1. Ko e hā ‘a e mo‘oni fakafiemālie ‘oku fakahaa‘i mai ‘e he Tohi Tapú fekau‘aki mo Sihová?

TE KE sai‘ia ke fakamāu‘i koe ‘e he kakaí ‘o makatu‘unga ‘i he lanu ho kilí, ko ho fōtungá pe ko ho mamafá? Ngalingali, he‘ikai te ke sai‘ia ai. He fakafiemālie ē ke ‘ilo‘i, ‘oku ‘ikai ke fakamāu‘i kitautolu ‘e Sihova ‘o makatu‘unga ‘i he me‘a ‘oku sio ki ai ‘a e tangatá! Ko e fakatātaá, ‘i he sio ‘a Sāmiuela ki he ngaahi foha ‘o Sesé, na‘e ‘ikai ke ne sio ki he me‘a na‘e sio ki ai ‘a Sihová. Na‘e tala ange ‘e Sihova kia Sāmiuela ko e taha ‘i he ngaahi foha ‘o Sesé te ne hoko ko e tu‘i ‘o ‘Isileli. Ko hai nai ia? ‘I he sio ‘a Sāmiuela ki he foha lahi taha ‘o Sesé, ‘a ‘Eliapi, na‘á ne pehē: “‘Oku tu‘u mo‘oni heni ‘i he ‘ao ‘o Sihová ‘a ‘ene tokotaha paní.” Na‘e hangē ‘a ‘Eliapi ko ha tu‘í. “Ka na‘e folofola ‘a Sihova kia Sāmiuela: ‘‘Oua na‘á ke tokanga ki hono fōtungá pea mo hono mā‘olungá, he kuó u si‘aki ia.’” Ko e hā ‘a e lēsoní? Na‘e toe pehē ‘e Sihova: “‘Oku sio ‘a e tangatá pē ki he me‘a ‘oku hā ki he matá, ka ‘oku sio ‘a Sihova ia ki he lotó.”—1 Sām. 16:1, 6, 7.

2. Hangē ko e Sione 7:24, ko e hā ‘oku ‘ikai totonu ai ke tau fakamāu‘i ha taha ‘aki hono fōtungá? Fakatātaa‘i.

² ‘I he tu‘unga ko e fa‘ahinga ta‘ehaohaoa ‘o e tangatá, ko kitautolu kotoa ‘oku tau hehema ke fakamāu‘i ‘a e ni‘ihi kehé ‘aki ‘a e me‘a ‘oku hā ki tu‘á. (Lau ‘a e Sione 7:24.) Ka ko e me‘a si‘isi‘i pē ‘oku tau ‘ilo‘i fekau‘aki mo ha taha mei he me‘a ‘oku tau sio ki aí. Ke fakatātaa‘í, na‘a mo ha toketā poto mo taukei ‘e lava ke ne ‘ilo pē ha me‘a si‘isi‘i ‘i he‘ene sio pē ki ha tokotaha mahaki. Kuo pau ke ne fanongo tokanga kapau ‘okú ne loto ke ‘ilo‘i ‘a e puipuitu‘a fakafaito‘o ‘o e tokotahá, ko e anga ‘ene ongo‘í pe ko ha faka‘ilonga pē ‘okú ne ma‘u. ‘E a‘u ‘o fiema‘u nai ‘e he toketaá ke fai hano faka‘ata. He ka ‘ikai, ‘e ‘oange ‘e he toketaá ha faito‘o ‘oku hala. ‘I he tu‘unga meimei tatau, he‘ikai lava ke tau mahino‘i kakato hotau fanga tokouá mo e fanga tuofāfiné  ‘aki ‘etau sio pē ki he me‘a ‘oku hā ki tu‘á. Kuo pau ke tau sio fakalaka atu ai—ki he tangata ‘i lotó. Ko e mo‘oni, ‘oku ‘ikai lava ke tau sio ki he lotó, ko ia he‘ikai ‘aupito ke tau mahino‘i ‘a e ni‘ihi kehé ‘o hangē ko Sihová. Ka ‘e lava ke tau fai hotau lelei tahá ke fa‘ifa‘itaki kia Sihova. Anga-fēfē?

3. ‘E anga-fēfē hono tokoni‘i kitautolu ‘e he ngaahi fakamatala Fakatohitapu ‘i he kupu ko ení ke fa‘ifa‘itaki kia Sihová?

³ ‘Oku anga-fēfē ‘a e fakafeangai ‘a Sihova ki he‘ene kau lotú? ‘Okú ne fanongo kiate kinautolu. ‘Okú ne fakakaukau ki honau puipuitu‘á mo e tu‘ungá. Pea ‘okú ne fakahāhā ‘a e manava‘ofa kiate kinautolu. ‘I he‘etau lāulea ki he founga na‘e fai pehē ai ‘a Sihova kia Siona, ‘Ilaisiā, Heka‘ā mo Loté, tau vakai angé ki he founga ‘e lava ke tau fa‘ifa‘itaki ai kia Sihova ‘i he fakafeangai ki hotau fanga tokouá mo e fanga tuofāfiné.

4. Ko e hā nai te tau vakai ‘ikai lelei ai kia Sioná?

⁴ Mei he‘etau vakai fakangatangatá, ‘e lava ke tau fakamāu‘i ‘a Siona ko ha tokotaha ta‘efalala‘anga pe ta‘emateaki. Na‘á ne ma‘u ha fekau hangatonu meia Sihova ke fanongonongo ‘a e fakamaau ki Ninive. Ka na‘e ‘ikai ke talangofua ‘a Siona, na‘á ne heka ki ha vaka ‘o ‘alu ki ha feitu‘u kehe, “‘o mama‘o meia Sihova.” (Siona 1:1-3) Na‘á ke mei ‘oange kia Siona hano faingamālie? Mahalo pē ‘ikai. Neongo ia, na‘e kehe ‘a e vakai ia ‘a Sihová.—Siona 3:1, 2.

5. Ko e hā ‘okú ke ako fekau‘aki mo Siona mei he‘ene ngaahi lea ‘i he Siona 2:1, 2, 9?

⁵ Na‘e fakae‘a ‘e Siona ‘a ia tonu ‘i he‘ene lotú. (Lau ‘a e Siona 2:1, 2, 9.) Ko e lotu ko iá—‘oku ‘ikai ha veiveiua ko e taha ia ‘i he ngaahi lotu lahi ‘a Siona—‘okú ne tokoni‘i kitautolu ke sio kiate ia ‘o fakalaka atu ia ‘i ha tangata na‘á ne hola mei ha vāhenga-ngāue. ‘Oku fakahaa‘i ‘i he‘ene ngaahi leá na‘á ne anga-fakatōkilalo, hounga‘ia mo fakapapau‘i ke talangofua kia Sihova. Tāne‘ine‘i ke sio fakalaka atu ‘a Sihova ‘i he tō‘onga ‘a Sioná, tali ‘ene lotú pea hokohoko atu hono ngāue‘aki ia ko ha palōfitá!

6. Ko e hā ‘oku tuha ai mo e feingá ke tau fanongo tokangá?

⁶ Ke fanongo tokanga ki he ni‘ihi kehé, ‘oku fiema‘u ke tau anga-fakatōkilalo mo kātaki. ‘Oku ‘i ai ha ‘uhinga ‘e tolu ‘oku tuha ai ia mo e feingá. ‘Uluakí, he‘ikai ke tau hehema ke fakamulituku hala fekau‘aki mo e kakaí. Uá, ‘e lava ke tau ‘ilo‘i ‘a e ongo‘i mo e fakaue‘iloto hotau tokouá, pea ‘e tokoni eni ke tau kaungāongo‘i lahi ange. Pea ko e tolú, te tau tokoni‘i nai ‘a e  tokotahá ke ne ako ha me‘a fekau‘aki mo ia tonu. Ko e mo‘oni, ‘i he taimi ‘e ni‘ihi ‘oku ‘ikai ke tau mahino‘i ‘etau ongo‘í kae ‘oua kuo tau talanoa fekau‘aki mo ia. (Pal. 20:5) ‘Oku fakahaa‘i ‘e ha mātu‘a ‘i ‘Ēsia: “Na‘e ngalo ‘iate au, ‘oku totonu ke u fanongo ki mu‘a peá u toki lea. Na‘á ku tala ange ki ha tuofefine na‘e fiema‘u ke ne fakalelei‘i ‘ene ngaahi talí. Ki mui ai, na‘á ku mahino‘i na‘e ‘ikai loko sai ‘ene lautohí pea na‘e fiema‘u kiate ia ‘a e feinga lahi ke fai ha tali.” ‘Oku mātu‘aki mahu‘inga ki he kau mātu‘á ke “fanongo ki he ngaahi mo‘oni‘i me‘á” ki mu‘a ke fai ha akonaki.—Pal. 18:13.

7. Ko e hā ‘okú ke ako mei he anga ‘o e fakafeangai ‘a Sihova kia ‘Ilaisiā?

⁷ ‘Oku faingata‘a ki he ni‘ihi hotau fanga tokouá mo e fanga tuofāfiné ke talanoa fekau‘aki mo ‘enau ongo‘í koe‘uhi ko honau puipuitu‘á, anga fakafonuá pe anga‘itangatá. ‘E lava fēfē ke tau ‘ai ke faingofua ange ke nau fakahaa‘i mai ‘enau ongo‘í? Manatu‘i ‘a e anga ‘o e fakafeangai ‘a Sihova kia ‘Ilaisiā ‘i he‘ene hola meia Sisipelí. Na‘e ‘osi atu ‘a e ngaahi ‘aho pea toki fakahaa‘i ‘e ‘Ilaisiā ‘ene ongo‘i mo‘oní ki he‘ene Tamai fakahēvaní. Na‘e fanongo tokanga ‘a Sihova. Peá ne fakalototo‘a‘i ‘a ‘Ilaisiā ‘o ‘oange kiate ia ha ngāue mahu‘inga ke ne fai. (1 Tu‘i 19:1-18) ‘E fiema‘u nai ha taimi ki hotau fanga tokouá mo e fanga tuofāfine ke nau ongo‘i fiemālie ke talanoa mai kiate kitautolu, ka ko e toki taimi pē ia te tau mahino‘i ai ‘enau ngaahi ongo‘i mo‘oní. ‘I he‘etau fa‘ifa‘itaki kia Sihova ‘i he hoko ‘o anga-kātakí, te nau toki falala mai. Ka, ‘i he taimi ‘oku nau loto ai ke fakahaa‘i ‘enau ongo‘í, ‘oku totonu ke tau fanongo tokanga.

8. Fakatatau ki he Sēnesi 16:7-13, na‘e anga-fēfē hono tokoni‘i ‘e Sihova ‘a Heka‘ā?

⁸ Ko Heka‘ā, ‘a e kaunanga ‘a Sēlaí, na‘á ne fai ta‘efakapotopoto hili ‘ene hoko ko e uaifi ‘o ‘Epalamé. ‘I he feitama ‘a Heka‘aá na‘e kamata ke ne ta‘etoka‘i ‘a Sēlai, na‘e ‘ikai ha‘ane fānau. ‘I he fakautuutu ke kovi ange ‘a e tu‘ungá na‘e tuli ‘e Sēlai ‘a Heka‘ā. (Sēn. 16:4-6) Mei he‘etau vakai ta‘ehaohaoá, ‘oku hā ngali ko ha fefine kovi ‘a Heka‘ā ‘o tuha pē mo hono tulí. Ka na‘e kehe ‘a e vakai ia ‘a Sihova kia Heka‘aá. Na‘á ne fekau‘i atu ‘ene ‘āngelo kiate ia. ‘I hono ‘ilo‘i ia ‘e he ‘āngeló, na‘á ne tokoni‘i ia ke fakatonutonu ‘ene fakakaukaú pea tāpuaki‘i ia. Na‘e ongo‘i ‘e Heka‘ā na‘e ‘afio‘i mo mahino‘i ‘e Sihova ‘a e me‘a kotoa na‘e hoko kiate iá. Na‘e ue‘i ia ke ne ui ‘a Sihova ‘ko ha ‘Otua ‘o e mamata, ‘a e tokotaha ‘okú ne mamata kiate aú.’—Lau ‘a e Sēnesi 16:7-13.

9. Ko e hā na‘e fakafeangai pehē ai ‘a e ‘Otuá kia Heka‘ā?

⁹ Ko e hā na‘e vakai ki ai ‘a Sihova ‘ia Heka‘aá? Na‘á ne ‘ilo‘i kakato hono puipuitu‘á mo e me‘a kotoa na‘á ne fouá. (Pal. 15:3) Ko Heka‘aá ko ha ‘Isipite na‘á ne nofo ‘i ha fāmili Hepelū. Na‘á ne fa‘a ongo‘i ‘o hangē ha‘ane nofo hili atú? Na‘á ne ‘ofa ki hono fāmilí mo hono fonuá? Na‘e ‘ikai ko e uaifi pē ia ‘o ‘Epalamé. Na‘e ‘i ai ‘a e taimi ko e kau tangata faitōnunga ‘e ni‘ihi na‘a nau mali tokolahi. Ka na‘e ‘ikai ko e mu‘aki taumu‘a ia ‘a Sihová. (Māt. 19:4-6) ‘Oku ‘ikai leva ha ofo, ko e ngaahi tu‘unga peheé na‘e fa‘a fakatupunga ai ‘a e fua‘a mo e tāufehi‘a. Neongo na‘e ‘ikai ke fakatonuhia‘i ‘e Sihova hono ta‘etoka‘i ‘e Heka‘ā ‘a Sēlaí, ‘oku tau ‘ilo‘i na‘á ne fakakaukau ki he puipuitu‘a ‘o Heka‘aá pea mahino‘i hono tu‘ungá.

10. ‘E lava fēfē ke tau hoko ‘o mahino‘i lelei ange hotau fanga tokouá mo e fanga tuofāfiné?

¹⁰ ‘E lava ke tau fa‘ifa‘itaki kia Sihova ‘i he feinga ke mahino‘i ‘a e ni‘ihi kehé. Hoko ‘o mahino‘i lelei ange ho fanga tokouá mo e fanga tuofāfiné. Talanoa mo kinautolu ki mu‘a he fakatahá mo e tukú, ngāue mo kinautolu ‘i he ngāue fakafaifekaú pea ‘o ka malava, fakaafe‘i kinautolu ke mou kai fakataha. ‘I ho‘o fai iá,  te ke ‘ilo‘i nai ai ko ha tuofefine ‘oku hā ngali anga-ta‘efakakaume‘a ko hono mo‘oní ‘okú ne mā, ko ha tokoua ‘okú ke fakakaukau ‘okú ne tuli ki he me‘a fakamatelié ‘okú ne anga-talitali kakai, pe ko ha fāmili ‘oku nau fa‘a tōmui mai ki he fakatahá ‘oku nau kātekina ha fakatanga. (Siope 6:29) Ko hono mo‘oní, ‘oku ‘ikai totonu ke tau hoko ko e “kau kaunoa ‘i he ngaahi me‘a ‘a e kakai kehé.” (1 Tīm. 5:13) Kae kehe, ‘oku lelei ke tau ‘ilo‘i ha me‘a fekau‘aki mo hotau fanga tokouá mo e fanga tuofāfiné mo e ngaahi tu‘unga kuó ne fakafuo honau anga‘itangatá.

11. Ko e hā ‘oku mahu‘inga ai ki he kau mātu‘á ke nau mahino‘i lelei ‘a e fanga sipí?

¹¹ Ko e kau mātu‘á ‘oku tautefito ‘a e fiema‘u ke nau ‘ilo‘i ‘a e puipuitu‘a ‘o e fanga tokoua mo e fanga tuofāfine ‘oku nau tokanga‘í. Fakakaukau ki he fa‘ifa‘itaki‘anga ‘a Artur na‘á ne ngāue ko ha ‘ovasia sēketi. Na‘á ne ‘a‘ahi mo ha mātu‘a ki ha tuofefine na‘e hā ngali mā. “Na‘á ma ‘ilo‘i ko hono husepānití na‘e mate ‘i he hili pē ‘ena malí,” ko e lau ia ‘a Artur. “Neongo ‘a e ngaahi polé, na‘á ne ‘ohake ha ongo tamaiki fefine mālohi fakalaumālie. Ka ‘i he taimi ní ‘oku ‘alu ke kovi ange ‘ene sió pea loto-mafasia. Neongo ia, ko ‘ene ‘ofa kia Sihová mo ‘ene tui kiate iá ‘oku hanganaki mālohi. Na‘á ma ‘ilo‘i na‘e lahi ‘a e me‘a ‘oku lava ke ma ako mei he fa‘ifa‘itaki‘anga lelei ‘a e tuofefine ko ení.” (Fil. 2:3) Na‘e muimui ‘a e ‘ovasia sēketí ki he fa‘ifa‘itaki‘anga ‘a Sihová. ‘Oku ‘afio‘i ‘e Sihova ‘ene fanga sipí mo e mamahi ‘oku nau fuesiá. (‘Eki. 3:7) Ko e kau mātu‘a ‘oku nau mahino‘i lelei ‘a e fanga sipí ‘oku nau ‘i ha tu‘unga lelei ange ke tokoni‘i kinautolu.

12. Na‘e anga-fēfē ‘a e ma‘u ‘aonga ‘a Yip Yee mei he hoko ‘o ‘ilo‘i ha tuofefine ‘i he fakataha‘angá?

¹² ‘I ho‘o ‘ilo‘i ‘a e puipuitu‘a ‘o ha kaungā-Kalisitiane ‘okú ne faka‘ita‘i koe, ‘oku ngalingali te ke ongo‘i kaungāongo‘i ange ki he tokotaha ko iá. Fakakaukau ki ha fakatātā. “Ko ha tuofefine ‘i he‘eku fakataha‘angá na‘á ne lea mātu‘aki le‘o-lahi,” ko e lau ia ‘a Yip Yee, ‘a ia ‘okú ne nofo ‘i ‘Ēsia. “Na‘á ku fakakaukau na‘e ‘ikai ke ne ‘ulungaanga lelei. Ka ‘i he‘eku ngāue fakataha mo ia ‘i he malangá, na‘á ku ‘ilo‘i na‘á ne fa‘a tokoni ki he‘ene ongo mātu‘á ‘i he fakatau ika he māketí. Na‘e pau ke ne lea le‘o-lahi ke tohoaki‘i mai ‘a e kakaí.” ‘Oku toe pehē ‘e Yip Yee: “Na‘á ku ‘ilo‘i ke mahino‘i hoku fanga tokouá mo e fanga tuofāfiné, ‘oku fiema‘u ke u ‘ilo‘i honau puipuitu‘á.” ‘Oku fiema‘u ‘a e feinga ke hoko ‘o ‘ilo‘i lelei ange ho fanga tokouá. Ka, ‘i he taimi ‘okú ke muimui ai ‘i he akonaki ‘a e Tohi Tapú ke mātu‘aki fakaava atu ho lotó, ‘okú ke fa‘ifa‘itaki ai kia Sihova, ‘a ia ‘okú ne ‘ofa ‘i he “fa‘ahinga kakai kotoa pē.”—1 Tīm. 2:3, 4; 2 Kol. 6:11-13.

13. Hangē ko ia ‘oku hiki ‘i he Sēnesi 19:15, 16, ko e hā na‘e fai ‘e he ongo ‘āngeló ‘i he kei fakatuotuai ‘a Loté, pea ko e hā hono ‘uhingá?

¹³ ‘I ha taimi mātu‘aki mahu‘inga ‘i he mo‘ui ‘a Loté, na‘á ne fakatuotuai ke talangofua ki he fakahinohino ‘a Sihová. Na‘e ‘a‘ahi ha ongo ‘āngelo kia Lote pea tala ange ke ‘ave hono fāmilí ki tu‘a mei Sōtoma. Ko e hā hono ‘uhingá? Na‘á na pehē: “Te ma faka‘auha ‘a e feitu‘ú ni.” (Sēn. 19:12, 13) ‘I he pongipongi hokó, na‘e kei ‘i honau ‘apí pē ‘a Lote mo hono fāmilí. Ko ia na‘e toe fakatokanga ‘a e ongo ‘āngeló kia Lote. Ka na‘á ne ‘kei fakatuotuai.’ Te tau fakamāu‘i nai ‘a Lote ‘o pehē na‘á ne ta‘etokanga pe talangata‘a. Neongo ia, na‘e ‘ikai fo‘i ‘a Sihova ‘iate ia. “Koe‘uhi ko e manava‘ofa ‘a Sihova kiate iá,” na‘e puke ‘e he ongo ‘āngeló ‘a e nima ‘o e fāmilí pea taki atu kinautolu ki tu‘a mei he koló.—Lau ‘a e Sēnesi 19:15, 16.

14. Ko e hā nai na‘e ongo‘i manava‘ofa ai ‘a Sihova kia Loté?

¹⁴ Na‘e ongo‘i manava‘ofa nai ‘a Sihova kia Lote ‘i he ngaahi ‘uhinga lahi. Na‘e toumoua nai ‘a Lote ke mavahe mei hono ‘apí koe‘uhí na‘á ne manavahē ‘i he kakai ‘i tu‘a ‘i he koló. Na‘e ‘i ai foki mo e ngaahi fakatu‘utāmaki kehe. ‘Oku ngalingali na‘e ‘ilo‘i ‘e Lote ‘a e ongo tu‘i na‘á na tō ‘i he ngaahi luo ‘o e me‘a hangē ha valitaá, ‘i ha tele‘a ofi mai. (Sēn. 14:8-12) ‘I he tu‘unga ko ha husepāniti mo e tamai, kuo pau pē na‘e hoha‘a ‘a Lote fekau‘aki mo hono fāmilí. Pehē foki, na‘e koloa‘ia ‘a Lote, ko ia kuo pau pē na‘á ne ma‘u ha fale lelei ‘i Sōtoma. (Sēn. 13:5, 6) Ko hono mo‘oní, ‘oku ‘ikai hoko ‘a e ngaahi ‘uhinga ko ení ko ha kalofanga ki he ‘ikai talangofua vave ‘a Lote kia Sihová. Kae kehe, na‘e sio fakalaka atu ‘a Sihova ‘i he fehālaaki ‘a Loté pea vakai kiate ia ko ha “tangata mā‘oni‘oni.”—2 Pita 2:7, 8.

15. ‘I he ‘ikai fakamāu‘i ‘a e tō‘onga ‘a ha tokotaha, ko e hā ‘oku totonu ke tau faí?

¹⁵ ‘I he ‘ikai fakamāu‘i ‘a e tō‘onga ‘a ha tokotaha, fai ho lelei tahá ke mahino‘i ‘a e anga ‘ene ongo‘í. Ko ha tuofefine ‘i ‘Iulope, ko Veronica, na‘á ne feinga ke fai ia. “Na‘e ‘i ai ha tuofefine na‘á ne hā ngali ‘ite‘ita ma‘u pē,” ko ‘ene laú ia. “Na‘á ne fakamavahe‘i ma‘u pē ia mei he ni‘ihi kehé. ‘I he taimi ‘e ni‘ihi, na‘á ku ilifia ke lea kiate ia. Ka na‘á ku fakakaukau, ‘Kapau na‘á ku  ‘i hono tu‘ungá, te u fiema‘u ha kaume‘a.’ Ko ia na‘á ku ‘eke ange pe ‘okú ne fēfē. Pea na‘e kamata ke ne tala mai ‘a e anga ‘ene ongo‘í. ‘Oku ou mahino‘i he taimí ni ‘a e me‘a lahi ange fekau‘aki mo ia.”

16. Ko e hā ‘oku totonu ai ke tau lotu ki ha tokoni ke fakatupulekina ‘a e kaungāongo‘í?

¹⁶ Ko e tokotaha pē ‘okú ne mahino‘i mo‘oni kitautolú ko Sihova. (Pal. 15:11) Ko ia kole kiate ia ke tokoni‘i koe ke sio ki he ni‘ihi kehé ‘o hangē ko ‘ene sio kiate kinautolú pea ke mahino‘i ‘a e founga ke fakahāhā ai ‘a e manava‘ofá kiate kinautolu. Ko e lotú na‘e tokoni ki ha tuofefine ko Anzhela ke kaungāongo‘i lahi ange. Ko ha tuofefine ‘i he‘ene fakataha‘angá na‘e anga-faingata‘a. ‘Oku pehē ‘e Anzhela: “Na‘e mei faingofua ‘aupito ke fakaanga‘i ‘a e tuofefiné pea fakamama‘o meiate ia. Ka na‘á ku kole kia Sihova ke tokoni‘i au ke kaungāongo‘i ki he tuofefine ko ení.” Na‘e tali ‘e Sihova ‘a e lotu ‘a Anzhela? ‘Okú ne pehē: “Na‘á ma ngāue fakataha ‘i he malangá pea ‘i he hili iá na‘á ma talanoa ‘i he laui houa. Na‘á ku fanongo kiate ia ‘i he kaungāongo‘i. ‘Oku ou ‘ofa lahi ange kiate ia he taimí ni, pea ‘oku ou fakapapau‘i ke tokoni‘i ia.”

17. Ko e hā ‘oku totonu ke tau fakapapau‘i ke faí?

¹⁷ He‘ikai lava ke ke fili ‘a e fanga tokoua mo e fanga tuofāfine ‘oku nau tuha mo ho‘o manava‘ofa kaungāongo‘í. Ko kinautolu kotoa ‘oku nau fehangahangai mo e ngaahi palopalema hangē pē ko Siona, ‘Ilaisiā, Heka‘ā mo Lote. ‘I he ngaahi tu‘unga lahi, ko e fakatupunga pē ‘e kinautolu. Ko hono mo‘oní, ko kitautolu kotoa kuo tau fai pehē ‘i ha taimi. ‘Oku ‘uhinga lelei leva, ‘a e fiema‘u mai ‘e Sihova ke tau fakahāhā ‘a e kaungāongo‘i ki he ni‘ihi kehé. (1 Pita 3:8) ‘I he‘etau talangofua kia Sihová, ‘oku tau tokoni ai ki he fā‘ūtaha ‘a hotau fāmili ‘i māmani lahí. Ko ia ‘i he‘etau fefakafeangai‘akí, ‘ofa ke tau fakapapau‘i ke fanongo, mahino‘i pea fakahāhā ‘a e manava‘ofá.