Ko e hā ‘a e founga te ne tokoni‘i koe ke fakamānako ange ai ho‘o lau Tohi Tapú pea ma‘u ‘aonga lahi mei ai? Fakatokanga‘i ha fokotu‘u ‘e nima na‘e ‘aonga ki he tokolahi.

Kumi ha ‘ātakai fe‘ungamālie. Feinga ke kumi ha feitu‘u ‘oku lōngonoa. Fakasi‘isi‘i ‘a e ngaahi fakahoha‘á koe‘uhi ka ke lava ‘o tokangataha ki he me‘a ‘okú ke laú. Ko ha feitu‘u ‘oku maama fe‘unga mo ‘ea lelei ‘e lava ke tokoni ia ke ke ma‘u ‘aonga lahi mei he me‘a ‘okú ke laú.

Ma‘u ha fakakaukau totonu. Koe‘uhi ko e Tohi Tapú ‘oku mei he‘etau Tamai fakahēvaní, te ke ma‘u ‘a e ‘aonga lahi tahá kapau te ke ma‘u ha fakakaukau ‘o ha ki‘i tama ‘oku mateuteu ke ako mei ha ongo mātu‘a ‘ofa. Kapau ‘oku ‘i ai ha‘o fakakaukau ta‘etotonu pē tōmu‘a fakamāu‘i ‘a e Tohi Tapú, feinga ke to‘o ia kae lava ‘e he ‘Otuá ke ne ako‘i koe.—Saame 25:4.

Lotu peá ke toki lau. ‘Oku ‘i he Tohi Tapú ‘a e ngaahi fakakaukau ‘a e ‘Otuá, ko e ‘uhinga ia ‘oku tau fiema‘u ai ‘ene tokoní ke mahino‘i ia. ‘Oku tala‘ofa ‘a e ‘Otuá te ne foaki ‘a e “laumālie mā‘oni‘oní ki he fa‘ahinga ‘oku kole kiate iá!” (Luke 11:13) Ko e laumālie mā‘oni‘oní ‘e lava ke ne tokoni‘i koe ke mahino‘i ‘a e fakakaukau ‘a e ‘Otuá. Faai atu pē ‘a e taimí, ‘e mahino ia kiate koe “na‘a mo e ngaahi me‘a loloto ‘a e ‘Otuá.”—1 Kolinitō 2:10.

Lau ke mahino. ‘Oua ‘e feinga pē ke ‘osiki ‘a e fakamatalá. Fakakaukau fakamātoato ki he me‘a ‘okú ke laú. ‘Eke hifo kiate koe ‘a e ngaahi fehu‘i hangē ko ení: ‘Ko e hā ‘a e ngaahi ‘ulungaanga ‘oku ou ako mei he tokotaha ko ení? ‘E lava fēfē ke u ngāue‘aki eni ‘i he‘eku mo‘uí?’

Fokotu‘u ha ngaahi taumu‘a pau. Ke ma‘u ‘aonga mei ho‘o lau Tohi Tapú, fokotu‘u ha taumu‘a ke ako ‘a ia ‘e lava ke lelei ange ai ho‘o mo‘uí. Te ke fokotu‘u nai ha taumu‘a hangē ko ení: ‘‘Oku ou fie ako lahi ange fekau‘aki mo e ‘Otuá tonu.’ ‘‘Oku ou loto ke hoko ko ha tokotaha lelei, husepāniti pe uaifi lelei ange.’ Pea fili leva ‘a e konga ‘i he Tohi Tapú te ne tokoni‘i koe ke a‘usia ‘a e ngaahi taumu‘a ko iá. *

Ko e fokotu‘u ‘e nima ko ení ‘e tokoni‘i ai koe ke ke kamata lau ‘a e Tohi Tapú. Ka ‘i he founga fē ‘e lava ke ‘ai ai ho‘o lau Tohi Tapú ke fakamānako angé? Ko e kupu hoko maí ‘oku toe ‘omai ai ha ngaahi founga.