‘I he 2 Kolinitō 12:2, 3, na‘e lave ai ‘a Paula ki ha tangata na‘e ‘hamusi hake ki he langi hono tolú.’ Ko hai ‘a e tangata ko iá? ‘I he tohi ki he fakataha‘anga ‘i Kolinitoó, na‘e fakamamafa‘i ‘e Paula na‘e ngāue‘aki ia ‘e he ‘Otuá ko ha ‘apositolo. (2 Kol. 11:5, 23) Na‘á ne lave leva ki he “ngaahi vīsone fakaofo mo e ngaahi me‘a fakahā ‘a e ‘Eikí.” Na‘e ‘ikai lave ‘a Paula ‘i he potutohi ko iá ki ha tokoua kehe. Ko ia, ‘oku hā mahino na‘á ne lave kiate ia tonu ko e tangata na‘á ne ma‘u ‘a e ngaahi vīsoné mo e ngaahi me‘a fakahaá.​—2 Kol. 12:1, 5.

Ko ia ko Paula ‘a e tokotaha na‘e ‘hamusi hake ki he langi hono tolú’ pea “hamusi ‘o ‘ave ki palataisi.” (2 Kol. 12:2-4) Na‘á ne ngāue‘aki ‘a e kupu‘i lea ko e “ngaahi me‘a fakahā,” ‘a ia ‘oku fakahu‘unga ai ko hono fakae‘a ‘o e me‘a ‘e hoko ‘i he kaha‘ú.

Ko e hā ‘a e me‘a na‘e sio ki ai ‘a Paula ko e “langi hono tolú”?

‘I he Tohi Tapú, ‘oku lava ke ‘uhinga ‘a e “langí” ki he langi fakamatelié. (Sēn. 11:4; 27:28; Māt. 6:26) Ka ‘oku lava ke toe ngāue‘aki ‘a e “langí” ki he ngaahi tu‘unga kehe. ‘I he taimi ‘e ni‘ihi ‘oku ‘uhinga ia ki he tu‘unga-pule fakaetangata. (Tan. 4:20-22) Pe ‘e lava ke ‘uhinga ki he tu‘unga-pule faka‘otua, hangē ko e Pule‘anga ‘o e ‘Otuá.​—Fkh. 21:1.

Na‘e sio ‘a Paula ki he “langi hono tolú.” Na‘á ne ‘uhinga ki he hā? ‘Oku fa‘a toutou lave tu‘o tolu ‘a e Tohi Tapú ki ha me‘a ke fakafofonga‘i ‘a e fakamamafa‘i, lahi, pe mālohi ‘oku toe tānaki atu ki ai. (‘Ai. 6:3; ‘Isi. 21:27; Fkh. 4:8) ‘Oku ngalingali ‘i he lave ki he “langi hono tolú,” na‘e fakamamafa‘i ‘e Paula ‘a e founga-pule lelei taha mo mā‘olunga tahá​—‘a e Pule‘anga Faka-Mīsaia fakafou ‘ia Sīsū Kalaisi mo hono kaungāpule ‘e toko 144,000. (Sio ki he Insight on the Scriptures, Vol. 1, p. 1059, 1062.) Hangē ko ia na‘e tohi ‘e he ‘apositolo ko Pitá, ‘oku tau tatali ki ha “ngaahi langi fo‘ou” ‘o fakatatau ki he tala‘ofa ‘a e ‘Otuá.​—2 Pita 3:13.

Kae fēfē ‘a e lave ‘a Paula ki he “palataisi”?

Ko e fo‘i lea “palataisi” ‘oku lava ke toe ‘uhinga ki he ngaahi me‘a kehekehe: (1) ‘I he vakai ki he mu‘aki ‘api ‘o e tangatá, ko e “palataisi” ‘oku lava ke ‘uhinga mo‘oni ia ki he māmani Palataisi ‘oku hanga mei mu‘á. (2) ‘Oku lava ke ‘uhinga ki he tu‘unga fakalaumālie ‘e fiefia ai ‘a e kakai ‘a e ‘Otuá ‘i he māmani fo‘oú. (3) Tānaki atu ki ai, ‘oku lava ke ‘uhinga ia ki he ngaahi tu‘unga fakaofo ‘i hēvani, ko e “palataisi ‘a e ‘Otuá” ‘oku lave ki ai ‘i he Fakahā 2:7.​—Sio ki he Taua Le‘o, Siulai 15, 2015, p. 8. pal. 8.

‘Oku lava ke pehē na‘e lave ‘a Paula ki he tafa‘aki kotoa ‘e tolu ko iá ‘i he 2 Kolinitō 12:4 ‘i he‘ene fakamatala ki he‘ene hokosiá.

‘I hono fakanounoú:

Ko e “langi hono tolú” na‘e lave ki ai ‘i he 2 Kolinitō 12:2 ngalingali ‘oku ‘uhinga ki he Pule‘anga Faka-Mīsaia ‘i he nima ‘o Sīsū Kalaisí mo e toko 144,000, ‘a e “ngaahi langi fo‘ou.”​—2 Pita 3:13.

Ko e “langi hono tolú” ia koe‘uhi ko e Pule‘angá ‘a e founga-pule lelei taha mo mā‘olunga tahá.

Ko e “palataisi” ‘a ia na‘e “hamusi hake” ki ai ‘a Paula ‘i he vīsoné ‘oku ngalingali ‘oku ‘uhinga ia ki he (1) māmani Palataisi ‘oku hanga mei mu‘á, (2) palataisi fakalaumālie ‘e toki hokó, ‘a ia ‘e lahi mama‘o ange ia ‘i he palataisi fakalaumālie ‘i he taimi ní, pea (3) “ko e “palataisi ‘a e ‘Otuá” ‘i hēvaní ‘a ia ‘e hoko fakataha mai mo e māmani fo‘oú.

Fakatatau ki aí, ko e palataisí ko hono fakataha‘i ia ‘o e ngaahi langi fo‘oú mo e māmani fo‘oú. ‘E hoko ia ko ha fokotu‘utu‘u fo‘ou, ‘o kau fakatou‘osi ai ‘a e Pule‘anga fakahēvaní mo e fa‘ahinga ‘o e tangatá ‘oku nau tauhi kia Sihova ‘i ha māmani palataisi.