ʻI HE taʻu kotoa pē, ko e kakai ʻe toko ono miliona tupu ʻoku nau fononga mamaʻo atu ki he Vaotā sita ʻi he muitolotolo ʻo Shima ʻi Siapani. ʻOku nau omi ki he Potu Toputapu ʻo Ise, naʻe ʻi ai ʻa e ʻotua fefine ʻo e laʻaá ko Amaterasu Omikami, ʻi he lotu faka-Sinitō naʻe fai ki ai ʻa e lotú ʻi ha taʻu ʻe ua afe nai. Ko e kau lotú naʻa nau fakamaʻa kinautolu ʻaki hono fufulu honau nimá mo e ngutú. Pea nau toki tuʻu leva ʻi he potu toputapú haiden (holo faiʻanga lotu), ʻoku nau fai ʻa e meʻa fakaeouau ʻi heʻenau punou, pasipasi mo lotu ki he ʻotua fefiné. a ʻOku ʻatā pē ki he kau lotu faka-Sinitoó ke tali e ngaahi tui kehé, meʻa ʻe niʻihi ʻi he lotu-Putá, kau Kalisitiane lau peé pea ʻoku ʻikai ha fepakipaki ʻi hono fai ʻa e tōʻonga fakaeouau ʻi he lotu faka-Sinitoó he potu toputapu ko ení.

Ko e lahi taha e ngaahi lotu tefito ʻi he māmaní ʻoku ʻi ai ʻenau potu toputapu b pea ʻoku laui miliona e kakai ʻoku ʻaʻahi ki aí. ʻI he ngaahi fonua ʻo e kau Kalisitiane lau peé, ʻoku lahi ai ʻa e ngaahi fale lotu mo e potu toputapu kuo fakatapui maʻa Sīsū, Mele mo e kau sangató. Ko e niʻihi ʻo kinautolu ʻoku tuʻu ʻi he ngaahi feituʻu naʻe hoko ai ʻa e ngaahi meʻa Fakatohitapú pe “ngaahi mana” ka ki muí ni mai kuo pehē ai ko e feituʻu fakahisitōlia ia ʻo e lotú. ʻOku ʻalu ʻa e tokolahi ki he ngaahi potu toputapú koeʻuhi ko ʻenau tui ʻe tali ange ʻenau lotú kapau ʻe fai mei ha feituʻu toputapu. Ki ha niʻihi, ko e aʻu ki ha potu toputapu ko e tumutumu ia ʻo ha fononga pilikimi kuo fai, ko e fakahāhā ʻo ʻenau līʻoa fakalotú.

ʻE tali pe fanongoa nai ʻa e ngaahi lotú mo e kolé kapau ʻe fai ʻi ha potu toputapu? ʻE fakahōifua ki he ʻOtuá ʻa e līʻoa ʻa e faʻahinga ʻoku nau fononga pilikimi ki he ngaahi potu toputapú? Ke toe mahino angé, ʻoku totonu ki he kau Kalisitiané ke nau lotu ʻi ha ngaahi potu toputapu? Ko e tali ki he ngaahi fehuʻi ko ení ʻe ʻikai ngata pē ʻene ʻomai ʻa e founga ʻoku totonu ke tau vakai ki he ngaahi potu toputapú pea toe tokoniʻi kitautolu ke mahinoʻi ʻa e founga lotu ʻokú ne fakahōifuaʻi moʻoni ʻa e ʻOtuá.

Ko e fetalanoaʻaki ʻa Sīsū mo e fefine Samēliá ʻoku fakaeʻa ai ʻa e vakai e ʻOtuá ki he lotu ʻi he feituʻu toputapú pe potu toputapú. Naʻe fononga ʻa Sīsū ʻi Samēlia pea mālōlō ʻi ha vaitupu ofi ki he kolo ko Saika. Naʻá ne kamataʻi ha fetalanoaʻaki mo ha fefine naʻe haʻu ke ʻutu vai ʻi he vaitupú. ʻI heʻena talanoá, naʻe ʻohake ʻe he fefiné e faikehekehe fakalotu ʻi he vahaʻa ʻo e kau Siú mo e kau Samēliá. Naʻe pehē he fefiné “Ko ʻemau fanga kuí naʻa nau  lotu ʻi he moʻungá ni; . . . ka ko e kakai ko kimoutolú ʻoku mou pehē ko Selusalema ʻa e feituʻu ʻoku totonu ke lotu ai ʻa e kakaí.”—Sione 4:5-9, 20.

Ko e moʻunga naʻe ʻuhinga ki ai ʻa e fefiné ko Moʻunga Kelisimi, naʻe tuʻu ia ʻi he maile nai ʻe 30 (50 km) ʻi he tokelau ʻo Selusalemá. ʻI aí, naʻe ʻi ai ha temipale naʻe faiʻanga kātoanga ʻa ia ʻi he taimi ʻe taha naʻe kātoangaʻi ai ʻe he kau Samēliá ʻa e Pāsová. Kae kehe, ʻi he ʻikai tokangataha ki he ʻīsiu ʻo e faikehekehe naʻe ʻi he vahaʻa ʻo e kau Siú mo e Senitailé, naʻe pehē ʻe Sīsū ki he fefiné: “Tui mai kiate au, fefine, ʻoku hoko mai ʻa e houa ʻa ia ʻe ʻikai te mou lotu ai ki he Tamaí ʻi he moʻungá ni pe ʻi Selusalema.” (Sione 4:21) He fakamatala fakaʻohovale ē, tautefito mei heʻene haʻu mei ha Siu! Ko e hā ne ngata ai e lotu ʻi he temipale ʻo e ʻOtuá ʻi Selusalemá?

Naʻe hoko atu ʻa Sīsū: “ʻOku hoko mai ʻa e houa, pea ko e taimí ni ia, ʻa ia ko e kau lotu moʻoní te nau lotu ki he Tamaí ʻi he laumālie mo e moʻoni, he ko e moʻoni, ko e Tamaí ʻokú ne fakasio ʻa e faʻahinga peheé ke lotu ange kiate ia.” (Sione 4:23) ʻI ha ngaahi senituli, naʻe vakai ʻa e kau Siú ki he temipale fisifisimuʻa ʻi Selusalemá ko ha senitā ia ʻenau lotú. Naʻa nau fononga ki ai tuʻo tolu ʻi he taʻu ke fai ha ngaahi feilaulau ki honau ʻOtuá, ʻa Sihova. (ʻEkisoto 23:14-17) Ka naʻe pehē ʻe Sīsū ko e kotoa ʻo e ngaahi meʻa ko ení ʻe liliu pea ko e “kau lotu moʻoní” te nau lotu “ʻi he laumālie mo e moʻoni.”

Ko e temipale ʻo e kau Siú ko ha fuʻu langa ia ʻi ha feituʻu fakasiokālafi pau. Ka ko e laumālié mo e moʻoní ʻoku ʻikai fakamatelie pe fakangatangata ki ha faʻahinga feituʻu fakamatelie. Ko ia, naʻe fakamatala ʻa Sīsū ko e lotu ʻa e kau Kalisitiane moʻoní ʻoku ʻikai ke nau tāfataha pe fakafalala ki ha fuʻu langa pe feituʻu fakamatelie, pe ʻi Moʻunga Kelisimi, temipale ʻi Selusalemá pe ko ha faʻahinga feituʻu toputapu pē.

ʻI he fetalanoaʻaki ʻa Sīsū mo e fefine Samēliá, naʻá ne toe pehē ko e “houa” ki he liliu ʻo e lotu ki he ʻOtuá naʻe “hoko mai.” ʻE hoko eni ʻafē? Naʻe hoko ʻa e houa ko ení ʻi he feilaulau pekia ʻa Sīsuú, pea naʻe ngata ai ʻa e founga lotu ʻa e kau Siú naʻe makatuʻunga ʻi he Lao ʻa Mōsesé. (Loma 10:4) Neongo ia, naʻe pehē ʻe Sīsū: “[Ko e] houa . . . ko e taimí ni ia.” Ko e hā hono ʻuhingá? Koeʻuhi ʻi heʻene hoko ko e Mīsaiá kuó ne ʻosi fakatahaʻi ʻa e kau ākonga naʻa nau talangofua ki he fekau naʻá ne talá: “Ko e ʻOtuá ko ha Laumālie, pea ko e faʻahinga ʻoku lotu kiate iá kuo pau ke nau lotu ʻi he laumālie mo e moʻoni.” (Sione 4:24) Ko e hā leva ʻa e ʻuhinga ʻo e lotu ʻi he laumālie mo e moʻoní?

ʻI he taimi naʻe lave ai ʻa Sīsū ki he lotu ʻi he laumālié, naʻe ʻikai ke ne lave ki ha laumālie pau pe ha founga faivelenga ʻo e lotú. ʻI hono kehé, naʻá ne lea  ʻo fekauʻaki mo e hoko ʻo tataki ʻe he laumālie māʻoniʻoni ʻo e ʻOtuá, ʻa ia ʻokú ne tataki ʻetau mahinoʻi ʻa e Folofolá. (1 Kolinitō 2:9-12) Pea ko e “moʻoni” naʻe lave ki ai ʻa Sīsuú ko e ʻilo totonu ki he ngaahi akonaki ʻa e Tohi Tapú. Ko ia ai, ʻi he ʻikai ke tau lotu ʻi ha feituʻu makehe, ʻe fakahōifua ʻetau lotú ki he ʻOtuá kapau ʻe nōfoʻi ʻi he meʻa ʻoku akoʻi ʻe he Tohi Tapú pea tataki ia ʻe he laumālie māʻoniʻoní.

ʻOku totonu leva ke fēfē ʻa e vakai ʻa e kau Kalisitiané ki he ngaahi fononga fakapilikimi ki he ngaahi potu toputapú mo e lotu ʻi aí? Fakakaukau atu ki he fekau ʻa Sīsū ki he kau lotu moʻoní ke fai ʻenau lotú ʻi he laumālie mo e moʻoni, ʻoku hā mahino ko e lotu ʻoku fai ʻi ha faʻahinga potu toputapu pe ko ha feituʻu ʻoku fakatoputapuʻi kuo ʻikai ke ʻi ai haʻane mahuʻinga makehe ki heʻetau Tamai fakahēvaní. Tānaki atu ki aí, ʻoku tala mai he Tohi Tapú ʻa e vakai e ʻOtuá ki he fakaʻapaʻapaʻi ʻo e ngaahi ʻaitolí ʻi he lotú. ʻOku pehē ai: “Hola mei he tauhi ʻaitolí” pea “fakamamaʻo mei he ngaahi ʻaitolí.” (1 Kolinitō 10:14; 1 Sione 5:21) Ko ia ai, ko e kau Kalisitiane moʻoní ʻoku ʻikai ke nau lotu ʻi ha faʻahinga feituʻu ʻoku vakai ki ai ʻoku toputapu pe feituʻu ʻoku fakaʻaiʻai ai e tauhi ʻaitolí. Ko ia, ko e fakamatala ki he natula moʻoni ʻo e ngaahi potu toputapú, ʻoku fakaʻehiʻehi ʻa e kau Kalisitiane moʻoní mei hono fai ha lotu ʻi ai.

Kae kehe, ʻoku ʻikai ʻuhinga ia ʻoku tapui ʻe he Folofola ʻa e ʻOtuá hono fai ha lotu, ako pe fakalaulauloto ʻi ha feituʻu faiʻanga lotu pau. Ko ha feituʻu faiʻanga fakataha ʻoku maau mo ngeia ʻoku feʻungamālie ke fai ai ha ako mo lāulea ki he ngaahi meʻa fakalaumālié. ʻOku ʻikai hala ia ke ʻai ha fakamanatu ʻo hangē ko e maka fakamanatu ʻo ha pekia. ʻE hā nai eni ko ha kiʻi fakamatala nounou ʻo e manatu ʻofa ki he pekiá. Kae kehe, ko e fakakaukau ko e ngaahi feituʻu ko ení ʻoku toputapu pe fakalāngilangiʻi ʻo e ngaahi ʻaitolí pe ko ha tauhi ʻofa ʻe kehe ʻaupito ia mo e lea ʻa Sīsuú.

Ko ia ai, ʻoku ʻikai fiemaʻu ke ke ʻalu ki ha potu toputapu ʻi he fakakaukau ʻe fanongo mo tali ʻe he ʻOtuá hoʻo lotú. Naʻa mo e ʻOtuá heʻikai fiefia pe ʻoatu ha tāpuaki makehe ki hoʻo fononga pilikimi ki ha potu toputapu. ʻOku tala mai ʻe he Tohi Tapú ko Sihova ko e ʻOtuá, ko e “ʻEiki ʻo langi mo māmaní, . . . ʻoku ʻikai ke ne ʻafio ʻi ha ngaahi temipale kuo ngaohiʻaki ʻa e nimá.” Ka ʻoku ʻikai ke mamaʻo ai ʻa e ʻOtuá meiate kitautolu. ʻOku lava ke tau lotu kiate ia ʻi ha faʻahinga feituʻu pē pea te ne fanongo mai koeʻuhi “ʻoku ʻikai te ne mamaʻo mei ha taha ʻo kitautolu.”—Ngāue 17:24-27.