Naʻe fāʻeleʻi au ʻi Ciudad Mante, ko ha kiʻi siteiti fakaʻofoʻofa ʻi Tamaulipas ʻi Mekisikou. ʻI he tuʻunga fakalūkufuá, ko e kakai ʻi aí naʻa nau nima-homo mo anga-lelei. Ka ko e meʻa fakamamahí, koeʻuhi ko e kau faihiá, naʻe hoko ai ʻa e feituʻú ni ʻo fakatuʻutāmaki ʻaupito.

Ko e fika ua au ʻi he tamaiki tangata ʻe toko fā. Naʻe papitaiso au heʻeku ongo mātuʻá ʻi he Siasi Katoliká, pea ki mui ai naʻá ku kau ʻi he kau hivá. Naʻá ku loto ke fakahōifuaʻi ʻa e ʻOtuá koeʻuhi naʻá ku ilifia naʻa fakamāuʻi au pea tutu taʻengata ʻi heli.

ʻI heʻeku taʻu nimá, naʻe liʻaki kimautolu heʻeku tamaí. Naʻá ku mamahi ai mo ongoʻi liʻekina. Naʻe ʻikai ke u mahinoʻi ʻa e ʻuhinga naʻá ne liʻaki ai kimautolú he naʻa mau ʻofa lahi ʻiate ia. Naʻe pau ai ke ngāue ʻeku faʻeé ʻi ha ngaahi houa lahi ʻo mavahe mei ʻapi ke tokonaki maʻá e toko fā tangata ko kimautolú.

Naʻá ku lau ko e faingamālie eni ke liʻaki ʻa e akó kae feohi mo e tamaiki lalahí. Naʻa nau akoʻi au ke kapekape, ifi, kaihaʻa mo fuhu. Koeʻuhi ko ʻeku saiʻia ke puleʻi e niʻihi kehé, naʻá ku ako fuhu, tau fangatua, ako fakakautau pea ako ki hono ngāueʻaki ʻa e meʻataú. Naʻá ku hoko ko ha talavou fakamālohi. Naʻá ku faʻa kau ʻi he tau fana, pea ʻi he taimi lahi naʻe faʻa liʻaki au ke mate ʻi he halá ʻoku ou toto ʻatā. He lahi moʻoni ē ʻa e mamahi naʻá ku fai ki heʻeku faʻeé ʻi heʻene ʻiloʻi au ʻi he tuʻunga ko ení pea leleakiʻi au ki falemahaki!

ʻI heʻeku taʻu 16, ko ha kiʻi kaungāmeʻa naʻá ma tupu fakataha hake ko Jorge naʻá ne ʻaʻahi mai ki homau ʻapí. Naʻá ne tala mai ko e taha ia ʻo e Kau Fakamoʻoni ʻa Sihová pea ʻokú ne loto ke vahevahe mai ha pōpoaki mahuʻinga. Naʻe kamata ke ne fakamatala ki heʻene tuí ʻo ngāueʻaki ʻa e Tohi Tapú. Naʻe teʻeki ʻaupito ke u lau ia, pea naʻá ku fiefia ʻi he ʻilo ki he huafa ʻo e ʻOtuá mo ʻene ngaahi taumuʻá. Naʻe tuʻuaki mai ʻe Jorge ke mau ako Tohi Tapu. Naʻa mau tali ia.

Naʻá ku ongoʻi nonga ange ʻi heʻeku ʻiloʻi ʻa e moʻoni fekauʻaki mo e afi ʻo helí—ʻoku ʻikai ko ha akonaki ia mei he Tohi Tapú. (Saame 146:4; Koheleti 9:5) ʻI heʻeku ʻiloʻi pē iá, naʻe ʻikai ke u toe mate manavahē ʻi he ʻOtuá. ʻI hono kehé, naʻá ku kamata ke vakai ki ai ko ha Tamai ʻofa ʻokú ne loto ke maʻu ʻe heʻene fānaú ʻa e lelei tahá.

ʻI he fakalakalaka ʻeku ako Tohi Tapú, naʻá ku ʻiloʻi ai ʻa e fiemaʻu ke fai ha ngaahi liliu ʻi hoku angaʻitangatá. Naʻe fiemaʻu ke u fakatupulekina  ʻa e anga-fakatōkilaló mo tuku ʻa e tōʻonga fakamālohí. Ko e faleʻi ʻi he 1 Kolinitō 15:33 naʻá ne tokoniʻi au. ʻOku pehē ai: “Ko e ngaahi feohi koví ʻokú ne maumauʻi ʻa e ngaahi anga ʻoku leleí,” pe fakamatala ʻi laló, “maumauʻi ʻa e ngaahi anga ʻoku leleí.” Naʻá ku ʻiloʻi kapau ʻoku ou loto ke liliu ʻeku angaʻitangatá, ʻoku fiemaʻu ke taʻofi ʻeku feohi mo e faʻahinga ʻoku nau ʻulungaanga koví. Ko ia naʻá ku fetongi hoku ngaahi kaungāmeʻa ki muʻá ʻaki ha niʻihi ʻi he fakatahaʻanga Kalisitiane moʻoní—ʻa e faʻahinga ʻoku nau fakaleleiʻi ʻenau ngaahi fefaikehekeheʻakí ʻo ʻikai ʻi ha founga fakamālohi kae fakafou ʻi hono ngāueʻaki ʻa e ngaahi tefitoʻi moʻoni Fakatohitapú.

Ko ha toe veesi Tohi Tapu naʻe maongo lahi kiate au ko e Loma 12:17-19. ʻOku pehē ai: “ʻOua ʻe fetongi ʻa e koví ʻaki ʻa e kovi ki ha taha. . . . ʻO ka ala lava, ʻo fakatatau ki he lahi taha ʻo hoʻomou malavá, mou nofo melino mo e tangata kotoa pē. ʻOua te mou faisāuni maʻamoutolu, . . . he kuo tohi: ‘“ʻOku ʻaʻaku ʻa e sāuní; te u fai ʻe au ʻa e totongi fakafokí, ko e folofola ia ʻa Sihová.’” Naʻá ku tui ʻe fakaleleiʻi ʻe Sihova ʻa e fakamaau taʻetotonú ʻi he founga mo e taimi pē ʻaʻana. Faai atu pē ʻa e taimí, naʻá ku ikuʻi ʻeku founga moʻui fakamālohí.

Heʻikai ʻaupito pē ngalo ʻiate au ʻa e meʻa naʻe hoko ʻi ha efiafi ʻi heʻeku foki atu ki ʻapí. Ko ha kulupu ʻo ha kau talavou ko ha kau kengi naʻa nau ʻohofi au, pea naʻe taaʻi ʻe he takí hoku tuʻá pea kaila, “Kumi haʻo moʻui!” ʻI he taimi ko iá naʻá ku lotu nounou kia Sihova, ʻo kole kiate ia ke tokoniʻi au ke kātekina ʻa e fakatangá. Neongo naʻá ku loto-lahi ke ʻoho atu, ka naʻá ku hola. ʻI he ʻaho ʻe tahá, naʻá ku fetaulaki mo e taki e kau kengí. Naʻá ku ʻita peá u loto ke u taaʻi ka naʻá ku toe kole fakalongolongo kia Sihova ke tokoniʻi au ke u mapuleʻi. Naʻá ku ʻohovale ʻi heʻene haʻu ʻo pehē mai: “Fakamolemoleʻi au ki he meʻa naʻe hoko ʻanepoó. Ko hono moʻoní, ʻoku ou loto ke u hangē ko koé. ʻOku ou fie ako ʻa e Tohi Tapú.” He fiefia ē ka ko au ʻi heʻeku lava ʻo mapuleʻi ʻeku ʻitá! Naʻá ku fakamālō ʻi he meʻá ni, ko ia naʻe kamata ke ma ako ʻa e Tohi Tapú.

Ko e meʻa fakamamahí, ko e kotoa hoku fāmilí naʻe ʻikai ke hoko atu ʻenau ako ʻa e Tohi Tapú ʻi he taimi ko iá. Kae kehe, naʻá ku fakapapauʻi ke hokohoko atu ʻeku akó pea ʻikai fakaʻatā ha taha pe ko ha meʻa ke ne taʻofi au. Naʻá ku ʻiloʻi ko e feohi maʻu pē mo e kakai ʻa e ʻOtuá ʻe lava ke fakaleleiʻi ʻeku ngaahi mamahi fakaeongo mo maʻu ai ʻa e fāmili naʻá ku fiemaʻú. Naʻe hokohoko atu ʻeku fakalakalaká pea ʻi he 1991 naʻá ku papitaiso ai ko e taha ʻo e Kau Fakamoʻoni ʻa Sihová.

Naʻá ku angaʻaki ʻa e loto-ʻitá, fakaaoao mo fakamālohi. Ka naʻe liliu moʻoni ʻe he Folofola ʻa e ʻOtuá ʻeku moʻuí. ʻI he taimí ni ʻoku ou vahevahe ai ʻa e pōpoaki melino ʻo e Tohi Tapú ki ha taha pē ʻe fie fanongo. Naʻá ku maʻu mo e monū ko ha tokotaha ngāue taimi-kakato ʻi he taʻu ʻe 23 kuohilí.

ʻI ha taimi ʻe taha, naʻá ku kau ʻi ha ngāue pole ki he ʻōfisi vaʻa ʻo e Kau Fakamoʻoni ʻa Sihová ʻi Mekisikou. Lolotonga ʻeku ʻi aí, naʻá ku fetaulaki ai mo Claudia ko ha finemui Kalisitiane longomoʻui, pea naʻá ma mali ʻi he 1999. He houngaʻia ē ko au kia Sihova ʻi hono tāpuakiʻiʻaki au ʻa e kaungāmeʻa mateaki ko ení!

ʻOkú ma ngāue fakataha ʻi he fakatahaʻanga Mekisikou ʻi he Lea Fakanoá, ʻi hono tokoniʻi ʻa e kau noá ke ako fekauʻaki mo Sihova. Ki mui aí, naʻe fakaafeʻi kimaua ke ma hiki ki Pēlisi ke akoʻi ʻa e Tohi Tapú ki he kakai ʻo e fonua ko iá. Neongo ʻoku faingofua ange ʻema moʻuí ʻi heni, ʻokú ma maʻu kotoa e meʻa ʻoku fiemaʻu ke fiefia aí. Heʻikai ke ma fetongiʻaki ia ha meʻa.

ʻI he faai atu ʻa e taimí, naʻe toe hoko atu ʻa e ako Tohi Tapu ʻeku faʻeé pea papitaiso. Ko hoku tokoua lahí mo hono uaifí mo ʻena fānaú foki ʻoku nau hoko ʻi he taimí ni ko e Kau Fakamoʻoni ʻa Sihova. Ko e niʻihi hoku ngaahi kaungāmeʻa ki muʻá ʻa ia naʻá ku vahevahe kiate kinautolu ʻa e pōpoaki ʻo e Puleʻangá ʻoku nau tauhi foki kia Sihova.

Ko e meʻa fakamamahí, ko e niʻihi hoku fāmilí kuo nau mate koeʻuhi ko e ʻikai ke liliu ʻenau tōʻonga fakamālohí. Kapau naʻe hokohoko atu ʻeku founga moʻui hangē ko kinautolú, te u fou ai pē ʻi he ikuʻanga tatau. ʻOku ou houngaʻia kia Sihova ʻi heʻene tohoakiʻi au kiate ia mo ʻene kau lotú, ʻa ia naʻa nau akoʻi au ʻi he anga-kātaki mo anga-lelei ke ngāueʻaki ʻa e ngaahi tefitoʻi moʻoni Fakatohitapú ʻi heʻeku moʻuí.