KO HA ʻAMANAKI FAKAOFO Ē! Kuo talaʻofa ʻe hotau Tokotaha-Fakatupú ke tau moʻui taʻengata, ʻi heni ʻi he māmaní. Kae kehe, ʻoku faingataʻa ke tui ki ai ʻa e tokolahi. ʻOku nau pehē, ‘Ko e tokotaha kotoa pē te ne mate ʻi ha taimi. Ko e konga ia ʻo ha vilo takai fakanatula ʻo e moʻuí mo e maté.’ ʻOku tui ʻa e niʻihi ʻoku malava ʻa e moʻui taʻengatá, kae ʻikai ʻi heni ʻi he māmaní. ʻOku nau pehē ko e moʻui taʻengatá ʻoku toki maʻu pē ia ʻi he hili hoʻo maté peá ke ʻalu ki hēvaní. Ko e hā hoʻo fakakaukaú?

Ki muʻa ke fai hoʻo talí, fēfē ke ke fakakaukau ki he tali ʻa e Tohi Tapú ki he fehuʻi ʻe tolu ko ení: Ko e hā ʻoku fakahaaʻi ʻe he founga naʻe ngaohi ai ʻa e tangatá fekauʻaki mo e lōloa naʻe fakataumuʻa ke ne moʻui aí? Ko e hā ʻa e muʻaki taumuʻa ʻa e ʻOtuá ki he māmaní mo e faʻahinga ʻo e tangatá? Naʻe anga-fēfē ʻa e hoko mai ʻa e maté ki he fāmili fakaetangatá?

ʻI he kotoa ʻo e moʻui kuo fakatupu ʻe he ʻOtuá ʻi he māmaní, ʻoku makehe moʻoni ʻa e faʻahinga ʻo e tangatá. Anga-fēfē? ʻOku fakahaaʻi ʻe he Tohi Tapú ko e tangatá pē naʻe fakatupu ʻi he ‘ʻīmisi’ mo e ‘tatau’ ʻo e ʻOtuá. (Sēnesi 1:26, 27) ʻOku ʻuhinga ia ki he hā? ʻOku ʻuhinga iá naʻe ʻoange ki he faʻahinga ʻo e tangatá ʻa e ngaahi anga mo e ʻulungaanga naʻe tapua mai ai ʻa e ʻOtuá tonu, hangē ko e ʻofá mo e ongoʻi ʻo e fakamaau totonú.

ʻIkai ko ia pē, naʻe ʻoange ki he faʻahinga ʻo e tangatá ʻa e malava ke fakakaukau mo fakaʻuhinga, mo e malava fakaeʻulungaanga mo fakalaumālie. Ko e ʻuhinga ia ʻoku malava ai ke tau mahinoʻi ʻa e māʻongoʻonga ʻo e ʻuniveesí mo e fakaofo ʻo natulá, hangē ko e ʻātí, mūsiká mo e faʻu māú. Hiliō ai, ʻoku maʻu ʻe he faʻahinga ʻo e tangatá ʻa e malava makehe ke lotu ki he Tokotaha-Fakatupú. Ko e ngaahi malava peheé ʻokú ne ʻai ʻa e faʻahinga ʻo e tangatá ke kehe ʻaupito mei ha meʻamoʻui pē ʻi he māmaní.

Ko ia, fakakaukau angé: ʻE ʻoange ʻe he ʻOtuá ki he faʻahinga ʻo e tangatá ha ʻulungaanga fakaofo pehē mo e malava taʻefakangatangata ke fakatupulekina ʻa e ngaahi anga ko iá, kapau naʻá ne ʻuhinga pē ke tau moʻui ʻi ha ngaahi taʻu siʻi? Ko hono moʻoní naʻe ʻoange ʻe he ʻOtuá ki he faʻahinga ʻo e tangatá ʻa e ngaahi ʻulungaanga mo e malava makehe ko ení ke tau lava ʻo fiefia ʻi he moʻuí ʻi heni ʻi he māmaní ʻo taʻengata.

Kae kehe, ʻoku pehē ʻe he niʻihi naʻe ʻikai ʻaupito ʻuhinga ʻa e ʻOtuá ia ke moʻui taʻengata ʻa e tangatá ʻi he māmaní. ʻOku nau taukaveʻi naʻe faʻu ʻa e māmaní ia ko ha ʻapi fakataimi pē, ko ha siviʻanga ke sio ko fē ʻi he ngaahi mēmipa ʻi he fāmili fakaetangatá ʻoku taau ke ne ʻalu ki hēvani ʻo moʻui taʻengata ai fakataha mo e ʻOtuá. Kapau naʻe moʻoni eni, ʻikai ʻe tukuakiʻi ki he ʻOtuá ʻa e kovi mo e fulikivanu kotoa pē ʻoku fonu ʻi he māmaní? ʻE fepaki ʻaupito ia mo e natula moʻoni ʻo e ʻOtuá. ʻOku pehē ʻe he Tohi Tapú fekauʻaki mo ia: “He ko e fakamaau totonu ʻa ʻene founga fulipē. Ko ha ʻOtua faitōnunga  ʻoku ʻikai ʻaupito taʻefaitotonu; ko iá ʻoku māʻoniʻoni mo anga-tonu.”​—Teutalōnome 32:4.

ʻOku fakahaaʻi mahino ʻe he Tohi Tapú ʻa e muʻaki taumuʻa ʻa e ʻOtuá ki he māmaní ʻi he ngaahi leá ni: “Ko e langí, ʻoku ʻa Sihova ia, ka ko e māmaní kuó ne foaki ia ki he ngaahi foha ʻo e tangatá.” (Saame 115:16) ʻIo, naʻe fakatupu ʻe he ʻOtuá ʻa e māmaní ke hoko ko ha ʻapi fakaʻofoʻofa mo tuʻuloa ki he faʻahinga ʻo e tangatá, pea naʻá ne fakafonu ia ʻaki ʻa e meʻa kotoa pē ʻoku fiemaʻu ke tau fiefia ai ʻi ha moʻui mohu ʻuhinga mo taʻengata.​—Sēnesi 2:8, 9.

“Ko e langí, ʻoku ʻa Sihova ia, ka ko e māmaní kuó ne foaki ia ki he ngaahi foha ʻo e tangatá.”​—Saame 115:16

ʻOku toe fakahaaʻi mahino ʻe he Tohi Tapú ʻa e taumuʻa ʻa e ʻOtuá ki he faʻahinga ʻo e tangatá. Naʻá ne fekauʻi ʻa e ʻuluaki ongo meʻa fakaetangatá ke na “fakafonu ʻa e māmaní pea mo pule ki ai, pea pule ki he . . . meʻamoʻui kotoa pē ʻoku ngaue ʻi he funga ʻo māmaní.” (Sēnesi 1:28) Ko ha monū lahi ē kiate kinaua ke na tokangaʻi mo fakalahi atu hona ʻapi Palataisi ko e māmaní! Ko e moʻoni, ko e ʻamanaki naʻe fakatatali kia ʻĀtama mo ʻIvi mo ʻena fānau te na maʻú ko e moʻui taʻengata ʻi he māmaní, ʻikai ko ha pale ʻi hēvani.

Ko e hā leva ʻoku tau mate aí? ʻOku fakahaaʻi ʻe he Tohi Tapú ko e taha ʻi he ngaahi meʻamoʻui laumālie ʻa e ʻOtuá, naʻe fakapapauʻi ki mui ko e tokotaha angatuʻu ko Sētane ko e Tēvoló, naʻá ne feinga ke maumauʻi ʻa e ngaahi fokotuʻutuʻu ʻa e ʻOtuá ʻi ʻĪtení. Anga-fēfē?

Naʻe fakataueleʻi ʻe Sētane ʻetau ʻuluaki ongo mātuʻá, ʻa ʻĀtama mo ʻIvi, ke na kau fakataha mo ia ʻi he angatuʻu ki he ʻOtuá. ʻI hono taukaveʻi ʻe Sētane naʻe taʻofi ʻe he ʻOtuá ha meʻa lelei meiate kinauá​—ʻa e totonu ke na fakapapauʻi maʻanaua ʻa e meʻa ʻoku tonú mo e meʻa ʻoku halá​—naʻá na kau ai mo Sētane ʻo sītuʻa mei he ʻOtuá. Ko e hā ʻa e olá? ʻI he faai atu ʻa e taimí, naʻá na mate, ʻo hangē tofu pē ko ia naʻe fakatokanga ki ai ʻa e ʻOtuá. Naʻe mole ai meiate kinaua ʻa e ʻamanaki ko e moʻui taʻengata ʻi he Palataisi ʻi he māmaní.​—Sēnesi 2:17; 3:1-6; 5:5.

Kuo uesia ʻe he angatuʻu ʻa ʻĀtama mo ʻIví ʻa e kotoa ʻo e faʻahinga ʻo e tangatá ʻo aʻu mai ki hotau ʻahó ni. ʻOku pehē ʻe he Folofola ʻa e ʻOtuá: “Ko e fou mai ʻi he tangata ʻe toko taha [ko ʻĀtama] ʻa e hoko mai ʻa e angahalá ki he māmaní pea mo e maté fakafou ʻi he angahalá, pea ʻoku pehē ʻa e mafola ʻa e maté ki he kakai kotoa pē.” (Loma 5:12) ʻOku tau mate koeʻuhi kuo tau maʻu tukufakaholo ʻa e angahalá mo e maté mei heʻetau ʻuluaki ongo mātuʻá, ʻikai koeʻuhi ko ha ‘palani’ taʻealamakupusi mo toka tuʻutuʻuni ʻe he ʻOtuá.

Naʻe ʻikai taʻofi ʻe he angatuʻu ʻi ʻĪtení ʻa e muʻaki taumuʻa ʻa e ʻOtuá ki he faʻahinga ʻo e tangatá mo e māmaní. Ko e ʻofa haohaoa ʻa e ʻOtuá mo ʻene ongoʻi ʻa e fakamaau totonú naʻá ne ueʻi ia ke ne tokonaki ha founga ke fakatauʻatāinaʻi ai kitautolu mei he pōpula ki he angahalá mo e mate tukufakaholó. Naʻe fakamatalaʻi ʻe he ʻapositolo ko Paulá: “Ko e totongi ki he angahalá ko e mate, ka ko e meʻaʻofa ʻoku foaki ʻe he ʻOtuá ko e moʻui taʻengata ʻia Kalaisi Sīsū ko hotau ʻEikí.” (Loma 6:23) Naʻe ʻofa ʻa e ʻOtuá ʻo ne “foaki ai hono ʻAlo tofu-pē-taha-ne-fakatupú [ʻa Sīsū Kalaisi], koeʻuhi ko e tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.” (Sione 3:16) ʻI hono foaki loto-lelei ʻo ia tonu ko ha feilaulau huhuʻí, naʻe huhuʻi ai ʻe Sīsū ʻa e meʻa kotoa naʻe mole fakafou ʻia ʻĀtamá. a

Kuo vavé ni ke hoko mai ʻa e talaʻofa ʻa e ʻOtuá ki ha palataisi ʻi he māmaní. ʻE lava ke ke maʻu ʻa e kahaʻu fakaofó ni kapau te ke tukulotoʻi ʻa e enginaki ʻa Sīsuú: “Hū ʻi he matapā fāsiʻí, koeʻuhí ʻoku fālahi ʻa e matapā mo ʻatā ʻa e hala ʻoku taki atu ki he ʻauhá, pea ʻoku hū atu ai ʻa e tokolahi; ka ʻoku fāsiʻi ʻa e matapā pea ʻefiʻefi ʻa e hala ʻoku taki atu ki he moʻuí, pea ko e tokosiʻi pē ʻoku nau ʻiloʻi iá.” (Mātiu 7:13, 14) ʻIo, ko ho kahaʻú ʻoku ʻi ho ʻaofinimá pē. Ko e hā te ke faí?