SIOLOTO atu ‘okú ke sio ‘i ha vitiō ‘o ha tokotaha ‘iloa, mahalo ko ha tokotaha hiva ‘iloa ‘okú ke sai‘ia ai. ‘Oku kamata mei he‘ene kei si‘í, ko ‘ene ako hivá, mo ‘ene ngaahi toutou ako ‘a e hivá. ‘Okú ke sio leva ki he‘ene konisetí, ko ‘ene fefolau‘aki takaí, pea ‘okú ne hoko ko ha tokotaha hiva ‘iloa fakavaha‘apule‘anga. Fuoloa mei ai, ko ha ngaahi ‘ata ‘o ‘ene ta‘umotu‘á, pea ngata leva ‘a e vitiō—​‘okú ne mate.

Ko e vitiō ko ení ‘oku ‘ikai mo‘oni ka ‘okú ne ‘omai ha fakalika ‘o e mo‘ui ‘o ha tokotaha kuo mate. Pe ko e tokotahá ko ha fai mūsika, faisaienisi, tokotaha sipoti pe ko ha tokotaha ‘iloa, ‘e aofangatuku tatau pē ‘a e talanoá. Kuo lavame‘a lahi nai ‘a e tokotahá, ka ‘okú ke fakakaukau atu ki he lahi ‘o e me‘a na‘á ne mei lava‘i kapau na‘e ‘ikai ‘a e tu‘unga fakamamahi ‘o e ta‘umotu‘á mo e maté?

‘Oku fakamamahi nai, ka ko e me‘a ia te tau fou aí. (Tangata Malanga 9:5) Tatau ai pē pe ko e hā ‘o e lahi ‘etau feingá, he‘ikai lava ke tau hao mei he nunu‘a ‘o e ta‘umotu‘á pea mo e maté. ‘Ikai ko ia pē, ‘e fuonounou nai ‘etau mo‘uí koe‘uhi ko ha mate fakafokifā pe ko ha ‘ekisiteni. Hangē ko ia ‘oku fakamatala‘i ‘i he Tohi Tapú, ‘oku tau hangē ko e kakapu ‘o e pongipongí ‘oku “hā ‘i ha ki‘i taimi si‘i pea puli atu leva.”​—Sēmisi 4:14.

Ki he ni‘ihi, ‘oku hā ngali ta‘epau mo ta‘e‘aonga ‘a e mo‘uí pea ‘oku nau muimui ai ‘i he founga mo‘ui ko e “tuku ke tau kai ā mo inu, he ko ‘apongipongí te tau mate.” (1 Kolinitō 15:32) ‘Ikai ‘okú ke loto-tatau, ko e mo‘ui ‘i he founga peheé ko e founga pē ia ke tali ai ki he tu‘unga fakamamahi ‘o e maté? ‘Oku vavé ni pe ko ‘amui ange​—kae tautefito ki he taimi ‘oku tau fekuki ai mo ha ‘ahi‘ahi—​te ke ‘eke nai, ‘Ko e mo‘uí pē eni?’ Te ke ma‘u mei fē ‘a e talí?

‘Oku hanga ‘a e tokolahi ‘i he ‘ahó ni ki he saienisí. Ko e fakalakalaka ‘i he saienisí mo e tafa‘aki fakafaito‘ó kuó ne fakalōloa atu ‘etau mo‘uí. Pea ko e kau faisaienisi ‘e ni‘ihi ‘oku nau feinga ke fakalōloa ange ‘etau mo‘uí. Pe te nau lavame‘a pe ‘ikai, ‘oku kei tu‘u pē ‘a e fehu‘í: Ko e hā ‘oku tau motu‘a ai pea maté? ‘Oku ‘i ai ha ‘amanaki ‘e iku‘i hotau fili ko e maté? Ko e kupu hokó ‘e sivisivi‘i ai ‘a e ongo kaveinga ko ení pea tali ‘a e fehu‘i: Ko e mo‘uí pē eni?