe fakafisi ke tali ia ko e Kalaisí. Na‘e si‘aki ia ‘e he kau Siu tokolahi ‘aki hono kouna‘i ‘a Pailato ke tāmate‘i ia. (Luke 23:18-23) ‘Io, na‘e toe tupu foki meia kinautolu ‘a e pekia ‘a Sīsuú.

8. Na‘e lava fēfē ke hoko ‘a Sīsū ko e “maka-tuliki tefitó”?

⁸ Kapau na‘e si‘aki pea tāmate‘i ‘a Sīsū, na‘e lava fēfē ke ne hoko ko e “maka-tuliki tefitó”? Na‘e lava ke toki hoko pē iá kapau te ne toetu‘u. Na‘e fakamahino‘i ia ‘e Sīsū ‘i he‘ene fai ha talanoa fekau‘aki mo ha tokotaha na‘e ‘o‘ona ha kelekele ‘a ia na‘á ne fekau‘i atu ‘ene kau talafekau ki ha kau ngoue na‘a nau ngāue kiate ia. Na‘e ngaohikovi‘i ‘e he kau ngoué ‘a e kau talafekaú. Na‘e faifai pē pea fekau‘i atu ‘e he  tokotaha na‘e ‘o‘ona ‘a e kelekelé ‘a hono fohá tonu, ‘i he‘ene ‘amanaki ‘e fanongo kiate ia ‘a e kau ngoué. Ka na‘a nau tāmate‘i ‘a e foha ‘o e tokotaha na‘e ‘o‘ona ‘a e kelekelé. Hili ‘ene fai ‘a e talanoa ko ení, na‘e to‘o-lea ‘a Sīsū mei he kikite ‘i he Saame 118:22. (Luke 20:9-17) Na‘e ngāue‘aki ‘e he ‘apositolo ko Pitá ‘a e veesi tatau ‘i he‘ene lea ki he kau Siu ko e “kau pulé, kau mātu‘á, pea mo e kau sikalaipé ‘i Selusalema.” Na‘á ne talanoa fekau‘aki mo “Sīsū Kalaisi ko e Nāsaletí, ‘a ia na‘a mou tautau ‘i he ‘akaú ka na‘e fokotu‘u hake ‘e he ‘Otuá mei he maté.” Pea na‘á ne pehē: “Ko eni ia ‘‘a e maka na‘e ‘ikai fakamahu‘inga‘i ‘e kimoutolu kau tufungá kuo hoko ia ko e maka-tuliki tefitó.’”​—Ngā. 3:15; 4:5-11; 1 Pita 2:5-7.

9. Ko e hā ‘a e me‘a ‘oku taau ke fakatokanga‘i na‘e tomu‘a tala ‘i he Saame 118:22?

⁹ ‘Oku hā mahino, ko e kikite ‘i he Saame 118:22 na‘e tomu‘a tala ai ha toetu‘u ‘e hoko ‘i he ta‘u ‘e lauingeau ki mui. ‘E si‘aki ‘a e Mīsaiá pea tāmate‘i. Ka ‘e fokotu‘u hake ia pea te ne hoko ko e maka-tuliki tefito. ‘I he‘ene toetu‘ú pē, na‘e hoko ai ‘a Sīsū ko e toko taha pē ia ‘e taha ‘a ia ko hono hingoá na‘e “tuku mai ki he ha‘oha‘onga ‘o e tangatá ‘a ia kuo pau ke tau ma‘u ai ‘a e mo‘uí.”​—Ngā. 4:12; ‘Ef. 1:20.

10. (a) Ko e hā na‘e tomu‘a tala ‘i he Saame 16:10? (e) Ko e hā ‘oku lava ai ke tau fakapapau‘i na‘e ‘ikai ‘uhinga ‘a e Saame 16:10 kia Tēvita?

¹⁰ Tau lāulea angé ki ha toe veesi ‘oku fakamatala ai fekau‘aki mo ha toetu‘u. Na‘e fakahoko ia laka hake ‘i ha ta‘u ‘e taha afe ki mui. Ko e mo‘oni‘i me‘a ko ení ‘oku totonu ke ne ‘ai ke tau tuipau ‘e lava ke hoko ha toetu‘u ‘i ha taimi fuoloa hili hono tomu‘a tala pe tala‘ofa‘akí. ‘I he Saame 16, ‘oku tau lau ai ‘a e lea ‘a Tēvita: “He‘ikai te ke tuku au ‘i he Fa‘itoká. ‘E ‘ikai te ke tuku ‘a ho‘o tokotaha mateakí ke sio ki he luó.” (Saame 16:10) Na‘e ‘ikai feinga ‘a Tēvita ke ne pehē he‘ikai ‘aupito te ne mate pea ‘i he Fa‘itoká. ‘Oku lea‘aki mātu‘aki mahino ‘i he Folofola ‘a e ‘Otuá na‘á ne motu‘a peá ne mate pea “na‘e toka ‘a Tēvita ‘o mālōlō fakataha mo ‘ene fanga kuí pea na‘e tanu ia ‘i he Kolo-‘o-Tēvitá.” (1 Tu‘i 2:1, 10) Ko ia ‘oku ‘uhinga ‘a e veesi ko ení kia hai?

11. Ko e taimi fē na‘e fakamatala‘i ai ‘e Pita ‘a e Saame 16:10?

¹¹ Laka hake ‘i he ta‘u ‘e taha afe hili hono hiki ‘e Tēvita ‘a e ngaahi lea ko iá, na‘e fakamatala ‘a Pita ki he tokotaha na‘e ‘uhinga ki ai ‘a e Saame 16:10. ‘I ha ngaahi uike si‘i mei he pekia ‘a Sīsū peá ne toetu‘ú, na‘e lea ai ‘a Pita ki he kau Siu mo e kau ului Siu ‘e laui afe. (Lau ‘a e Ngāue 2:29-32.) Na‘á ne fakamanatu kiate kinautolu na‘e mate ‘a Tēvita pea na‘e tanu ia. Pea ‘oku ‘ikai ke pehē ‘i he Tohi Tapú na‘e ‘ikai loto-tatau ha taha ‘o kinautolu mo Pita ‘i he‘ene hoko atu ‘o pehē ko Tēvitá “na‘á ne tomu‘a sio mo ne lea ‘o kau ki he toetu‘u” ‘a e Mīsaiá.

12. Na‘e anga-fēfē hono fakahoko ‘a e Saame 16:10, pea ko e hā ‘oku fakapapau‘i ‘e he me‘a ko iá fekau‘aki mo e tala‘ofa ki he toetu‘ú?

¹² Na‘e poupou‘i ‘e Pita ‘ene poiní ‘aki ‘ene to‘o-lea mei he ngaahi lea ‘a Tēvita ‘i he Saame 110:1. (Lau ‘a e Ngāue 2:33-36.) Ko e faka‘uhinga ‘a Pita mei he Folofolá na‘e tokoni ki hono fakatuipau‘i ki he fu‘u kakaí ko Sīsuú “ko e ‘Eiki mo e Kalaisi.” Na‘e ‘ilo‘i ‘e he kakaí na‘e fakahoko ‘a e Saame 16:10 ‘i he toetu‘u ‘a Sīsū mei he pekiá. Ki mui ai, na‘e ngāue‘aki ‘e he ‘apositolo ko Paulá ‘a e fakamo‘oni tatau ‘i he‘ene lea ki he kau Siu ‘i he kolo ko ‘Aniteoke ‘i Pisitiá. Na‘e maongo mo‘oni kiate kinautolu ‘a e fakamo‘oni ko ení, pea na‘a nau loto ke fanongo ki ha me‘a lahi ange. (Lau ‘a e Ngāue 13:32-37, 42.) ‘Oku totonu ke ne fakatuipau‘i foki kitautolu ko e ngaahi kikite Fakatohitapu ko ia fekau‘aki mo ha toetu‘u ‘i he kaha‘ú na‘e alafalala‘anga neongo na‘e fakahoko ia ‘i ha ta‘u ‘e lauingeau ki mui.

13. Ko e hā ‘a e ongo fehu‘i te tau ‘eke nai fekau‘aki mo e toetu‘ú?

¹³ ‘Oku fakalototo‘a ke ‘ilo‘i ‘e lava ke hoko ha toetu‘u ‘i he ta‘u ‘e lauingeau hili hono tomu‘a  talá. Neongo ia, ‘e ‘eke nai ‘e he ni‘ihi: ‘‘Oku ‘uhinga iá te u tatali ‘i ha taimi fuoloa peá u toki sio ki he tokotaha ‘oku ou ‘ofa aí? ‘E hoko ‘afē ‘a e toetu‘ú?’ Sai, na‘e tala ‘e Sīsū ki he‘ene kau ‘apositoló na‘e ‘i ai ‘a e ngaahi me‘a na‘e ‘ikai te nau ‘ilo‘i pea he‘ikai lava ke nau ‘ilo‘i. ‘Oku ‘i ai ‘a e ngaahi fakaikiiki fekau‘aki mo e “ngaahi taimi pe ngaahi kuonga ‘a ia kuo ta‘ofi ‘e he Tamaí ki hono mafai pē ‘o‘oná.” (Ngā. 1:6, 7; Sione 16:12) Kae kehe, ‘oku tau ma‘u ha fakamatala fekau‘aki mo e taimi ‘e hoko ai ‘a e toetu‘ú.

14. Na‘e anga-fēfē ‘a e kehe ‘a e toetu‘u ‘a Sīsuú mei he ni‘ihi kehe na‘e toetu‘u ki mu‘a aí?

¹⁴ Ko e toetu‘u mahu‘inga taha ‘oku hiki ‘i he Tohi Tapú ko e toetu‘u ‘a Sīsuú. Kapau na‘e ‘ikai ke fokotu‘u hake ia mei he pekiá, he‘ikai ha taha ‘o kitautolu ‘e ‘i ai ha‘atau ‘amanaki ke toe sio ki he fa‘ahinga ‘oku tau ‘ofa aí. Ko e kakai na‘e fokotu‘u hake ki mu‘a ‘ia Sīsuú, hangē ko e fa‘ahinga na‘e fokotu‘u hake ‘e ‘Ilaisiā mo ‘Ilaisá, na‘e ‘ikai te nau mo‘ui ta‘engata. Na‘a nau toe mate pea hoko ko e efu ‘i he fa‘itoká. Ka ko Sīsuú kuo “fokotu‘u hake ia mei he pekiá.” Ko iá “he‘ikai te ne toe pekia; ‘oku ‘ikai ke kei pule kiate ia ‘a e maté.” ‘I hēvaní, ‘okú ne mo‘ui ai “‘o ta‘engata pea ta‘engata.”​—Loma 6:9; Fkh. 1:5, 18; Kol. 1:18; 1 Pita 3:18.

15. Ko e hā ‘oku ui ai ‘a Sīsū ko e “‘uluaki fuá”?

¹⁵ Ko e toetu‘u ‘a Sīsū ki hēvani ko ha tokotaha laumālié ‘a e toetu‘u ‘uluaki mo mahu‘inga taha ‘i he fa‘ahinga toetu‘u ko ení. (Ngā. 26:23) Kae kehe, ‘oku ‘ikai ko ia pē ‘a e toko taha na‘e fokotu‘u hake ki hēvaní. Na‘e tala‘ofa ‘a Sīsū ko ‘ene kau ‘apositolo faitōnungá te nau pule fakataha mo ia ‘i ai. (Luke 22:28-30) Ka te nau toki ma‘u pē ‘a e pale ko ení hili ‘enau maté. Pea ‘i he hangē ko Sīsuú, ‘e fokotu‘u hake kinautolu mo ha sino fakalaumālie. Na‘e tohi ‘e Paula ‘o pehē “kuo ‘osi fokotu‘u hake ‘a Kalaisi mei he maté, ko e ‘uluaki fua ia ‘i he fa‘ahinga kuo mohe ‘i he maté.” Na‘e pehē leva ‘e Paula ‘e ‘i ai mo e ni‘ihi kehe ‘e fokotu‘u hake pea te nau ō ki hēvani: “Ko e tokotaha taki taha ‘i hono fakahokohoko totonu: Ko Kalaisi ‘a e ‘uluaki fuá, hili iá ko e fa‘ahinga ‘oku ‘o e Kalaisí ‘i he lolotonga ‘o ‘ene ‘i hení.”​—1 Kol. 15:20, 23.

16. Ko e hā ‘a e fakalika ‘oku tau ma‘u fekau‘aki mo e taimi ‘e hoko ai ‘a e toetu‘u fakahēvaní?

¹⁶ Ko e ngaahi lea ‘a Paulá ‘oku ‘omi ai kiate kitautolu ha fakalika ki he taimi ‘e hoko ai ‘a e toetu‘u fakahēvaní. ‘E hoko ia lolotonga ‘a e ‘i heni ‘a Kalaisí. Kuo fakamo‘oni‘i ‘e he Kau Fakamo‘oni ‘a Sihová ‘i he ngaahi ta‘u lahi mei he Tohi Tapú ko e “i heni” ‘a Kalaisí na‘e kamata ‘i he 1914. ‘Oku tau lolotonga mo‘ui ‘i he‘ene ‘‘i hení,’ pea ko e ngata‘anga ‘o e fokotu‘utu‘u fulikivanu ko ení ‘oku ofi ‘aupito.

17, 18. Ko e hā ‘e hoko ki he kau pani ‘e ni‘ihi lolotonga ‘a e ‘i heni ‘a Kalaisí?

¹⁷ ‘Oku fakamatala ‘a e Tohi Tapú ki he me‘a lahi ange fekau‘aki mo e toetu‘u fakahēvaní: “‘Oku ‘ikai ke mau loto ke mou hoko ‘o ta‘e‘ilo  fekau‘aki mo e kaha‘u ‘o e fa‘ahinga ‘oku nau mohe ‘i he maté . . . He kapau ‘oku tau tui na‘e pekia ‘a Sīsū peá ne toetu‘u hake, ‘e pehē pē ‘a hono fakafoki mai ‘e he ‘Otuá ke fakataha mo ia ‘a e fa‘ahinga kuo nau mohe ‘i he maté . . . Ko kitautolu kau mo‘uí ‘a ia ‘oku tau hao mo‘ui atu ‘o a‘u ki he ‘i heni ‘a e ‘Eikí ‘e ‘ikai ‘aupito te tau mu‘omu‘a ‘i he fa‘ahinga ko ia kuo nau mohe ‘i he maté; koe‘uhí ‘e ‘alu hifo ‘a e ‘Eikí mei hēvani ‘o ne ‘oatu ha tu‘utu‘uni, . . . pea ko e fa‘ahinga ‘oku nau mate ‘i he fā‘ūtaha mo Kalaisí te nau ‘uluaki toetu‘u hake kinautolu. Hili iá ko kitautolu kau mo‘uí ‘a ia ‘oku tau hao mo‘ui atú ‘e ‘ohake kitautolu, fakataha mo kinautolu ‘i he ngaahi ‘aó ke fetaulaki mo e ‘Eikí ‘i he langí; pea ko ia ai, te tau ‘i he ‘Eikí ma‘u ai pē.”​—1 Tes. 4:13-17.

¹⁸ Ko e ‘uluaki toetu‘ú ‘e hoko ia ‘i ha taimi hili ‘a e kamata ‘o e ‘i heni ‘a Kalaisí. Ko e kau pani ‘e mo‘ui lolotonga ‘a e fu‘u mamahi lahí ‘e ‘‘ohake kinautolu ‘i he ngaahi ‘aó.’ (Māt. 24:31) ‘Oku ‘uhinga ia ki he hā? Ko e fa‘ahinga ‘e “‘ohake” ‘e ‘ikai te nau “mohe ‘i he maté,” ‘a ia, ‘e ‘ikai te nau mate ai pē ‘i ha taimi fuoloa. ‘I hono kehé, ‘i he taimi te nau mate aí, te nau “liliu kotoa pē, ‘i ha fo‘i mōmeniti, ‘i ha fo‘i kemo pē ‘a e matá, ‘i he lolotonga ‘a e ifi ‘a e talupite faka‘osí.”​—1 Kol. 15:51, 52.

19. Ko e hā ‘a e “toetu‘u lelei ange”?

¹⁹ ‘I he ‘ahó ni, ko e tokolahi taha ‘o e kau Kalisitiane faitōnungá ‘oku ‘ikai pani kinautolu pea ‘oku ‘ikai fili kinautolu ke nau pule fakataha mo Kalaisi ‘i hēvani. Ka, ‘oku nau fakatu‘amelie atu ki he “‘aho ‘o Sihová,” ki he taimi te ne fakangata ai ‘a e māmani fulikivanu ko ení. ‘Oku ‘ikai ha taha te ne ‘ilo‘i ‘a e taimi tofu pē ‘e hoko ai ‘a e ngata‘anga ko ení, ka ‘oku fakahaa‘i ‘i he fakamo‘oní ‘oku ofi ia. (1 Tes. 5:1-3) ‘I he hoko mai ‘a e māmani fo‘ou ‘a e ‘Otuá, ‘e ‘i ai ha fa‘ahinga kehekehe ‘o e toetu‘ú. ‘I he taimi ko iá, ‘e fokotu‘u hake ‘a e kakaí ke nau mo‘ui ‘i māmani pea te nau ma‘u ‘a e ‘amanaki ‘o e hoko ‘o haohaoa pea ‘ikai ‘aupito ke nau toe mate. ‘E hoko eni ko ha “toetu‘u lelei ange” ‘i he toetu‘u ‘a e fa‘ahinga ‘i he kuohilí ‘a ia na‘e fokotu‘u hake ka na‘a nau toe mate ‘i ha taimi ki mui ai.​—Hep. 11:35.

20. Ko e hā ‘oku lava ai ke tau falala ‘e fokotu‘utu‘u maau ‘a e toetu‘ú?

²⁰ ‘Oku pehē ‘e he Tohi Tapú ko e fa‘ahinga ‘oku ō ki hēvaní ‘oku fokotu‘u hake ‘a e “tokotaha taki taha ‘i hono fakahokohoko totonu.” (1 Kol. 15:23) Ko ia ‘e lava ke tau falala ko e toetu‘u ‘i he māmaní ‘e fakahokohoko mo ia, pe ‘e fokotu‘utu‘u maau. ‘E fakatupunga nai ai ke tau ‘eke: ‘E fokotu‘u hake ‘a e fa‘ahinga na‘e toki mate ki mui ní ofi ki he kamata ‘o e Pule Ta‘u ‘e Taha Afe ‘a Kalaisí pea talitali lelei kinautolu ‘e honau ngaahi ‘ofa‘anga ‘oku nau ‘ilo‘i kinautolú? ‘E toetu‘u mai ki mu‘a ange ‘a e kau tangata faitōnunga mei he kuohilí ‘a ia na‘a nau hoko ko e kau taki pōto‘í ke nau tokoni ki hono fokotu‘utu‘u ‘a e kakai ‘a e ‘Otuá ‘i he māmani fo‘oú? Ko e hā ‘e hoko ki he kakai na‘e ‘ikai ‘aupito te nau tauhi kia Sihová? ‘E fokotu‘u hake kinautolu ‘afē pea ‘i fē? ‘Oku lahi ‘aupito ‘a e ngaahi fehu‘i ‘e lava ke tau ‘eké. Ka ‘oku ‘ikai fiema‘u ke tau hoha‘a fekau‘aki mo e ngaahi me‘á ni ‘i he taimí ni. ‘Oku lelei ange pē ke tau tatali anga-kātaki. ‘Oku lava ke tau falala ‘e fakalotomāfana ‘a e sio ki he founga ‘e fai ai ‘e Sihova ‘a e ngaahi me‘á.

21. Ko e hā ho‘o ‘amanakí?

²¹ ‘Oku totonu ke tau fakaivimālohi‘i ‘etau tui kia Sihová, kae ‘oua kuo toki a‘u ki he taimi ko iá. Na‘á ne tala‘ofa fakafou ‘ia Sīsū ko e kau maté ‘oku ‘i He‘ene manatú pea te nau toe mo‘ui. (Sione 5:28, 29; 11:23) Ko ha toe fakamo‘oni ‘e fokotu‘u hake ‘e Sihova ‘a e kau maté, na‘e pehē ‘e Sīsū ‘i he taimi ‘e taha ko ‘Ēpalahame, ‘Aisake, pea mo Sēkope “‘oku nau mo‘ui kotoa pē kiate ia.” (Luke 20:37, 38) ‘Oku hā mahino, ‘oku lahi ‘a e ngaahi ‘uhinga lelei ke tau lea ai ‘o hangē ko e ‘apositolo ko Paulá: “‘Oku ou ma‘u ‘a e ‘amanaki ki he ‘Otuá . . . ‘e ‘i ai ‘a e toetu‘u.”​—Ngā. 24:15.