1. ʻOku anga-fēfē hono ueʻi kitautolu ʻe he fakalaulauloto ki he talaʻofa ʻa Sihova ki he moʻui taʻengatá?

 ʻOKU talaʻofa ʻe Sihova ko e faʻahinga ʻoku talangofua kiate iá te nau maʻu ʻa e “moʻui taʻengata.” (Loma 6:23) ʻI he taimi ʻoku tau fakalaulauloto ai ki he meʻa ʻoku ʻomai ʻe Sihova maʻatautolú, ko ʻetau ʻofa kiate iá ʻe tupu moʻoni ʻo toe mālohi ange. Fakakaukau atu angé: ʻOku ʻofa lahi ʻetau Tamai fakahēvaní ʻiate kitautolu ʻo ne ʻomai ai ʻa e meʻaʻofa ko ení koeʻuhi ke ʻoua ʻaupito ʻe fakamavaheʻi kitautolu meiate ia.

2. ʻOku anga-fēfē hono tokoniʻi kitautolu ʻe he talaʻofa ʻo e moʻui taʻengatá?

² Ko e talaʻofa ʻa e ʻOtuá ki he moʻui taʻengatá ʻokú ne tokoniʻi kitautolu ke kātekina hotau ngaahi ʻahiʻahi lolotongá. Naʻa mo e ʻi he taimi ʻoku fakamanamanaʻi ai kitautolu ʻe hotau ngaahi filí ʻaki ʻa e maté, heʻikai ke tau fakangaloku. Ko e hā hono ʻuhingá? Ko e ʻuhinga ʻe taha he ʻoku tau ʻiloʻi kapau te tau mate faitōnunga kia Sihova, te ne fokotuʻu hake kitautolu mei he maté mo e ʻamanaki ʻo e ʻikai ʻaupito ke toe mate. (Sione 5:28, 29; 1 Kol. 15:55-58; Hep. 2:15) Ko e hā ʻoku lava ai ke tau fakapapauʻi ʻoku malava ke tau moʻui taʻengatá? Fakakaukau ki he ngaahi ʻuhinga ko ení.

3. Ko e hā ʻoku lava ai ke tau fakapapauʻi ʻoku malava ke ʻai kitautolu ʻe Sihova ke tau moʻui taʻengatá? (Saame 102:12, 24, 27)

³ ʻOku tau ʻiloʻi ʻoku malava ke ʻai kitautolu ʻe Sihova ke tau moʻui taʻengata koeʻuhí ko ia ʻa e Matavai ʻo e moʻuí pea ʻokú ne moʻui taʻengata. (Saame 36:9) Fakatokangaʻi ha niʻihi pē ʻo e ngaahi veesi Tohi Tapu ʻoku fakapapauʻi ai ko Sihova kuó ne ʻi ai maʻu pē pea te ne ʻi ai maʻu pē. ʻOku pehē ʻi he Saame 90:2 ko Sihova ʻoku “mei he taʻengata ki he taʻengata.” ʻOku lave ʻa e Saame 102 ki ha poini meimei tatau. (Lau ʻa e Saame 102:12, 24, 27.) Pea naʻe hiki ʻe he palōfita ko Hapakuké fekauʻaki mo  ʻetau Tamai fakahēvaní: “ʻIkai ʻokú ke talu mei muʻa, ʻe Sihova? ʻE hoku ʻOtua, ko ʻeku Tokotaha Māʻoniʻoní, ʻoku ʻikai te ke mate.”​—Hap. 1:12.

4. ʻOku totonu ke tau hohaʻa kapau ʻoku faingataʻa ke makupusi ʻa e fakakaukau ko Sihova kuó ne ʻi ai maʻu pē? Fakamatalaʻi.

⁴ ʻOku faingataʻa ke ke makupusi ʻa e fakakaukau ko Sihová kuó ne ʻi ai “ʻi he kotoa ʻo ʻitānití”? (ʻAi. 40:28) ʻOku ʻikai foʻou ʻa e fakakaukau ko iá. Naʻe pehē ʻe ʻIlaiū fekauʻaki mo e ʻOtuá: “Ko e lahi ʻo hono ngaahi taʻú ʻoku ʻikai malava ke makupusi.” (Siope 36:26) Ka ʻoku ʻikai ke ʻuhinga pē ʻa e ʻikai ke tau mahinoʻi ha meʻa ʻoku tau pehē ai ʻoku ʻikai moʻoni. Ko e fakatātaá, neongo heʻikai nai ke tau mahinoʻi kakato ʻa e founga ʻoku ngāue ai ʻa e māmá, ʻoku ʻuhinga iá ʻoku ʻikai ke ʻi ai ha maama? ʻIkai ʻaupito! ʻI he tuʻunga meimei tatau, ko kitautolu faʻahinga ʻo e tangatá heʻikai ʻaupito lava ke tau makupusi kakato ʻa e ʻuhinga kuo ʻi ai maʻu pē ai ʻa Sihová pea te ne ʻi ai maʻu peé. Ka ʻoku ʻikai ʻuhinga ení ko e ʻOtuá ʻoku ʻikai moʻui taʻengata. Ko e moʻoni fekauʻaki mo e Tokotaha-Fakatupú ʻoku ʻikai makatuʻunga ia ʻi he meʻa ʻoku lava pe ʻikai lava ke tau mahinoʻí. (Loma 11:33-36) Pea naʻá ne ʻosi ʻi ai ki muʻa ke faʻu ʻa e ʻuniveesi matelié​—ʻo kau ai ʻa e ngaahi matavai ʻo e māmá hangē ko e laʻaá. ʻOku tau fakapapauʻi ko Sihova ko e “Tokotaha-Ngaohi ia ʻo e māmaní ʻaki hono mālohí.” ʻIo, naʻá ne ʻosi ʻi ai ki muʻa ke ne “falō atu ʻa e ngaahi langí.” (Sel. 51:15; Ngā. 17:24) Ko e hā ha toe ʻuhinga ʻoku lava ai ke tau fakapapauʻi ʻoku malava ke tau moʻui taʻengatá?

5. Ko e hā ʻa e ʻamanaki naʻe maʻu ʻe he ʻuluaki ongo mātuʻá?

⁵ Naʻe fakatupu ʻe Sihova ʻa e ngaahi meʻamoʻui ʻi he māmaní mo ha taimi fakangatangata pē ke nau moʻui ai, tuku kehe ʻa e faʻahinga ʻo e tangatá. Naʻá ne ʻoange kiate kinautolu ʻa e ʻamanaki makehe ʻo e ʻikai ʻaupito ke maté. Neongo ia, naʻe fakatokanga ʻa Sihova kia ʻĀtama: “Ko e ʻakau ʻo e ʻilo ʻo e leleí mo e koví, kuo pau ke ʻoua te ke kai mei ai, he ʻi he ʻaho te ke kai ai mei aí ko e moʻoni te ke mate.” (Sēn. 2:17) Kapau naʻe talangofua ʻa ʻĀtama mo ʻIvi kia Sihova, heʻikai ke na mate. ʻOku ʻuhinga lelei ke fakaʻosiʻaki naʻe mei faai atu pē ʻo fakaʻatā ʻe Sihova kinaua ke na kai mei he “fuʻu ʻakau ʻo e moʻuí.” Naʻe mei ʻuhinga ení naʻá na maʻu ʻa e fakapapauʻiʻanga meiate ia te na “moʻui taʻengata.” b​—Sēn. 3:22.

6-7. (a) Ko e hā ha toe meʻa ʻokú ne fakahaaʻi naʻe ʻikai fakataumuʻa ke mate ʻa e tangatá? (e) Ko e hā ʻa e ngaahi ngāue ʻokú ke fakaʻamu ke ke fakahokó? (Sio ki he fakatātaá.)

⁶ ʻOku fakatupu tokanga ʻa e lave ʻa e kau fakatotolo ʻe niʻihi ki he fakamoʻoni fakasaienisi ko  hotau foʻi ʻutó ʻokú ne maʻu ʻa e malava ke tānaki ʻa e fakamatala lahi mamaʻo ange ia ʻi he meʻa ʻoku lava ke tau tānaki ʻi he lolotonga ʻetau moʻui he taimi ní. ʻI he 2010 naʻe pehē ʻi ha kupu ʻi he pepa ko e Scientific American Mind ko e fakafuofua ʻe taha ki he meʻa ʻe lava ke tānaki ʻe hotau ʻutó ʻoku ofi ki he kikapaiti ʻe 2.5 miliona, ʻo tatau ia mo ha polokalama TV houa ʻe tolu miliona (laka hake ʻi he taʻu ʻe 300). Ko e fika ko iá ʻoku siʻisiʻi fau nai ia ʻi hono fakahoa atu ki he meʻa ʻoku malava ke tānaki ʻe hotau ʻutó. Kae kehe, ʻoku fakatātaaʻi ai naʻe faʻu ʻe Sihova hotau foʻi ʻutó ke ne tauhi ʻa e fakamatala lahi ange ʻi he meʻa ʻoku tau makupusi ʻi he taʻu pē ʻe 70 pe 80.​—Saame 90:10.

⁷ Kuo toe fakatupu ʻe Sihova ha holi mālohi ʻiate kitautolu ke moʻui ai pē. ʻOku pehē ʻe he Tohi Tapú fekauʻaki mo e faʻahinga ʻo e tangatá ko e ʻOtuá kuó ne “ʻai ʻa ʻitāniti ki honau lotó.” (Tml. 3:11) Ko e ʻuhinga ia ʻe taha ʻoku tau vakai ai ki he maté ko ha fili. (1 Kol. 15:26) Kapau te tau puke lahi, ʻoku tau tali pē ʻa e tuʻungá pea foʻi? ʻIkai. Ko e anga-mahení, ʻoku tau ʻaʻahi ki ha toketā pea mahalo ʻoku tau ngāueʻaki ha faitoʻo ke tauʻi ʻa e mahakí. Ko hono moʻoní, ʻoku tau fai ʻa e meʻa kotoa ʻoku tau malavá ke fakaʻehiʻehi mei he maté. Pea ʻi he taimi ʻoku mate ai ha taha ʻoku tau ʻofa ai, pe ko e tokotaha ko iá ʻoku kei siʻi pe taʻumotuʻa, ʻikai ʻoku tau ongoʻi ha mamahi fakaeongo loloto ʻi ha taimi fuoloa? (Sione 11:32, 33) Ko e moʻoni, heʻikai ke ʻomai ʻe hotau Tokotaha-Fakatupu ʻofá kiate kitautolu ʻa e holi mo e malava ke moʻui ai pē kapau naʻe ʻikai ko ʻene taumuʻa ki he faʻahinga ʻo e tangatá ke nau moʻui ai pē. Ka ʻoku tau maʻu ha toe ngaahi ʻuhinga fakatupu tuipau ke tui ai ʻoku lava ke tau moʻui taʻengata. Tau lāulea angé ki he niʻihi ʻo e ngaahi meʻa naʻe fai ʻe Sihova ʻi he kuohilí mo e lolotongá ni ʻoku fakamoʻoniʻi ai kuo ʻikai ke liliu ʻene muʻaki taumuʻá.

8. ʻI he fekauʻaki mo e taumuʻa ʻa Sihova kiate kitautolú, ko e hā ʻa e fakapapau ʻoku tau maʻu mei he ʻAisea 55:11?

⁸ Neongo naʻe faiangahala ʻa ʻĀtama mo ʻIvi pea ʻomai ai ʻa e maté ki heʻena fānaú, naʻe ʻikai liliu ʻe Sihova ʻene fakakaukau fekauʻaki mo ʻene taumuʻá. (Lau ʻa e ʻAisea 55:11.) ʻOku kei tuʻu pē ʻene taumuʻá ke moʻui taʻengata ʻa e faʻahinga faitōnunga ʻo e tangatá. Ko e fakamulituku ko iá ʻoku hā mahino ʻi heʻetau lāulea ki he ngaahi meʻa kuo leaʻaki mo fai ʻe Sihova koeʻuhí ke fakahoko ʻene taumuʻá.

9. Ko e hā kuo talaʻofa ʻe he ʻOtuá? (Taniela 12:2, 13)

⁹ Kuo talaʻofa mai ʻe Sihova te ne fokotuʻu hake ʻa e maté pea ʻoange kiate kinautolu ʻa e faingamālie ke moʻui taʻengata. (Ngā. 24:15; Tai. 1:1, 2) Ko e tangata faitōnunga ko Siopé naʻá ne tuipau ko Sihová ʻokú ne holi ke fokotuʻu mai ʻa e faʻahinga kuo nau maté. (Siope 14:14, 15) Ko e palōfita ko Tanielá naʻá ne ʻiloʻi ko e faʻahinga ʻo e tangatá ʻoku nau maʻu ʻa e ʻamanaki ke nau toetuʻu fakataha mo e faingamālie ke moʻui taʻengata. (Saame 37:29; lau ʻa e Taniela 12:2, 13.) Ko e kau Siu ʻi he ʻaho ʻo Sīsuú naʻa nau ʻiloʻi foki ko Sihova ʻe lava ke ne ʻoange ki heʻene kau sevāniti faitōnungá ʻa e “moʻui taʻengatá.” (Luke 10:25; 18:18) Naʻe toutou lave ʻa Sīsū ki he talaʻofa ko ení, pea ko ia tonu naʻe fokotuʻu mai ʻe heʻene Tamaí.​—Māt. 19:29; 22:31, 32; Luke 18:30; Sione 11:25.

10. Ko e hā ʻoku fakamoʻoniʻi ʻe he ngaahi toetuʻu ʻi he kuohilí? (Sio ki he fakatātaá.)

¹⁰ Ko Sihova ʻa e Tokotaha Foaki-Moʻuí pea ʻokú ne maʻu ʻa e mālohi ke toe fokotuʻu mai ʻa e kakaí. Naʻá ne fakaivia ʻa e palōfita ko ʻIlaisiaá ke fokotuʻu mai ʻa e tama ʻa e uitou ʻo Salepitá. (1 Tuʻi 17:21-23) Ki mui ai, ʻi he tokoni ʻa e ʻOtuá, ko e palōfita ko ʻIlaisá naʻá ne fokotuʻu mai ʻa e tama ʻa ha fefine Sūnemi. (2 Tuʻi 4:18-20, 34-37) Ko e ongo toetuʻu ko iá mo e ngaahi toetuʻu kehe ʻoku fakamoʻoniʻi ai ʻoku maʻu ʻe Sihova ʻa e mālohi ke toe fokotuʻu mai ʻa e kakaí. ʻI he ʻi māmani ʻa Sīsuú, naʻá ne fakamoʻoniʻi kuo ʻoange ʻe heʻene Tamaí ʻa e mālohi ko iá kiate ia. (Sione 11:23-25, 43, 44) ʻI he taimí ni ʻoku ʻi hēvani ʻa Sīsū pea kuo tuku kiate ia “ʻa e mafai kotoa pē ʻi hēvani mo māmani.” Ko ia ai, ʻokú ne ʻi ha tuʻunga ke fakahoko ʻa e talaʻofa “ko e faʻahinga kotoa ʻi he ngaahi fonualoto fakamanatú” ʻe fokotuʻu mai kinautolu mo e ʻamanaki ʻo e moʻui ai pē ʻo taʻengata.​—Māt. 28:18; Sione 5:25-29.

11. ʻOku anga-fēfē hono ʻai ʻe he huhuʻí ke malava ke tau moʻui taʻengatá?

¹¹ Ko e hā naʻe fakaʻatā ai ʻe Sihova ʻa hono ʻAlo ʻofeiná ke pekia ʻi ha mate fakamamahí? Naʻe fakahaaʻi ʻe Sīsū ʻa e ʻuhingá, ʻi heʻene pehē: “Naʻe ʻofa lahi ʻaupito ʻa e ʻOtuá ki he māmaní ʻo ne foaki ai hono ʻAlo tofu-pē-taha-ne-fakatupú, koeʻuhi ko e tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.” (Sione 3:16) ʻI hono foaki ʻe he ʻOtuá ʻa hono ʻAló ko ha huhuʻi ke ʻufiʻufi ʻetau angahalá, ʻokú ne ʻai ai ke malava ʻo tau maʻu ʻa e moʻui taʻengatá. (Māt. 20:28) Naʻe fakamāʻopoʻopo ʻe he ʻapositolo ko Paulá ʻa e konga mahuʻinga ko eni ʻo e taumuʻa ʻa e ʻOtuá ʻi heʻene tohi: “Koeʻuhi naʻe fou mai ʻa e maté ʻi ha tangata, ko e toetuʻu ʻa e maté ʻoku toe fou mai ia ʻi ha tangata. ʻOku mate kotoa pē koeʻuhi ko ʻĀtama, pehē foki ʻe toetuʻu kotoa pē koeʻuhi ko Kalaisi.”​—1 Kol. 15:21, 22.

12. ʻE anga-fēfē tokoni ʻa e Puleʻangá ke fakahoko ʻa e taumuʻa ʻa Sihova kiate kitautolú?

¹² Naʻe akoʻi ʻe Sīsū hono kau muimuí ke lotu ke hoko mai ʻa e Puleʻanga ʻo e ʻOtuá pea ke fakahoko ʻa e finangalo ʻo e ʻOtuá ʻi he māmaní. (Māt. 6:9, 10) Ko e konga ʻo e taumuʻa ʻa e ʻOtuá ki he faʻahinga ʻo e tangatá ke nau moʻui taʻengata ʻi he māmaní. Ke fakahoko iá, kuo fakanofo ʻe Sihova ʻa hono ʻAló ko e Tuʻi ʻo e Puleʻanga Faka-Mīsaiá. Kuo fakatahatahaʻi ʻe he ʻOtuá ha kakai ʻe toko 144,000 mei he māmaní ke ngāue fakataha mo Sīsū ʻi hono fakahoko ʻa e finangalo ʻo e ʻOtuá.​—Fkh. 5:9, 10.

13. Ko e hā ʻoku fakahoko ʻe Sihova he taimi ní, pea ʻoku anga-fēfē hoʻo kaunga ki aí?

 ¹³ Ko Sihova ʻokú ne tohoakiʻi mai he taimí ni ha “fuʻu kakai lahi” pea akoʻi kinautolu ke nau moʻui ʻi he malumalu ʻo hono Puleʻangá. (Fkh. 7:9, 10; Sēm. 2:8) Neongo ʻa e moʻui ʻi he ʻahó ni ʻi ha māmani ʻoku māvahevahe ʻi he manavaheé mo e taú, ko e faʻahinga ʻoku faʻuʻaki ʻa e kulupu ko ení ʻoku nau feinga ke ikuʻi ʻa e kotoa ʻo e tāufehiʻa fakafonua, fakamatakali mo e fakafoʻituitui. Kuo nau ʻosi tuki fakaefakatātā ʻenau ngaahi heletaá ke hoko ko e ngaahi mataʻi-palau. (Mai. 4:3) ʻI he ʻikai ke kau ʻi he taú ʻa ia ʻokú ne fakatupunga ʻa e mate lahi fau, ʻoku nau tokoniʻi ʻa e kakaí ke maʻu ʻa e “moʻui moʻoní” ʻaki hono akoʻi kinautolu fekauʻaki mo e ʻOtua moʻoní mo ʻene ngaahi taumuʻá. (1 Tīm. 6:19) Ko e ngaahi mēmipa ʻo e fāmilí te nau fakafepakiʻi nai kinautolu pe te nau tofanga ʻi ha palopalema fakapaʻanga koeʻuhi ko ʻenau poupou ki he Puleʻanga ʻo e ʻOtuá, ka ʻoku fakapapauʻi ʻe Sihova te nau maʻu ʻa e ngaahi meʻa ʻoku nau fiemaʻú. (Māt. 6:25, 30-33; Luke 18:29, 30) Ko e ngaahi moʻoniʻi meʻa ko iá ʻoku fakapapauʻi mai ai kiate kitautolu ko e Puleʻanga ʻo e ʻOtuá ʻoku moʻoni pea ʻe hokohoko atu ʻene fakahoko ʻa e taumuʻa ʻa Sihová.

14-15. ʻE anga-fēfē hono fakahoko ʻa e talaʻofa ʻa Sihova ke toʻo ʻosi atu ʻa e maté ʻo taʻengatá?

¹⁴ Ko Sīsū ʻa e Tuʻi he taimí ni ʻo e Puleʻangá ʻi hēvaní pea te ne fakahoko ʻa e ngaahi talaʻofa  kotoa kuo fai ʻe Sihová. (2 Kol. 1:20) Talu mei he 1914, kuo pule ʻa Sīsū ʻi he lotolotonga hono ngaahi filí. (Saame 110:1, 2) Ko ia mo hono kaungāpulé ʻoku vavé ni ke nau fakakakato ʻenau ikuná pea fakaʻauha ʻa e fulikivanú.​—Fkh. 6:2.

¹⁵ Lolotonga ʻa e Pule Taʻu ʻe Afe ʻa Sīsuú, ko e kau maté ʻe toe fokotuʻu hake pea ko e faʻahinga talangofua ʻo e tangatá te nau hoko ʻo haohaoa. Hili ʻa e ʻahiʻahi fakaʻosí, ko e faʻahinga ʻe fakamāuʻi ʻe Sihova ʻoku nau māʻoniʻoní “te nau maʻu ʻa e māmaní, pea te nau nofo ai ʻo taʻengata.” (Saame 37:10, 11, 29) Ko e meʻa fakafiefiá, “ko e maté, hotau fili fakaʻosí, ʻe toʻo ʻosi atu ia.”​—1 Kol. 15:26.

16. Ko e hā ʻoku totonu ke hoko ko ʻetau fakaueʻiloto tefito ki he tauhi kia Sihová?

¹⁶ Hangē ko ia naʻa tau vakai ki aí, ko ʻetau ʻamanaki ke moʻui taʻengatá ʻoku makatuʻunga fefeka ia ʻi he Folofola ʻa e ʻOtuá. Ko e ʻamanaki ko iá ʻe lava ke ne tokoniʻi kitautolu ke tau nofoʻaki mateaki lolotonga ʻa e ngaahi ʻaho fakaʻosi faingataʻa ko ení. Ka ke fakahōifuaʻi ʻa Sihová, kuo pau ke ueʻi kitautolu ʻe ha meʻa lahi ange ʻi he holi pē ke moʻui ai peé. Ko e ʻuhinga tefito ki heʻetau nofoʻaki mateaki kia Sihova mo Sīsuú ko ʻetau ʻofa loloto kiate kinauá. (2 Kol. 5:14, 15) ʻOku ueʻi kitautolu ʻe he ʻofa ko iá ke faʻifaʻitaki kiate kinaua pea vahevahe atu ki he niʻihi kehé ʻa e ʻamanaki ʻoku tau maʻú. (Loma 10:13-15) ʻI heʻetau ako ke hoko ʻo taʻesiokita mo nima-homó, ʻoku tau hoko ai ko e faʻahinga kakai ʻoku loto ʻa Sihova ke hoko ko hono ngaahi kaumeʻa ʻo taʻengata.​—Hep. 13:16.

17. Ko e hā ʻa e fatongia fakafoʻituitui ʻoku tau maʻú? (Mātiu 7:13, 14)

¹⁷ Te tau kau ʻi he faʻahinga te nau maʻu ʻa e moʻui taʻengatá? Kuo fakaava mai ʻe Sihova ʻa e matapā ki he faingamālie ko iá. Ko ia ʻoku ʻatautolu pē ke fili he taimí ni ke nofo ai pē ʻi he hala ʻoku taki atu ki he moʻuí. (Lau ʻa e Mātiu 7:13, 14.) ʻE fēfē ʻa e moʻuí ʻi he taimi te tau moʻui taʻengata aí? Te tau lāulea ki he tali ʻo e fehuʻi ko iá ʻi he kupu hokó.