Ngalingali ‘ikai. Na‘e ‘ikai tala ange ‘e he Tēvoló kia ‘Ivi kapau te ne kai ‘a e fua‘i‘akau na‘e tapui ‘e he ‘Otuá, ‘e hā ngali ‘okú ne mate ka ko ha konga ta‘ehāmai ‘o hono sinó (‘a ia ‘oku lau ‘e he ni‘ihi he ‘ahó ni ko ha laumālie ta‘efa‘amate) ‘e mo‘ui atu ‘i ha feitu‘u kehe. ‘I he lea fakafou ‘i he ngatá, na‘e taukave‘i ‘e Sētane kapau na‘e kai ‘e ‘Ivi ‘a e fua‘i‘akau mei he ‘akau ko iá, ‘he‘ikai mo‘oni te ne mate.’ Na‘á ne fakahu‘unga ‘e mo‘ui ai pē ‘a ‘Ivi, ma‘u ha mo‘ui lelei ange ‘i he māmaní, ko ha mo‘ui tau‘atāina mei he ‘Otuá.—Sēn. 2:17; 3:3-5.

Kapau ko e tokāteline loi ‘o e laumālie ta‘efa‘amate ‘oku ako‘i he ‘aho ní na‘e ‘ikai tupu ia mei ‘Īteni, na‘e kamata ia ‘anefē? ‘Oku ‘ikai lava ke tau fakapapau‘i. ‘Oku tau ‘ilo ko e lotu loi kotoa pē na‘e to‘o atu ia ‘i he Lōmaki ‘i he ‘aho ‘o Noá. Na‘e ‘ikai ha toe fakakaukau hala fakalotu na‘e hao ‘i he Lōmakí koe‘uhi ko Noa pē mo hono fāmilí—‘a e kau lotu mo‘oní—na‘a nau haó.

Ko ia ko e akonaki he taimí ni fekau‘aki mo e laumālie ta‘efa‘amate ‘o e tangatá kuo pau pē na‘e toki kamata ‘i he hili ‘a e Lōmakí. ‘I hono fakapuputu‘u‘i ‘e he ‘Otuá ‘a e leá ‘i Pēpelí pea movete atu ‘a e kakaí “ki he funga ‘o māmaní kotoa,” ‘oku ‘ikai ha veiveiua na‘a nau ‘ave ai ‘a e fakakaukau ko e fa‘ahinga ‘o e tangatá na‘a nau ma‘u ha laumālie ta‘efa‘amate. (Sēn. 11:8, 9) Tatau ai pē pe na‘e kamata ‘anefē ‘a e fakakaukau loí, ‘e lava ke tau fakapapau‘i ko Sētane ko e Tēvoló, “ko e tamai ia ‘a e loí,” pea ko ia na‘á ne fakatupunga iá pea na‘á ne fiefia ke sio ki he‘ene mafolalahiá.—Sione 8:44.