‘I he 1913, ko ‘eku tamaí, ‘a John Mills, na‘á ne papitaiso ‘i Niu ‘Ioke ‘i hono ta‘u 25. Na‘e fai ‘e Tokoua Russell ‘a e malanga papitaisó. Taimi nounou mei ai, na‘e ‘alu ‘eku tamaí ki Tuliniteti, ‘o ne mali ai mo Constance Farmer, ko ha Ako Tohi Tapu faivelenga. Na‘e tokoni ‘eku tamaí ki hono kaume‘a ko William R. Brown ke hulu ‘a e “Tulama-‘Ata ‘o e Fakatupú.” Na‘á na fai pehē ‘o toki a‘u ki hono vahe‘i ‘a Tokoua mo Tuofefine Brown ki ‘Afilika Hihifo ‘i he 1923. Ko ‘eku tamaí mo ‘eku fa‘ē, ‘a ia na‘á na ma‘u ‘a e ‘amanaki fakahēvaní, na‘á na ngāue ai pē ‘i Tuliniteti.

Na‘e toko hiva ‘emau fānaú, ‘o fakahingoa ‘a e tamasi‘i lahí ki he palesiteni ‘i he taimi ko iá ‘o e Watch Tower Bible and Tract Society ko Rutherford. ‘I hono fā‘ele‘i au ‘i Tīsema 30, 1922, na‘e fakahingoa au kia Clayton J. Woodworth, ko e ‘ētita ‘o e The Golden Age (ko e Awake! ia he taimí ni). Na‘e ‘ai ‘e he‘emau ongo mātu‘á ke mau ma‘u ha ako fe‘unga, ka na‘á na fakalototo‘a‘i ke mau fokotu‘u ha taumu‘a fakalaumālie. Na‘e ma‘u ‘e he fine‘eikí ha malava makehe ‘i he faka‘uhinga fakatupu tuipau mei he Folofolá. Na‘e sai‘ia ‘eku tamaí ke talanoa ki he ngaahi talanoa Fakatohitapú, peá ne fakatātaa‘i ia ‘o lava ke mau sioloto atu ki he fakamatala Fakatohitapú.

Na‘e ola lelei ‘ena feingá. Ko e toko tolu ‘o kimautolu ‘i he tamaiki tangata ‘e toko nimá na‘a mau ‘alu ki he Ako‘anga Kiliatí. Na‘e tāimu‘a hoku tuofefine ‘e toko tolu ‘i he ngaahi ta‘u ‘i Tuliniteti mo Topako. ‘I he akonaki mo e fa‘ifa‘itaki‘anga lelei ‘emau ongo mātu‘á, na‘á na tō ai kimautolu fānaú “‘i he fale ‘o Sihová.” Ko ‘ena fakalototo‘á na‘e tokoni ia ke mau nofo ai pē ai pea tupu ‘āfa‘afa “‘i he ongo loto‘ā ‘o hotau ‘Otuá.”​—Saame 92:13.

Na‘e fokotu‘utu‘u ‘a e ngāue fakamalangá mei homau ‘apí. Na‘e fakataha ki ai ‘a e kau tāimu‘á pea fa‘a talanoa fekau‘aki mo Tokoua George Young, ko ha misinale Kānata na‘á ne ‘a‘ahi ki Tuliniteti. Na‘e talanoa fiefia ‘eku ongo mātu‘á ki  hona ongo hoa ngāue ki mu‘á, ‘a Tokoua mo Tuofefine Brown, ‘a ia na‘á na ‘i ‘Afilika Hihifo he taimi ko iá. Na‘e ue‘i au ‘e he me‘á ni kotoa ke kamata ‘eku ngāue fakamalangá ‘i he‘eku ta‘u hongofulú.

Na‘e fu‘u hangatonu ‘etau ‘ū makasiní ‘i he taimi ko iá, ‘o fakae‘a ‘a e lotu loí, kau fefakatau‘aki mānumanú mo e kau politiki kākaá. ‘I he tali ki aí, ‘i he 1936 na‘e poupou‘i ‘e he ha‘a faifekaú ‘a e kōvana le‘ole‘o ‘o Tulinitetí ke ne ta‘ofi ‘a e ‘ū tohi kotoa ‘a e Taua Le‘o. Na‘a mau fūfuu‘i ‘a e ‘ū tohí kae hokohoko atu ke ngāue‘aki ia kae ‘oua ke ‘osi. Na‘a mau malanga ‘aki hono tui ‘a e papa tu‘uaki pea tufa mo e lau‘ipepa-tu‘uaki ‘i he‘emau laka holo mo heka pasikala. Fakataha mo e fa‘ahinga ne nau ‘alu ‘i ha kā mo e me‘a fakaongo le‘o-lahi ki he kolo ko Tunapuna, na‘a mau malanga ‘o a‘u ki he kolo tu‘u mavahe taha ‘i Tulinitetí. Na‘e fakafiefia! Ko e ‘ātakai fakalaumālie ko iá na‘e iku ai ki he‘eku papitaiso ‘i he‘eku ta‘u 16.

Ko homau tofi‘a fakafāmilí mo e ngaahi hokosia ko ení na‘á ne ‘ai ke u holi ke hoko ko ha misinale. Na‘e kei mālohi ‘a e holi ko iá ‘iate au ‘i he‘eku ‘alu ki Aruba ‘i he 1944 pea kau fakataha mo Tokoua Edmund W. Cummings. Na‘á ma fiefia ke fakataha mo ha kakai ‘e toko hongofulu ki he Fakamanatu ‘i he 1945. ‘I he ta‘u hono hokó, na‘e fokotu‘u ‘a e fuofua fakataha‘anga ‘i he motú.

Taimi nounou pē mei ai, na‘á ku faifakamo‘oni ‘ikai anga-maheni ki ha kaungāngāue ko Oris Williams. Na‘e feinga mālohi ‘a Oris ke taukapo‘i ‘a e ngaahi tokāteline na‘e ako‘i ia ki aí. Kae kehe, fakafou ‘i ha ako Tohi Tapu, na‘á ne ako ‘a e mo‘oni ‘o e Folofolá peá ne papitaiso ‘i Sanuali 5, 1947. ‘I he faai atu e taimí, na‘á ma fe‘ofa‘aki peá ma mali. Na‘á ne kamata tāimu‘a ‘i Nōvema 1950. Koe‘uhi ko Oris na‘e kamata ke u toe fiefia ange ‘i he mo‘uí ‘i ha founga kehe.

‘I he 1955 na‘e fakaafe‘i kimaua ki he Ako‘anga Kiliatí. ‘I he teuteu ki he monū ko iá, na‘á ku fakafisi mo Oris ‘i he‘ema ngāué, fakatau atu homa ‘apí mo e ‘ū koloa kehe, pea lea māvae ki Aruba. ‘I Siulai 29, 1956, na‘á ma ma‘u tohi fakamo‘oni ako mei he kalasi hono 27 ‘o Kiliatí pea vahe‘i kimaua ki Naisīlia.

‘I he sio atu ki muí, na‘e pehē ‘e Oris: “‘E lava ke tokoni‘i ‘e he laumālie ‘o Sihová ha taha ke ne fekuki mo e faingata‘a ‘o e mo‘ui ko ha misinalé. ‘I he ‘ikai hangē ko hoku husepānití, na‘e ‘ikai ‘aupito ke u fie hoko ko ha misinale. Na‘á ku sai‘ia ange ke ma‘u ha ‘api pea ‘ohake ha fānau. Na‘e liliu ‘eku fakakaukaú ‘i he‘eku ‘ilo‘i ‘a e fakavavevave hono fiema‘u ke malanga‘i ‘a e ongoongo leleí. ‘I he‘ema ‘osi mei Kiliatí, na‘á ku mateuteu kakato ke malanga ko ha misinale. ‘I he‘ema heka ‘i he vaka Queen Mary, na‘e ui mai ‘a Worth Thornton, mei he ‘ōfisi ‘o Tokoua Knorr ke ma ma‘u ha folau lelei. Na‘á ne tala mai te ma ngāue ‘i Pēteli. ‘‘Oiauē!’ Na‘á ku māpuhoi. Ka na‘e vave ‘eku fe‘unu‘akí peá u ‘ofa ‘i he ngāue ‘i Pētelí, ‘a ia na‘á ku ma‘u ai ‘a e vāhenga-ngāue kehekehe. Ko e ngāue ne u sai‘ia taha aí ko e talitali kakaí. ‘Oku ou ‘ofa he kakaí, pea na‘e ‘ai au ‘e he ngāué ni ke u fetaulaki tonu ai mo e fanga tokoua Naisīliá. Ne a‘u mai ‘a e tokolahi ‘oku nau efua, hela‘ia, fieinua mo fiekaia. Ko ha monū ia ke ‘oange ‘a e me‘akai mo e fakafiemālie na‘a nau fiema‘ú. Ko e ngāue toputapu kotoa eni kia Sihova, pea ko e me‘a ia na‘á ne ‘omi kiate au ‘a e fiemālie mo e fiefia.” ‘Io ko e vāhenga-ngāue taki taha na‘e ‘ai ai ke ma lakalakaimonū.

‘I ha fakataha fakafāmili ‘i Tuliniteti ‘i he 1961, na‘e lave ‘a Tokoua Brown ki he ni‘ihi ‘o ‘ene ngaahi hokosia fakafiefia ‘i ‘Afiliká. Na‘á ku lave leva ki he tupu ‘i Naisīliá. Na‘e hili mai ‘e Tokoua Brown hono nimá ki hoku umá peá ne pehē ki he‘eku tamaí: “Johnny, na‘e ‘ikai te ke a‘u koe ki ‘Afilika, ka na‘e a‘u ‘a Woodworth ia ki ai!” ‘I he tali ki aí, na‘e pehē he‘eku tamaí: “Hokohoko atu, Worth! Hokohoko atu!” Ko e fakalototo‘a pehē mei he fa‘ahinga taukei fakalaumālie ko iá na‘e toe fakaloloto‘i ai ‘eku holi ke fakahoko faka‘āuliliki ‘eku ngāue fakafaifekaú.

‘I he 1962, na‘á ku ma‘u ha monū ke ako lahi ange ‘i he kalasi hono 37 ‘o Kiliatí, ko ha ako māhina ‘e hongofulu. Ko Tokoua Wilfred Gooch, ‘a e ‘ovasia ‘o e va‘a Naisīliá he taimi ko iá, na‘á ne ma‘u ‘a e kalasi hono 38 pea vahe‘i ia ki ‘Ingilani. Ko hono tokanga‘i ‘a e va‘a Naisīliá na‘e hoko ia ko  hoku fatongiá. ‘I he muimui ki he fa‘ifa‘itaki‘anga ‘a Tokoua Brown, na‘e lahi ange ‘eku folaú, hoko ‘o ‘ilo‘i mo ‘ofa ‘i he si‘i fanga tokoua Naisīliá. Neongo na‘e ‘ikai fu‘u lahi ‘enau me‘a fakamatelié hangē ko e kakai ‘i he ngaahi fonua fakalakalaka angé, ko ‘enau fiefiá mo e toponó na‘e hā mahino mei ai ko ha mo‘ui mohu ‘uhinga ‘oku ‘ikai fakatu‘unga ia ‘i he pa‘angá pe koloa fakamatelié. ‘I he fakakaukau atu ki honau tu‘ungá, ‘oku fakaofo ke sio ‘oku nau ma‘a, maau pea fakangeingeia ‘i he ngaahi fakatahá. ‘I he‘enau ‘aukolo mai ki he ngaahi fakataha-lahí, ‘oku a‘u mai ‘a e tokolahi ‘i he ngaahi loli mo e bolekajas * (ko ha pasi ‘ikai hano sio‘ata he tafa‘akí na‘e ngaahi fakalotofonua pē). ‘Oku fa‘a tā ha ngaahi kupu‘i lea ‘i he ‘ū pasí. Ko e taha: “Hoko ha tulutā vai ko ha ‘ōseni lahi.”

He mo‘oni ē ko e kupu‘i lea ko iá! Ko e ki‘i feinga ‘a e tokotaha taki taha na‘e ‘aonga; na‘á ma tokoni mo kimaua ki ai. ‘I he 1974, na‘e hoko ‘a Naisīlia ko e fuofua fonua ia ‘i tu‘a mei ‘Amelika ke a‘u ki he kau malanga ‘e 100,000. Na‘e tupu ‘āfa‘afa ‘a e ngāué!

Lolotonga ‘a e tupu ko ení, na‘e hoko ‘a e Tau Fakalotofonua ‘i Naisīliá mei he 1967 ki he 1970. ‘I he laui māhina, ko hotau fanga tokoua ‘i he tafa‘aki ‘o Biafran ‘i he Vaitafe Naisá na‘e ‘ikai lava ke nau toe fetu‘utaki mo e ‘ōfisi va‘á. Na‘e pau ke mau ‘ave kiate kinautolu ‘a e me‘akai fakalaumālié. Hangē na‘e lave ki ai ‘i he talateú, ‘i he lotu mo e falala kia Sihova, na‘e tu‘o lahi ‘ema kolosi ‘i he vaitafé.

‘Oku ou manatu‘i lelei ‘a e ngaahi fononga fakatu‘utāmaki ‘o e kolosi ‘i he Naisá, ‘o tuku ‘ema mo‘uí ke ‘i ha tu‘unga fakatu‘utāmaki ‘i he kau sōtia anga-fakamamahí, ko e mahamahakí mo e ngaahi fakatamaki kehe. Na‘e ‘osi fakatu‘utāmaki pē ‘a e fou atu ‘i he kau sōtia ‘a e pule‘angá, ka na‘e toe fakamanavahē ange ‘a e a‘u ki he tafa‘aki ‘o Biafran. ‘I he tu‘unga ‘e taha, na‘á ku kolosi ai ‘i he vaitafe tafe mālohi ‘o Naisá ‘i ha pōpao mei Asaba ki Onitsha pea ‘alu ke fakalototo‘a‘i ‘a e kau mātu‘a ‘i Enugu. Ko e fononga ‘e taha ke fakalototo‘a‘i ‘a e kau mātu‘á ‘i he tu‘utu‘uni ke tāmate‘i efiafia ‘a e ‘uhilá ‘i Aba. ‘I he Taulanga Harcourt, na‘e faka‘osi fakavave ‘emau fakatahá ‘aki ha lotu ‘i he hū mai ‘i he tu‘akoló ‘a e kau sōtiá ki Biafran.

Na‘e mātu‘aki mahu‘inga ‘a e ngaahi fakataha ko iá ke fakapapau‘i ki si‘otau fanga tokouá ‘a e tokanga anga-‘ofa ‘a Sihová pea ‘oange ‘a e akonaki na‘a nau fiema‘u lahi ‘i he fekau‘aki mo e tu‘u-‘ataá mo e fā‘ūtahá. Na‘e kātekina lavame‘a ‘e he fanga tokoua ‘i Naisīliá ‘a e fakafepaki fakalilifu ko iá. Ko ‘enau fe‘ofa‘akí na‘e mālohi ange ia ‘i ha tāufehi‘a fakamatakali pē pea na‘a nau tauhi ma‘u ‘a e fā‘ūtaha faka-Kalisitiané. Ko ha monū ē ke ‘i ai fakataha mo kinautolu ‘i he taimi faingata‘a ko iá!

‘I he 1969, ko Tokoua Milton G. Henschel na‘e sea ‘i he ‘Asemipilī Fakavaha‘apule‘anga “Melino ‘i he Māmaní” ‘i he Yankee Stadium, ‘i Niu ‘Ioke, pea na‘á ku tokoni kiate ia pea ako ‘a e me‘a lahi mei ai. Ko e ako taimi totonu eni koe‘uhi ‘i he 1970 na‘e fai ‘ai ‘a e ‘Asemipilī Fakavaha‘apule‘anga “Kakai ‘Oku Hōifua ki Ai” ‘i Lagos, Naisīlia. ‘I hono fakahoko eni hili pē ‘a e tau fakalotofonuá, na‘e lavame‘a ‘a e kātoangá ni ‘i he tāpuaki pē ‘a Sihová. Ko ha kātoanga makehe eni na‘e fai ‘i he lea ‘e 17 pea ma‘u ‘e he toko 121,128. Ko Tokoua Knorr mo Henschel mo e kau ‘a‘ahi na‘a nau puna mai mei ‘Amelika mo ‘Ingilani na‘a nau fakamo‘oni ki he papitaiso lahi taha faka-Kalisitiane talu mei he Penitekosí​—ko e kau ākonga fo‘ou ‘e 3,775! ‘I he tokoni ke fokotu‘utu‘u ‘a e kātoanga ko iá mahalo ko e taimi femo‘uekina taha ia ‘i he‘eku mo‘uí. Na‘e tupulaki vave ‘aupito ‘a e kau malangá!

‘I he ta‘u ‘e 30 tupu ‘i Naisīliá, na‘á ku fiefia ‘i he‘eku fa‘a ngāue ko ha ‘ovasia fefononga‘aki mo ha ‘ovasia sone ‘i ‘Afilika Hihifo. He hounga‘ia ē ko e kau misinalé ‘i hono ma‘u ‘a e tokanga fakatāutaha mo e fakalototo‘á! He monū ē ko ia ke fakapapau‘i kiate kinautolu na‘e ‘ikai te nau ngalo! Na‘e ako‘i mai ‘e he ngāué ni kiate au ko hono fakahāhā ‘a e mahu‘inga‘ia fakafo‘ituitui ‘i he kakaí ko e kī ia ki hono tokoni‘i kinautolu ke nau lakalakaimonū pea tauhi ma‘u ‘a e mālohi mo e fā‘ūtaha ‘a e kautaha ‘a Sihová.

Ko e tokoni pē ‘a Sihová na‘e malava ai ke ma fekuki mo e palopalema tupu mei he tau fakalotofonuá mo e mahamahakí. Na‘e hā mahino ma‘u pē ‘a e tāpuaki ‘a Sihová. Na‘e pehē ‘e Oris:

 “Na‘e toutou ma‘u kimaua ‘e he malēliá. ‘I he taimi ‘e taha, na‘e leleaki‘i ‘a Worth ki ha falemahaki ‘i Lagos kuó ne pongia. Na‘e tala mai mahalo te ne mate, kae mālō na‘e ‘ikai pehē! ‘I he‘ene toe aké, na‘á ne talanoa fekau‘aki mo e Pule‘anga ‘o e ‘Otuá ki he neesi na‘á ne tokanga‘i iá. Ki mui ai, ne u ‘alu mo Worth ke sio ki he nēsí, ko Mr. Nwambiwe, ke fakatupulekina ‘ene mahu‘inga‘ia ‘i he Tohi Tapú. Na‘á ne tali ‘a e mo‘oní peá ne hoko ki mui ai ko ha mātu‘a ‘i Aba. Na‘á ku lavame‘a foki ‘i hono tokoni‘i ‘a e tokolahi, ‘o a‘u ki he kau Mosilemi fefeka, ke nau hoko ko e kau sevāniti lī‘oa kia Sihova. Ka na‘á ma fiefia lahi tahá ‘i he hoko ‘o ‘ilo‘i mo ‘ofa ‘i he kakai Naisīliá, ko ‘enau anga fakafonuá, tō‘ongá mo e leá.”

Ko e toe lēsoni eni ‘e taha: Ke lakalakaimonū ‘i he‘ema vāhenga-ngāue mulí, na‘e fiema‘u ke ma ‘ofa ‘i homa fanga tokouá mo e fanga tuofāfiné neongo ‘a e kehe ‘enau anga fakafonuá meiate kimaua.

Hili ‘a e ngāue ‘i he Pēteli ‘i Naisīliá, ‘i he 1987 na‘á ma ma‘u ha vāhenga-ngāue fo‘ou ko e ongo misinale ‘i he mala‘e malangá ‘i he ki‘i motu faka‘ofo‘ofa ko Sā. Lūsia ‘i he Kalipiané. Ko ha vāhenga-ngāue fakafiefia mo‘oni ia, ka na‘e ‘i ai hono pole fo‘ou. ‘I he ‘ikai hangē ko ‘Afiliká, ‘a ia na‘e ma‘u ai ‘e he tangata ‘e taha ha ngaahi uaifi tokolahi, ‘i heni ‘i Sā. Lūsia, ko e palopalemá na‘e nonofo pē ‘a e ongo me‘á kae ‘ikai mali fakalao. Na‘e ue‘i ‘e he Folofola mālohi ‘a e ‘Otuá ‘a e tokolahi ‘ema kau ako Tohi Tapú ke fai ‘a e ngaahi liliu na‘e fiema‘ú.

‘I he hōloa homa mālohí ‘i he ta‘umotu‘á, na‘e vahe‘i anga-‘ofa kimaua ‘e he Kulupu Pulé ki he ‘ulu‘i ‘apitanga ‘i māmani ‘i Brooklyn, Niu ‘Ioke, ‘Amelika, ‘i he 2005. ‘Oku ou kei fakamālō pē he ‘aho kotoa kia Sihova koe‘uhi ko Oris. Na‘e iku‘i ia ‘e he fili ko e maté ‘i he 2015, pea ko e mamahi ‘i he‘ene molé ‘oku ta‘ealafakamatala‘i. Ko e hoa lelei mo‘oni mo ha uaifi anga-‘ofa ia. Na‘á ku ‘ofa mo‘oni ‘iate ia ‘i he ta‘u ‘e 68 ‘ema nofo malí. Na‘á ma ‘ilo‘i ko e kī ki he fiefiá, ‘i he nofo malí pea ‘i he fakataha‘angá, ko e faka‘apa‘apa‘i ‘a e tu‘unga-‘ulú, fakamolemole loto-lelei, hanganaki anga-fakatōkilalo pea fakahāhā ‘a e fua ‘o e laumālié.

‘I he‘ema hokosia ‘a e siva ‘a e ‘amanakí mo e loto-si‘í, na‘á ma hanga kia Sihova ke ne tokoni‘i kimaua ke tauhi ma‘u ta‘eue‘ia ‘ema ngaahi feilaulau fakafo‘ituituí. ‘I he‘ema hokohoko atu ke fe‘unu‘akí, na‘á ma sio na‘e hoko ‘o toe lelei ange ‘a e ngaahi me‘á ‘i he taimi kotoa​—pea ko e lelei tahá ‘oku kei ‘i mu‘a!​—‘Ai. 60:17; 2 Kol. 13:11.

‘I Tuliniteti mo Topako, na‘e tāpuaki‘i ‘e Sihova ‘a e ngāue ‘eku ongo mātu‘á mo e ni‘ihi kehé koe‘uhi​—fakatatau ki he līpooti fakamuimui tahá—​ko e toko 9,892 kuo nau kau ki he lotu mo‘oní. ‘I Aruba, na‘e ngāue ‘a e tokolahi ke fakaivimālohi‘i ‘a e mu‘aki fakataha‘anga ne u kau ki aí. ‘I he motu ko iá he taimí ni ‘oku ‘i ai ‘a e fakataha‘anga lakalakaimonū ‘e 14. Ka ‘i Naisīlia, kuo tupulaki ‘a e kau malangá ki ha fu‘u kakai ‘e toko 381,398. Pea ‘i Sā. Lūsia, ko e toko 783 ‘oku nau poupou‘i ‘a e Pule‘anga ‘o Sihová.

‘Oku ou ta‘u 90 tupu he taimí ni. ‘Oku pehē ‘e he Saame 92:14 fekau‘aki mo e fa‘ahinga ‘oku tō ‘i he fale ‘o Sihová: “Na‘a mo ‘enau ta‘umotu‘á te nau kei lakalakaimonū ai pē; te nau kei iviivi ai pē mo mo‘ui lelei.” ‘Oku ou hounga‘ia ‘aupito ‘i he‘eku fakamoleki ‘eku mo‘uí ‘i he ngāue ‘a Sihová. Ko e tofi‘a faka-Kalisitiane fakakoloa kuó u ma‘ú kuó ne fakalototo‘a‘i au ke tauhi kakato kia Sihova. ‘I he ‘ofa mateaki ‘a Sihová, kuó ne ‘ai au ke u “tupu ‘āfa‘afa ‘i he ongo loto‘ā ‘o [hoku] ‘Otuá.”​—Saame 92:13.