ʻI he ʻaho ʻe taha, ko ha tuofefine ʻi Nuʻu Sila naʻá ne sio ʻi he vitiō “ʻOku Totonu Ke Tau Fetokangaʻaki,” ʻa ia ʻoku lāulea ai ki he ʻikai ngata pē hono maʻu ʻe Sihova ʻa e ongoʻi manavaʻofá ka ʻokú ne fakahaaʻi foki ia. (ʻAi. 63:​7-9) Naʻá ne fili ke ngāueʻaki ʻa e meʻa naʻá ne akó ʻaki hono fai ha tokoni ʻaonga. Ki mui ange ʻi he ʻaho ko iá lolotonga ʻene ʻalu ʻo fai ha fakatau, naʻá ne fetaulaki mo ha fefine tukuhāusia peá ne tala ange te ne fakatau ange haʻane meʻakai. Naʻe loto ki ai ʻa e fefiné. ʻI he foki mai ʻa e tuofefiné mo e meʻakaí, naʻá ne fai ha fakamoʻoni nounou, ʻo ngāueʻaki ʻa e tuleki ʻE Toe Ngata Koā ʻa e Faingataʻá?

Naʻe tō loʻimata ʻa e fefiné. Naʻá ne fakamatala ange naʻe ʻohake ia ko ha Fakamoʻoni ka naʻá ne mavahe mei he moʻoní ʻi he ngaahi taʻu lahi kuo maliu atú. Neongo ia, ki muí ni naʻá ne lotu kia Sihova ki ha tokoni ke foki kiate ia. Naʻe ʻoange ʻe he tuofefiné ki he fefiné ha Tohi Tapu pea fokotuʻutuʻu ke na ako. a

ʻE lava ke tau faʻifaʻitaki ki he manavaʻofa ʻa Sihova ki he kakaí, kau ai hotau kāingá mo hotau fanga tokoua mo e fanga tuofāfine ʻi he fakatahaʻangá. Pea ʻe lava ke tau fakahāhā ʻa e manavaʻofá ʻaki ʻa e kumi ki ha faingamālie ke faifakamoʻoni ai ki he niʻihi kehé.