ʻOku lolotonga malangaʻi ʻa e ongoongo lelei ʻo e Puleʻanga ʻo e ʻOtuá ʻi he kotoa ʻo e māmaní, ʻo hangē tofu pē ko ia naʻe kikiteʻi ʻe Sīsuú. (Mātiu 24:14) ʻOku tala mai ʻe he tohi ʻa Tanielá ʻi he Tohi Tapú ko e Puleʻanga ko ení ko ha founga-pule ia ʻa e ʻOtuá. ʻOku ʻi he vahe 2 ʻo e tohi ko iá ha kikite ʻokú ne fakatotoloʻi ʻa e tukuʻau mai ʻa e ngaahi founga-pule pe ngaahi puleʻanga fakaetangatá talu mei Pāpilone ʻo e kuonga muʻá ʻo aʻu mai ki hotau ʻahó ni. ʻI hono tomuʻa tala ʻo e meʻa ʻoku toka mei muʻá, ʻoku pehē ʻe he veesi 44:

“ʻE fokotuʻu ʻe he ʻOtua ʻo langí ha puleʻanga ʻa ia ʻe ʻikai ʻaupito ke fakaʻauha. Pea ko e puleʻangá ni ʻe ʻikai tuku ia ki ha toe kakai kehe. Te ne laiki mo fakaʻauha ʻa e ngaahi puleʻanga kotoa ko ení, pea ʻe tuʻu toko taha pē ia ʻo taʻengata.”

ʻOku tomuʻa tala ʻe he kikité ni mo e ngaahi kikite kehe ʻi he Tohi Tapú ʻe fetongi ʻe he Puleʻanga ʻo e ʻOtuá ʻa e pule fakaetangata kotoa pē pea fakahoko mai ʻa e tuʻunga maʻumaʻuluta mo e maau ki he kakai ʻi he māmaní. ʻE fēfē ʻa e moʻuí ʻi he malumalu ʻo e Puleʻangá? Ko e ngaahi talaʻofa fisifisimuʻa eni ʻe niʻihi kuo vavé ni ke hoko moʻoni.

• ʻIKAI TOE ʻI AI HA TAU

  Saame 46:9: “[Ko e ʻOtuá] ʻokú ne fakangata ʻa e ngaahi taú ʻi he māmaní kotoa. ʻOkú ne fesiʻi ʻa e kaufaná peá ne tutuʻu ʻa e taó; ʻokú ne tutu ʻa e ngaahi saliote taú ʻaki ʻa e afi.”

  Sioloto atu ki he tuʻunga ne mei ʻi ai ʻa e māmaní kapau ko e kotoa ʻo e paʻanga mo e pōtoʻi ʻa ia kuo fakamoleki ʻi he taimí ni ki he faʻu naunau taú ne tafe kotoa ia ki he ngaahi tafaʻaki ʻe ʻaonga ki he kakaí kae ʻikai ko hono tāmateʻi kinautolu! Ko e talaʻofa ko iá ʻe hoko moʻoni ia ʻi he malumalu ʻo e Puleʻanga ʻo e ʻOtuá.

• ʻIKAI KE TOE ʻI AI HA PUKE

  ʻAisea 33:24: “ʻE ʻikai ha taha ʻoku nofo ai te ne pehē: ‘ʻOku ou puke.’”

  Fakakaukau atu ki ha māmani heʻikai tofanga ai ha taha ʻi ha mahaki mafu, kanisā, malēlia, pe ko ha toe mahaki kehe. ʻE mole atu mo e fiemaʻu ʻo ha ngaahi falemahaki mo ha ngaahi faitoʻo. Moʻui haohaoa​—ko e kahaʻu ia ki he kau nofo ʻi he māmaní.

• ʻIKAI TOE ʻI AI HA NOUNOU FAKAMEʻATOKONI

  Saame 72:16: “ʻE lahi fau ʻa e uité ʻi he māmaní; ʻe mahutafea ʻa e tumutumu ʻo e ngaahi moʻungá.”

  ʻE fakatupu ʻe he māmaní ha meʻakai feʻunga ki he tokotaha kotoa, pea ʻe maʻu ia ʻe he tokotaha kotoa. ʻE ʻikai ke toe ʻi ai ha fiekaia mo ha fasimanava.

• ʻIKAI KE TOE ʻI AI HA LANGA, MAMAHI MO E MATE

  Fakahā 21:4: “[Ko e ʻOtuá] te ne holoholo ʻa e loʻimata kotoa pē mei honau matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa. Kuo mole atu ʻa e ngaahi meʻa muʻá.”

   ʻE ʻuhinga iá ko e moʻui taʻengata haohaoa ʻi ha māmani palataisi! Ko e meʻa ia kuo talaʻofaʻaki mai ʻe hotau Tokotaha-Fakatupu ʻofá, ko Sihova ko e ʻOtuá.

Ko ha foʻi loi mālie pē ʻeni? Neongo ʻe loto-tatau ʻa e kakai tokolahi taha ko e moʻui ʻoku talaʻofaʻaki mo fakamatalaʻi ʻi he Tohi Tapú ʻoku fakamānako moʻoni, ʻi ha ʻuhinga kehekehe, ʻe faingataʻa nai ke mahinoʻi ʻe he tokolahi ʻa e foʻi fakakaukau ko e moʻui taʻengatá. ʻOku ʻikai fakaʻohovale ia, he kuo teʻeki hokosia ʻe ha tangata ha moʻui pehē ke ne tala mai kiate kitautolu.

Kuo pōpula ʻa e faʻahinga ʻo e tangatá ki he angahalá mo e maté mo ongosia ʻi he kavenga ko e langa, faingataʻaʻia, mo mamahi he fuʻu taimi fuoloa ʻo tali ai ʻe he kakai tokolahi ʻa e founga moʻui ko ení ko ha meʻa anga-maheni pe fakanatula pē ia. Ka ʻoku kehe ʻaupito ia mei he meʻa naʻe fakataumuʻa ki he faʻahinga ʻo e tangatá ʻe hotau Tokotaha-Fakatupú, ʻe Sihova ko e ʻOtuá.

Ke tokoniʻi kitautolu ke tau mahinoʻi ʻa e papau ʻa e kotoa ʻo e meʻa kuó ne talaʻofaʻaki maí, naʻe mātuʻaki pehē ʻe he ʻOtuá fekauʻaki mo ʻene folofolá: “ʻE ʻikai foki mai ia kiate au taʻeʻiai hano ola, ka te ne fakahoko moʻoni ha meʻa pē ʻoku ou hōhōʻia ai, pea ʻe lavameʻa moʻoni ʻi ha meʻa ʻoku ou fekauʻi atu ia ke faí.”​—ʻAisea 55:11.

ʻOku fakamatalaʻi ʻa Sihova ʻi he Tohi Tapú ko e ʻOtua ‘ʻoku ʻikai lava ke loi.’ (Taitusi 1:2) Koeʻuhi kuó ne talaʻofa ʻaki ʻa e kotoa ʻo e ngaahi meʻa fisifisimuʻa ko ení ki he kahaʻú, ʻe fakapotopoto ke tau fakakaukau: ʻE malava moʻoni ki he faʻahinga ʻo e tangatá ke moʻui taʻengata ʻi he Palataisi fakaemāmani kuo talaʻofaʻaki maí? Ko e hā kuo pau ke tau fai ke tau maʻu ʻaonga ai mei he talaʻofa ʻa e ʻOtuá? ʻI he ngaahi peesi hoko mai ʻo e makasini ko ení, te ke maʻu ai ha fakamatala ʻaonga te ne tali ʻa e ongo fehuʻí ni.