‘Oku pehē ‘e Rose: “‘Oku ou ma‘u ha palopalema fakakēnisi ‘okú ne fakatupunga ai ke u ma‘u ha langa lahi mo tu‘uma‘u. Kuo tō lalo ‘a e tu‘unga ‘eku mo‘uí.” Ko e taha ‘o ‘ene ngaahi loto-hoha‘a lahi tahá ko e ngaahi taimi na‘e ‘ikai malava ke tokangataha ai hono ‘atamaí ki he‘ene ako ‘a e Tohi Tapú mo e ngaahi me‘a fakalaumālié. Ka na‘e tokoni‘i lahi ia ‘e he ngaahi lea ‘a Sīsū ‘oku lēkooti ‘i he Mātiu 19:6: “Ki he ‘Otuá ‘oku malava ‘a e me‘a kotoa pē.” Na‘e ‘ilo‘i ‘e Rose ‘oku toe ‘i ai ‘a e founga ke ako ai. Koe‘uhi na‘e ‘ai ia ‘e he‘ene langá ke meimei ‘ikai malava ke ne lautohi ‘i ha ngaahi taimi, na‘á ne kamata fanongo ki he ngaahi hiki-le‘o ‘o e Tohi Tapú mo e ‘ū tohi Fakatohitapú. * “Ka ne ‘ikai ‘a e ngaahi foungá ni,” ko ‘ene laú ia, “‘Oku ‘ikai te u ‘ilo pe na‘e mei fēfē ha‘aku tauhi ma‘u hoku tu‘unga fakalaumālié.”

‘I he loto-mamahi ‘a Rose ‘i he ‘ikai malava ke ne fai ‘a e me‘a na‘á ne malava ki mu‘á, ‘okú ne ma‘u ‘a e fakafiemālie ‘i he ngaahi lea ‘oku lēkooti ‘i he 2 Kolinitō 8:12: “Kapau ‘oku ‘uluaki ‘i ai ‘a e loto-vēkeveké, ‘oku tautefito ‘ene fakahōifuá ‘i hono fai ‘o fakatatau ki he me‘a ‘oku ma‘u ‘e ha taha, ‘o ‘ikai fakatatau ki he me‘a ‘oku ‘ikai ma‘u ‘e ha taha.” ‘Oku fakamanatu ‘e he ngaahi lea ko iá kia Rose ‘oku hōifua ‘a e ‘Otuá ‘i he me‘a ‘okú ne faí, koe‘uhi ‘okú ne fai ‘a e kotoa ‘okú ne malavá ‘o fakatatau ki hono ngaahi ngata‘angá.

Ko Delphine, na‘e lave ki ai ki mu‘á, ‘okú ne pehē: “‘I he hili ‘a e mate ‘eku ta‘ahine ta‘u 18, na‘e lahi fau hoku mamahí ‘o ‘ikai ke u tui ‘e lava ke u kei mo‘ui atu. Na‘e hala‘atā ha me‘a ‘e tatau mo ia.” Neongo ia, na‘á ne ma‘u ‘a e fiemālie lahi ‘i he ngaahi lea ‘o e Saame 94:19, ‘a ia na‘e pehē ai ‘e he tokotaha-tohi-sāmé ki he ‘Otuá: “‘I hono lōmekina au ‘e he ngaahi loto-mo‘uá, na‘á ke fakafiemālie‘i mo fakanonga au.” ‘Okú ne pehē, “Na‘á ku lotu kia Sihova ke ne tokoni‘i au ke u ‘ilo ‘a e me‘a ke u fai ke nonga ai hoku mamahí.”

Na‘á ne ‘ai ia ke ne femo‘uekina ‘i ha ngāue pole mohu ‘uhinga. ‘I he faai mai ‘a e taimí, na‘á ne kamata fakahoa ia ki ha fo‘i kala ‘a ha ki‘i leka​—na‘a mo e ngaahi fo‘i kala kuo motumotú ‘oku kei ‘aonga pē ki he tā valivalí. ‘I he founga meimei tatau, neongo ‘ene ongo‘i hangē ha fo‘i kala ‘oku motú, na‘á ne ‘ilo ‘oku kei lava pē ke ne tokoni‘i ‘a e ni‘ihi kehé. ‘Okú ne manatu‘i: “Fakafokifā pē na‘á ku ‘ilo ko e taimi pē na‘á ku ngāue‘aki ai ‘a e ngaahi tefito‘i mo‘oni Fakatohitapú mo e ngaahi founga fakakaukau Fakatohitapú ke fakafiemālie‘i‘aki ‘eku kau akó, ko e founga ia na‘e ngāue‘aki ‘e Sihova ke ne fakanonga mo fakafiemālie‘i aú.” Na‘á ne ‘ai ha lisi ‘o e fa‘ahinga ‘i he Tohi Tapú na‘a nau foua ‘a e vaha‘a taimi ‘o e mamahi lahí. “Ko e mo‘oni,” na‘á ne ‘ilo‘i, “ko e kakai kotoa ia na‘a nau lotu.” Na‘á ne toe ‘ilo “he‘ikai ‘aupito te ke ma‘u ha tali kapau ‘oku ‘ikai te ke lau ‘a e Tohi Tapú.”

Ko hono ako ‘a e Tohi Tapú kuó ne ako‘i kia Delphine ha toe me‘a kehe​—ke tokangataha ki he kaha‘ú, ‘ikai ki he kuohilí. Ko e ‘amanaki ‘oku lave ki ai ‘a e Ngāue 24:15 ‘okú ne fakafiemālie‘i ia: “‘E ‘i ai ‘a e toetu‘u fakatou‘osi ‘a e mā‘oni‘oní mo e ta‘emā‘oni‘oní.” ‘Oku lahi fēfē ‘ene fakapapau‘i ‘e fokotu‘u hake ‘e Sihova ‘ene ta‘ahiné? Tuku ke tali mai ‘e Delphine: “‘Oku ou sio ki he‘eku ta‘ahiné ‘i he kaha‘ú. Ko homa ‘‘aho’ hokó kuo ‘osi fakataimitēpile‘i, ‘o hangē ia kuo ‘osi ‘i he tohimāhina ‘a ‘eku Tamaí. ‘Oku ou sio fakatou‘osi kiate kimaua ‘i he‘ema ngoué ‘o hangē pē ko ‘eku sio mo ‘ofa ‘iate ia ‘i he ‘aho na‘e fā‘ele‘i ai iá.”