Kuó ke lau fakalelei ʻa e ngaahi ʻīsiu fakamuimui ʻo e Taua Leʻo ʻi he taʻu ní? Sai, sio angé pe ʻe lava ke ke tali ʻa e ngaahi fehuʻi ko ení:

Ko e hā ʻoku kau ki hono “fakafoʻou homou ʻatamaí”? (Loma 12:2)

ʻOku kau ki ai ʻa e meʻa lahi ange ʻi hono fakafonu pē hoʻo moʻuí ʻaki ʻa e ngaahi ngāue lelei. ʻOku kau ki ai hono sivisiviʻi ʻa hotau tangata ʻi lotó pea fai ʻa e ngaahi liliu ke ʻai ʻetau moʻuí ke fehoanaki mo e ngaahi tuʻunga ʻa e ʻOtuá ʻi he ofi taha ʻe ala lavá.—w23.01, p. 8-9.

ʻE lava fēfē ke tau fakahāhā ʻa e mafamafatatau ʻi he vakai ki he ngaahi meʻa ʻoku hoko ʻi he māmaní?

ʻOku tau mahuʻingaʻia ʻi he anga hono fakahoko ʻe he ngaahi meʻa ʻoku lolotonga hoko ʻi he māmaní ʻa e kikité. ʻI he ʻikai ke fakamahaló, ʻa ia ʻe lava ke fakatupunga ai ʻa e māvahevahe, ʻoku lelei ke tau fakatefito ʻa e meʻa ʻoku tau leaʻakí ʻi he meʻa ʻoku pulusi ʻe he kautaha ʻa Sihová. (1 Kol. 1:10)—w23.02, p. 16.

ʻOku anga-fēfē kehe ʻa e papitaiso ʻa Sīsuú mei he papitaiso ʻa hono kau muimuí?

ʻI hono fanauʻi ki ha puleʻanga naʻe ʻosi fakatapui ki he ʻOtuá, naʻe ʻikai fiemaʻu ai kia Sīsū ke ne fakatapui ia kia Sihova ʻo hangē ko kitautolú. Ko Sīsuú ko ha tangata ia naʻe haohaoa mo ʻikai haʻane angahala. Naʻe ʻikai fiemaʻu ke ne fakatomala ʻi haʻane ngaahi angahala.—w23.03, p. 5.

ʻE lava fēfē ke tau tokoniʻi ʻa e niʻihi kehé ke tali ʻi he ngaahi fakatahá?

ʻE lava ke tau tauhi ʻetau ngaahi talí ke nounou, ʻo fakaʻatā ʻa e niʻihi kehé ke nau fai ha tali. ʻE lava foki ke tau fakaʻehiʻehi mei hono tali ʻa e ngaahi poini lahi. ʻE ʻi ai leva ʻa e ngaahi tafaʻaki ke tali ai ʻa e niʻihi kehé.—w23.04, p. 23.

ʻOku ʻuhinga ki he hā ʻa e “Hala ʻo e Māʻoniʻoní” ʻoku lave ki ai ʻi he ʻAisea 35:8?

Ko e hala lahi fakaefakatātā ko ení naʻe ʻuluaki ʻuhinga ia ki he hala naʻe fononga ai ʻa e kau Siú mei Pāpilone ki honau fonua tupuʻangá. Kae fēfē ʻi onopooni? ʻI he laui senituli lahi ʻo aʻu ki he 1919, ko e ngāue teuteú naʻe fakahoko—ʻoku kau ki ai ʻa hono liliu mo pulusi ʻa e Tohi Tapú. Ko e kakai ʻa e ʻOtuá kuo nau fononga ʻi he “Hala ʻo e Māʻoniʻoní” ki ha palataisi fakalaumālie, ʻa ia ʻoku taki atu ki he ngaahi tāpuaki ʻo e Puleʻangá.—w23.05, p. 15-19.

ʻI he Palōveepi vahe 9 ʻoku ʻomai ai ʻa e faleʻi ʻo makatuʻunga ʻi ha ongo fefine fakaefakatātā. Ko hai kinaua?

ʻOku lave ʻa e Palōvēpí ki ha “fefine vale” ʻa ia ko ʻene fakaafé ʻoku taki atu ki ‘Faʻitoka’ pea ko “poto moʻoni” naʻe fakahoa ki ha fefine, ʻa ia ko ʻene fakaafé ʻoku taki atu ki he “hala ʻo e mahinó” mo e moʻuí. (Pal. 9:​1, 6, 13, 18)—w23.06, p. 22-24.

Naʻe anga-fēfē hā mahino ʻa e anga-fakatōkilalo mo e fakaʻatuʻi ʻa e ʻOtuá ʻi heʻene fakafeangai kia Loté?

Naʻe fakahinohino ʻe Sihova kia Lote ke ne hola ki he feituʻu moʻungaʻiá. ʻI he kōlenga ʻa Lote ke kumi hūfanga ʻi Soá, naʻe tali ʻe he ʻOtuá ʻene kolé.—w23.07, p. 21.

Ko e hā ʻe lava ke fai ʻe ha uaifi kapau ʻoku sio ʻa hono hoá ʻi he ʻata fakalieliá?

Kuo pau ke ne manatuʻi ʻoku ʻikai ko ia ke tukuakiʻi ki he meʻá ni. ʻOku totonu ke ne tokangataha ki hono vahaʻangatae mo e ʻOtuá pea fakalaulauloto ki he ngaahi talanoa Fakatohitapu fekauʻaki mo e kakai fefine hohaʻatuʻu naʻa nau maʻu ha fakafiemālie meiate ia. ʻE lava ke ne tokoniʻi hono hoá ke fakaʻehiʻehi mei he ngaahi feituʻu ʻe ala fakataueleʻi ai iá.—w23.08, p. 14-17.

ʻI hono poleʻi ʻetau ngaahi tuí, ʻe lava fēfē ke tokoniʻi kitautolu ʻe he vavanga fakaefakakaukaú ke anga-maluú?

ʻE lava ke tau vakai ki he fehuʻí pe ko e polé ko ha founga ke ʻiloʻi ai ʻa e meʻa ʻoku fakakaukau ki ai ʻa e niʻihi kehé pe tokanga fekauʻaki mo iá. Te tau mateuteu lelei ange ai ke fakafeangai ʻi ha founga anga-malū.—w23.09, p. 17.

Ko e hā ʻe lava ke tau ako meia Mele fekauʻaki mo hono maʻu ʻo e mālohí?

ʻI hono ʻiloʻi ʻe Mele te ne hoko ko e faʻē ʻa e Mīsaiá, naʻá ne maʻu ʻa e mālohi mei he niʻihi kehé. Naʻe ʻoange ʻe Kepaleli mo ʻIlisapesi ʻa e fakalototoʻa mei he Folofolá kia Mele. Ko kitautolu foki ʻe lava ke tau maʻu ʻa e mālohi mei hotau kaungālotú.—w23.10, p. 15.

ʻE anga-fēfē nai hono tali ʻe Sihova ʻetau ngaahi lotú?

ʻOkú ne talaʻofa te ne tali ʻetau ngaahi lotú pea fakakaukau ki he anga ʻo ʻenau felāveʻi mo ʻene taumuʻá. (Sel. 29:12) Te ne tali nai ʻa e ngaahi kole meimei tatau ʻi he ngaahi founga kehekehe, ka te ne poupouʻi maʻu pē kitautolu.—w23.11, p. 21-22.

ʻI he Loma 5:2 ʻoku lave ai ki he “ʻamanaki,” ko ia ko e hā ʻoku toe lave ai ki ai ʻi he veesi 4?

ʻI he fanongo ki he ongoongo leleí, ʻe maʻu nai ʻe ha tokotaha ʻa e ʻamanaki ʻo e moʻui taʻengata ʻi ha palataisi ʻi he māmaní. Ka ʻi heʻene fehangahangai mo e ngaahi mamahí, kātekina ia pea maʻu ʻa e hōifua ʻa e ʻOtuá, ko ʻene ʻamanakí ʻoku ngalingali ʻe tupu ʻo toe mālohi ange pea toe moʻoni ange kiate ia fakafoʻituitui.—w23.12, p. 12-13.