‘Oku fanongo mai ‘a e ‘Otuá. ‘Oku fakapapau‘i mai ‘i he Tohi Tapú “‘Oku ofi ‘a Sihova ki he fa‘ahinga kotoa ‘oku ui kiate iá, ki he fa‘ahinga kotoa ‘oku ui kiate ia ‘i he mo‘oní. . . . ‘Okú ne fanongo ki he‘enau tangi ki ha tokoní.”​—Saame 145:18, 19.

‘Oku finangalo ‘a e ‘Otuá ke ke lotu kiate ia. ‘Oku fakaafe‘i kitautolu ‘e he Tohi Tapú: “‘I he me‘a kotoa pē mou ‘ai ke ‘ilo ho‘omou ngaahi kolé ‘e he ‘Otuá, fakafou ‘i he lotu mo e hū tōtōaki fakataha mo e fakafeta‘i.”​—Filipai 4:6.

‘Oku tokanga mo‘oni ‘a e ‘Otuá kiate koe. ‘Oku ‘afio‘i lelei ‘e he ‘Otuá ‘etau ngaahi hoha‘á mo e loto-mo‘uá, pea ‘okú ne loto ke tokoni‘i kitautolu. “Lī atu ‘a e kotoa ho‘omou loto-mo‘uá kiate ia,” ko e lau ia ‘a e Tohi Tapú, “koe‘uhí he ‘okú ne tokanga mai kiate kimoutolu.”​—1 Pita 5:7.