Lau ‘a e Kakaí Fekau‘aki mo e Lotú
“‘I he‘eku lotú, ‘oku ou ongo‘i ‘o hangē ‘oku ‘i hoku tafa‘akí ‘a e ‘Otuá, ‘o puke hoku nimá pea tataki au ‘i he‘eku tuēnoá.”—MARÍA.
“Na‘e mate hoku uaifí hili ha‘ane faitau mo e kanisaá ‘i he ta‘u ‘e 13. ‘Oku ou manatu‘i ‘eku lotu ‘i he ‘aho kotoa ki he ‘Otuá pea ongo‘i na‘á ne fanongo mo‘oni mai ki he‘eku mamahí. Na‘á ku nonga.”—RAÚL.
“Ko e lotú ko ha me‘a‘ofa faka‘ofo‘ofa mei he ‘Otuá ki he tangatá.”—ARNE.
Na‘e vakai ‘a María, Raúl, Arne mo e tokolahi ki he lotú ko ha me‘a‘ofa makehe. ‘Oku nau ongo‘i ‘i he‘enau lotú, ‘oku nau talanoa ai ki he ‘Otuá, fakamālō kiate ia, pea kumi ki he‘ene tokoní. ‘Oku nau tui ‘aufuatō ki he fakapapau ‘a e Tohi Tapú fekau‘aki mo e lotu ki he ‘Otuá: “‘Oku tau falala kiate ia he ‘ilonga ha me‘a ‘oku tau kole ‘o fakatatau ki hono finangaló, ‘okú ne fanongo mai kiate kitautolu.”—1 Sione 5:14.
‘I he tafa‘aki ‘e tahá, ko e kakai tokolahi ‘oku faingata‘a ke nau tali ‘a e me‘a ‘oku lea‘aki ‘e he Tohi Tapú fekau‘aki mo e lotú. ‘Oku fakamatala ‘a Steve ki he‘ene ongo‘i fekau‘aki mo e lotú. “‘I he‘eku ta‘u 17, na‘e mate hoku kaungāme‘a ‘e toko tolu ‘i ha fakatu‘utāmaki ‘e ua. Ko e tokotaha na‘e mate ‘i he fakatu‘utāmaki ‘i ha me‘alele pea ko e toko ua na‘á na melemo ‘i tahi.” Ko e hā na‘e fai ‘e Steve? “Na‘á ku lotu ki he ‘Otuá ki ha tali ki he ‘uhinga na‘e hoko ai ‘a e ngaahi me‘a ko iá, ka na‘e ‘ikai ha tali. Ko ia na‘á ku ‘eke hifo, ‘Ko e hā ke lotu aí?’” Ko ia ai, ‘i hono ‘ikai tali ‘a e lotu ‘a e tokolahi ‘oku taki atu ai ke nau fehu‘ia pe ‘oku kei ‘aonga koā ‘a e lotú.
‘Oku toe ‘i ai mo e ngaahi ‘uhinga kehe ‘oku fehu‘ia ai ‘e he kakaí ‘a e mahu‘inga ‘o e lotú. ‘Oku pehē ‘e he ni‘ihi koe‘uhi ‘oku ‘afio‘i ‘e he ‘Otuá ‘a e me‘a kotoa pē, ‘okú ne ‘osi ‘ilo‘i ‘etau ngaahi fiema‘ú pe ko ‘etau ngaahi palopalemá, ko ia ‘oku ‘ikai ke fu‘u fiema‘u ia ke tau tala ange ia kiate ia.
‘Oku tui ‘a e ni‘ihi ‘oku ‘ikai ke fie fanongo ‘a e ‘Otuá ki he‘enau lotú koe‘uhi ko e ngaahi fehālaaki na‘a nau fai ‘i he kuohilí. ‘Oku pehē ‘e Jenny, “Ko e palopalema lahi taha na‘á ku fekuki mo iá ko e ongo‘i ta‘efe‘unga. Na‘á ku fai ‘a e ngaahi me‘a ‘oku ou faka‘ise‘isa ai, ko ia ‘oku ou pehē loto pē ‘oku ‘ikai ke u tuha ke fanongo mai ‘a e ‘Otuá.”
‘Oku fēfē ho‘o ongo‘i fekau‘aki mo e lotú? Kapau kuó ke ongo‘i hoha‘a pe veiveiua fekau‘aki mo e lotú, ‘e lava ke ke fiemālie ‘i hono ‘ilo‘i ‘e lava ke ‘omai ‘e he Tohi Tapú ha ngaahi tali fakafiemālie. Ko e Tohi Tapú ‘e lava ke ne tokoni‘i koe ke ma‘u ‘a e tali falala‘anga taha fekau‘aki mo e lotú; * hangē ko e ngaahi fehu‘i ko ení:
-
‘Oku fanongo mo‘oni mai ‘a e ‘Otuá ki he‘etau lotú?
-
Ko e hā ‘oku ‘ikai tali ai ‘a e lotu ‘e ni‘ihi?
-
‘E lava fēfē ke tali ho‘o lotú?
-
‘E ‘aonga fēfē lotú kiate koe?
^ pal. 9 ‘Oku ma‘u ‘i he Tohi Tapú ‘a e ngaahi lotu ‘a e kau sevāniti tokolahi ‘a e ‘Otuá, kau ai ‘a Sīsū Kalaisi. Ko e Ngaahi Konga Tohi Tapu Faka-Hepeluú, ‘oku anga-maheni hono ui ko e Fuakava Motu‘á, ‘oku ma‘u ai ‘a e ngaahi lotu ‘e 150 tupu.
Te Ke Fie Vakai Foki ki Heni
ʻEKE ʻE HE TOʻUTUPÚ
Ko e Hā Ke U Lotu Aí?
Ko e lotú ko ha meʻa pē ia ʻokú ne ʻai ke u ongoʻi lelei pe ʻoku ʻi ai ha meʻa lahi ange?
KO E TAUA LE‘O
‘Oku Totonu Ke Ke Lotu?
ʻOku lava ke tali ʻe he ʻOtuá ʻa e ngaahi lotú ʻo ʻikai fai ha mana.
