ʻI he taimi naʻe fekauʻi ai ʻe Sihova ʻa e faʻahinga ʻo e tangatá ke nau “fakafonu ʻa e māmaní pea mo pule ki ai,” naʻá ne fakahaaʻi ai ko e māmaní kotoa ʻe faai atu pē ʻo hoko ko ha palataisi. (Sēn. 1:28) Ko e muʻaki fekau ko iá ʻoku fakatatali mai ki he faʻahinga ʻoku nau maʻu ʻa e māmaní. Ka heʻikai ke nau maʻu ha palataisi ʻi he kamatá​—ko e ngoue ʻo ʻĪtení kuo ʻikai ke toe ʻi ai. ʻE lahi ʻa e meʻa ke fai mei he kamatá pē ʻi hono fakamaʻa ʻa e ngaahi feituʻu kuo maumauʻi he taimi ko ení. ʻE hoko ia ko ha ngāue lahi fakaʻulia!

ʻOku fakamanatu mai heni ʻa e ngāue naʻe fai ʻe he kau ʻIsilelí ʻi heʻenau foki mei Pāpiloné. Ko honau fonuá naʻe ʻikai toe nofoʻi ʻi ha taʻu ʻe 70. Ka naʻe tomuʻa tala ʻe ʻAisea fakafou ʻi he tāpuaki ʻa Sihová, ʻe malava ke nau fakafoki mai ia. Naʻe pehē ʻi he kikité: “Te ne ngaohi ʻa hono toafá ke hangē ko ʻĪtení pea mo hono toafa tokaleleí ke hangē ko e ngoue ʻa Sihová.” (ʻAi. 51:3) Naʻe lavameʻa ʻa e kau ʻIsilelí. ʻI he tuʻunga meimei tatau, fakafou ʻi he tāpuaki ʻa Sihová, ko e faʻahinga te nau maʻu ʻa e māmaní te nau  lavameʻa ʻi he pule ki aí. Pea naʻa mo e taimí ni ʻe lava foki ke ke fakahāhā ʻokú ke holi ke kau ki ai.

Ko e founga ʻe taha ko hono fai ʻa e meʻa ʻokú ke malavá ke tauhi ho ʻapí mo e ʻātakaí ke maʻa mo maau. ʻE lava ke ke fai ia neongo pe ko e hā ʻoku fai ʻe ho kaungāʻapí. ʻE lava ke ke fai ʻa e meʻa lahi ange ʻaki ʻa e tokoni ke fakamaʻa mo tauhi ʻa e Fale Fakatahaʻanga fakalotofonuá mo e Holo ʻAsemipilií. Kapau ʻoku fakaʻatā ʻe ho tuʻungá, ʻe lava foki ke ke tohi kole ke kau ʻi he pole ʻi he ngāue tokoni ʻi he fakatamakí. ʻOkú ke fakahaaʻi ai ʻoku ngalingali ʻokú ke mateuteu ke tokoni ʻo ka fiemaʻu. ʻEke hifo kiate koe, ‘Te u maʻu nai mei ai ha ngaahi pōtoʻi ʻe lava ke u ngāueʻaki kapau te u maʻu ʻa e tāpuaki ke u maʻu ʻa e māmaní?’

ʻI he hili pē hono fokotuʻu mai ʻe Sīsū ʻa e ʻofefine ʻo Siailosí, naʻá ne tala ange ʻoku fiemaʻu ke ʻoange ki he kiʻi taʻahiné ha meʻa ke ne kai. (Mk. 5:42, 43) Naʻe ʻikai nai ko ha meʻa faingataʻa ke tokangaʻi ʻa e kiʻi taʻahine taʻu 12 ko iá. Neongo ia, fakakaukau ki he ngāue lahi te tau fai ʻi he taimi ʻe fakahoko ai ʻe Sīsū ʻene talaʻofa “ko e faʻahinga kotoa ʻi he ngaahi fonualoto fakamanatú te nau fanongo ki hono leʻó pea te nau hū mai ki tuʻa.” (Sione 5:28, 29) Neongo ʻoku ʻikai ʻomai ʻi he Tohi Tapú ha ngaahi fakaikiiki lahi, ʻe lava ke tau sioloto atu ʻe fiemaʻu ʻe he kau toetuʻú ʻa e tokoni ke maʻu ʻa e meʻakai, nofoʻanga mo e vala. ʻE lava ke ke fakahāhā he taimí ni ʻokú ke loto ke mateuteu ke tokoni? Ko e ngaahi fehuʻi eni ke fakakaukau ki ai.

ʻI he fanongonongo ʻe ʻaʻahi atu ʻa e ʻovasia sēketí ki hoʻo fakatahaʻangá, ʻokú ke fakaafeʻi ia ki ha houa kai? ʻI he vaheʻi ha kau sevāniti taimi-kakato makehe mei Pēteli ki he malaʻe malangá pe ʻi he taimi ʻoku ngata ai ʻa e ngāue ʻa ha ʻovasia sēketi ʻi he ngāue fefonongaʻakí, ʻe lava ke ke tokoni ke kumi hano nofoʻanga? Kapau ʻe fakahoko ha fakataha-lahi fakavahe pe makehe ʻi ho feituʻú, ʻe lava ke ke pole ke ngāue ʻi he ki muʻa pe hili ʻa e fakataha-lahí pe ke tokoni ki hono talitali ʻa e kau maʻu fakatahá?

ʻI he fehoanaki mo e Ngāue 24:15, ʻoku tau ʻamanekina ko e kakai ʻe laui piliona ʻe toe fokotuʻu mai. Ko e tokolahi naʻe ʻikai ke nau maʻu ha faingamālie ki muʻa ke ʻiloʻi ʻa Sihova. Ko e faingamālie ko iá ʻe ʻatā kiate kinautolu hili ʻenau toetuʻú. a Ko e kau sevāniti faitōnunga taukei ʻa e ʻOtuá te nau kau ʻi he ngāue fakafaiako ko iá. (ʻAi. 11:9) Ko Charlotte, ʻa ia kuó ne malanga ʻi ʻIulope, ʻAmelika Tonga mo ʻAfilika, ʻokú ne fakatuʻotuʻa atu ki ai. ʻOkú ne fakamatala fiefia: “ʻOku ou fakatuʻotuʻa atu ke akoʻi ʻa e kakaí ʻi he toetuʻú. ʻI he taimi ʻoku ou lau ai fekauʻaki mo ha taha naʻá ne moʻui ʻi he kuohilí, ʻoku ou faʻa fakakaukau: ‘Kapau pē naʻe ʻiloʻi ʻe he tokotaha ko ení ʻa Sihova, naʻe mei kehe ʻene moʻuí.’ ʻOku ʻikai ke u faʻa tatali ke tala ki he kau toetuʻú ʻa e meʻa naʻa nau tō mei aí.”

Naʻa mo e kau sevāniti faitōnunga ʻa Sihova naʻa nau moʻui ki muʻa ke haʻu ʻa Sīsū ki he māmaní ʻe lahi ʻa e meʻa ke nau akó. Fakakaukauloto ki he fiefia mo e monū ko ia ke fakamatalaʻi kia Taniela ʻa e fakahoko ʻo e ngaahi kikite naʻá ne hikí ka naʻe ʻikai ke ne mahinoʻí. (Tan. 12:8) Pe fēfē hono tokoniʻi ʻa Lute mo Nāomi ke ʻiloʻi ʻa e kaunga hona fāmilí ki he laine hohoko ki he Mīsaiá? He meʻa fakafiefia ē ke kau ʻi he polokalama faiako ʻi māmani lahi ko iá, ʻo ʻatā mei he ngaahi tenge mo e fakahohaʻa ʻa e māmani fulikivanu ko ení!

ʻE lava fēfē ke ke fakahāhā he taimí ni ʻokú ke loto ke mateuteu ke kau ʻi he polokalama ko iá? Ko e founga mahino ʻe taha ko e feinga ke fakaleleiʻi hoʻo pōtoʻi fakafaiakó pea kau maʻu pē ʻi he ngāue fakamalanga ʻi māmani lahi ʻi he ʻaho ní. (Māt. 24:14) Neongo kapau ʻoku fakangatangata ʻe ho taʻumotuʻá pe ko e ngaahi tuʻunga kehé ʻa hoʻo ngāue he taimi ní, ko hoʻo ngaahi feingá ʻe lava ke tapua atu ai hoʻo mateuteu ke akoʻi ʻa e kau toetuʻú.

ʻIo, ko ha fehuʻi mahuʻinga eni, ʻOkú ke fakatuʻotuʻa moʻoni atu ke maʻu ʻa e māmaní? ʻOkú ke fiefia ʻi he ʻamanaki ke pule ki he māmaní, pehē foki ki hono talitali mo akoʻi ʻa e faʻahinga ʻe toetuʻú? ʻE lava ke ke fakahāhā ʻokú ke mateuteu ʻaki hono puke ʻa e ngaahi faingamālie he ʻahó ni ke kau ʻi he ngaahi ngāue ʻoku meimei tatau mo ia ʻoku fakatatali mai kiate koe ʻi he taimi te ke maʻu ai ʻa e māmaní!