ʻOku fakamatalaʻi ʻa e kaungāongoʻí “ko e malava ke te maʻu ʻa e ngaahi ongoʻi pe ngaahi hokosia ʻa ha taha kehe ʻaki ʻete sioloto atu pe ko e hā ʻe hokó kapau te te ʻi he tuʻunga ʻo e tokotaha ko iá.” Ko ha mataotao ki he moʻui fakaʻatamaí, ko Dr. Rick Hanson ʻokú ne pehē “ʻoku ʻi hotau ngaahi huí ʻa e kaungāongoʻí.”

FAKAKAUKAU ANGÉ: Ko e hā ʻoku tau kaungāongoʻi aí, ko ha ʻulungaanga ʻoku ʻikai hano tatau ʻi ha toe faʻahinga meʻamoʻui kehe? ʻOku fakamatalaʻi ʻe he Tohi Tapú naʻe fakatupu ʻe he ʻOtuá ʻa e tangatá ʻi hono ʻīmisí. (Sēnesi 1:26) Naʻe ngaohi kitautolu ʻi he ʻīmisi ʻo e ʻOtuá pea ʻoku lava ke tau tapua atu hono ʻulungāngá mo fakahāhā hono ngaahi ʻulungaanga leleí. Ko ia ai, ʻi hono ueʻi ʻe he kaungāongoʻí ʻa e kakai tokangá ke nau tokoni ki he niʻihi kehé, ʻoku nau tapua atu ai ʻa e kaungāongoʻi ʻa honau Tokotaha-Fakatupu manavaʻofá, ko Sihova ko e ʻOtuá.​—Palōveepi 14:31.

ʻOku kaungāongoʻi mai ʻa e ʻOtuá kiate kitautolu pea ʻokú ne fehiʻa heʻene ʻafio mai ki heʻetau faingataʻaʻiá. ʻI he fekauʻaki mo e kakai ʻo ʻIsileli ʻo e kuonga muʻá, ʻa ia naʻa nau kātekina ʻa e nofo pōpula anga-kakaha ʻi ʻIsipité pea hoko atu ai ki he ngaahi taʻu faingataʻa ʻe 40 ʻi he toafá, ʻoku pehē ʻe he Tohi Tapú: “ʻI he lolotonga ʻa ʻenau mamahí kotoa naʻe fakalotomamahi ia kiate ia.” (ʻAisea 63:9) Fakatokangaʻi naʻe ʻikai ngata pē ʻi he lāuʻilo ʻa e ʻOtuá ki heʻenau mamahí. Naʻe lava ke ne ongoʻi ʻenau mamahí. “ʻOku ou ʻafioʻi lelei ʻa e ngaahi mamahi ʻoku nau fuesiá,” ko ʻene fakahāʻí ia. (ʻEkisoto 3:7) “ʻIlonga ʻa ia te ne ala kiate kimoutolú,” ko e folofola ia ʻa e ʻOtuá, “ʻokú ne ala ki hoku tamaʻimatá.” (Sākalaia 2:8) ʻI hono fakalotomamahiʻi kitautolu ʻe he niʻihi kehé, ʻoku mamahi hono lotó fakataha mo kitautolu.

ʻOku fakapapauʻi mai ʻe he Tohi Tapú neongo ʻetau kei ongoʻi halaiá mo ongoʻi ʻoku ʻikai te tau taau mo e kaungāongoʻi ʻa e ʻOtuá, “ʻoku lahi ange ʻa e ʻOtuá ʻi hotau lotó pea ʻokú ne ʻafioʻi ʻa e ngaahi meʻa kotoa pē.” (1 Sione 3:19, 20) ʻOku ʻafioʻi lelei ange ʻe he ʻOtuá kitautolu ʻiate kitautolu tonu. ʻOkú ne lāuʻilo kakato ki hotau ngaahi tuʻungá kotoa, ngaahi fakakaukaú, mo ʻetau ngaahi ongoʻí. ʻOkú ne kaungāongoʻi mai kiate kitautolu.

 ʻOku fakapapauʻi mai ʻe he Tohi Tapú

• “Te ke toki ui, pea ʻe tali mai ʻe Sihova; te ke tangi ki ha tokoni, pea te ne folofola mai, ‘Ko au eni!’”​—ʻAISEA 58:9.

• “‘He ʻoku ou ʻiloʻi lelei ʻa e ngaahi fakakaukau ʻoku ou fakakaukau ʻaki kiate kimoutolú,’ ko e fakahaaʻi ia ʻe Sihová, ‘ko e ngaahi fakakaukau ʻo e melino, ʻo ʻikai ko ha kovi, ke ʻoatu kiate kimoutolu ha kahaʻu pea mo ha ʻamanaki. Pea te mou ui kiate au mo mou omi ʻo lotu kiate au, pea te u fanongo kiate kimoutolu.’”​—SELEMAIA 29:11, 12.

• “Tānaki muʻa ʻa hoku loʻimatá ʻi hoʻo hina kiliʻimanú. ʻIkai ʻoku hiki ia ʻi hoʻo tohí?”​—SAAME 56:8.

ʻE lava ʻe he ʻiloʻi ʻoku kaungāongoʻi mai ʻa e ʻOtuá kiate kitautolú ʻo tokoniʻi kitautolu ke tau fekuki mo e mamahí? Fakakaukau ki he hokosia ʻa Maria:

“Naʻá ku ongoʻi ne faingataʻa ʻa e moʻuí mo ʻikai ha fakamaau totonu hili ʻeku hokosia ha mamahi lahi fakaʻulia ʻi he mole atu ʻeku tamasiʻi taʻu 18 he hili ia ʻa e taʻu ʻe ua ʻene fāinga mo e kanisaá. Naʻá ku ʻita ʻia Sihova ʻi he ʻikai te ne kau mai ʻo fakamoʻui iá!

“ʻI he taʻu ʻe ono ki mui ai, naʻe fanongo mai ai kiate au ha kaumeʻa ʻofa mo manavaʻofa ʻi he fakatahaʻangá ʻi heʻeku fakahaaʻi ʻeku ongoʻi ne ʻikai ʻofa ʻa Sihova ia ʻiate au. Hili ʻene fanongo tokanga kiate au ʻi ha ngaahi houa, naʻá ne lave ki ha veesi naʻe ueʻi ai au. ʻOku pehē ʻi he 1 Sione 3:19, 20: ‘ʻOku lahi ange ʻa e ʻOtuá ʻi hotau lotó pea ʻokú ne ʻafioʻi ʻa e ngaahi meʻa kotoa pē.’ Naʻá ne fakamatalaʻi mai ʻoku mahinoʻi ʻe Sihova ʻetau mamahí.

“Neongo ʻa e meʻá ni, naʻe faingataʻa kiate au ke u tukuange ʻeku ʻitá! Naʻá ku lau leva ʻa e Saame 94:19, ʻa ia ʻoku pehē: ‘ʻI hono lōmekina au ʻe he ngaahi loto-moʻuá, naʻá ke fakafiemālieʻi mo fakanonga au.’ Naʻá ku ongoʻi ne hangē ne tohi pē ʻa e ngaahi vēsí ni ia maʻakú! Faifai atu pē, naʻá ku ʻilo naʻe mātuʻaki fakanonga ʻa e talanoa kia Sihova fekauʻaki mo ʻeku mamahí, ʻi hono ʻiloʻi ʻokú ne fanongo mai mo mahinoʻi.”

He fakafiemālie ē ko hono ʻiloʻi ʻoku mahinoʻi mo ongoʻi kitautolu ʻe he ʻOtuá! Ka ko e hā koā ʻoku lahi fau ai ʻa e faingataʻá? Koeʻuhí nai ʻoku tauteaʻi kitautolu ʻe he ʻOtuá ʻi heʻetau faihalá? ʻE fai ʻe he ʻOtuá ha meʻa ke fakangata ʻa e faingataʻaʻia kotoa pē? ʻE lāulea ki he ngaahi meʻá ni ʻi he ngaahi kupu hoko maí.