FAKAKAUKAU KI HE ME‘Á NI: ‘Okú ke ‘eve‘eva ki ha misiume ‘oku fonu ai ‘a e ngaahi me‘a fakahisitōlia ‘o e kuonga mu‘á. Ko e lahi taha aí kuo tamele, mole hono lanú, pea mato‘o hono konga. Ko e ni‘ihi kuo puli atu hono konga lahi. Neongo ia, ‘oku ‘i ai ha me‘a ‘e taha ‘oku fakaofo ‘ene kei kakató, kei hā lelei ‘aupito hono fōtunga fihí. “‘Oku fo‘ou ange ‘a e me‘á ni ia ‘i he ngaahi me‘a kehé?” Ko ho‘o ‘eke ange ia ki he tokotaha taki mamatá. ‘Okú ne tali atu: “‘Ikai, ‘oku motu‘a ange ia ‘i he ngaahi me‘a lahi tahá, pea kuo ‘ikai ‘aupito ke fai hano fakafo‘ou.” ‘Okú ke ‘eke ange: “Na‘e tauhi fakalelei?” ‘Oku tali mai ‘e he tokotaha taki mamatá: “‘Ikai, kuo fehangahangai ‘a e me‘á ni mo e matangi mo e ‘uha kovi tahá. Pea na‘e feinga ‘a e kau faka‘auha tavale tokolahi ke maumau‘i ia.” Mahalo te ke fifili mo ofoofo, ‘‘Oku ngaohi eni mei he hā?’

‘I ha founga, ‘oku hangē ‘a e Tohi Tapú ko e me‘a fakahisitōlia fakaofo ko iá. Ko ha tohi motu‘a ‘aupito ia​—motu‘a ange ia ‘i he ‘ū tohi lahi tahá. Ko hono mo‘oní, ‘oku ‘i ai ha ngaahi tohi motu‘a kehe. Ka ‘i he hangē ko e ngaahi me‘a fakahisitōlia motu‘a kuo mato‘o atu hono kongá, ko e konga lahi taha ‘o e ngaahi tohi motu‘á kuo maumau lahi ‘i he faai mai ‘a e taimí. Ko e fakatātaá, ko ‘enau ngaahi fakamatala ‘i he saienisí kuo fepaki ia mo e ‘ilo fo‘oú, ‘oku fakamo‘oni ki ai ‘a e ngaahi mo‘oni‘i me‘a. Ko ‘enau fale‘i fakafaito‘ó ‘oku fa‘a hā ngali lahi ange ‘ene fakatu‘utāmakí ‘i he‘ene ‘aongá. Pea ko e ngaahi tohi motu‘a lahi ko ha ngaahi konga pē ‘oku toe mei he ngaahi ‘uluaki tataú; kuo mole atu ha ngaahi konga ia pe mātu‘aki maumau.

Neongo ia, ko e Tohi Tapú ‘oku kei tu‘u ‘o makehe ia. Ko hono hikí na‘e kamata ia ‘o laka hake ‘i he senituli ‘e 35 kuo maliu atú, ka ‘oku kei kakato pē ‘a e Tohi Tapú. Pea neongo ne fai hono toutou ‘ohofi ‘i he laui senituli—​tutu, tapui, pea mo ta‘etoka‘i​—ko ‘ene ngaahi fakamatalá ‘oku kei kakato pē. ‘I he ‘ikai lava ke fakamo‘oni‘i kuo ‘osi hono taimí ‘i he ha‘u ha ‘ilo fo‘ou, ‘oku lea‘aki ‘e he Tohi Tapú ia ‘a e me‘a lahi ‘o hā mei ai ‘ene sio fakaofo ki he kaha‘ú.​—Sio ki he puha “‘Osi Hono Taimí pe Mu‘omu‘a ‘I Hono Taimí?”

Kae kehe, te ke fifili nai, ‘‘Oku mātu‘aki ‘aonga ‘a e ngaahi akonaki ‘a e Tohi Tapú ki hotau ‘ahó ni?’ Ke tali iá, ‘eke hifo kiate koe: ‘Ko e hā ‘a e ngaahi palopalema kovi taha ‘oku fehangahangai mo e fa‘ahinga ‘o e tangatá he ‘aho ní? Ko fē ai ‘oku fakalilifu tahá?’ Mahalo te ke fakakaukau ki he taú, ‘ulí, faihiá, pe ta‘efaitotonú. Sai, fakakaukau atu ki ha ngaahi tefito‘i mo‘oni ‘oku ako‘i mai ‘e he Tohi Tapú. ‘I ho‘o fai peheé, ‘eke hifo kiate koe, ‘Kapau na‘e mo‘ui‘aki ‘e he kakaí ‘a e ngaahi tefito‘i mo‘oni ko ení, ‘ikai ‘e hoko ‘a e māmaní ko ha feitu‘u lelei ange?’

‘OFA ‘I HE MELINÓ

“Fiefia ē ko kinautolu ‘oku fakamelinó, he ‘e ui kinautolu ko e ngaahi foha ‘o e ‘Otuá.” (Mātiu 5:9) “‘O ka ala lava, ‘o fakatatau ki he lahi taha ‘o ho‘omou malavá, mou nofo melino mo e tangata kotoa pē.”​—Loma 12:18.

MEESI, FAKAMOLEMOLE

“Fiefia ē ko e kau faimēsí, he ‘e faimeesi kiate kinautolu.” (Mātiu 5:7) “Hokohoko atu ‘a e fekātaki‘aki mo e fefakamolemole‘aki loto-lelei neongo ai pē ‘o kapau ‘oku ‘i ai ha taha ‘okú ne ma‘u ha ‘uhinga ke lāunga ai fekau‘aki mo ha taha. Hangē tofu pē ko ia ne fakamolemole‘i loto-lelei kimoutolu ‘e Sihová, * kuo pau foki ke mou fai ‘a e me‘a tatau.”​—Kolose 3:13.

FEONGOONGOI FAKAMATAKALI

Ko e ‘Otuá na‘á ne “ngaohi mei he tangata pē taha ‘a e pule‘anga kotoa pē ‘o e tangatá ke nau nofo ‘i he funga kotoa ‘o e māmaní.” (Ngāue 17:26) “‘Oku ‘ikai ke filifilimānako ‘a e ‘Otuá, ka ‘i he pule‘anga kotoa pē, ko e tangata ko ia ‘oku manavahē kiate ia mo fai ‘a e me‘a ‘oku totonú, ‘okú ne tali ia.”​—Ngāue 10:34, 35.

TOKA‘I ‘A E MĀMANÍ

“Na‘e ‘ave ‘e Sihova ko e ‘Otuá ‘a e tangatá ‘o ne tuku ia ‘i he ngoue ‘o ‘Ītení ke ne ngoue‘i ia pea mo tokanga‘i ia.” (Sēnesi 2:15) ‘E hanga ‘e he ‘Otuá ‘o “faka‘auha ‘a e fa‘ahinga ‘oku nau faka‘auha ‘a e māmaní.”​—Fakahā 11:18.

FEHI‘A ‘I HE MĀNUMANÚ MO E ‘ULUNGAANGA TA‘ETĀÚ

“Le‘ohi kimoutolu telia ‘a e fa‘ahinga kotoa pē ‘o e mānumanú, koe‘uhi na‘a mo hono ma‘u ‘e ha taha ha me‘a lahi, ‘oku ‘ikai fakatu‘unga ‘ene mo‘uí ‘i he ngaahi me‘a ‘okú ne ma‘ú.” (Luke 12:15) “Ko e fehokotaki fakasino ta‘etāú mo e fa‘ahinga kotoa pē ‘o e ta‘ema‘á pe mānumanú, tuku ke ‘oua na‘a fai ha talanoa ki ai ‘i homou lotolotongá, ‘o hangē tofu pē ko ia ‘oku totonu ki he kakai mā‘oni‘oní.”​—‘Efesō 5:3.

FAITOTONU, NGĀUE MĀLOHI

“Ko ‘emau faka‘amú ia ke mau faitotonu ‘i he me‘a kotoa pē.” (Hepelū 13:18) “Tuku ki he tokotaha ‘oku kaiha‘á ke ‘oua te ne toe kaiha‘a; ‘i hono kehé, tuku ke ne ngāue mālohi.”​—‘Efesō 4:28.

KO E MAHU‘INGA ‘O E TOKONI KI HE FA‘AHINGA ‘OKU FIEMA‘U TOKONÍ

“Lea fakanonga ki he fa‘ahinga ‘oku loto-mafasiá, poupou ki he kau vaivaí, mou kātaki ‘i he feangainga mo e tokotaha kotoa.” (1 Tesalonaika 5:14) “Tokanga‘i ‘a e kau paeá mo e kau uitoú ‘i he‘enau faingata‘a‘iá.”​—Sēmisi 1:27.

‘Oku ‘ikai ke fakahokohoko mai pē ‘e he Tohi Tapú ‘a e ngaahi tefito‘i mo‘oni ko ení. ‘I ha ngaahi founga ‘aonga, ‘okú ne ako‘i kitautolu ke tau fakamahu‘inga‘i ‘a e ngaahi tefito‘i mo‘oni peheé pea ngāue‘aki ia ‘i he‘etau mo‘ui faka‘ahó. Kapau na‘e ngāue‘aki ‘e ha kakai tokolahi ange ‘a e ngaahi akonaki kuo mau fakahokohoko atú, ‘ikai ne mei si‘i ‘aupito ai ‘a e ngaahi palopalema kovi taha ‘a e fa‘ahinga ‘o e tangatá? Ko ia ai, ko e ngaahi tefito‘i mo‘oni ‘i he Tohi Tapú ‘oku kei ‘aonga mo taimi tonu ange ia ‘i ha toe taimi ki mu‘a! Ko e hā leva ‘oku lava ke fai ma‘au he taimí ni ‘e he ngaahi akonaki ‘a e Tohi Tapú?

Na‘e pehē ‘e he tangata poto tahá: “‘Oku fakatonuhia‘i ‘a poto ‘i hono ngaahi olá.” (Mātiu 11:19, fakamatala ‘i lalo) ‘Ikai ‘okú ke tui ki ai? Ko hono tesi‘i mo‘oni ‘o e potó ko e anga ‘ene ngāue ‘i he taimi ‘okú ke ngāue‘aki ai iá. Ko ia te ke faka‘uhinga nai, ‘Kapau ‘oku ‘aonga mo‘oni ‘a e Tohi Tapú, ‘ikai ‘oku totonu ke ne fakatupu ha ngaahi ola ‘i he‘eku mo‘uí? ‘Oku anga-fēfē ‘ene ‘aonga ki he ngaahi palopalema ‘oku ou fehangahangai mo ia he taimi ní?’ Fakakaukau atu ki ha fakatātā.

Kia Delphine, * na‘e femo‘uekina ‘a e mo‘uí, kakato, mo fakafiemālie. Kae fakafokifā, na‘á ne tofanga ‘i ha mole fakamamahi hokohoko. Na‘e mate ‘ene ta‘ahine ta‘u hongofulu tupu. Na‘e movete ‘ene nofo malí. Na‘á ne hoko ‘o faingata‘a‘ia fakapa‘anga. ‘Okú ne manatu‘i: “Na‘e ‘ikai ha‘aku toe manatu pe ko hai koā au​—kuo ‘ikai ha‘aku ta‘ahine, ‘ikai ha husepāniti, ‘ikai ha ‘api. Na‘á ku ongo‘i ko e koto noa pē au​—kuo ‘ikai haku mahu‘inga, ‘ikai ha mālohi, ‘ikai ha fakakaukau ki he kaha‘ú.”

Na‘e te‘eki ai ‘aupito mātā ‘e Delphine ki mu‘a ‘a e mātu‘aki mo‘oni ‘a e ngaahi leá ni: “Ko e lōloa ‘o ‘emau mo‘uí ko e ta‘u ‘e 70, pe 80 kapau ‘okú te mātu‘aki mālohi. Ka ‘oku fonu ia ‘i he faingata‘a mo e mamahi; ‘oku puli vave ia, pea ‘oku mau puna atu.”​—Saame 90:10.

Na‘e hanga ‘a Delphine ki he Tohi Tapú ‘i he taimi ‘o ‘ene faingata‘a‘iá. ‘Oku fakaofo ‘a e me‘a na‘e fai ma‘ana ‘e he Tohi Tapú. Hangē ko ia ‘e hā atu ‘i he kupu  ‘e tolu hono hokó, kuo toe ‘i ai mo e tokolahi kehe kuo nau ‘ilo kuo fai ‘e he Tohi Tapú ‘a e ngaahi me‘a fakaofo ma‘anautolu ‘i he‘enau ngāue‘aki ‘a ‘ene akonakí ki he‘enau palopalema ‘i he mo‘uí. Kuo nau ongo‘i ‘oku hangē ‘a e Tohi Tapú ko e me‘a fakahisitōlia ko ia na‘e fakamatala ki ai ‘i he kamata‘angá. ‘Oku ‘ikai ke hangē ia ko e ngaahi tohi ta‘efa‘alaua kehe kuo hoko ‘o motu‘a mo ‘osi hono taimí. Ko e ‘uhingá nai ko e Tohi Tapú ‘oku ngaohi‘aki ia ha me‘a kehe? Ko e ‘i ai ‘a e ngaahi fakakaukau ‘a e ‘Otuá​—kae ‘ikai ko ha ngaahi fakakaukau pē ‘a e tangatá?​—1 Tesalonaika 2:13

Mahalo pē ‘okú ke kau mo koe ‘i hono ‘ilo ko e mo‘uí ‘oku nounou mo fonu ‘i he palopalema. ‘I he taimi ‘oku tu‘u fakamanamana mai ai ‘a e ngaahi palopalemá ke ne lōmekina koé, ko fē ‘okú ke hanga ki ai ki ha fakafiemālie, poupou, mo ha fale‘i alafalala‘angá?

Tau lāulea ki ha founga tefito ‘e tolu ‘a ia ‘oku lava ke fakamo‘oni‘i ai ‘a e ‘aonga ‘a e Tohi Tapú ki ho‘o mo‘uí. ‘E lava ke ne ako‘i koe ki he founga ke

1. faka‘ehi‘ehi ai mei he palopalemá ‘o ka ala lava.

2. fakalelei‘i ai ‘a e ngaahi faingata‘á ‘i he‘enau malanga haké.

3. fekuki lavame‘a ai mo e ngaahi tu‘unga he‘ikai lava ke ke liliu.

Ko e ngaahi kupu hokó ‘e lāulea ki he ngaahi tafa‘aki ‘e tolu ko ení.