1. Ko e hā ʻa e mahuʻinga ʻo e maá ʻi he taimi ʻo e Tohi Tapú?

 KO E maá ko e meʻakai tefito ia ki he tokolahi ʻi he taimi ʻo e Tohi Tapú. (Sēn. 14:18; Luke 4:4) Ko hono moʻoní, naʻe mātuʻaki mahuʻinga ia ʻo ngāueʻaki ai ʻe he Tohi Tapú ʻi he taimi ʻe niʻihi ʻa e “mā” ke ʻuhinga ki he meʻakaí fakalūkufua. (Māt. 6:11) Naʻe toe hoko ʻa e maá ko ha meʻa tefito ia ʻi ha mana ʻiloa ʻe ua ʻa Sīsū. (Māt. 16:​9, 10) Ko e taha ʻi he ongo fakamatala ko iá ʻoku tau maʻu ʻi he Sione vahe 6. ʻI heʻetau lāulea ki he fakamatala ko ʻení, te tau kumi ki ha ngaahi lēsoni ʻe lava ke tau ngāueʻaki ʻi he ʻahó ni.

2. ʻI he tuʻunga fē naʻe malanga hake ai ha fiemaʻu ki ha meʻakai?

² ʻI he ʻosi ʻa e fononga fakamalanga ʻa e kau ʻapositolo ʻa Sīsuú, naʻá ne ʻave kinautolu ʻi ha vaka ʻo nau kolosi atu ʻi he Tahi Kālelí koeʻuhi ke nau maʻu ha mālōlō. (Mk. 6:​7, 30-32; Luke 9:10) Naʻa nau aʻu atu ki ha potu lala ʻi he feituʻu ʻo Petesaitá. Kae kehe, naʻe vave ʻa e haʻu ha kakai ʻe laui afe ʻo haʻohaʻo takai ʻiate ia. Naʻe ʻikai ke tukunoaʻi kinautolu ʻe Sīsū. Naʻá ne anga-lelei ʻo vaheʻi ha taimi ke akoʻi kinautolu fekauʻaki mo e Puleʻangá pea ke fakamoʻui ʻa e kau puké. ʻI heʻene efiafi hifó, naʻe fifili ʻa e kau ākongá pe ʻe anga-fēfē hano maʻu ʻe he kakai kotoa ko iá ha meʻa ke nau kai. Ko e niʻihi ʻo kinautolu ʻoku ngalingali naʻe ʻi ai pē ʻenau kiʻi meʻakai, ka ko e tokolahi tahá ʻe fiemaʻu ke nau ʻalu ki he ngaahi koló ʻo fakatau mai ha meʻakai. (Māt. 14:15; Sione 6:​4, 5) Ko e hā ʻe fai ʻe Sīsuú?

 KO HA MANA KE TOKONAKI HA MĀ

3. Naʻe anga-fēfē tali ʻa Sīsū ki he fiemaʻu ʻa e fuʻu kakaí? (Sio foki ki he fakatātā.)

³ Naʻe tala ʻe Sīsū ki heʻene kau ʻapositoló: “ʻOku ʻikai fiemaʻu ia ke nau mavahe; ʻoange ʻe kimoutolu ha meʻa ke nau kai.” (Māt. 14:16) Ko ha palopalema ia he ʻoku fakafuofua ko e kakai tangata ʻe toko 5,000 naʻe ʻi aí. Pea tānaki atu ki ai ʻa e kakai fefiné mo e fānaú, naʻe ʻi ai nai ʻa e kakai ʻe toko 15,000 ke fafanga. (Māt. 14:21) Naʻe lea hake ʻa ʻAnitelū: “Ko ha kiʻi tamasiʻi eni ʻoku ʻi ai ʻene foʻi mā paʻale ʻe nima mo ha ongo kiʻi mataʻiika ʻe ua. Ka ko e hā hake ia ki he fuʻu tokolahí ni?” (Sione 6:9) Ko e mā paʻalé naʻe anga-maheni ke kai ia ʻe he kau masivá mo e niʻihi, pea ko e ongo kiʻi mataʻiiká nai ko e ika mōmoa. Neongo ia, ko e lahi ʻo e meʻakai naʻe maʻu ʻe he kiʻi tamasiʻí heʻikai feʻunga ia ke fafangaʻaki ha tokolahi—pe ʻe feʻunga pē ia?

4. Ko e hā ʻe lava ke tau ako mei he Sione 6:​11-13? (Sio foki ki he fakatātaá.)

⁴ ʻI he loto ʻa Sīsū ke anga-talitali kakai ki he fuʻu kakaí, naʻá ne fakahinohino kiate kinautolu ke nau nofo hifo fakakulukulupu ʻi he musié. (Mk. 6:​39, 40; lau ʻa e Sione 6:​11-13.) ʻOku tau lau naʻe fai ʻe Sīsū ha fakafetaʻi ki heʻene Tamaí koeʻuhi ko e maá mo e mataʻiiká. Naʻe mātuʻaki feʻungamālie ke fakafetaʻi ki he ʻOtuá, ʻa ia ko hono moʻoní ko ia ʻa e Matavai ʻo e meʻakaí. Ko ha fakamanatu lelei ia kiate kitautolu ke muimui ʻi he faʻifaʻitakiʻanga ʻa Sīsuú ʻaki ʻa e lotu ki muʻa ke kaí, tatau ai pē pe ʻoku tau toko taha pe ʻoku ʻi ai ʻa e niʻihi kehé. Naʻe ʻai leva ʻe Sīsū ke tufotufa ʻa e meʻakaí, pea naʻe kai ʻa e kakaí ʻo nau mākona. Naʻe toe pē ʻa e meʻakaí, ʻa ia naʻe ʻikai loto ʻa Sīsū ke maumauʻi. Ko ia naʻá ne ʻai ke tānaki ʻa e meʻakai naʻe toé, ngalingali ke toki fakaʻaongaʻi ʻamui ange. Naʻe fokotuʻu ʻe Sīsū ha sīpinga kiate kitautolu ʻi he haʻu ko ia ki hono  ngāueʻaki fakapotopoto ʻa e ngaahi meʻa ʻoku tau maʻú. Kapau ko ha mātuʻa koe, fēfē ke ke vakaiʻi ʻa e fakamatala ko ení mo hoʻo fānaú pea lāulea ki he ngaahi lēsoni ʻe lava ke ako mei ai fekauʻaki mo e lotú, anga-talitali kakaí, mo e nima-homó.

5. Naʻe anga-fēfē fakafeangai ʻa e kakaí ki he meʻa naʻe fai ʻe Sīsū ʻi he ʻaho ko iá, pea naʻe anga-fēfē ʻene tali ki aí?

⁵ Naʻe maongo ki he kakaí ʻa e founga faiako ʻa Sīsuú pea mo ʻene ngaahi maná. ʻI he ʻiloʻi naʻe talaʻofa ʻa Mōsese ko e ʻOtuá te ne fokotuʻu ha palōfita makehé, naʻa nau fifili nai, ‘Ko Sīsū ʻa e tokotaha ko iá?’ (Teu. 18:​15-18) Kapau ko ia, naʻe hā ngali te ne hoko ko ha pule tuʻu-ki-muʻa, mahalo te ne malava ʻo tokonaki ha mā ki he puleʻangá fakakātoa. Ko ia ai, ko e fuʻu kakaí naʻe teu ke nau ‘puke ʻa Sīsū ke fakanofo ko ha tuʻi.’ (Sione 6:​14, 15) Kapau naʻe fakaʻatā ia ʻe Sīsū ke hoko, te ne kau ai ʻi he ngaahi meʻa fakapolitikale ʻa e kau Siú, ʻa ia naʻa nau ʻi he malumalu ʻo e pule ʻa Lomá. Ka naʻá ne fai pehē? ʻIkai. ʻOku tau lau naʻe feinga fakavave ʻa Sīsū ke ‘mavahe ki he moʻungá.’ Ko ia neongo ʻa e tenge mei he niʻihi kehé, naʻe ʻikai te ne kau ʻi he ngaahi meʻa fakapolitikalé. He lēsoni mahuʻinga ē kiate kitautolu!

6. ʻE lava fēfē ke tau fakahāhā ʻoku tau loto ke muimui ʻi he sīpinga ʻa Sīsuú? (Sio foki ki he fakatātaá.)

⁶ ʻOku hā mahino, heʻikai ke kole mai ia ʻe he niʻihi kehé ke tau fakalahi fakaemana ha mā pe fakamoʻui ʻa e kau puké; pe te nau feinga ke fakanofo kitautolu ko ha tuʻi pe ko ha pule fakapuleʻanga. Ka te nau fakaʻaiʻai nai kitautolu ke tau kau ki he ngaahi meʻa fakapolitikalé ʻaki ʻa e fili pe poupou ki ha tokotaha ʻoku nau ongoʻi te ne  fakaleleiʻi ʻa e ngaahi meʻá. Kae kehe, ko e faʻifaʻitakiʻanga ʻa Sīsuú ʻoku māʻalaʻala. Naʻá ne fakafisi ke kau ki he ngaahi meʻa fakapolitikalé, naʻa mo ʻene lea ki mui ai: “Ko hoku Puleʻangá ʻoku ʻikai ko ha konga ia ʻo e māmani ko ení.” (Sione 17:14; 18:36) Ko e kau Kalisitiané ʻi he ʻahó ni ʻoku lelei ke nau faʻifaʻitaki ki he fakakaukau mo e tōʻonga ʻa Sīsuú. ʻOku tau poupou, faifakamoʻoni, pea lotu fekauʻaki mo e Puleʻanga ko iá. (Māt. 6:10) Tau toe foki angé ki he fakamatala fekauʻaki mo hono tokonaki fakaemana ʻe Sīsū ʻa e maá pea lāulea ki ha toe meʻa ʻe lava ke tau ako mei ai.

“ʻUHINGA ʻO E NGAAHI FOʻI MAÁ”

7. Ko e hā naʻe fai ʻe Sīsū mo e kau ʻapositoló? (Sione 6:​16-20)

⁷ ʻI he hili hono fafanga ʻe Sīsū ʻa e fuʻu kakaí, naʻá ne tuku ʻene kau ʻapositoló ke nau mavahe mei he feituʻú ʻo foki ki Kāpaneume ʻi ha vaka peá ne mavahe ki he moʻungá, ʻo ne hao ai mei he feinga ʻa e fuʻu kakaí ke fakanofo ia ko ha tuʻí. (Lau ʻa e Sione 6:​16-20.) Lolotonga ʻa e folau ʻa e kau ʻapositoló, naʻe tō ha afā, ʻo ne ʻomi ʻa e matangi mālohi mo e ngaahi peau aake mālohi. Ko ia naʻe haʻu ʻa Sīsū kiate kinautolu, ʻo luelue mai ʻi he fukahi tahí. Pea naʻá ne tala ki he ʻapositolo ko Pitá ke ne luelue ange foki ʻi he fukahi tahí. (Māt. 14:​22-31) ʻI he heka pē ʻa Sīsū ki he vaká, naʻe malū ʻa e matangí. Naʻe ueʻi ai ʻa e kau ākongá ke nau pehē: “Ko e ʻAlo moʻoni koe ʻo e ʻOtuá.” a (Māt. 14:33) Neongo ia, naʻe ʻikai ke nau sio ki he felāveʻi ʻa e mana ko ení mo e meʻa naʻe hoko ki muʻa atu ki he fuʻu kakaí. ʻOku tānaki mai ʻe Maʻake ʻa e fakaikiiki ko ení: “[Ko e kau ʻapositoló] naʻa nau mātuʻaki ofoofo, he naʻe ʻikai ke nau mahinoʻi ʻa e ʻuhinga ʻo e ngaahi foʻi maá, pea naʻe kei mahinongataʻa pē ia ki honau lotó.” (Mk. 6:​50-52) ʻIo, naʻe ʻikai ke nau mahinoʻi ʻa e lahi ʻo e mālohi naʻe ʻoange ʻe Sihova kia Sīsū ke fakahokoʻaki ʻa e ngaahi maná. Kae kehe, ʻi ha taimi nounou mei ai, naʻe toe lave ʻa Sīsū ki he mana fekauʻaki mo e maá, pea naʻá ne ʻomai ha lēsoni kiate kitautolu.

8-9. Ko e hā naʻe kumi ai ʻa e fuʻu kakaí kia Sīsuú? (Sione 6:​26, 27)

⁸ Ko e fuʻu kakai naʻe fafangaʻi ʻe Sīsuú naʻa nau tokangataha ki hono fakalato ʻenau ngaahi fiemaʻu mo e holi fakaesinó. Anga-fēfē? ʻI he ʻaho hono hokó, naʻa nau sio naʻe mavahe ʻa Sīsū mo ʻene kau ʻapositoló. Ko ia naʻe heka ʻa e fuʻu kakaí ki ha ngaahi vaka naʻe tau mai mei Taipiliō pea nau tukufolau ki Kāpaneume ke kumi kia Sīsū. (Sione 6:​22-24) Ko e ʻuhinga tefito ʻenau fai peheé ke fanongo lahi ange fekauʻaki mo e Puleʻangá? ʻIkai. Naʻa nau fakakaukau pē ki heʻenau fiemaʻu ha maá. ʻOku anga-fēfē ʻetau ʻiloʻi iá?

⁹ Fakatokangaʻi ʻa e meʻa naʻe hoko ʻi he maʻu atu ʻe he fuʻu kakaí ʻa Sīsū ofi ki Kāpaneume. Naʻe tala ange hangatonu ʻe Sīsū ko e meʻa naʻa nau fakamuʻomuʻá ko hono fakalato ʻenau ngaahi fiemaʻu fakaesino taimi nounoú. Naʻá ne fakahaaʻi naʻa nau “kai mei he ngaahi foʻi maá pea [nau] mākona” ʻi he “meʻakai ʻoku ʻauhá.” ʻI hono kehé, naʻá ne enginaki kiate kinautolu ke nau ngāue maʻá e “meʻakai ʻoku tolonga atu ki he moʻui taʻengatá.” (Lau ʻa e Sione 6:​26, 27.) Naʻe pehē ʻe Sīsū ko ʻene Tamaí te ne tokonaki ʻa e faʻahinga meʻakai ko iá. Ko e foʻi fakakaukau ko ia ko e meʻakaí ʻe lava ke taki atu ki he moʻui taʻengatá kuo pau pē naʻe fakatoʻoaloto! Ko e hā ha meʻakai ʻe lava ke ne ʻomai ia, pea ʻe lava fēfē ke maʻu ia ʻe he kau fanongo ʻa Sīsuú?

10. Ko e hā ʻa e “ngāue . . . ʻa e ʻOtuá” naʻe fiemaʻu ke lāuʻilo ki ai ʻa e kakaí?

¹⁰ ʻOku ngalingali ko e kau Siu ko iá naʻa nau ongoʻi naʻe pau ke nau fai ha faʻahinga ngāue ke taau ai ke maʻu ha meʻakai pehē. Naʻa nau fakakaukau nai ki he “ngaahi ngāue” ʻo e Lao ʻa Mōsesé. Kae kehe, naʻe tala ʻe Sīsū kiate kinautolu:  “Ko e ngāue eni ʻa e ʻOtuá, ke mou ngāueʻi ʻa e tui ki he tokotaha ko ia naʻá ne fekauʻi maí.” (Sione 6:​28, 29) ʻOku fiemaʻu ke ngāueʻi ʻa e tui ki he fakafofonga ʻo e ʻOtuá koeʻuhi ke “maʻu ʻa e moʻui taʻengatá.” Ko hono moʻoní, naʻe ʻosi lave ʻa Sīsū ki he meʻá ni ki muʻa. (Sione 3:​16-18, 36) Pea ki mui aí naʻá ne toe lave lahi ange fekauʻaki mo e founga ʻe lava ke tau maʻu ai ʻa e moʻui taʻengatá.—Sione 17:3.

11. Naʻe anga-fēfē hono fakahaaʻi ʻe he kau Siú naʻa nau kei hohaʻa pē fekauʻaki mo e hoko ʻo mākona ʻi he maá? (Saame 78:​24, 25)

¹¹ Ko e kau Siu ko iá naʻe ʻikai ke nau tali ʻa e akonaki ʻa Sīsū fekauʻaki mo ha ‘ngāue foʻou ʻa e ʻOtuá.’ Naʻa nau ʻeke kiate ia: “Ko e hā te ke fakahoko ko ha fakaʻilonga, koeʻuhi ke mau sio ki ai pea mau tui atu kiate koe?” (Sione 6:30) Naʻa nau pehē ko ʻenau fanga kui ʻi he ʻaho ʻo Mōsesé naʻa nau maʻu ʻa e maná, ʻa ia ʻe lava ke fakahoa ia ki he maá. (Nehe. 9:15; lau ʻa e Saame 78:​24, 25.) ʻOku hā mahino, naʻe kei fakahangataha pē honau ʻatamaí ki he hoko ʻo mākona ʻi he mā moʻoní. Naʻe aʻu ʻo ʻikai ke nau ʻeke kia Sīsū ki ha fakamāʻalaʻala ʻi he hoko atu ʻene lea fekauʻaki mo e “mā moʻoní mei he langí,” ʻa ia naʻe hangē ha mana foaki moʻui mei he langí. (Sione 6:32) Naʻa nau mātuʻaki tokangataha ki heʻenau ngaahi fiemaʻu fakaesinó ʻo nau tukunoaʻi ai ʻa e ngaahi moʻoni fakalaumālie naʻe feinga ʻa Sīsū ke vahevahe kiate kinautolú. Ko e hā ʻe lava ke tau ako mei he fakamatala ko ení?

MEʻA ʻOKU TAU FAKAMUʻOMUʻÁ

12. Naʻe anga-fēfē hono fakahaaʻi ʻe Sīsū ʻa e meʻa ʻoku mahuʻinga tahá?

¹² Ko ha lēsoni mahuʻinga eni ʻe lava ke tau ako mei he Sione vahe 6. Ko e meʻa ʻoku totonu ke tau fakamuʻomuʻá ko ʻetau ngaahi fiemaʻu fakalaumālié. Manatuʻi naʻe fakaeʻa ʻe Sīsū ʻa e poini ko iá ʻi heʻene talitekeʻi mālohi ʻa e ʻahiʻahi ʻa Sētané. (Māt. 4:​3, 4) Pea ʻi he Malanga ʻi he Moʻungá, naʻá ne fakamamafaʻi ʻa e hoko ʻo lāuʻilo ki heʻete fiemaʻu fakalaumālié. (Māt. 5:3) Fakatatau ki ai, ʻe lava ke tau ʻeke hifo, ‘ʻOku fakahaaʻi ʻi heʻeku founga moʻuí ʻoku ou tokanga lahi ange ki hono fakalato ʻeku fiemaʻu fakalaumālié kae ʻikai ko hono fakatōliʻa ʻeku ngaahi holi fakaesinó?’

13. (a) Ko e hā ʻoku ʻikai hala ai ke tau fiefia ʻi he meʻakaí? (e) Ko e hā ʻa e fakatokanga ʻoku taau ke tau tokanga ki aí? (1 Kolinitō 10:​6, 7, 11)

¹³ ʻOku feʻungamālie ke tau lotu fekauʻaki mo ʻetau ngaahi fiemaʻu fakaesinó pea ke fiefia ʻi hono fakalato iá. (Luke 11:3) Ko e ngāue mālohi ʻokú ne ʻai ke tau ‘kai mo inú’ ʻokú ne ʻomai ʻa e fiefia pea ʻoku “mei he nima ia ʻo e ʻOtua moʻoní.” (Tml. 2:24; 8:15; Sēm. 1:17) Neongo ia, ʻoku fiemaʻu ke tau tauhi ʻa e ngaahi meʻa fakamatelié ke ʻi honau tuʻunga totonú. Naʻe fakamamafaʻi eni ʻe he ʻapositolo ko Paulá ʻi heʻene tohi ki he kau Kalisitiane naʻa nau moʻui ʻi he ofi ki he ngataʻanga ʻo e fokotuʻutuʻu faka-Siú. Naʻá ne ʻohake ʻa e ngaahi meʻa naʻe hoko ʻi ʻIsileli ʻi he kuohilí, kau ai ʻa e meʻa naʻe hoko ʻi he veʻe Moʻunga Sainaí. Naʻá ne fakatokanga ki he kau Kalisitiané ke “ʻoua te [nau] holi ki he ngaahi meʻa ʻoku koví,” hangē ko ia naʻe holi ki ai ʻa e kau ʻIsilelí. (Lau ʻa e 1 Kolinitō 10:​6, 7, 11.) Ko e kau ʻIsilelí naʻa nau fakaʻatā ʻenau holi ki he meʻakaí ke ne liliu naʻa mo e ngaahi tokonaki fakaemana ʻa Sihová ke hoko ko e ‘ngaahi meʻa ʻoku kovi.’ (Nōm. 11:​4-6, 31-34) Pea ʻi he fekauʻaki mo ha ʻuhikiʻi pulu koula, naʻa nau kai, inu, mo fakafiefia. (ʻEki. 32:​4-6) Naʻe lave ʻa Paula ki heʻenau hokosiá ko ha fakatokanga ki he kau Kalisitiane naʻe moʻui ki muʻa ʻi he ngataʻanga ʻo e fokotuʻutuʻu faka-Siú ʻi he 70 T.S. ʻOku tau moʻui he taimí ni ʻo ofi ki he ngataʻanga ʻo ha fokotuʻutuʻu, ko ia ʻoku lelei ke tau tokanga fakamātoato ki he faleʻi ʻa Paulá.

14. ʻI he fekauʻaki mo e meʻakaí, ko e hā ʻe lava ke tau ʻamanekina ʻi he māmani foʻoú?

¹⁴ ʻI he lea ʻa Sīsū fekauʻaki mo e ‘mā ki he ʻaho ní,’ naʻá ne tuhu ki he taimi ʻa ia ʻe fai ai ʻa e finangalo ʻo e ʻOtuá “ʻo hangē ko ia ʻi hēvaní, ke  pehē foki ʻi māmani.” (Māt. 6:​9-11) ʻOkú ke sioloto atu pe ʻe fēfē ʻa e māmaní ʻi he taimi ko iá? ʻOku fakahaaʻi ʻe he Tohi Tapú ko e finangalo ʻo e ʻOtuá ki he māmaní ʻoku fakakau ai ʻa e ngaahi meʻakai lelei. ʻI he fehoanaki mo e ʻAisea 25:​6-8, ʻe lahi fau ʻa e meʻakai vovo ʻe maʻu ʻi he malumalu ʻo e Puleʻanga ʻo Sihová. ʻOku tomuʻa tala ʻi he Saame 72:16: “ʻE lahi fau ʻa e uité ʻi he māmaní; ʻe mahutafea ʻa e tumutumu ʻo e ngaahi moʻungá.” ʻOkú ke fakatuʻotuʻa atu ke ngāueʻaki ha niʻihi ʻo e uite ko iá ke taʻo ʻa e foʻi mā ʻokú ke saiʻia taha aí pe ke ʻahiʻahiʻi ha ngaahi foʻi kuki foʻou? ʻIkai ko ia pē, te ke fiefia nai ʻi he fua ʻo e ngaahi ngoue kālepi naʻá ke toó. (ʻAi. 65:​21, 22) Pea heʻikai ko koe toko taha pē.

15. Ko e hā ʻa e ako ʻe fakahoko ʻi he toetuʻu ʻi he kahaʻú? (Sione 6:35)

¹⁵ Lau ʻa e Sione 6:35. Ko e hā ʻoku toka mei muʻa ki he faʻahinga naʻa nau kai ʻa e mā mo e ika naʻe tokonaki ʻe Sīsuú? ʻI he toetuʻu ka hoko maí, te ke fetaulaki nai mo ha niʻihi ʻo kinautolu. Neongo kapau naʻe ʻikai ke nau ngāueʻi ʻa e tuí ʻi he kuohilí, te nau toetuʻu nai. (Sione 5:​28, 29) Ko e faʻahinga ko iá ʻe pau ke nau ako ʻa e ʻuhinga ʻo e ngaahi lea ʻa Sīsuú: “Ko au ʻa e mā ʻo e moʻuí. ʻIlonga ʻa ia ʻoku haʻu kiate aú ʻe ʻikai te ne teitei fiekaia.” ʻE fiemaʻu ke nau fakatupulekina ʻa e tui ki he feilaulau huhuʻi ʻa Sīsuú, ʻo tui naʻá ne foaki ʻene moʻuí maʻanautolu. ʻI he taimi ko iá, ʻe ʻi ai ha polokalama ako fakalaumālie ki he faʻahinga ʻe toetuʻú pea mo ha fānau pē ʻe fanauʻi ʻi he taimi ko iá. He meʻa fakafiefia ē ke kau ʻi hono akoʻi ʻa e faʻahinga ko iá! Ko hoʻo fai peheé ʻe fakafiefia ange ia ʻi haʻo kai ha foʻi mā. ʻIo, ko e ngaahi meʻa fakalaumālié ʻe hoko ko e meʻa mahuʻinga tahá.

16. Ko e hā te tau sivisiviʻi ʻi he kupu hono hokó?

¹⁶ Kuo tau lāulea ki ha konga ʻo e fakamatala ʻi he Sione vahe 6, ka naʻe kei toe lahi ʻa e meʻa ke akoʻi ʻe Sīsū fekauʻaki mo e “moʻui taʻengatá.” Naʻe taau ke tokanga ki ai ʻa e kau Siu ko iá pea ʻoku pehē pē mo kitautolu ʻi he ʻahó ni. Te tau hoko atu ʻa e lāulea ki he Sione vahe 6 ʻi he kupu hono hokó.