Kuó ke lau fakalelei ʻa e ngaahi ʻīsiu ʻo e Taua Leʻo ʻi he taʻu ní? Sai, sio angé pe ʻe lava ke ke tali ʻa e ngaahi fehuʻi ko ení:

ʻE fakapaleʻi fēfē kitautolu kapau te tau fakamoleki ʻa e taimi ke talanoa, fanongo pea fakakaukau fekauʻaki mo Sihova?

Te tau fai ʻa e ngaahi fili lelei ange, hoko ko ha kau faiako lelei ange, maʻu ʻa e tui mālohi ange, pea tupulaki ʻetau ʻofa kia Sihová.​—w22.01, p. 30-31.

ʻE tokoni fēfē kiate kitautolu kapau ʻoku tau ako ke falala kia Sihova mo hono kau fakafofongá?

Ko e taimi eni ke ako ai ke falala ki he founga hono fai ʻe Sihova ʻa e ngaahi meʻá ʻaki ʻa e ʻikai ke fehuʻia ʻa e tataki mo e faituʻutuʻuni ʻa e kau mātuʻá. ʻI he hoko mai ʻa e fuʻu mamahi lahí, te tau mateuteu ke talangofua neongo kapau te tau maʻu ʻa e ngaahi fakahinohino ʻe hā ngali kehe pe taʻeʻuhinga.​—w22.02, p. 4-6.

Ko e hā naʻe ʻuhinga ki ai ʻa e ʻāngeló ʻi heʻene tala ange kia Sākalaia fekauʻaki mo e “palamú ʻi he nima [ʻo Kōvana] Seluipēpelí”? (Sāk. 4:8-10)

Ko e vīsone ko ení naʻá ne fakapapauʻi ki he kakai ʻa e ʻOtuá ko e temipale naʻe langá ʻa ia naʻe hā ngali ʻikai fuʻu lāngilangiʻia ki he niʻihi ʻe kakato pea ʻe fehoanaki mo e ngaahi tuʻunga ʻa Sihová.​—w22.03, p. 16-17.

ʻE lava fēfē ke tau hoko “ko ha faʻifaʻitakiʻanga . . . ʻi he lea”? (1 Tīm. 4:12)

ʻOku tau lea ʻi he anga-lelei mo e fakaʻapaʻapa ʻi he ngāue fakafaifekaú, hiva loto-kakato, tali maʻu pē ʻi he fakatahá pea lea moʻoni mo langa hake ʻa e niʻihi kehé, ʻo fakaʻehiʻehi mei he laukoví.​—w22.04, p. 6-9.

Ko e hā ʻoku fakatahaʻi ai ʻa e ngaahi tafaʻaki ʻo e fuʻu manu ʻe faá (ngaahi puleʻanga) ʻoku lave ki ai ʻi he Taniela vahe 7 ki he manu fekai pē ʻe taha hangē ko ia ʻoku fakamatalaʻi ʻi he Fakahā 13:1, 2?

Ko e manu fekai ʻi he Fakahā 13 ʻoku ʻikai ke ne fakafofongaʻi ha puleʻanga pē ʻe taha, hangē ko Lomá. ʻI hono kehé, ʻokú ne fakafofongaʻi ʻa e kotoa ʻo e ngaahi mafai fakapolitikale kuó ne puleʻi ʻa e faʻahinga ʻo e tangatá.​—w22.05, p. 9.

Ko e hā ha founga tefito ke fakahāhā ʻetau falala pau ki he fakamaau totonu ʻa e ʻOtuá?

Kapau kuo fakaʻitaʻi pe faiangahala mai ha taha kiate kitautolu, ʻoku tau feinga ke tuku ange ʻa e ʻitá mo e mamahí, ʻo tuku ʻa e ngaahi meʻá ki he toʻukupu ʻo Sihová. Te ne toʻo ʻosi atu ʻa e maumau kotoa kuo fakatupunga ʻe he angahalá.​—w22.06, p. 10-11.

Ko e hā ʻoku totonu ke manatuʻi ʻe ha tokoua ʻokú ne fai ha lotu ʻi ha fakataha?

Ko e lotú ʻoku ʻikai totonu ko ha taimi ia ke akonakiʻi ai ʻa e fakatahaʻangá pe tala fanongonongo. Tautefito ʻi he kamataʻanga ʻo ha fakataha, ko e ngāueʻaki ʻa e “ngaahi lea lahí” ʻoku ʻikai fiemaʻu ia. (Māt. 6:7)​—w22.07, p. 24-25.

ʻI he founga fē ʻe hokosia ai ʻe he “faʻahinga naʻa nau fai ʻa e ngaahi meʻa ʻoku fulikivanú” ha “toetuʻu ki he fakamaau”? (Sione 5:29)

Heʻikai ke fakahalaiaʻi kinautolu ʻo makatuʻunga ʻi heʻenau moʻui ʻi he kuohilí. ʻE siviʻi kinautolu ʻo fakatatau ki honau ʻulungaanga mo e tōʻonga hili ʻenau toetuʻú.​—w22.09, p. 18.

Ko e hā ʻa e ekinaki fakafiefia naʻe fai ʻe J. F. Rutherford ʻi he fakataha-lahi ʻi Sepitema 1922?

ʻI ha fakataha-lahi ʻi Cedar Point, Ohio, ʻAmelika, naʻá ne fanongonongo ai: “ʻOku pule ʻa e Tuʻí! Ko ʻene kau fakafofonga tuʻuakí kimoutolu. Ko ia tuʻuaki, tuʻuaki, tuʻuaki, ʻa e Tuʻí mo hono Puleʻangá!”​—w22.10, p. 3-5.

ʻI he ʻAisea vahe 30 ko e hā ʻa e founga ʻe tolu ʻoku fakamamafaʻi mai ai hono tokoniʻi kitautolu ʻe he ʻOtuá ke kātakí?

ʻOku fakahaaʻi mai ʻi he vahe ko ení ʻokú ne (1) fanongo pea tali ʻetau lotú, (2) tokonaki mai ʻa e tataki, pea (3) tāpuakiʻi kitautolu ʻi he taimí ni pea te ne fai pehē ʻi he kahaʻú.​—w22.11, p. 9.

Ko e hā ʻoku fakaʻosiʻaki ai ko e ngaahi lea ʻi he Saame 37:10, 11, 29 naʻe ʻi ai hono fakahoko ʻi he kuonga muʻá pea ʻe fakahoko ʻi he kahaʻú?

ʻOku fakamatalaʻi māʻalaʻala ʻe he ngaahi lea ʻa Tēvitá ʻa e ngaahi tuʻunga lakalakaimonū naʻe hoko ʻi ʻIsilelí, ʻo hangē ko e taimi naʻe pule ai ʻa Solomoné. Naʻe tuhu ʻa Sīsū ki ha palataisi ʻi he kahaʻú pea toʻo-lea mei he veesi 11. (Māt. 5:5; Luke 23:43)​—w22.12, p. 8-10, 14.