Tāpuaki Ma‘á e Kau Talangofua ki he ‘Otuá
Na‘e pehē ‘e he palōfita ko Mōsesé kapau te tau talangofua ki he fekau ‘a e ‘Otuá, te tau ma‘u ai ‘ene tāpuakí. (Teutalōnome 10:13; 11:27) ‘Oku ‘ikai ke tau talangofuá ko ‘etau manavahē na‘a tautea‘i kitautolu ‘e he ‘Otuá. ‘Oku ue‘i kitautolu ‘e he ngaahi ‘ulungaanga faka‘ofo‘ofa ‘o e ‘Otuá ke tau talangofua kiate ia he ‘oku tau ‘ofa kiate ia pea ‘oku tau loto ke faka‘ehi‘ehi mei hono fakalotomamahi‘i nai iá. “Ko e me‘a ‘eni ‘oku ‘uhinga ki ai ‘a e ‘ofa ki he ‘Otuá, ko ‘etau tauhi ‘ene ngaahi fekaú.”—1 Sione 5:3.
Ka ko e hā ‘a e tāpuaki te tau ma‘u mei he talangofua ki he ‘Otuá? Fakakaukau ki he tafa‘aki ‘e ua.
1. TALANGOFUA KI HE ‘OTUÁ TE NE ‘AI KE TAU POTO
“Ko au Sihova, ko ho ‘Otuá, ‘a e Tokotaha ‘okú ne ako‘i koe ke ke ma‘u ‘aonga aí, . . . ‘okú ne tataki koe ‘i he hala ‘oku totonu ke ke fou aí.”—‘AISEA 48:17.
Ko Sihova ko e ‘Otuá, ‘a hotau Tokotaha-Fakatupú, ‘okú ne ‘ilo‘i kitautolu pea tokonaki mai ‘a e tataki ‘oku tau fiema‘ú. Kapau ‘oku tau loto ke tokoni‘i kitautolu ‘e he‘ene akonakí ke fai ‘a e fili fakapotopotó, kuo pau ke tau ako mei he Folofolá ‘a e me‘a ‘oku fiema‘u ‘e he ‘Otuá ke tau faí pea ngāue‘aki leva ia.
2. TALANGOFUÁ TE NE ‘AI KE TAU FIEFIA
“He fiefia ē ko e fa‘ahinga ‘oku fanongo ki he folofola ‘a e ‘Otuá pea tauhi iá!”—LUKE 11:28.
‘I he ‘ahó ni, ko e laui miliona ‘oku nau muimui ki he Folofola ‘a e ‘Otuá ‘oku nau fiefia mo‘oni. Ko e fakatātaá, fakakaukau ki ha tangata ‘i Sipeini na‘á ne ‘ita tōlili pea ngaohikovi‘i anga-kakaha ‘a e ni‘ihi kehé—kau ai hono uaifí. ‘I he ‘aho ‘e taha na‘á ne lau ‘a e tohi ‘a e palōfita ko Mōsesé fekau‘aki mo ha tokotaha anga-malū ko Siosifa, ‘a e foha ‘o Sēkope. Na‘e fakatau atu ‘a Siosifa ko ha pōpula pea tuku pōpula ta‘etotonu ia; ka na‘á ne anga-malū, fakamelino mo fa‘a fakamolemole. (Sēnesi, vahe 37-45) Na‘e pehē ‘e he tangata ‘i Sipeiní: “‘I he fakakaukau fekau‘aki mo e fa‘ifa‘itaki‘anga ‘a Siosifá na‘á ne ue‘i au ke fakatupulekina ‘a e anga-malū, anga-lelei mo e mapule‘i-kita. Ko hono olá, ‘oku ou ma‘u he taimí ni ha mo‘ui fiefia.”
‘Oku ‘omai ‘i he Folofolá ‘a e tataki lahi ange ki he founga ‘oku totonu ke tau fakafeangai ai ki he ni‘ihi kehé. Vakai ki ha fakaikiiki lahi ange ‘o e me‘á ni ‘i he kupu hokó.
