KUÓ KE fakapapau‘i ke hoko ko ha Kalisitiane? Kapau ko ia, kuó ke kau ‘i he toko ua piliona tupu ‘o e kakai ‘i he māmaní​—‘a ia meimei ko e toko taha ‘i he toko tolu kotoa pē​—‘oku nau taukave‘i ko e kau muimui ‘o Kalaisi. ‘I he ‘ahó ni, ‘oku laui afe ‘a e ngaahi lotu ‘oku ui ko e Kalisitiane, ka neongo ia ‘oku nau māvahevahe ‘i he ngaahi tokāteline fepakipaki mo e fakakaukau kehekehe. Ko ia mahalo ‘e kehe nai ho‘o tuí mei he ni‘ihi ‘oku nau taku ko e kau Kalisitiane. ‘Oku ‘i ai hano mahu‘inga ‘o e me‘a ‘okú ke tui ki aí? ‘Io ‘oku pehē​—kapau ‘okú ke loto ke fai ‘a e me‘a ‘oku ako‘i ‘e he Lotu faka-Kalisitiané mei he Tohi Tapú tonu.

Ko e ‘uluaki kau muimui ‘o Sīsū Kalaisí na‘a nau ‘iloa ko e ‘kau Kalisitiane.’ (Ngāue 11:26) Na‘e ‘ikai toe fiema‘u ha ngaahi hingoa kehe ke faka‘ilonga‘i ‘aki kinautolu, koe‘uhí na‘e taha pē ‘a e tui faka-Kalisitiané ia. Na‘e muimui fā‘ūtaha ‘a e kau Kalisitiané ki he akonaki mo e fakahinohino ‘a e tokotaha na‘á ne Fokotu‘u ‘a e Lotu faka-Kalisitiané ‘a Sīsū Kalaisi. Kae fēfē lotu ‘okú ke kau ki aí? ‘Okú ke tui ‘okú ne ako‘i ‘a e me‘a na‘e ako‘i ‘e Kalaisí mo e me‘a na‘e tui ki ai ‘a e mu‘aki kau muimui ‘o Kalaisí? ‘E lava fēfē ke ke fakapapau‘i ia? ‘Oku ‘i ai e founga pē ‘e taha​—ko hono ngāue‘aki ‘a e Tohi Tapú ko ha lula fua.

Fakakaukau ki heni: Ko Sīsū Kalaisi na‘á ne ma‘u ‘a e faka‘apa‘apa loloto ki he Tohi Tapú ko e Folofola ‘a e ‘Otuá. Na‘e ‘ikai ke ne tali ‘a e fa‘ahinga na‘a nau hu‘i ‘a e akonaki Fakatohitapú ‘aki hono fakamu‘omu‘a ‘a e akonaki fa‘u ‘e he tangatá.  (Ma‘ake 7:9-13) ‘E lava ke tau faka‘osi‘aki ko e kau muimui mo‘oni ‘o Sīsuú ‘oku makatu‘unga ‘enau tuí ‘i he Tohi Tapú. Ko ia ai, ko e Kalisitiane taki taha ‘oku lelei ke ‘eke hifo kiate ia tonu, ‘‘Oku fehoanaki ‘a e akonaki ‘i he Tohi Tapú mo e lotu ‘oku ou kau ki aí?’ Ke tali ‘a e fehu‘i ko iá, ko e hā ‘oku ‘ikai ke ke fakahoa ai e akonaki ‘a e lotu ‘okú ke kau ki aí mo e me‘a ‘oku lea‘aki he Tohi Tapú?

‘Oku pehē ‘e Sīsū ko ‘etau lotu ki he ‘Otuá kuo pau ke makatu‘unga ia ‘i he mo‘oní​​—ko e mo‘oni ko iá ‘oku ma‘u ‘i he Tohi Tapú. (Sione 4:24; 17:17) Pea na‘e pehē ‘e he ‘apositolo ko Paulá ‘e makatu‘unga hotau fakahaofí ‘i he hoko ‘o ma‘u ‘a e “‘ilo totonu ki he mo‘oní.” (1 Tīmote 2:4) Ko ia ‘oku mātu‘aki mahu‘inga ‘etau tuí ke makatu‘unga ‘i he ‘ilo totonu ki he mo‘oni ‘o e Tohi Tapú. Ko hono ‘uhingá, ‘e makatu‘unga mei ai hotau fakahaofí!

‘Oku mau fakaafe‘i atu koe ke lau ‘a e ngaahi fehu‘i ‘e ono ko ení pea fakatokanga‘i e tali ‘a e Tohi Tapú ki he ngaahi fehu‘i ko iá. Sio ki he ngaahi konga Tohi Tapu ‘oku haá pea fakakaukauloto ki he talí. ‘Eke hifo kiate koe, ‘‘Oku fēfē akonaki ‘a e lotu ‘oku ou kau ki aí ‘i hono fakahoa ki he me‘a ‘oku lea‘aki ‘e he Tohi Tapú?’

Ko e ki‘i fehu‘i nounou ko ení ‘e tokoni‘i ai koe ke fai ‘a e fakahoa ‘aonga tahá. ‘Okú ke loto-lelei ke fakahoa ‘a e ngaahi akonaki kehe ‘i he lotu ‘okú ke kau ki aí mo e me‘a ‘oku lea‘aki ‘e he Tohi Tapú? ‘Oku fiefia ‘a e Kau Fakamo‘oni ‘a Sihová ke tokoni‘i koe ke sivisivi‘i mā‘ala‘ala ‘a e mahino mo‘oni ‘o e Tohi Tapú. Ko e hā ‘oku ‘ikai ke ke kole ai kia kinautolu ki ha ako Tohi Tapu ta‘etotongi? Pe ko ho‘o ‘a‘ahi ki he‘emau uepisaiti, jw.org.