1. Ko e hā kuo pau ke fai ʻe ha tangata Kalisitiane ke hoko ai ʻo lavameʻá?

 NAʻE ʻoange ʻe Tuʻi Tēvita ha fakahinohino kia Solomone: “Ke ke tuʻu mālohi pea ʻai ke ngali tangata.” (1 Tuʻi 2:​1-3) Ko e kotoa ʻo e kau tangata Kalisitiane ʻi he ʻaho ní ʻoku lelei ke nau ngāueʻaki ʻa e faleʻi ko iá. Ke hoko ʻo lavameʻá, kuo pau ke nau ako ke talangofua ki he ngaahi lao ʻa e ʻOtuá pea ngāueʻaki ʻa e ngaahi tefitoʻi moʻoni Fakatohitapú ʻi he ngaahi tafaʻaki kotoa ʻo ʻenau moʻuí. (Luke 2:52) Ko e hā ʻoku mātuʻaki mahuʻinga ai ki he fanga tokoua kei siʻí ke nau hoko ko e kau tangata Kalisitiane matuʻotuʻá?

2-3. Ko e hā ʻoku mahuʻinga ai ki ha tokoua kei siʻi ke hoko ko ha Kalisitiane matuʻotuʻá?

² Ko ha tangata Kalisitiane ʻokú ne fakahoko ʻa e ngaahi ngafa mātuʻaki mahuʻinga ʻi he fāmilí pea ʻi he fakatahaʻangá. Fanga tokoua kei siʻi, ʻoku ʻikai ha veiveiua kuo mou fakakaukau ki he ngaahi fatongia te mou maʻu ʻi he kahaʻú. Te ke maʻu nai ʻa e taumuʻa ke hoko ko ha faifekau taimi-kakato, ko ha sevāniti fakafaifekau, pea ki mui ai ko ha mātuʻa ʻi he fakatahaʻangá. Te ke toe loto nai ke mali pea maʻu mo ha fānau. (ʻEf. 6:4; 1 Tīm. 3:1) Ke aʻusia ʻa e ngaahi taumuʻa ko ení pea hoko ʻo lavameʻá, ʻoku fiemaʻu kiate koe ʻa e tuʻunga matuʻotuʻa faka-Kalisitiane. b

³ Ko e hā ʻe lava ke ne tokoniʻi koe ke aʻusia ʻa e tuʻunga matuʻotuʻa Faka-Kalisitiané? ʻOku ʻi ai ʻa e ngaahi pōtoʻi mahuʻinga ʻoku fiemaʻu ke ke fakatupulekina. Ko e hā leva ʻe lava ke ke fai he taimí ni ke teuteu ai pea hoko ʻo lavameʻa ʻi ha faʻahinga ngafa pē ʻi he kahaʻú ʻe fiemaʻu nai ke ke fakahoko?

4. ʻE lava ke ke maʻu mei fē ʻa e ngaahi faʻifaʻitakiʻanga lelei ke faʻifaʻitaki ki aí? (Sio foki ki he fakatātaá.)

⁴ Fili ʻa e ngaahi faʻifaʻitakiʻanga lelei ke faʻifaʻitaki ki ai. ʻOku  fonu ʻi he Tohi Tapú ʻa e ngaahi faʻifaʻitakiʻanga lelei ki he kau talavoú ke faʻifaʻitaki ki ai. Ko e kau tangata ko ia mei he kuohilí naʻa nau ʻofa ki he ʻOtuá pea fakahoko ʻa e ngaahi fatongia kehekehe ʻi hono tokangaʻi ʻene kakaí. ʻE lava foki ke ke maʻu mo e ngaahi faʻifaʻitakiʻanga lelei mei he kau tangata Kalisitiane matuʻotuʻa ʻi ho fāmilí tonu pea ʻi hoʻo fakatahaʻangá. (Hep. 13:7) Pea ʻokú ke maʻu ʻa e faʻifaʻitakiʻanga haohaoa ʻa Sīsū Kalaisí. (1 Pita 2:21) ʻI hoʻo sivisiviʻi fakalelei ʻa e ngaahi faʻifaʻitakiʻanga ko ení, fakakaukau ki honau ngaahi ʻulungaanga tuʻu-ki-muʻá. (Hep. 12:​1, 2) Pea fili leva ʻa e founga te ke faʻifaʻitaki ai ki he kau tangata ko ení.

5. ʻE lava fēfē ke ke fakatupulekina ʻa e malava fakaefakakaukaú, pea ko e hā ʻoku mahuʻinga ai ení? (Saame 119:9)

⁵ Fakatupulekina pea “maluʻi ʻa e . . . malava fakaefakakaukaú.” (Pal. 3:21) Ko ha tangata mo ha malava fakaefakakaukau ʻokú ne fakakaukau fakalelei ki he ngaahi fili ʻokú ne maʻú ki muʻa ke ne fai ha meʻa. Ko ia ngāue mālohi ke maʻu pea tauhi maʻu ʻa e malava ko iá. Ko e hā hono ʻuhingá? Ko e māmani ko ení ʻoku fonu ʻi he kau talavou ʻoku tataki kinautolu ʻe heʻenau fakakaukaú pē pe fakaʻatā ʻa e ngaahi ongoʻí ke puleʻi ʻenau tōʻongá. (Pal. 7:7; 29:11) Ko e mītiá ʻe lava foki ke ne tākiekina mālohi koe. Ka ʻe lava fēfē ke ke maʻu ʻa e malava fakaefakakaukaú? Kamataʻaki hono ako ʻa e ngaahi tefitoʻi moʻoni Fakatohitapú pea fakakaukau fekauʻaki mo e ʻuhinga ʻoku nau ʻaonga aí. Ngāueʻaki leva ʻa e ngaahi tefitoʻi moʻoni ko iá ke tokoni kiate koe ke fai ʻa e ngaahi fili ʻe fakahōifua kia Sihova. (Lau ʻa e Saame 119:9.) Kapau te ke fakatupulekina ʻa e pōtoʻi mahuʻinga ko ení, te ke fou atu ai ʻi ha sitepu tefito ki he hoko ko ha tangata Kalisitiane matuʻotuʻa. (Pal. 2:​11, 12; Hep. 5:14) Fakakaukau ki he anga ʻo e hoko ʻa e malava fakaefakakaukaú ʻo ʻaonga kiate koe ʻi ha tuʻunga ʻe ua: (1) ʻI he fakafeangai ki he fanga tuofāfiné pea (2) ʻi hono fai ʻa e ngaahi fili fekauʻaki mo ho fōtunga hā mai fakafoʻituituí.

6. ʻE anga-fēfē hono tokoniʻi ʻe he malava fakaefakakaukaú ha tokoua kei siʻi ke fakahāhā ʻa e fakaʻapaʻapa ki he fanga tuofāfiné?

⁶ Ko e malava fakaefakakaukaú te ne tokoniʻi koe ke fakahāhā ʻa e fakaʻapaʻapa ki he kakai fefiné. ʻOku fakanatula mo feʻungamālie ki ha tokoua kei siʻi ke fakatupulekina ha vahaʻangatae fakaemanako mo ha tuofefine Kalisitiane. Kae kehe, ko ha kiʻi talavou mo ha malava  fakaefakakaukau heʻikai ke ne leaʻaki, tohi pe fai ha faʻahinga meʻa ʻe ʻoatu ai ha fakaʻilonga ʻo e tokanga fakaemanako tuku kehe kapau ʻokú ne fakakaukau loto-moʻoni ki he tuofefiné te ne hoko ko ha hoa mali ʻi he kahaʻú. (1 Tīm. 5:​1, 2) Kapau ʻokú ne faialea mo ha tuofefine, te ne maluʻi ʻa e ongoongo ʻo e tuofefiné ʻaki ʻa e ʻikai ʻaupito ke ʻalu pe nofo toko ua mo ia tuku kehe ʻo ka ʻi ai ha fakafeʻao taau.—1 Kol. 6:18.

7. ʻE anga-fēfē tokoni ʻa e malava fakaefakakaukaú ki ha tokoua kei siʻi ʻi heʻene fai ʻa e fili ʻi he ʻai valá mo e teuteú?

⁷ Ko e founga ʻe taha ʻoku fakahāhā ai ʻe ha kiʻi talavou kuó ne fakatupulekina ʻa e malava fakaefakakaukau leleí ko hono fai ʻa e ngaahi fili lelei ʻi he ʻai valá mo e teuteú. Ko e meʻa ʻoku faʻa hokó, ko e ākenga ʻo e sitailá ʻoku tisaini ia mo pouaki ʻe he kakai ʻoku ʻikai ke nau fakaʻapaʻapaʻi ʻa Sihova pe ʻoku nau moʻuiʻaki ʻa e ʻulungaanga taʻetāú. Ko ʻenau fakakaukau taʻetāú ʻoku tapua atu ia ʻi he sitaila vala ʻoku manoʻonoʻo pe ko ʻene ʻai ʻa e kakai tangatá ke nau hangē ha kakai fefiné. ʻI hono fili ʻa e vala ke tuí, ko ha kiʻi talavou ʻoku tupulekina ki he matuʻotuʻa faka-Kalisitiané ʻe tataki ia ʻe he ngaahi tefitoʻi moʻoni Fakatohitapú pea mo e ngaahi faʻifaʻitakiʻanga lelei ʻi he fakatahaʻangá. ʻE lava ke ne ʻeke hifo: ‘ʻOku fakahaaʻi ʻi heʻeku ngaahi filí ʻoku ou fakakaukau lelei mo fakaʻatuʻi ki he niʻihi kehé? ʻOku ʻai ʻe heʻeku founga ʻai valá ke faingofua ki he niʻihi kehé ke nau tui ʻoku ou līʻoa ke tauhi ki he ʻOtuá?’ (1 Kol. 10:​31-33; Tai. 2:6) Ko ha kiʻi talavou mo ha malava fakaefakakaukau heʻikai ngata pē ʻene maʻu ʻa e fakaʻapaʻapa ʻa hono fanga tokouá mo e fanga tuofāfiné kae pehē foki ki heʻene Tamai fakahēvaní.

8. ʻE lava fēfē ke ako ha tokoua kei siʻi ke hoko ʻo alafalalaʻanga?

⁸ Hoko ʻo alafalalaʻanga. Ko ha kiʻi talavou alafalalaʻanga ʻokú ne tokanga fakamātoato ki he kotoa hono ngaahi fatongiá. (Luke 16:10) Fakakaukau ki he faʻifaʻitakiʻanga haohaoa ʻa Sīsuú. Naʻe ʻikai ʻaupito ke ne taʻetokanga pe taʻefuafatongia. ʻI hono kehé, naʻá ne fakahoko ʻa e ngaahi vāhenga-ngāue naʻe ʻoange ʻe Sihova kiate iá, naʻa mo e ʻi he taimi naʻe faingataʻa ai ke fai peheé. Naʻá ne ʻofa ʻi he kakaí—tautefito ʻi heʻene kau ākongá—pea naʻá ne foaki loto-lelei ʻene moʻuí maʻanautolu. (Sione 13:1) ʻI he faʻifaʻitaki kia Sīsuú, ngāue mālohi ke fakahoko ha faʻahinga vāhenga-ngāue pē ʻoku ʻoatu kiate koe. Kapau ʻoku ʻikai te ke fakapapauʻi ʻa e founga ke fakahoko ai iá, hoko ʻo anga-fakatōkilalo pea kole tokoni mei he fanga tokoua matuʻotuʻá. ʻOua ʻaupito ʻe fai fakamuʻomuʻa nima ʻa e ngāué. (Loma 12:11) ʻI hono kehé, fakakakato ho vāhenga-ngāué, ʻo fai ia “kia Sihova, kae ʻikai ki he tangatá.” (Kol. 3:23) Ko e moʻoni, ʻoku ʻikai te ke haohaoa, ko ia hoko ʻo anga-fakanānā pea fakahaaʻi ha fehālaaki ʻokú ke fai.—Pal. 11:2.

9. Ko e hā kuo pau ai ke fakatupulekina ʻe ha tokoua kei siʻi ʻa e ngaahi pōtoʻi ʻaongá?

⁹ Ke hoko ko ha tangata Kalisitiane matuʻotuʻa, ʻe fiemaʻu ke ke fakatupulekina ʻa e ngaahi pōtoʻi ʻaonga. ʻE tokoni eni kiate koe ke fua ʻa e ngaahi fatongia ʻi he fakatahaʻangá, maʻu ha ngāue paʻanga ke poupouʻi koe pe ko ha fāmili, pea ke maʻu ʻa e ngaahi vahaʻangatae lelei mo e niʻihi kehé. Fakakaukau ki ha niʻihi ʻo e ngaahi pōtoʻi mahuʻinga ko ení.

10-11. ʻE anga-fēfē ke maʻu ʻaonga tonu ha tokoua kei siʻi pea mo e fakatahaʻangá mei heʻene ako ke lautohi mo tohi leleí? (Saame 1:​1-3) (Sio foki ki he fakatātaá.)

 ¹⁰ Ako ke lautohi mo tohi lelei. ʻOku pehē ʻe he Tohi Tapú ko ha tangata fiefia mo lavameʻa ʻokú ne fakamoleki ʻa e taimi ʻi he ʻaho taki taha ke lau ʻa e Folofola ʻa e ʻOtuá pea fakalaulauloto ki ai. (Lau ʻa e Saame 1:​1-3.) ʻI hono lau fakaʻaho ʻa e Tohi Tapú, te ne hoko ai ʻo ʻiloʻi ʻa e anga ʻo e fakakaukau ʻa Sihová, ʻa ia ʻe tokoniʻi ai ia ke ne fakakaukau fakalelei pea fakaʻuhinga lelei. (Pal. 1:​3, 4) Ko e kau tangata peheé ʻoku fiemaʻu ʻi he fakatahaʻangá. Ko e hā hono ʻuhingá?

¹¹ Ko hotau fanga tokouá mo e fanga tuofāfiné ʻoku nau hanga ki he kau tangata taukei ki ha fakahinohino mo ha faleʻi Fakatohitapu. (Tai. 1:9) Kapau ʻe lava ke ke lautohi mo tohi lelei, ʻe malava ke ke teuteu ʻa e ngaahi malanga mo e ngaahi tali fakatupu ʻilo mo fakatupu tui mālohi. ʻE malava foki ke ke hiki ʻa e ngaahi nouti mohu ʻuhinga ʻi hoʻo akó pea ʻi hoʻo fanongo ki he ngaahi malanga ʻi he fakataha ʻa e fakatahaʻangá, ʻasemipilií, mo e fakataha-lahí. Ko e ngaahi nouti ko ení te ne tokoniʻi koe ke langa hake hoʻo tuí tonu pea ke fakalototoʻaʻi ʻa e niʻihi kehé.

12. Ko e hā te ne tokoniʻi koe ke hoko ko ha tokotaha fetuʻutaki leleí?

¹² Fakatupulekina ʻa e pōtoʻi ʻi he fetuʻutaki leleí. Ko ha tangata Kalisitiane kuo pau ke ne ako ke fetuʻutaki lelei. Ko ha tangata fetuʻutaki lelei ʻokú ne fanongo pea feinga ke mahinoʻi ʻa e ngaahi fakakaukau mo e ongoʻi ʻa e niʻihi kehé. (Pal. 20:5) ʻE lava ke ne ako ke mahinoʻi ʻa e tō ʻo e leʻo ʻo ha taha, ko ʻene fakafōtungá, mo e anga ʻo e ngaue hono sinó. Heʻikai lava ke ke fai eni kapau heʻikai ke ke fakamoleki ha taimi mo e kakaí. Kapau ʻokú ke ngāueʻaki maʻu pē ʻa e ngaahi meʻangāue fakaʻilekitulōniká ki he fetuʻutakí, hangē ko e ʻīmeilí mo e ʻave pōpoakí, ʻe fakavaivaiʻi heni hoʻo malava ke fetuʻutaki mo e kakaí mata ki he matá. Ko ia ai, ʻai ha faingamālie ke talanoa mo e niʻihi kehé mata ki he mata.—2 Sio. 12.

13. Ko e hā mo ha toe meʻa kuo pau ke ako ʻe ha kiʻi talavou? (1 Tīmote 5:8) (Sio foki ki he fakatātaá.)

¹³ Ako ke fai ha tokonaki maʻau. Ko ha tangata matuʻotuʻa Kalisitiane kuo pau ke ne malava ʻo tokonaki maʻana pea mo hono falé. (Lau ʻa e 1 Tīmote 5:8.) ʻI he ngaahi fonua ʻe niʻihi, ʻe ako nai ʻe he fanga tokoua kei siʻí ha pōtoʻi ngāue mei heʻenau tamaí pe ko ha kāinga ʻe taha. ʻI he ngaahi fonua kehé, ʻe ako nai ʻe ha kiʻi talavou ha pōtoʻi ngāue lolotonga ʻene ʻi he kolisí. Pe ko e hā pē ʻa e tuʻungá, ʻoku lelei ke ako ha pōtoʻi te ne tokoniʻi koe ke maʻu ha ngāue. (Ngā. 18:​2, 3; 20:34; ʻEf. 4:28) Maʻu ha ongoongo ʻo e hoko ko ha tokotaha ngāue mālohi pea fakapapauʻi ke fakahoko ha ngāue kae ʻoua ke kakato. Kapau te ke fai ia, ʻoku ngalingali ange te ke maʻu ha ngāue pea nofo maʻu ai. Ko e ngaahi ʻulungaanga mo e ngaahi pōtoʻi naʻa tau lāulea ki aí ʻoku toe  mahuʻinga ki ha tangata Kalisitiane koeʻuhí ke lava ʻo ne fakahoko ʻa e ngaahi ngafa ʻi he kahaʻú. Tau vakai angé ki he niʻihi ʻo e ngaahi ngafa ko iá.

14. ʻE lava fēfē ke teuteu ha tokoua kei siʻi ke hoko ko ha sevāniti ngāue taimi-kakato?

¹⁴ Sevāniti ngāue taimi-kakato. Ko e kau tangata Kalisitiane matuʻotuʻa tokolahi naʻa nau kamata ngāue fakafaifekau taimi-kakato mei heʻenau kei taʻu siʻí. Ko e ngāue tāimuʻá ʻoku tokoni ki ha kiʻi talavou ke ako ki he founga ke ngāue ola lelei ai fakataha mo e kakai kehekehe. ʻOku toe tokoni ia ke ne levaʻi lelei ʻa e paʻangá pea moʻui ʻo fakatatau ki ai. (Fil. 4:​11-13) Ko ha maka lakaʻanga lelei ki he ngāue taimi-kakató ko e tāimuʻa tokoni. Ko e tokolahi ʻoku nau ngāue ko ha kau tāimuʻa tokoni ʻi ha vahaʻa taimi, ʻa ia ʻoku tokoniʻi ai kinautolu ke mateuteu ki he tāimuʻa tuʻumaʻú. Ko e ngāue tāimuʻá ʻe lava ke ne fakaava atu ʻa e matapā ki he ngaahi tafaʻaki kehe ʻo e ngāue taimi-kakató, ʻo kau ai ʻa e ngāue ko ha sevāniti langa pe ko ha tokotaha Pēteli.

15-16. ʻE lava fēfē ke taau ha tokoua kei siʻi ke ngāue ʻi he fakatahaʻangá?

¹⁵ Sevāniti fakafaifekau pe mātuʻa. Ko e kau tangata Kalisitiané ʻoku totonu ke nau maʻu ha taumuʻa ʻo e hoko ʻo taau ke ngāue maʻa honau fanga tokouá mo e fanga tuofāfiné ko ha kau mātuʻa ʻi he fakatahaʻangá. ʻOku pehē ʻi he Tohi Tapú ko e kau tangata ʻoku nau kakapa atu ki he ngafa ko ení ʻoku nau “holi ki ha ngāue lelei.” (1 Tīm. 3:1) Ki muʻa ke ngāue ha tokoua ko ha mātuʻa, kuo pau ke ne taau ke ngāue ko ha sevāniti fakafaifekau. Ko e kau sevāniti fakafaifekaú ʻoku nau tokoni ki he kau mātuʻá ʻi he ngaahi founga ʻaonga lahi. Ko e kau mātuʻá mo e kau sevāniti fakafaifekaú ʻoku nau ngāue anga-fakatōkilalo maʻa honau fanga tokouá mo e fanga tuofāfiné pea kau faivelenga ʻi he ngāue fakafaifekaú. Ko e fanga tokoua kei siʻí ʻe lava ke nau taau ke ngāue ko ha kau sevāniti fakafaifekau naʻa mo e ʻi heʻenau kei taʻu hongofulu tupu lahí. Pea ʻe fakanofo nai ha sevāniti fakafaifekau taau ʻi hono taʻu 20 tupu siʻí ko ha mātuʻa.

¹⁶ ʻE lava fēfē ke ke taau ki he ngafa ko ení? ʻOku ʻikai ha tuʻutuʻuni papau ki ai. Kae kehe, ko e ngaahi tuʻunga taau ʻoku fiemaʻu ki aí ʻoku makatuʻunga kotoa ia ʻi he Tohi Tapú pea ʻi he ʻofa kia Sihová, ki ho fāmilí, mo e fakatahaʻangá. (1 Tīm. 3:​1-13; Tai. 1:​6-9; 1 Pita 5:​2, 3) Feinga ke mahinoʻi ʻa e tuʻunga taau taki taha. Lotu kia Sihova ke ne tokoniʻi koe ke aʻusia ʻa e ngaahi tuʻunga taau ko ení. c

17. ʻE lava fēfē ke teuteu ha tokoua kei siʻi ke hoko ko ha husepāniti mo ha ʻuluʻi fāmili? (Sio foki ki he fakatātaá.)

¹⁷ Husepāniti mo ha ʻuluʻi fāmili. Hangē ko ia naʻe fakahaaʻi ʻe Sīsuú, ko e kau tangata Kalisitiane matuʻotuʻa ʻe niʻihi ʻoku nau nofo taʻemali  pē. (Māt. 19:12) Kae kehe, kapau ʻokú ke fili ke mali, ʻe toe tānaki atu kiate koe ʻa e ngafa ʻo e hoko ko ha husepāniti mo ha ʻuluʻi fāmili. (1 Kol. 11:3) ʻOku ʻamanekina ʻe Sihova mei ha husepāniti ke ne ʻofa ʻi hono uaifí pea tokangaʻi fakaesino, fakaeongo, mo fakalaumālie ia. (ʻEf. 5:​28, 29) Ko e ngaahi ʻulungaanga mo e pōtoʻi naʻe lāulea ki ai ʻi he kamataʻanga ʻo e kupu ko ení, hangē ko hono fakatupulekina ʻa e malava fakaefakakaukaú, fakaʻapaʻapaʻi ʻa e kakai fefiné, pea hoko ʻo alafalalaʻangá, ʻe tokoni kiate koe ko ha hoa mali. Te ke mateuteu lelei ai ke fakahoko ho ngafa ko ha husepāniti pea mo ha ʻuluʻi fāmili.

18. ʻE lava fēfē ke teuteu ha tokoua kei siʻi ke hoko ko ha tamai?

¹⁸ Tamai. Hili hoʻo malí, te ke hoko nai ko ha tamai. Ko e hā ʻe lava ke ke ako meia Sihova fekauʻaki mo e hoko ko ha tamai leleí? ʻOku lahi ʻa e ngaahi lēsoní. (ʻEf. 6:4) Naʻe tala ange hangatonu ʻe Sihova ki hono ʻAló, ʻa Sīsū, naʻá ne ʻofa ʻiate ia pea hōifua kiate ia. (Māt. 3:17) Kapau te ke hoko ko ha tamai, fakapapauʻi ʻokú ke tala ange maʻu pē ki hoʻo fānaú ʻokú ke ʻofa ʻiate kinautolu. Fakaongoongoleleiʻi maʻu pē kinautolu ki he ngaahi ngāue lelei ʻoku nau faí. Ko e ngaahi tamai ʻoku nau faʻifaʻitaki ki he faʻifaʻitakiʻanga ʻa Sihová ʻoku nau tokoniʻi ʻenau fānaú ke nau hoko ko ha kau tangata mo e kau fefine Kalisitiane matuʻotuʻa. ʻE lava ke ke teuteu he taimí ni ki he ngafa ko ení ʻaki ʻa e tokanga anga-ʻofa ki he niʻihi kehe ʻi ho fāmilí pea ʻi he fakatahaʻangá pea ʻaki ʻa e ako ke fakahāhā hoʻo ʻofa mo e houngaʻia ʻiate kinautolú. (Sione 15:9) ʻE tokoni eni kiate koe ke fakahoko ho ngafa ʻi he kahaʻú ko ha husepāniti pea mo ha tamai. ʻI he lolotonga ní, te ke hoko ko ha koloa mahuʻinga kia Sihova, ki ho fāmilí, pea ki he fakatahaʻangá.

19-20. Ko e hā ʻe tokoni ki he fanga tokoua kei siʻí ke nau hoko ko e kau tangata Kalisitiane matuʻotuʻá? (Sio ki he tā ʻi he takafí.)

¹⁹ Fanga tokoua kei siʻi, heʻikai ke fakafokifā pē hoʻo hoko ko ha tangata Kalisitiane matuʻotuʻá. ʻE fiemaʻu ke ke fili ʻa e ngaahi faʻifaʻitakiʻanga lelei ke faʻifaʻitaki ki ai, fakatupulekina ʻa e malava fakaefakakaukau, hoko ʻo alafalalaʻanga, maʻu ʻa e ngaahi pōtoʻi ʻaonga ʻi he moʻuí, pea teuteu ki he ngaahi ngafa ʻi he kahaʻú.

²⁰ Te ke ongoʻi lōmekina nai ʻi ha taimi ʻi he fakakaukauloto atu ki he ngāue ʻoku toka mei muʻá. Ka te ke lavameʻa. Manatuʻi ko Sihova ʻokú ne vēkeveke ke tokoniʻi koe. (ʻAi. 41:​10, 13) Ko e moʻoni, ko ho fanga tokoua mo e fanga tuofāfine ʻi he fakatahaʻangá te nau tokoniʻi foki koe. ʻI hoʻo aʻusia hoʻo malava kakato ko ha tangata Kalisitiane matuʻotuʻá, ko hoʻo moʻuí ʻe fakakoloa mo fakafiemālie. ʻOku mau ʻofa ʻiate kimoutolu, fanga tokoua kei siʻi! Fakatauange ke tāpuakiʻi lahi kimoutolu ʻe Sihova ʻi hoʻomou ngāue ʻi he taimí ni ke hoko ko ha kau tangata Kalisitiane matuʻotuʻá.—Pal. 22:4.