“‘A koe ko e Tokotaha-Fanongo ki he lotú, ‘e ‘alu atu kiate koe ‘a e ngaahi fa‘ahinga kakai kotoa.”​—Saame 65:2.

‘Oku lotu ‘a e ni‘ihi koe‘uhi ‘oku pehē ‘oku ‘ai ai ke nau ongo‘i lelei ange, neongo ‘oku ‘ikai ke nau tui ‘oku fanongo mo‘oni mai ha taha. Ka ko e lotú ‘oku ‘ikai ko ha me‘a ia ‘oku tau fai pē ke tau ongo‘i lelei koe‘uhi ke tau fekuki ai mo ‘etau ngaahi palopalemá. ‘Oku fakapapau‘i mai ‘e he Tohi Tapú “‘Oku ofi ‘a Sihova * ki he fa‘ahinga kotoa ‘oku ui kiate iá, ki he fa‘ahinga kotoa ‘oku ui kiate ia ‘i he mo‘oní. . . . ‘Okú ne fanongo ki he‘enau tangi ki ha tokoní.”​—Saame 145:18, 19.

Ko ia ai, ‘oku lava ke tau fakapapau‘i ‘oku fanongo mai ‘a Sihova ko e ‘Otuá ki he lotu ‘a ‘ene kau lotú. ‘Okú ne lea anga-‘ofa: “Te mou ui kiate au mo mou omi ‘o lotu kiate au, pea te u fanongo kiate kimoutolu.”​—Selemaia 29:12.

“Kītaki ‘i he lotu.”​—Loma 12:12.

‘I he Tohi Tapú, ‘oku fakalototo‘a‘i ai kitautolu ke “lotu ma‘u ai pē” pea “hokohoko atu ‘a e lotu ‘i he taimi kotoa pē.” ‘Oku hā mahino, ‘oku finangalo ‘a Sihova ko e ‘Otuá ke tau lotu ange kiate ia.​—Mātiu 26:41; ‘Efesō 6:18.

Ko e hā ‘oku finangalo ai ‘a e ‘Otuá ke tau lotu ange kiate iá? Faka‘uta atu: Ko hai ia ha mātu‘a he‘ikai loto ke pehē ange ha‘ane ki‘i leka “Teti, ‘e lava ke ke tokoni mai”? Ko e mo‘oni, ‘e ‘osi ‘ilo‘i nai ‘e ha tamai ‘a e me‘a ‘oku fiema‘u ‘e he‘ene ki‘i leká pe ko ‘ene ongo‘í, ka ‘i he taimi ‘okú ne fanongo ai ki he ngaahi lea ko iá, ‘oku fakahaa‘i ai kiate ia ‘oku falala ange ‘ene ki‘i leká pea ‘okú ne ofi kiate ia. ‘I he tu‘unga meimei tatau, ‘i he‘etau lotu kia Sihova ko e ‘Otuá, ‘oku tau fakahaa‘i ai ‘oku tau falala kiate ia pea ‘oku tau loto ke ofi kiate ia.​—Palōveepi 15:8; Sēmisi 4:8.

“Lī atu ‘a e kotoa ho‘omou loto-mo‘uá kiate ia, koe‘uhí he ‘okú ne tokanga mai kiate kimoutolu.”​—1 Pita 5:7.

Ko e finangalo ‘o e ‘Otuá ke tau lotu ange kiate ia koe‘uhi ‘okú ne ‘ofa mo tokanga mai kiate kitautolu. ‘Okú ne ‘afio‘i lelei ‘etau ngaahi hoha‘á mo e loto-mo‘uá, pea ‘okú ne loto ke tokoni‘i kitautolu.

‘I he kotoa ‘o e mo‘ui ‘a Tu‘i Tēvitá, na‘á ne lotu kia Sihova ko e ‘Otuá ki ha tokoni pea tala kiate Ia ‘ene fakakaukaú mo e ongo‘í. (Saame 23:1-6) Na‘e anga-fēfē ongo‘i ‘a e ‘Otuá kia Tēvitá? Na‘e ‘ofa ‘a e ‘Otuá kia Tēvita pea fanongo ki he‘ene ngaahi lotú. (Ngāue 13:22) ‘Oku pehē pē, ‘oku fanongo mai ‘a e ‘Otuá ki he‘etau lotú koe‘uhi ‘okú ne tokanga mai kiate kitautolu.

Ko e ngaahi lea ia ‘a ha tokotaha-tohi-saame ‘i he Tohi Tapú. Na‘á ne fakapapau‘i na‘e fanongo ‘a e ‘Otuá ki he‘ene lotú, pea na‘e ola lelei ia kiate ia. Na‘á ne ongo‘i ofi ange ki he ‘Otuá pea ma‘u ‘a e mālohi ke fekuki ai mo e ngaahi faingata‘a mo e mamahi ‘i he mo‘uí.​—Saame 116:1-9.

‘I he taimi ‘oku tau fakapapau‘i ai ‘oku fanongo mai ‘a e ‘Otuá ki he‘etau lotú, te tau kīvoi ‘i he talanoa kiate ia. Fakakaukau ki he hokosia ‘a Pedro, ‘okú ne nofo ‘i he fakatokelau ‘o Sipeiní. Na‘e mate hono foha ta‘u 19 ‘i ha fakatu‘utāmaki he halá. ‘I he‘ene mamahí, na‘e hua‘i atu ‘e Pedro hono lotó ki he ‘Otuá pea toutou lotu ki ha fakafiemālie mo ha poupou. Ko e hā na‘e hokó? “Na‘e tali ‘eku ngaahi lotú fakafou ‘i he fakafiemālie mo e poupou na‘á ku ma‘u mo hoku uaifí mei he kaungā-Kalisitiané,” ko e lau ia ‘a Pedro.

Neongo na‘e ‘ikai ke fakamo‘ui mai ‘e he lotú ‘a hono fohá, na‘e tokoni ia kia Pedro mo hono fāmilí ‘i he ngaahi founga mahu‘inga. ‘Oku manatu ‘a hono uaifí, ‘a María Carmen: “Na‘e tokoni ‘a e ngaahi lotú ke u kātekina ‘eku mamahí. Na‘á ku ‘ilo‘i na‘e mahino‘i au ‘e Sihova ko e ‘Otuá koe‘uhi ‘i he‘eku lotu kiate iá na‘á ku ongo‘i nonga mo fiemālie.”

Ko e Tohi Tapú mo e ngaahi hokosia fakafo‘ituituí ‘oku fakahaa‘i mahino ai ko e ‘Otuá ‘okú ne fanongo ki he ngaahi lotú. Neongo ia, ‘oku toe fakahaa‘i ai ko e ‘Otuá ‘oku ‘ikai ke ne tali ‘a e lotu kotoa pē. Ko e hā ‘oku tali ai ‘e he ‘Otuá ‘a e lotu ‘e ni‘ihi kae ‘ikai tali ‘a e ni‘ihi?