1. Ko e hā ko ha sitepu mahu‘inga ai ‘a e papitaisó? (Sio ki he ‘uluaki fakatātā ‘i he kupú ni.)

‘I HE ta‘u kotoa pē ‘oku papitaiso ai ‘a e laui afe ‘o e kau ako Tohi Tapú. Ko e tokolahi ‘o e fa‘ahingá ni ko e to‘utupu, ko e kau ta‘u hongofulu tupu pe si‘i ange ai. Na‘e ‘ohake nai kinautolu ‘i he mo‘oní. Ko e taha koe ‘o kinautolu? Kapau ko ia, kuó ke fai ha me‘a lelei ‘aupito. Kuo pau ke papitaiso ‘a e Kalisitiane kotoa pē. Pea ‘oku fiema‘u ‘a e papitaisó koe‘uhi ke ne ma‘u ai ‘a e fakamo‘uí pea mo‘ui ta‘engata.​—Māt. 28:19, 20; 1 Pita 3:21.

2. Ko e hā ‘oku ‘ikai totonu ai ke ke ilifia ‘i hono fai ha fakatapui kia Sihová?

² ‘I ho‘o papitaisó, na‘e kamata ke tāpuaki‘i koe ‘e Sihova ‘i he ngaahi founga fo‘ou lahi. Ka na‘á ke toe ma‘u foki ‘a e ngaahi fatongia fo‘ou. ‘I he founga fē? ‘I he ‘aho ‘o ho‘o papitaisó, ko e tokoua na‘á ne fai ‘a e malanga papitaisó na‘á ne ‘eke: “Makatu‘unga ‘i he feilaulau ‘a Sīsū Kalaisí, kuó ke fakatomala mei ho‘o ngaahi angahalá pea fakatapui koe kia Sihova ke fai hono finangaló?” Na‘á ke tali ‘io. Na‘á ke palōmesi te ke ‘ofa kia Sihova pea ‘ai ‘a ho‘o tauhi kiate iá ko e me‘a  mahu‘inga taha ia ‘i ho‘o mo‘uí. ‘Oku totonu ke ke faka‘ise‘isa ‘i hono fai ‘a e palōmesi mafatukituki ko iá? Mole ke mama‘o! ‘E ‘ikai ‘aupito te ke faka‘ise‘isa ‘i ho‘o faka‘atā ‘a Sihova ke ne tataki ‘a ho‘o mo‘uí. Ko e fa‘ahinga ‘oku ‘ikai ke nau ‘ilo‘i ‘a Sihová ko e konga kinautolu ‘o e māmani ‘o Sētané. ‘Oku ‘ikai ‘aupito ha tokanga ‘a e Tēvoló kiate kinautolu pe ko koe. Ko hono mo‘oní, te ne fiefia kapau ‘e mole ‘a ho‘o ‘amanaki ke mo‘ui ta‘engatá koe‘uhí ko ho‘o kau ki he‘ene fa‘ahí pea si‘aki ‘a Sihova.

3. Kuo anga-fēfē hono tāpuaki‘i koe ‘e Sihova koe‘uhi ko ho‘o fakatapui kiate iá?

³ Fakakaukau ki he founga kuo tāpuaki‘i ai koe ‘e Sihova koe‘uhi ko ho‘o fakatapui kiate ia pea papitaisó. Na‘á ke foaki ‘a ho‘o mo‘uí kia Sihova, ko ia ‘e lava ai ke ke lea fakataha mo e tuipau: “‘Oku kau mo au ‘a Sihova; ‘e ‘ikai te u ilifia. Ko e hā ‘e lava ke fai mai ‘e he tangatá kiate au?” (Saame 118:6) ‘Oku ‘ikai ha lāngilangi ‘e toe lahi ange ‘i he kau ki he fa‘ahi ‘a Sihová pea ‘i he ‘ilo‘i ‘okú ne laukau‘aki koé.

4, 5. (a) Ko e hā ‘e lava ai ke tau pehē ko ha fatongia fakafo‘ituitui ‘a e fakatapuí? (e) Ko e hā ‘a e ngaahi pole ‘oku ma‘u ‘e he kau Kalisitiane ‘i he ta‘umotu‘a kehekehe?

⁴ He‘ikai lava ke ke vakai ki ho vaha‘angatae mo Sihová ‘oku hangē ha telefoni to‘oto‘o na‘e fakatau atu ‘e ho‘o ongo mātu‘á. Neongo kapau ‘okú ke kei nofo mo ho‘o ongo mātu‘á, ko ho vaha‘angatae mo Sihová ko ho fatongia fakafo‘ituitui ia ‘o‘ou. Ko e hā ‘oku mahu‘inga ai ke manatu‘i iá? ‘Oku ‘ikai ha taha ‘iate kitautolu ‘e lava ke ne ‘ilo‘i ‘a e founga tofu pē ‘e ‘ahi‘ahi‘i ai ‘etau tuí ‘i he kaha‘ú. Ko e fakatātaá, kuó ke papitaiso nai ki mu‘a ke ke ta‘u hongofulu tupú. Ka ko eni ‘okú ke ta‘u hongofulu tupu, ‘oku fo‘ou ‘a ho‘o ongo‘í pea ‘i ai mo ho‘o palopalema fo‘ou. Na‘e pehē ‘e ha ta‘ahine ta‘u hongofulu tupu: “‘I he anga-mahení he‘ikai ke fehi‘a ha ki‘i leka ‘i he‘ene hoko ko e taha ‘o e Kau Fakamo‘oni ‘a Sihová koe‘uhí pē ko e ‘ikai te ne ma‘u ha konga keke fai‘aho ‘i he ‘apiakó. Ka ‘i ha ngaahi ta‘u si‘i mei ai ‘i he hoko ‘o mālohi ange ‘a ‘ene holi ki he fehokotaki fakasinó, ‘e fiema‘u ai ke ne mātu‘aki tuipau ko e talangofua ki he ngaahi lao ‘a Sihová ‘oku hoko ma‘u pē ko e fili lelei tahá ia.”

⁵ ‘Oku ‘ikai ko e to‘utupú pē ‘a e fa‘ahinga te nau ma‘u ha ngaahi pole fo‘oú. Na‘a mo e fa‘ahinga ‘oku papitaiso ‘i he‘enau lalahí ‘oku ‘ahi‘ahi‘i ‘enau tuí ‘i he ngaahi founga ‘oku ‘ikai te nau ‘amanekina. ‘Oku hoko mai nai honau ‘ahi‘ahí mei he‘enau nofo malí, tu‘unga mo‘ui leleí, pe ko ‘enau ngāué. Tatau ai pē pe ko e hā hotau ta‘umotu‘á, ko kitautolu taki taha ‘e fiema‘u ke tau faitōnunga kia Sihova ‘i he ngaahi tu‘unga kehekehe.​—Sēm. 1:12-14.

6. (a) ‘Oku ‘uhinga ki he hā ‘a e pehē ‘oku ‘ikai fakatu‘unga ‘i ha me‘a ‘a ho‘o fakatapui kia Sihová? (e) Ko e hā ‘e lava ke ke ako mei he Filipai 4:11-13?

⁶ Ke tokoni‘i koe ke ke hanganaki faitōnungá, manatu‘i ma‘u pē ko e palōmesi na‘á ke fai kia Sihová ‘oku ‘ikai fakatu‘unga ‘i ha me‘a. ‘Oku ‘uhinga ení na‘á ke palōmesi ki he Fungani Mā‘olungá te ke tauhi kiate ia ‘o tatau ai pē pe ko e hā ‘e hokó, neongo kapau ‘e tuku hono fai ia ‘e ho ngaahi kaume‘á pe ko ho‘o ongo mātu‘á. (Saame 27:10) ‘I he tu‘unga kotoa pē, fakapapau‘i ke ke kole kia Sihova ke ne tokoni‘i koe ke ke fai ki ho‘o palōmesi kiate iá.​—Lau ‘a e Filipai 4:11-13.

7. ‘Oku ‘uhinga ki he hā ‘a e ngāue‘i ho fakamo‘uí “‘i he manavahē mo e tetetete”?

⁷ ‘Oku loto ‘a Sihova ke ke hoko ko hono kaume‘a. Ka ‘oku fiema‘u ‘a e feinga ke tauhi ‘a e kaume‘a ko iá ke mālohi pea ke ngāue‘i ho fakamo‘uí. ‘Oku pehē ‘i he Filipai 2:12: “Mou hanganaki ngāue‘i homou fakamo‘ui ‘o kimoutolú ‘i he manavahē mo e tetetete.” ‘Oku ‘uhinga ení ‘oku fiema‘u ke tau fakakaukau fakalelei ki he founga te tau nofo ofi ai kia Sihova pea hanganaki faitōnunga ‘o tatau ai pē pe ko e hā ‘e hokó. He‘ikai lava ke tau fakahu‘unga pē te tau fai pehē. Manatu‘i na‘a mo e ni‘ihi na‘a nau tauhi ki he ‘Otuá ‘i he ngaahi ta‘u lahi kuo ‘ikai te nau kei  hanganaki faitōnunga. Ko e hā ‘a e ngaahi me‘a ‘aonga ‘e lava ke ne tokoni‘i koe ke ke ngāue‘i ho fakamo‘uí?

8. Ko e hā ‘oku kau ki he ako fakafo‘ituituí? Ko e hā ‘oku mahu‘inga aí?

⁸ Ke hoko ko e kaume‘a ‘o Sihova, ‘oku fiema‘u ke tau fanongo kiate ia pea ‘oku fiema‘u ke tau talanoa kiate ia. Ko e founga tefito ‘oku tau fanongo ai kia Sihová ko hono ako ‘a e Tohi Tapú. ‘Oku kau ki heni ‘a hono lau mo fakalaulauloto ki he Folofola ‘a e ‘Otuá mo e ‘ū tohi makatu‘unga ‘i he Tohi Tapú. Ka ko hono ako ‘a e Tohi Tapú ‘oku ‘ikai ke hangē ia ko hano ako ma‘uloto ‘a e ngaahi mo‘oni‘i me‘á hangē nai ko ia ‘okú ke fai ‘i ha sivi ‘i he akó. ‘I hono kehé, ‘oku hangē ia ko ha fononga fakafiefia ‘a ia ‘okú ke fakatotolo‘i ai ‘o ‘ilo ha ngaahi me‘a fo‘ou fekau‘aki mo Sihova. Te ke ‘unu‘unu ofi ai ki he ‘Otuá, pea te ne ‘unu‘unu ofi kiate koe foki.​—Sēm. 4:8.

9. Ko e hā ‘a e ngaahi me‘angāue na‘á ne tokoni‘i koe ‘i ho‘o ako fakafo‘ituituí?

⁹ ‘Oku tokonaki mai ‘e he kautaha ‘a Sihová ‘a e ngaahi me‘angāue lahi ‘e lava ke ne tokoni‘i koe ‘i ho‘o polokalama akó. Ko e fakatātaá, ‘oku ‘i ai ha kupu hokohoko ko e “Bible Study Activities” ‘i he konga “Teenagers” ‘a e jw.org ‘e tokoni‘i ai koe ke ke ngāue‘aki ‘a e me‘a ‘okú ke ako mei he ngaahi talanoa Fakatohitapú. Pehē foki ‘e lava ke ke ma‘u ‘i he jw.org ‘a e tataki fakaeako “Ko e Hā ‘Oku Ako‘i Mo‘oni ‘e he Tohi Tapú?” ‘E lava ke tokoni‘i koe ‘e he ngaahi me‘á ni ke langa hake ho‘o tuí pea fakamatala‘i ‘a ho‘o tuí ki he ni‘ihi kehé. ‘E lava ke ke ma‘u ha toe ngaahi fakakaukau ke ngāue‘aki ‘i ho‘o ako fakafo‘ituituí ‘i he kupu ko e “‘Oku ‘Eke ‘e he To‘utupú . . . ‘E Lava Fēfē Ke U ‘Ai ke Fakafiefia ‘a e Lau Tohi Tapú?” ‘i he ‘īsiu ‘o e ‘Ā Hake! ‘o Siulai 2009. Ko e akó mo e fakalaulaulotó ‘oku mahu‘inga ia ki hono ngāue‘i ho fakamo‘uí.​—Lau ‘a e Saame 119:105.

10. Ko e hā ‘oku fiema‘u ai ke lotu ha Kalisitiane ‘osi papitaiso?

¹⁰ ‘I he‘etau ako ‘a e Tohi Tapú, ‘oku tau fanongo ai kia Sihova, pea ‘i he‘etau lotú, ‘oku tau lea ai kiate ia. ‘Oku ‘ikai totonu ke tau fakakaukau ki he lotú ko ha tō‘onga pē pe ko ha ‘me‘a ‘omi monū’ ke tau lavame‘a ai. Ko e lotú ko e fetu‘utaki mo‘oni ia mo hotau Tokotaha-Fakatupú. Fakakaukau angé: ‘Oku loto ‘a Sihova ke fanongo ki he me‘a te ke lea‘akí! (Lau ‘a e Filipai 4:6.) Ko ia ‘i ha‘o ongo‘i loto-mo‘ua ‘i ha fa‘ahinga ‘uhinga pē, ‘oku pehē ‘e he Tohi Tapú ke ke  “lī ho‘o kavengá kia Sihova.” (Saame 55:22) ‘E lava ke tala atu kiate koe ‘e he fanga tokoua mo e fanga tuofāfine ‘e laui miliona ko e fale‘i ko ení kuó ne tokoni‘i kinautolu. ‘E lava ke ne tokoni‘i mo koe foki!

11. Ko e hā ‘oku totonu ai ke ke fakamālō ma‘u pē kia Sihová?

¹¹ Kae kehe, ‘oku ‘ikai totonu ke tau toki lotu pē ‘i he taimi ‘oku tau fiema‘u ai ke tokoni‘i kitautolu ‘e Sihová. ‘Oku fakamanatu mai ‘e he Tohi Tapú: “Mou fai ma‘u pē ‘a e fakamālō.” (Kol. 3:15) ‘I he taimi ‘e ni‘ihi ‘oku tau hoha‘a tōtu‘a ai fekau‘aki mo ‘etau ngaahi palopalemá ‘o ‘ikai ai ke tau fakatokanga‘i ‘a e ngaahi me‘a lelei kotoa ‘oku tau ma‘ú. Ko ia ‘ahi‘ahi‘i eni: ‘I he ‘aho kotoa pē, fakakaukau ki he me‘a ‘e tolu ‘okú ke hounga‘ia ai, pea fakamālō leva kia Sihova ‘i he ngaahi me‘a ko iá. Ko ha ta‘ahine ta‘u hongofulu tupu ko Abigail, ‘a ia na‘e papitaiso ‘i he‘ene ta‘u 12, ‘okú ne pehē: “‘Oku ou ongo‘i ‘oku tuha ‘a Sihova mo ‘etau fakamāloó ‘o mahulu atu ia ‘i ha toe taha pē ‘i he ‘univēsí. ‘Oku totonu ke tau fakamālō kiate ia ‘i he faingamālie kotoa pē ‘i he ngaahi me‘a‘ofa kuó ne ‘omai kiate kitautolú.” ‘I he taimi ‘e ni‘ihi ‘oku ‘eke ai ‘e Abigail kiate ia ‘a e fo‘i fehu‘i ko eni na‘á ne fanongo ai ki mu‘a: “Kapau te u ‘ā hake ‘apongipongi mo e ngaahi me‘a pē na‘á ku fakamālō ai kia Sihova ‘i he ‘aho ní, ko e hā ‘a e me‘a tofu pē te u ma‘ú?” * (Sio ki he fakamatala ‘i lalo.)

12, 13. Kuo anga-fēfē ho‘o hokosia fakafo‘ituitui ‘a e lelei ‘o Sihová, pea ko e hā ‘oku mahu‘inga ai ke ke fakakaukau ki he anga hono tokoni‘i koe ‘e Sihová?

¹² Na‘e tokoni‘i ‘e Sihova ‘a Tu‘i Tēvita ke ne kātekina ‘a e ngaahi tu‘unga faingata‘a lahi. Ko ia na‘e lea ai ‘a Tēvita mei he‘ene hokosia fakafo‘ituituí ‘i he‘ene pehē: “Mou ‘ahi‘ahi‘i ke mou ‘ilo ‘oku lelei ‘a Sihova; fiefia ē ko e tangata ‘oku hūfanga kiate iá.” (Saame 34:8) ‘Oku fakahaa‘i mai ‘i he veesi ko ení ‘oku fiema‘u ke tau hokosia tonu ‘a e lelei ‘o Sihová. ‘I ho‘o lau ‘a e Tohi Tapú mo ‘etau ‘ū tohí pea ma‘u ‘etau ngaahi fakatahá, ‘okú ke ako ai ki he anga hono tokoni‘i ‘e he ‘Otuá ‘a e ni‘ihi kehé ke nau hanganaki faitōnungá. Ka ‘i he hoko ‘o mālohi ange ho vaha‘angatae mo Sihová, ‘oku fiema‘u ke ke sio ki he anga hono tokoni‘i koe ‘e Sihová. Kuó ke hokosia fakafo‘ituitui ‘a e lelei ‘o Sihová?

¹³ Kuo hokosia ‘e he Kalisitiane kotoa pē ‘a e lelei ‘o Sihová ‘i ha founga makehe. Na‘á ne fakaafe‘i ‘a kitautolu taki taha ke tau ‘unu‘unu ofi kiate ia mo hono ‘Aló. Na‘e pehē ‘e Sīsū: “‘Oku ‘ikai ha tangata ‘e lava ke ha‘u kiate au kae ‘oua kuo tohoaki mai ia ‘e he Tamaí, ‘a ia na‘á ne fekau mai aú.” (Sione 6:44) ‘Okú ke ongo‘i kuo tohoaki‘i mai koe ‘e Sihova kiate ia? Pe ‘okú ke fakakaukau, ‘Na‘e tohoaki‘i mai ‘e Sihova ‘a ‘eku ongo mātu‘á kiate ia pea ‘oku ou muimui ai pē’? Manatu‘i ‘i he taimi na‘á ke fakatapui ai kia Sihova pea papitaisó, na‘á ke toki ma‘u ai ha vaha‘angatae makehe mo ia. ‘Oku tala mai ‘e he Tohi Tapú: “Kapau ‘oku ‘ofa ha taha ki he ‘Otuá, ko e tokotahá ni ‘okú ne ‘afio‘i mai ia.” (1 Kol. 8:3) Koloa‘aki ma‘u pē ‘a e tu‘unga kuo ‘oatu ‘e Sihova kiate koe ‘i he‘ene kautahá.

14, 15. ‘E lava fēfē ke tokoni‘i koe ‘e he ngāue fakamalangá ke ke ma‘u ha tui mālohi ange?

¹⁴ ‘Okú ke toe hokosia ‘a e lelei ‘o Sihová ‘i he‘ene ‘oatu ‘a e loto-to‘a ke ke talanoa mo e ni‘ihi kehé ki ho‘o tuí, ‘i he ngāue fakamalangá pe ‘i he ‘apiakó. ‘E lava ke faingata‘a ‘a e malanga ki ho ngaahi kaungāakó. Te ke hoha‘a nai fekau‘aki mo e tali te nau faí. ‘E lava ke fakatupu tailiili tautefito ‘i he taimi ‘okú ke fakamatala‘i ai ho‘o tuí ‘i he ‘ao ‘o ha fu‘u tokolahi. Ko e hā ‘e lava ke ne tokoni‘i koé?

¹⁵ Fakakaukau ki he ‘uhinga ‘o ho‘o tui ki he me‘a ‘okú ke tui ki aí. Kapau ‘oku ala ma‘u ‘a e tataki fakaeako ‘i he jw.org ‘i ho‘o leá, fakapapau‘i ke ke ngāue‘aki ia. ‘E lava ke ne tokoni‘i koe ke ke fakakaukau ki he me‘a ‘okú ke tui ki aí,  ‘uhinga ‘okú ke tui ai ki aí, mo e founga ‘e lava ke ke fakamatala‘i ai ho‘o tuí ki he ni‘ihi kehé. ‘I ho‘o tuipau mo‘oni pea teuteu leleí, te ke loto ai ke faifakamo‘oni fekau‘aki mo Sihova.​—Sel. 20:8, 9.

16. Ko e hā ‘e lava ke ne ‘ai koe ke ke loto-to‘a ke lea fekau‘aki mo ho‘o tuí?

¹⁶ Neongo kapau na‘á ke teuteu lelei, te ke kei manavasi‘i pē nai fekau‘aki mo hono fakamatala‘i ‘a ho‘o tuí. Ko ha tuofefine ta‘u 18, ‘a ia na‘e papitaiso ‘i he‘ene ta‘u 13, ‘okú ne pehē: “‘Oku ou ‘ilo‘i ‘a e me‘a ‘oku ou tui ki aí, ka ‘oku ou faingata‘a‘ia ‘i he taimi ‘e ni‘ihi ‘i hono fakalea ‘a ‘eku fakakaukaú.” Ko ia ‘okú ne feinga ke lea fekau‘aki mo e mo‘oní ‘i ha founga fakanatula mo fiemālie. ‘Okú ne pehē: “‘Oku talanoa tau‘atāina ‘a hoku ngaahi kaungāakó fekau‘aki mo e ngaahi me‘a ‘oku nau faí. ‘Oku totonu ke u ongo‘i tau‘atāina ke fai ‘a e me‘a tatau. Ko ia te u lave ki ha me‘a ‘i he kuohilí, hangē ko ení, ‘Na‘e fai ‘eku ako Tohi Tapu ‘i he ‘aho ‘e taha, pea . . .’ Na‘á ku hoko atu leva ki he poini ‘o ‘eku talanoá. Neongo ko e fo‘i poiní tonu ‘iate ia pē ‘oku ‘ikai ke fekau‘aki mo e Tohi Tapú, ‘oku fa‘a fie‘ilo ‘a e ni‘ihi kehé fekau‘aki mo ‘eku me‘a ‘oku fai ‘i he‘eku ako Tohi Tapú. ‘Oku nau ‘eke ‘i he taimi ‘e ni‘ihi ‘a e ngaahi fehu‘i fekau‘aki mo ia. Ko e lahi ange ‘eku ngāue‘aki ‘a e founga ko ení, ko ‘ene hoko ia ‘o toe faingofua angé. Pea ‘i he hili iá, ‘oku ou ongo‘i fiefia ma‘u pē!”

17. Ko e hā ha toe me‘a ‘e lava ke ne tokoni‘i koe ‘i ho‘o lea ki he ni‘ihi kehé?

¹⁷ ‘I he ongo‘i ‘e he ni‘ihi kehé ‘okú ke tokanga mo‘oni mo faka‘apa‘apa‘i kinautolú, ‘oku faingofua ange ai ke nau faka‘apa‘apa‘i koe mo ho‘o tuí. Ko Olivia, ‘a ia ‘okú ne ta‘u 17 ka na‘á ne papitaiso ‘i he‘ene kei si‘í, ‘okú ne pehē: “Na‘á ku ilifia ma‘u pē ‘i ha‘aku ngāue‘aki ‘a e Tohi Tapú ‘i ha talanoa, na‘a vakai mai kiate au ‘a e kakaí ‘oku ou fie lotu tōtu‘a.” Na‘e kamata leva ke ne vakai ki he ngaahi me‘á ‘i ha tu‘unga kehe. ‘I he ‘ikai ke ne fakakaukau lahi ki he‘ene ilifiá, na‘á ne fakakaukauloto: “‘Oku ‘ikai ke ‘ilo‘i ‘e he to‘utupu tokolahi ha me‘a ‘o fekau‘aki mo e Kau Fakamo‘oni ‘a Sihová. Ko kimautolu pē ‘a e Kau Fakamo‘oni ‘oku nau ‘ilo‘í. Ko ia ko e anga ‘o ‘emau tō‘ongá ‘e lava ke fakapapau‘i ai ‘a e anga ‘o e tali te nau fai maí. Fēfē kapau ‘oku mau mā pe loto-fo‘i pea faingata‘a‘ia ‘i he lea fekau‘aki mo ‘emau tuí, pe fēfē kapau ‘oku mau momou ‘i he taimi ‘oku mau lea aí? Te nau vakai mai leva kiate kimautolu ‘o hangē ‘oku ‘ikai ke mau laukau‘aki kimautolú. ‘E a‘u nai ‘o nau fai mai ha tali ta‘e‘ofa koe‘uhí ko e ‘ikai te mau loto-ma‘ú. Kae kehe, kapau te mau talanoa fiemālie pea fakapapau‘i ‘a e me‘a ‘oku mau tui ki aí, ‘o ‘ai ko ha konga anga-maheni pē ia ‘o e talanoá, ‘oku ngalingali ange ai te nau faka‘apa‘apa‘i kimautolu.”

18. Ko e hā ‘oku fiema‘u ke ke fai ‘i hono ngāue‘i ho fakamo‘uí?

¹⁸ Kuo tau ‘ilo‘i ko ha fatongia mafatukituki ‘a hono ngāue‘i ho fakamo‘uí. Ke fai ení, ‘oku fiema‘u ke ke lau mo fakalaulauloto ki he Folofola ‘a e ‘Otuá, lotu kia Sihova, pea fakakaukau lahi fekau‘aki mo e ngaahi founga kotoa kuó ne tokoni‘i fakafo‘ituitui ai koé. Ko hono fai ení ‘e tokoni‘i ai koe ke ke ma‘u ‘a e loto-ma‘u lahi ange ko Sihová ko ho Kaume‘a. ‘E ‘ai koe ‘e he me‘á ni ke ke loto ke lea ki he ni‘ihi kehé ‘o fekau‘aki mo ho‘o tuí.​—Lau ‘a e Saame 73:28.

19. Ko e hā ‘oku tuha ai mo e feinga ‘a hono ngāue‘i ho fakamo‘uí?

¹⁹ Na‘e pehē ‘e Sīsū: “Kapau ‘oku fie muimui ha taha ‘iate au, tuku ke ne si‘aki ‘e ia ia pea to‘o hake ‘ene ‘akau fakamamahí pea hanganaki muimui ‘iate au.” (Māt. 16:24) ‘Io, ke muimui ‘ia Sīsū, ko e Kalisitiane taki taha kuo pau ke ne fakatapui kia Sihova pea papitaiso. Ka ko e kamata‘anga pē eni ‘o ha mo‘ui fisifisimu‘a he taimí ni, pea ‘e taki atu ia ki he mo‘ui ta‘engata ‘i he māmani fo‘ou ‘a e ‘Otuá. Ko ia fai ‘a e me‘a kotoa pē te ke malavá ke ke hanganaki ngāue‘i ho fakamo‘uí!